Okupopila uuthemba wopalongelokalunga waapopi yomalaka goshivalelwamo

Mokati kaantu oyendjiyendji mboka oomvalele dhomoLatin Amerika, omu na oyendji mboka haya popi omalaka goshivalelwa mo nohaya landula omikalondjigilile dhawo. Mokati komihoko ndhono omwa kwatelwa aamwatate naamwameme mboka wo ya simaneka oohedhi dhawo. Opo ya kwathelwe pambepo, ehangano lyOonzapo dhaJehova ohali toloka nokwaandjaganeka iileshomwa momalaka ga konda pe 130 goomvalele dhomoLatin Amerika.a Ihe mboka ye li melongelokalunga lyOonzapo dhaJehova ohaya patanekwa nokuthiminikwa sho ihaya kutha ombinga momithigululwakalo ndhoka dhi li ompinge nOmbiimbeli. Omayambidhidho goye ohaga longithwa ngiini mokukwathela aamwatate miitopolwa mono?

Ya kwathelwa ya shune komagumbo

Aamwatate naamwameme moMeksiko, yomuhoko gwAahuichol, mboka haya kala moondundu moshitopolwalongo shaJalisco, oya li ya tindi okukutha ombinga miinima yopalongelokalunga mbyoka eiyuvo lyawo itali ya pitike ye shi ninge.b Oshinima shoka osha li sha geyitha yamwe momudhingoloko. Ongundu ya homata, oya ponokele aamwatate nosho wo mboka ya li pamwe nayo, mu 4 Desemba 2017. Ongundu ndjono oye ya tidha mo moshitopolwa, nokulongela uushadha omagumbo nomaliko gawo, noye ya ningile omatilitho kutya ngoka ta ka galuka, omwenyo ote gu ihulu.

Oonzapo dhaJehova ndhoka dhi li moondolopa dhopopepi, odha li dhe edhilile aamwatate naamwameme mboka noku ya sila oshimpwiyu. Ihe oshike sha li shi na okuningwa po opo ya shune komagumbo gawo? Omumwatate Agustín okwa ti: “Katwa li tu na iimaliwa ya gwana tu kwate hahende, nokatwa li tu shi kutya natu uke peni, opo tu mone ekwatho ngele tashi ya piinima yopaveta.”

Oshitayimbelewa shomoAmerika yoPokati osha li sha katuka nziya onkatu, oshoka aamwatate kaya li we taya longele Jehova ya manguluka. Tango, oshitayimbelewa osha pula aakwanepangelo yomoshitopolwa ya konakone oshinima shoka. Okuza mpono, oshitayimbelewa osha pewa eziminino kOkomitiye yAaunganeki yOlutuwiliki lwOonzapo dhaJehova shi longele kumwe nOshikondo shIikwaveta koombelewa dhetu oonene muuyuni, opo ya tule mo oshipotha pehala lyaamwatate naamwameme yomuhoko gwAahuichol. Oshipotha osho sha thiki kompangu ya shiga ko yuuyuuki yomoMeksiko, ndjoka oyo yi li ompangu yopombanda elela moshilongo.

Ongundu yooahende dha za miigwana yi ili noyi ili, oya longekidha uuyelele wa yela nawa kutya, ngaashi owala aantu yalwe ye na okusimaneka omithigululwakalo dhoomvalele dhomoshitopolwa, aakalimo moshitopolwa kehe nayo oye na wo okusimaneka nokugamena emanguluko lyakehe gumwe moshitopolwa shawo. Omuntu kehe oku na uuthemba we kutya nduno oha kala moshitopolwa shini.

Mo 8 Juli 2020, ompangu ya shiga ko oya ningi etokolo ndyoka tali popile Oonzapo dhaJehova. Oya gandja elombwelo kutya ayehe mboka ya tidhwa pomahala gawo naya galukile po. Omumwatate Agustín ngoka a tumbulwa metetekelo okwa popi nkene ye nosho wo yalwe ye uvite, a ti: “Otwa nyanyukwa notwa pandula shoka aamwatate ye tu ningila. Andola kaye tu kwathelele, ando inatu ninga po sha.”

