1 Omolwashike tu na okukala hatu galikana?

EGALIKANO. Opu na iipalanyolo yOmbiimbeli yontumba hayi pendutha ohokwe onene nosho wo ehalo lyokuuva kombinga yayo. Tala omapulo gaheyali ngoka haga pulwa olundji kombinga yegalikano; opo nduno konakona omayamukulo ngoka ga gandjwa kOmbiimbeli kombinga yago. Iitopolwa mbika oya nuninwa oku ku kwathela wu kale ho galikana, sha hala okutya, wu tameke okugalikana nenge wu kale ho galikana omagalikano taga ti sha.

MUUYUNI auhe, aantu yomomaputuko agehe noyomomalongelokalunga agehe ohaya galikana. Ohaya galikana uuna ye li oyo ayeke nongele ye li ongundu. Ohaya galikanene moongeleka, mootempeli, moosinagoga nomomahala galwe gokugalikanena moka mu na iiyambelo. Otashi vulika haya longitha okakumbatha kokugalikanena, olusaalia yomagalikano, uutaiyela, iihongwathano, omambo gomagalikano nenge omagalikano ga nyolwa kuupelende mboka hawu kala wa tsilikwa kiiti.

Egalikano olyo lya yoolola ko aantu kiishitwa yilwe yokombanda yevi. Odhoshili kutya tse aantu otwa faathana niinamwenyo miinima oyindji. Otwa pumbwa iikulya, ombepo nomeya ngaashi yo. Otwa valwa, otu na omwenyo nohatu si ngaashi yo. (Omuuvithi 3:19) Ihe aantu oyo owala haya galikana. Omolwashike mbela?

Otashi vulika omolwaashoka otwa pumbwa okugalikana. Kakele kaashono, egalikano ohali longithwa unene onga omukalo moka aantu taya vulu okupopya niinima mbyoka ya tala ko kutya iiyapuki notayi kalelele. Ombiimbeli otayi ulike kutya otwa shitwa nehalo lyokuninga ngawo. (Omuuvithi 3:11) Jesus Kristus okwa tile: “Aanelago oomboka [ye shi ompumbwe yawo yopambepo, NW], oshoka Oshilongo shegulu oshawo.”—Mateus 5:3.

Molwaashoka aantu oye na omatungo gomalongelokalunga niinima yopalongelokalunga nohaya longitha ethimbo olindji mokugalikana, otashi ulike kutya oye na ‘ompumbwe yopambepo.’ Dhoshili, aantu yamwe ohayi igwanithile po oompumbwe dhawo dhopambepo nenge ye dhi gwanithilwe po kooyakwawo. Ihe mbela owu shi ngaa kutya aantu itaya vulu okukwathela aantu moompumbwe dhawo adhihe? Itashi vulika, molwaashoka otu li aankundi, otu na onkalamwenyo ofupi nokatu shi kutya onakuyiwa otayi ka kala ya tya ngiini. Omuntu owala ngoka e na oondunge dhi vule dhetu, oonkondo nohi idhidhimike e tu vule, ta vulu oku tu pa shoka twa pumbwa. Oompumbwe dhini dhopambepo hadhi tu ningitha tu galikane?

Natu tale shika tashi landula: Mbela opu na ethimbo wa li wa hala ewiliko, uunongo nenge omayamukulo gomapulo ngoka taga monika ga fa itaaga vulu okutseyika kaantu? Mbela opwa li pu na esiku wa li wa pumbwa ehekeleko sho wa li wa yemata omolwokusilwa, wa pumbwa ewiliko sho wa li wu na okuninga omatokolo ga kwata miiti nenge sho wa li wa pumbwa edhiminopo omolwokukala wu uvite wu na ondjo?

Ombiimbeli otayi ulike kutya agehe ngano ogo omatompelo molwaashono hatu galikana. Ombiimbeli oyo embo li shi okwiinekelwa noonkondo tali popi kombinga yegalikano noli na omahokololo ogendji kombinga yomagalikano gaalumentu naakiintu oyendji aadhidhiginini. Aantu mboka oya li ya galikana ya hekelekwe, ya pewe ewiliko, ya dhiminwe po noya mone omayamukulo gomapulo ngoka omadhigu okuyamukula.—Episalomi 23:3; 71:21; Daniel 9:4, 5, 19; Habakuk 1:3.

