Iita moUkraine oya gwanitha omumvo gumwe ngashingeyi — Ombiimbeli oye tu pa etegameno lini?

Iita moUkraine oya gwanitha omumvo gumwe mEtitano, mo 24 Febuluali 2023. Oolopota dhimwe odha ti kutya aakwiita 300 000 lwaampono yaUkraine naRusia, oya dhipagwa nenge ya ehamekwa. Okwa ndhindhilikwa wo kutya miita moka omwa sila aakwashigwana 30 000. Nonando ongawo, omwaalu aguhe kumwe otashi vulika gwa konda po mpono.

Shiyemateka, iita mbika onkee ngaa tayi tsikile, noitayi monika ya fa yi li pokuhula.

• Mo 19 Febuluali 2023, oradio yopaigwana yedhina National Public Radio, oya ti: “Ngashingeyi otashi ka ninga omumvo gumwe okuza sho aakwiita yaRusia ya ponokele Ukraine, ihe natango kapu na shoka tashi ulike kutya iita mbyoka otayi hulu masiku. Osha fa shi li ngeyi kutya pokati kiilongo mbyoka iyali, kapu na shoka shi wetike osho tashi ka sindana miita mbyoka nosho wo kutya itayi ka tsa kumwe yi kandule po uupyakadhi.”

Aantu oyendji ngashingeyi oya yemata noonkondo, omoluuwehame nokumona iihuna hoka kwa etithwa kiita mbika nosho wo komakuyunguto galwe, iinima mbyoka ya guma wo oyendji muuyuni mboka kaaye na ondjo. Ombiimbeli oya gandja etegameno lini? Mbela opu na ngaa esiku iita nayi ka hule po?

Iita mbyoka tayi ka hulitha po iita ayihe muuyuni

Ombiimbeli oya popya kombinga yiita mbyoka tayi ka hupitha aantu, ihe haku ya hanagula po. Iita mbyoka ohayi ithanwa Armagedon, noya popiwa kutya oyo “iita mesiku enene lyaKalunga Omunankondoadhihe.” (Ehololo 16:14, 16) Piita mbyoka, Kalunga ota ka hulitha po omapangelo agehe gopantu, ngoka ga etitha iita oyindji iinyanyalithi. Opo wu mone nkene iita yaArmagedon tayi ka etela aantu ombili yaaluhe, lesha iitopolwa tayi landula:

• “Oita yaArmagedon oshike?”

• “Armagedon oku li onkundana ombwanawa!”