‘Okwa ningile oshindji aantu aashona’

Aamwatate moEcuador, momukunda San Juan de Ilumán, gu li moshitopolwa hashi ithanwa Otavalo Valley, moka hamu zi aapopi yomalaka ogendji goshivalelwa mo nayo oya li taya patanekwa nokuthindilwa kongudhi. Konima sho ya mono omikanda adhihe ndhoka ya pumbwa, mo 2014, oya li ya tameke okutunga Oshinyanga shUukwaniilwa. Ihe omusita gumwe okwa li a unganeke ongundu yaantu ya homata ya konda pe 100, opo yi ye moshipala iilonga yokutunga. Okuza mpono aantu momudhingoloko oya li ya lombwele Oonzapo dhaJehova kutya inadhi gongala we.

Oshikondo shIikwaveta moshitayimbelewa shaEcuador nosho wo shokoombelewa dhetu oonene muuyuni oyi imanga kumwe, opo yi popile uuthemba waamwatate ya kale haya gongala ya manguluka. Aamwatate oya li ya tula mo oshipotha. Shino osha ningitha ongundu ndjoka ya unganekwa komusita yi hulithe po omatilitho ngoka ya li tayi ningile aamwatate. Egongalo olya tameke okugongala niilonga yokutunga oya pula komeho sigo Oshinyanga sha pu. Opo aakalelipo yetu yopaveta ya gamene uuthemba waamwatate monakuyiwa, oya pula oompangu dhopombanda epulo lya simanenena ya ti: Ano aapopi yomakala goshivalelwa mo, yo kaaye na okusimaneka oveta yuuthemba womuntu yopaigwana?

Mo 16 Juli 2020, ompangu yopombanda moEcuador, oya li ya ungaunga noshipotha sha pamba epulo ndyoka. Aamwatate mboka ooahende moEcuador oya li ya kalele po egongalo. Opwa li wo natango aamwatate yane yokondje yomafuta, ooaende ndhoka dhi na ontseyo mokuungaunga niipotha. Omolwomangambeko goshivu sho-corona, oya li ya popi okupitila momakwatathano gopaintaneta ye li kiilongo yawo. Shino osho oshikando shotango muuyuni, ompangu ya pitika aakalelipo yopaveta yOonzapo dhaJehova ya popye okupitila momakwatathana gopaintaneta.c Ooahende mboka ya kalela po Oonzapo dhaJehova oya totha uutendo mekotampango lyuuthemba womuntu wopaigwana mboka tawu ulike kutya aantu inaya pumbwa okuyonenwa uuthemba wawo, molwaashoka owala yo yomuhoko gwontumba.

Aamwatate moshitopolwa Otavalo Valley, oya tegelela etokolo lyompangu. Ihe aamwatate oya nyanyukwa omolwekwatho ndyoka ya pewa. Omumwatate César, ngoka e li omukuluntugongalo megongalo lyedhina Ilumán Quichua, okwa ti: “Jehova oye owala ta vulu okuningila oshindji ngawo aantu aashona, okupitila mehangano lye.”

Ooahende ayehe mboka ya li ya popile aamwatate nayo Oonzapo dhaJehova, noinaya pula ehangano nando osenda yimwe. Ngaashi tu shi shi nawa, opo wu tule mo oshipotha noku shi ilongekidhila nosho wo oku ke shi popila mompangu ohashi pula ethimbo noshimaliwa. Ihe nonando ongawo, ooahende yetu nosho wo aamwatate yamwe oya li ya longo oowili dha konda po 380 mokwiilongekidhila shoka taya ka tya mompangu nosho wo oowili 240 ya toloke omikanda ndhoka dha longithwa pethimbo sho oshipotha tashi pulakenwa mompangu. Oshi li ngeyi kutya ooahende ye li 40 lwaampono oya longitha oowili odhindji moshipotha shika shomoEcuador. Iimaliwa otwe yi adha peni, opo tu kalele po oofuto ndhono dha longithwa moshipotha shono? Otwa kutha momayambidhidho ngoka haga gandjwa okupitila momikalo dhi ili nodhi ili ndhoka dhi li kepandja ko-donate.jw.org. Tangi unene komayambidhidho geni.