Nonando omagalikano ngoka ga popiwa mOmbiimbeli oga yoolokathana, oga li gu ukithwa komuntu gumwe, oshinima shoka sha pumba muuyuni mbuka. Aantu mboka yopethimbo lyOmbiimbeli oya li ye shi kutya oye na okugalikana kulye naashoka oshinima sha simana okuninga opo omagalikano gomuntu gu uvike.

2 Okulye tu na okukala hatu galikana?

MBELA Kalunga oha pulakene omagalikano agehe, kutya nduno otaga galikanwa gu ukithwa kulye? Muuyuni wonena, olundji aantu ohaya ti kutya osho shi li ngaaka. Edhiladhilo ndyoka olya hokiwa kaantu oyendji mboka ya hala omaitaalo agehe ga kale taga longele kumwe noga kale ga taambiwa ko nonando oga yoolokathana. Ihe mbela otashi wapa ngaa edhiladhilo ndyoka li kale kaali shi lyoshili?

Ombiimbeli otayi longo aantu kutya olundji aantu ihaya galikana kuKalunga kashili. Nale sho Ombiimbeli ya nyolwa, aantu oya li ye hole okugalikana iihongwathano. Ihe Kalunga okwa li he ya londodha lwiikando kaaye shi ninge. Pashiholelwa, Episalomi 115:4-6 otali popi kombinga yiikalunga tali ti: “Oyi na omakutsi, ihe itayi vulu okuuva ko.” Edhiladhilo ndika olya yela. Itashi kwatha sha okugalikana oshikalunga shoka itaashi ku uvu.

Ehokololo limwe lyOmbiimbeli otali yelitha nawanawa oshinima shoka. Omupolofeti gwashili Elia okwa li a shongo aapolofeti yaBaal ta ti naya galikane kukalunga kawo Baal nokonima yaashono Elia naye okwa ka galikana kuKalunga ke. Elia okwa ti kutya Kalunga kashili okwa li ta ka yamukula egalikano lye, na kalunga kiifundja ka li te ke ya yamukula. Aapolofeti yaBaal sho ya ningi shoka ya li ya lombwelwa, oya li ya galikana ethimbo ele noya mana mo, taya lili nokuli muule, ihe inaye shi pondola. Ehokololo otali ti: “Inaku uvika nando eyamukulo; inaku uvika nando ewi.” (1 Aakwaniilwa 18:29) Mbela oshike sha li sha ningwa po sho Elia a galikana?

Konima sho Elia a galikana, Kalunga ke okwe mu yamukula nziya, okwa tumu omulilo okuza megulu okulungunitha po omayambo ngoka Elia a yamba. Mbela eyooloko olya li peni? Elia okwa li a tumbula megalikano lye ndyoka lya nyolwa mAakwaniilwa yotango 18:36, 37 oshinima shimwe sha simanenena. Egalikano lye olya li efupi noonkondo, li na owala iitya 30 lwaampono melaka lyOshihebeli lyopetameko. Ihe Elia okwa li a popi niitya mbyoka ta tumbula Kalunga kedhina lye, Jehova, lwiikando itatu.

Aakaanana oya li ye na oshikalunga shedhina Baal ndyoka tali ti “omuwa,” nopwa li omautumbulilo ogendji ngoka ya li haye shi ithana. Ihe Jehova olyo edhina lyi ikalekelwa, ndyoka hali ithanwa owala omuntu gumwe meshito alihe. Kalunga nguka okwa li a lombwele oshigwana she a ti: “[Ongame Jehova. Ndyoka olyo edhina lyandje, NW]. Itandi gandja esimano lyandje kugulwe.”—Jesaja 42:8.

Mbela egalikano lyaElia nomagalikano gaapolofeti yaBaal oga li gu ukithwa komuntu gumwe? Elongelokalunga lyaBaal olya li hali shundula omikalo dhaantu nomilandu dhalyo dhumbwanda nomwa li hamu ningwa nokuli omafikiloyambo gaantu. Mepingathano naashoka, Jehova okwa li a lombwele oshigwana she, Israeli, shi mu longele momukalo gwesimaneko nosha li shi na okuhenuka omikalo dha tya ngaaka inaadhi yogoka. Onkee ano, dhiladhila kwaashika: Natu tye ando oto nyolele kuume koye a simanenena ontumwafo, mbela oto ka kala wa tegelela yi falwe komuntu gwedhina lyi ili nohi ihumbata momukalo gwa yooloka ko thiluthilu kwaangoka gwakuume koye? Hasho nando.

