Shoka Ombiimbeli tayi ti kombinga yompumbwe yomeya ga yela muuyuni awuhe
Atuheni otwa pumbwa omeya ga yela, opo tu kale tu na omwenyo. Amushangandjayi gwIigwana ya Hangana, António Guterres, okwa ti: “Aantu onkee ngaa taya tsikile okupula ya pewe omeya ga yela, shoka tashi ulike kutya otu na uupyakadhi wa kwata miiti womeya muuyuni.” Aantu omabiliyona muuyuni ihaya vulu okumona omeya ngoka ge shi okunuwa.
Strdel/AFP via Getty Images
Mbela opu na ngaa esiku napu ka kale omeya ga gwanena aantu ayehe? Nenge uupyakadhi mbuka opo owala tawu kala sigo aluhe? Ombiimbeli otayi ti ngiini?
Shoka Ombiimbeli ya uvaneka kombinga yomeya
Ombiimbeli oya ti kutya ompumbwe yomeya otayi ka hulithwa po masiku. Otaku ka kala omeya ogendji ga yela, ngoka ga gwana okunuwa.
“Omeya otaga ka tsipuka mombuga, nomontale otamu ka tondoka omilonga. Ehekevi lya pupyala otali ka pola, nomalondo otaga ka ninga omadhiya goothithiya.” — Jesaja 35:6, 7.
Omolwashike tatu vulu okwiinekela euvaneko ndyoka? Tala shoka Ombiimbeli tayi ti kombinga yomukalo gumwe moka opulanete yetu ya shitwa.
Shoka Ombiimbeli tayi ti kombinga yevi nosho wo yedhingoloko lyomeya
Otayi ti: “[Kalunga evi] ine li shita li mbugale, ihe ehala lyokukala aantu.” — Jesaja 45:18.
Kalunga okwa shita evi momukalo moka tali vulu oku tu kwathela tu kale nomwenyo, sho a shitile ko oonzo ndhoka hadhi vulu okuza omeya ogendji noga yela.
Ombiimbeli otayi ti: “Kalunga oye ta gongele omata gomeya ngoka taga ningi omvula moonzigi. Iikogo otayi pooka omeya, niihomo otayi ya kaantu ayehe.” — Job 36:27, 28.
Oku shi popya paunathangwa, oovelise ndhika otadhi ulike omukalo moka Kalunga a tula po edhingoloko lyomeya, ndyoka li li paunshitwe noli shi okwiinekelwa. Etango ohali pupyaleke omeya gomefuta nogokevi, e taga ningi omuku ngoka hagu ka ninga iikogo, opo nduno omvula tayi tameke okuloka. Kungawo, aantu niinamwenyo ohaya mono omeya ga yela. — Omuuvithi 1:7; Amos 5:8.
Ombiimbeli otayi ti: “Otandi mu lokithile omvula pethimbo lyo opala, opo evi li menithe iilya nomiti dhi ime iiyimati.” — Levitikus 26:4.
Kalunga okwa li a uvanekela Aaisraeli yopethimbo lyonale kutya ota ka yambeka uunamapya wawo, moku ya lokithila aluhe omvula, opo ya mone iilikolomwa oyindji. Okwa li e shi kutya opo aantu ya kale ye na iikulya, oya pumbwa omvula ya gwana pethimbo lyo opala.
Shoka Kalunga a li a ningile Aaisraeli yopethimbo lyonale, masiku ote ke shi ningila wo evi alihe. (Jesaja 30:23) Manga twa tegelela ethimbo ndyoka li thike, miitopolwa oyindji muuyuni epumbo lyomeya onkee ngaa tali tsikile, nuupyakadhi mboka owa kwatela mo ompumbwe yomvula. Ombiimbeli oya popya ishewe shike kombinga yekandulopo lyuupyakadhi womeya, mboka wu li po kunena?
Nkene ompumbwe yomeya tayi ka kandulwa po
Ombiimbeli oya holola kutya okupitila mUukwaniilwa we, Kalunga ota ka kandula po omaupyakadhi ngoka ga guma opulanete yetu, mwa kwatelwa ompumbwe yomeya. (Mateus 6:9, 10) Uukwaniilwa waKalunga owo epangelo lyomegulu, ndyoka masiku tali ka pangela ombanda yevi ayihe. (Daniel 2:44; Ehololo 11:15) Shimwe ishewe, Uukwaniilwa waKalunga otawu ya okugwanitha po shoka omapangelo gopantu inaaga vula okuninga, ano okuhulitha po iinima mbyoka hayi etitha uupyakadhi womeya.