Ngele to galikana kuJehova, nena oto galikana kOmushiti, He yaantu ayehe.a Omupolofeti Jesaja okwa popi megalikano a ti: “Ngoye [Jehova, NW], ongoye mwene tate.” (Jesaja 63:16) Ano Kalunga ngoka oye ngoka Jesus Kristus a li a popi kombinga ye sho a lombwele aalanduli ye a ti: “Ngame otandi shuna kuTate, nokuKalunga kandje nokeni wo.” (Johannes 20:17) Jehova oye He yaJesus. Oye Kalunga ngoka Jesus a galikana kuye naangoka Jesus a longo aalanduli ye ya galikane kuye.—Mateus 6:9.

Mbela Ombiimbeli otayi tu lombwele tu galikane kuJesus, kuMaria, kaayapuki nenge kaayengeli? Aawe, otayi tu lombwele owala tu galikane kuJehova. Tala omatompelo gaali kutya omolwashike oye awike e na okugalikanwa . Lyotango, egalikano olyo omukalo gwokulongela Kalunga, nOmbiimbeli otayi ti kutya Jehova oye awike e na okugalikanwa. (Eksodus 20:5) Etiyali, Ombiimbeli oya holola kutya limwe lyomomadhinasimaneko ge olyo ‘omuuvi gwomagalikano.’ (Episalomi 65:2) Nonando Jehova oha gandja nehalo ewanawa iinakugwanithwa oyindji kuyalwe, oshinakugwanithwa shoka ine shi gandja komuntu nando ogumwe. Oye Kalunga ngoka u uvaneka okupulakena ye mwene omagalikano getu.

Ngele owa hala omagalikano goye gu uvike kuKalunga, dhimbulukwa ekumagidho lyopamanyolo ndika tali ti: “Kehe ngoka ti ithana edhina lyOmuwa, ota hupithwa.” (Iilonga 2:21) Ihe mbela Jehova oha pulakene omagalikano agehe nopwaahe na oshitegelelwa shasha? Nenge opu na sha shilwe twa pumbwa okutseya ngele otwa hala omagalikano getu gu uvike kuJehova?

[Enyolo lyopevi]

[Ethano pepandja 5]

Momukalo moka Elia a shongo aapolofeti yaBaal otagu ulike kutya omagalikano agehe ihagu ukithwa komuntu gumwe

3 Ongiini tu na okukala hatu galikana?

UUNA tashi ya pegalikano, omikalo dhomalongelokalunga ogendjii ohadhi ukitha eitulomo komukalo moka olutu lwomuntu lu na okukala lu li ngele ta galikana, koohapu nokomisindalandu dhontumba ndhoka e na okulandula. Ihe Ombiimbeli otayi tu kwathele kaatu gandje eitulomo kiinima mbyoka ngele tatu galikana, ihe otu li ukithe kiinima mbyoka ya simana noonkondo yi na ko nasha nepulo: “Ongiini tu na okugalikana?”

Ombiimbeli oya popi aapiya yaKalunga aadhiginini taya galikanene pomahala ga yoolokathana nomalutu gawo ge li moonkalo dhi ili nodhi ili. Oya li ya galikana ya mwena nenge muule shi ikolelela koonkalo. Oya li ya galikana ya tala pombanda nenge ya sizimana. Oya li ya galikana tashi zi komutima niitya yawo yene, ihe inaya longitha iimenka, omagwe nenge omagalikano gomomambo oku ya kwathela megalikano. Mbela oshike sha li sha ningitha omagalikano gawo gu uvike kuKalunga?

Ngaashi sha tumbulwa moshitopolwa sha tetekele, oya li ya galikana owala kuKalunga gumwe awike, Jehova. Opu na natango oshinima shilwe sha simana. Otatu lesha muJohannes gwotango 5:14 taku ti: ‘Otatu vulu okuhedha kuKalunga tu na omukumo, oshoka ngele tatu mu indile shaa shoka she mu opalela, oye ote tu uvu.’ Omagalikano getu oga pumbwa okukala metsokumwe nehalo lyaKalunga. Mbela shika otashi ti ngiini?

Ngele otwa hala okugalikana metsokumwe nehalo lyaKalunga, otwa pumbwa oku li tseya. Okukonakona Ombiimbeli oko oshinima sha simanenena shi na ko nasha nokugalikana. Mbela shika osha hala okutya Kalunga ita ka pulakena komagalikano getu ngele katu shi aalongwantu yOmbiimbeli? Hasho, ihe Kalunga okwa tegelela tu ilonge kutya ehalo lye olini, tu kale tu li uvite ko notu katuke metsokumwe nalyo. (Mateus 7:21-23) Otwa pumbwa okukala hatu galikana metsokumwe naashoka twi ilonga.

Sho tatu ilongo kombinga yaJehova nosho wo yehalo lye, eitaalo lyetu otali kolo, shoka shi li oshinima shilwe sha simanenena shi na ko nasha negalikano. Jesus okwa ti: ‘Ngele mwi itaala, otamu pewa okehe tuu shoka tamu shi indile megalikano.’ (Mateus 21:22) Okukala neitaalo itashi ti kutya omuntu owu na okukala ho itaale nuupu. Ihe otashi ti okwiitaala sha shoka ihaashi monika, ihe opu na okukala pu na uunzapo tawu shi koleke. (Aahebeli 11:1) Ombiimbeli oyi na uunzapo owundji kutya Jehova ngoka itaatu vulu okumona, ogwolela, oku shi okwiinekelwa noku na ehalo okuyamukula omagalikano gaamboka ye mu itaala. Kakele kaashono, otatu vulu aluhe okupula eitaalo lyetu li gwedhelwe, na Jehova oku na ehalo lyoku tu pa shoka twa pumbwa.—Lukas 17:5; Jakob 1:17.

Mpaka opu na natango oshinima shilwe sha simanenena shi na ko nasha nankene tu na okugalikana. Jesus okwa ti: “Kape na ngoka ta vulu okuya kuTate, okuninga ta pitile mungame.” (Johannes 14:6) Onkee ano, opo tu vule okupopya naTate, Jehova, otu na okupitila muJesus. Osho molwaashoka Jesus a li a lombwele aalanduli ye ya galikane medhina lye. (Johannes 14:13; 15:16) Shoka itashi ti otu na okugalikana kuJesus. Ihe otu na okukala hatu galikana medhina lyaJesus, tatu dhimbulukwa kutya oye e shi ninga tashi wapa opo tu vule okukala tatu vulu okupopya naTate yetu a gwanenena nomuyapuki.

Oshikando shimwe aalanduli yaJesus yopothingo oya li ye mu pula ya ti: “Omuwa, tu longa okugalikana.” (Lukas 11:1) Osha yela kutya kaya li taya pula ya longwe iinima mbyoka twa za nokukundathana, ihe oya li ya halelela okutseya kutya oye na okugalikana kombinga yashike.

[Oohapu dha simana pepandja 6]

Opo omagalikano getu ga kale taga ti sha, otu na okugalikana metsokumwe nehalo lyaKalunga, tu na eitaalo kutya ote ga yamukula notatu shi ningi medhina lyaJesus

4 Okombinga yashike tu na okukala hatu galikana?

OHAKU tiwa kutya egalikano ndyoka Jesus a li a longo aalanduli ye, ohali endululwa noonkondo li vule omagalikano agehe gAakriste. Kutya shoka oshoshili nenge hasho, oshiholelwagalikano shaJesus omathimbo gamwe ohashi ithanwa egalikano lyOmuwa gwetu nenge egalikano lyaTate yetu ngu u li megulu, negalikano ndika ihali uviwa ko naanaa kaantu oyendji. Aantu omamiliyona ohaya popi oohapu dhalyo momutse esiku kehe, tashi vulika lwiikando mesiku. Ihe Jesus ka li nando a lalakanena egalikano ndika li longithwe momukalo gwa tya ngawo. Mbela otu shi shi ngiini?