Uupyakadhi: Elunduluko lyonkalo yombepo ohali ningitha edhingoloko lyomeya kaali kale palandulathano. Shoka ohashi eta iilanduliko ya kwata miiti ngaashi oluteni nosho wo iikungulu iidhigu, mbyoka hayi etithwa komvula yepoola nenge komakuthikuthi omanene gomefuta.
Ekandulopo: Uukwaniilwa waKalunga otawu ka opalekulula ashihe shoka sha yonagulwa, niinima ayihe otayi ka kala yi li pomahala. Kalunga okwa uvaneka a ti: “Tala, ngashingeyi iinima ayihe otandi yi ningi iipe!” (Ehololo 21:5) Iilongo mbyoka ya kukuta omolwompumbwe yomeya, otayi ka kala yi na omeya ga gwana, shoka tashi ka ningitha onkalamwenyo yi kale ombwanawa nokuli nomomahala ngoka ihaaga vulu okukaliwa ngashingeyi. (Jesaja 41:17-20) Jesus Kristus, e li Omukwaniilwa gUukwaniilwa waKalunga, ota ka pangela wo oonkondo dhomeshito.
Sho Jesus a li kombanda yevi, okwa li a lotitha oshikungulu, naashoka osha li sha ulike oonkondo ndhoka a pewa kuKalunga. (Markus 4:39, 41) Sho Kristus ngoka e li Omukwaniilwa gUukwaniilwa waKalunga ta ka pangela, iiponga yopaunshitwe itayi ka holoka we. Aantu otaya kala ye na ombili noya gamenwa noitaya ka kala we ya tila iiponga yoludhi kehe.
Uupyakadhi: Molwaashoka aantu aanalwiho, ihaya dhiladhila kiilanduliko yoonkatu dhawo dhokunyateka omeya gomomilonga, momatale nogokohi yevi, shoka hashi ningitha kaapu kale omeya ga yela.
Ekandulopo: Kalunga ota ka opalekulula evi nota ka shuna omilonga, omatale, nomafuta konkalo ombwanawa. Evi otali ka ninga oparadisa. Ombiimbeli oya popi momukalo gwokatewo ya ti: “Ombuga nomalondo otaga ka nyanyukwa, ontale otayi ka tundulukwa nokutemuna oongala.” — Jesaja 35:1.
Mbela oshike tashi ka ningilwa mboka kaaye na ko nasha nomudhingoloko nonaantu ooyakwawo? Kalunga okwa uvaneka kutya ota ka ‘hanagula po mboka taa yonagula po evi!’ — Ehololo 11:18; Omayeletumbulo 2:21, 22.
Uupyakadhi: Aantu ihaya longitha nawa oonzo dhomeya, naashoka ohashi etitha ya hepeke omeya ogendji noonkondo.
Ekandulopo: Uukwaniilwa waKalunga otawu ka gwanitha po ehalo lyaKalunga “kombanda yevi.” (Mateus 6:9, 10) Uukwaniilwa waKalunga otawu ka pa aalelwa yawo elongo lya dhenga mbanda. Jesaja 11:9 otayi ti: “Evi otali ka udha okutseya Omuwa.”a Tu na elongo ndyoka lya dhenga mbanda nosho wo ohole yetu yomuule yokuhola Kalunga niishitwa ye ayihe, otatu ka sila oshimpwiyu opulanete yetu ombwanawa yevi noonzo dhayo dhopaunshitwe.
Opo wu ilonge oshindji kombinga yaashoka Uukwaniilwa waKalunga tawu ka ninga, tala oshitopolwa “What Will God’s Kingdom Accomplish?” (Uukwaniilwa waKalunga otawu ka gwanitha po shike?)
Lesha emboMbiimbeli lyaJesaja ontopolwa 35 wu mone nkene evi tali ka ningwa oparadisa.
Tala okavidio Kalunga okwa li a shiti evi nelalakano lyashike? wu ilonge oshindji kombinga yelalakano lyaKalunga li na ko nasha nevi nosho wo naantu.
a Jehova olyo edhina lyaKalunga. (Eksodus 15:3, OB-1954) Tala oshitopolwa “Jehova oye lye?”