Jesus manga inaa longa aalanduli ye egalikano ndyoka, okwa ti: “Ngele tamu galikana, inamu popyagana.” (Mateus 6:7) Mbela Jesus okwa li a popi iinima tayi kondjithathana sho a longo aalanduli ye oohapu ndhoka ando ye na oku dhi kwata momutse nokukala haye dhi endulula? Hasho nando. Ihe okwa li e tu longo kutya otu na okugalikana kombinga yashike nokwa li e tu pe oshiholelwa shiinima oyindji mbyoka tu na okupititha komeho momadhiladhilo getu uuna tatu galikana. Natu ka konakoneni nawa shoka a li a popi. Egalikano ndyoka otali adhika muMateus 6:9-13.

“Tate yetu, ngu u li megulu: Edhina lyoye nali yapulwe.”

Ano Jesus okwa li a dhimbulukitha aalanduli ye kutya omagalikano agehe oge na okuukithwa kuHe, Jehova. Ihe mbela owu shi ngaa kutya omolwashike edhina lyaJehova lya simana noonkondo nomolwashike li na okuyapulwa nenge okukalekwa eyapuki?

Okuza petameko lyondjokonona yaantu, edhina lyaKalunga eyapuki olya kala nokushekithwa. Omutondi gwaKalunga, Satana, okwa li a ti kutya Jehova Omupangeli ha fundju nokwi ihole noke na uuthemba wokupangela eshito Lye. (Genesis 3:1-6) Aantu oyendji oya gama kombinga yaSatana, taya longo aantu kutya Kalunga ke na ohole, oku na onyanya noha kwatele onkone nenge taya tindi kutya haye Omushiti. Yalwe oye li thiluthilu ompinge nedhina lye, edhina ndyoka Jehova oye li kutha mo momatoloko gOombiimbeli dhawo nohayi indike aantu kaaye li longithe.

Ombiimbeli otayi ulike kutya Kalunga ota ka kutha po okwaahenuuyuuki akuhe hoka. (Hesekiel 39:7) Mokuninga ngawo, ota ka gwanitha po oompumbwe dhoye adhihe nota ka hulitha po uupyakadhi woye auhe. Mbela ote ke shi ninga ngiini? Oohapu dhomegalikano lyaJesus tadhi landula otadhi tu pe eyamukulo.

“Uukwaniilwa woye nawu ye.” (KB)

Kunena mokati kaalongi yomalongelokalunga omu na egwangwano olindji kombinga yUukwaniilwa waKalunga. Ihe ngaashi aapulakeni yaJesus ya li ye shi shi, aapolofeti yaKalunga oya kala ya hunganeka okuza nale kutya Mesiasa, Omuhupithi a hogololwa kuKalunga, okwa li ta ka kala omupangeli gwUukwaniilwa mboka wa li tawu ka lundulula uuyuni. (Jesaja 9:6, 7; Daniel 2:44) Otawu ka yapulitha edhina lyaKalunga mokutula pomutenya iifundja yaSatana nokuhanagula po Satana niilonga ye ayihe. Uukwaniilwa waKalunga otawu ka hulitha po iita, omikithi ondjala nokuli neso. (Episalomi 46:9; 72:12-16; Jesaja 25:8; 33:24) Ngele to galikana Uukwaniilwa waKalunga wu ye, nena oto galikana opo iinima ayihe mbyoka yu uvanekwa yi gwanithwe.

“Ehalo lyoye nali gwanithwe kombanda yevi wo ngaashi megulu.”

Oohapu dhaJesus otadhi ti kutya ehalo lyaKalunga otali ka gwanithwa shili kombanda yevi ngaashi megulu, moka Kalunga a kala. Kapwa li pu na ngoka a vulu okukeelela ehalo lyaKalunga kaali gwanithwe megulu, moka Omwana a li a kondjitha Satana naalanduli ye nokwe yu umbile kombanda yevi. (Ehololo 12:9-12) Ngaashi omaindilo gaali gotango, eindilo ndika etitatu lyomoshiholelwagalikano, otali tu kwathele tu ukithe eitulomo lyetu kiinima mbyoka ya simanenena, sha hala okutya, kaatu li ukithe kehalo lyetu yene, ihe okehalo lyaKalunga. Oshi li ehalo lyaKalunga okweetela iishitwa ye ayihe uuwanawa owundjiwundji. Ano nokuli nomulumentu a gwanenena, Jesus, okwa lombwele He a ti: “Hamolwehalo lyandje, ihe olyoye li gwanithwe.”—Lukas 22:42.

“Tu pa wo nena oshithima shetu shesiku kehe.”

Jesus okwa li u ulike natango kutya otatu vulu wo okugalikana shi na ko nasha noompumbwe dhetu. Inashi puka okugalikana Kalunga shi na ko nasha noompumbwe dhetu dhesiku kehe. Dhoshili, okuninga ngawo otaku tu dhimbulukitha kutya Jehova oye “ha pe aantu ayehe omwenyo nomufudho niinima ayihe.” (Iilonga 17:25) Ombiimbeli otayi holola kutya Jehova oku li omuvali omanahole ngoka ha nyanyukilwa okupa oyana shoka ya pumbwa. Ihe ngaashi omuvali omwaanawa, ita ka yamukula omagalikano ngoka itaage ye etele uuwanawa washa.

“Dhima po oondjo dhetu.”

Mbela owu na shili oondjo kuKalunga? Mbela owa pumbwa e dhi ku dhimine po? Aantu oyendji kunena kayu uvite ko kutya uulunde oshike nonokutya owu li oshinima sha kwata miiti. Ihe Ombiimbeli otayi longo kutya uulunde owo we etitha omaupyakadhi ga kwata miiti ngoka hage tu adha, molwaashoka owo hawu etitha eso. Molwaashoka otwa valwa nuulunde, atuhe ohatu yono omathimbo nomathimbo, netegameno lyetu lyonakuyiwa tayi kalelele olyi ikolelela owala kokudhiminwa po kuKalunga. (Aaroma 3:23; 5:12; 6:23) Lago enene, Ombiimbeli otayi ti: “OMUWA, ongoye omunalukeno noho tu dhimine po.”—Episalomi 86:5.

“Tu hupitha muuwinayi.”

Mbela owa tseya ngaa kutya owa pumbililwa egameno lyaKalunga meendelelo? Aantu oyendji oya tinda okwiitaala kutya ‘omwiinayi,’ Satana, oko e li shili. Ihe Jesus okwa longa aantu kutya Satana oko e li shili, nokwe mu ithana nokuli “omupangeli guuyuni mbuka.” (Johannes 12:31; 16:11) Satana okwa yona uuyuni mbuka wu li mepangelo lye nokwa hala noonkondo oku ku yona po, opo e ku imbe kuu kale nekwatathano lyopothingo naHo, Jehova. (1 Petrus 5:8) Ihe nonando ongaaka, Jehova oku na oonkondo e vule Satana nokwa halelela okugamena mboka ye mu hole.

Engongo li li paufupi lyomanenedhiladhilo gomoshiholelwagalikano shaJesus inali kwatela mo iinima ayihe mbyoka tatu vulu okupopya. Dhimbulukwa kutya Johannes gwotango 5:14 ote tu lombwele kombinga yaKalunga ta ti: ‘Ngele tatu mu indile shaa shoka she mu opalela, oye ote tu uvu.’ Onkee ano, ino kala to ipula kutya omaupyakadhi goye oga kwata miiti noitaga vulu okupulakenwa kuKalunga.—1 Petrus 5:7.

Ihe ongiini shi na ko nasha nethimbo nosho wo nehala mpoka tu na okugalikanena? Mbela otu na okukala tu na ethimbo lyokondandalunde ndyoka tu na okugalikana nosho wo ehala mpoka tu na oku shi ningila?

5 Mbela otu na okugalikana pethimbo nopehala lyokondandalunde?

NOPWAAHE NA omalimbililo owa mona kutya omalongelokalunga ogendji ohagu ukitha unene eitulomo komahala gomagalikano nosho wo kutya oye na okugalikana pethimbo lini. Mbela Ombiimbeli oya popya kutya openi pu na okugalikanenwa nopethimbo lini?

Mbela Ombiimbeli oya popyakutya ehala lini ewanawa nokugalikanena? Pashiholelwa, manga Jesus inaa lya pamwe naalanduli ye, okwa li a galikana kuKalunga. (Lukas 22:17) Naashono aalongwa ye ya li ya gongala, oya li ya galikana pamwe. Ano oya li ya tsikile oku shi ninga moosinagoga dhAajuda nomotempeli muJerusalem. Kalunga otempeli okwe yi nunina okukala “ongulu yegalikano yiigwana ayihe.”—Markus 11:17.

Uuna aapiya yaKalunga ya gongala nokugalikana pamwe, omagalikano gawo otaga vulu okuyamukulwa. Kalunga oha kala a nyanyukwa ngele aapiya ye ya gongala ye li ongundu ye na edhiladhilo limwe nongele taya galikana metsokumwe nomakotampango gOmbiimbeli. Egalikano otashi vulika nokuli li mu inyengithe a ninge shoka a li inaa dhiladhila okuninga. (Aahebeli 13:18, 19) Oonzapo dhaJehova ohadhi galikana aluhe pokugongala kwadho. Ano oto hiwa nesimaneko wu ye kOshinyanga shadho shUukwaniilwa shoka shi li moshitopolwa sheni nowu pulakene komagalikano ngoka.

Ihe Ombiimbeli inayi popya kutya ethimbo peni nenge opehala lini pu na okugalikanenwa. MOmbiimbeli otatu lesha mo kombinga yaapiya yaKalunga taya galikana ethimbo kehe nopehala kehe. Jesus okwa ti: “Ngele to galikana, inda mondunda yoye, edhila po osheelo, u galikane Ho ngoka e li meholamo. Nena Ho ngoka ha mono meholamo, ote ku futu.”—Mateus 6:6.

Ehiyo ndika kali shi tuu lihokitha! Oto vulu okugalikana Omunamapangeloagehe ethimbo kehe, itoo shi ningi montaneho nowu na uushili kutya ote ku pulakene. Ano itashi kumitha sho olundji Jesus a li he ki ikalela opo a galikane. Oshikando shimwe okwa li a kala uusiku awuhe ta galikana kuKalunga, sha yela kutya okwa li ta kongo ewiliko mokuninga omatokolo ga simanenena.—Lukas 6:12, 13.

Aalumentu naakiintu yalwe mboka ya hokololwa mOmbiimbeli oya li ya galikana sho ya li ye na okuninga omatokolo ga kwata miiti nenge sho ya li ya taalela omashongo. Omathimbo gamwe oya li haya galikana mokule, nomathimbo gamwe oya li ye shi ningi momutima, noya li haye shi ningi ngele ye li muungundu nenge ye li oyo ayeke. Kashi na nduno mbudhi kutya oya li haye shi ningi momukalo guni, oshinima sha simana osho kutya oya li ya galikana. Kalunga ota hiya nokuli aapiya ye ta ti: “Galikaneni aluhe.” (1 Aatessalonika 5:17) Jehova oku na aluhe ehalo okupulakena omagalikano gaamboka taya longo ehalo lye. Mbela ndyoka kali shi ehiyo lyopahole?

Dhoshili, muuyuni wonena waahe shi okwiinekelwa, aantu oyendji otayi ipula shi na ko nasha nomagalikano gawo ngele oge na ngaa oshilonga. Otashi vulika wu pule to ti: ‘Mbela egalikano otali kwathele ndje ngaa shili?’

[Oohapu dha simana pepandja 9]

Otatu vulu okugalikana ethimbo kehe nopehala kehe

6 Mbela egalikano otali vulu oku tu kwathela?

MBELA okugalikana ohaku tu etele ngaa uuwanawa washa? Ombiimbeli otayi ulike kutya omagalikano gaapiya yaKalunga aadhiginini ohage ya etele shili uuwanawa. (Lukas 22:40; Jakob 5:13) Dhoshili, okugalikana otaku vulu oku tu etela lela uuwanawa pambepo, pamaiyuvoo nokuli nopalutu. Ngiini?

Natu tye ando owu na okanona hoka ka pewa omagano. Mbela oto ke ka longa kutya oke na okukala ke na olupandu? Nenge mbela oto ke ka longa okukala haku ulike olupandu? Uuna tatu popi omaiyuvo getu ga simana, otatu ku ulika kutya otu uvite ngiini, nayalwe otaye ke shi tseya. Mbela hasho hatu kala tu uvite ngaaka nongele tatu popi naKalunga? Osho lela. Tala iiholelwa yontumba.

Omagalikano gokupandula. Uuna tatu pandula Tate yetu omolwiinima iiwanawa mbyoka he tu ningile, kungawo otatu ukitha eitulomo lyetu komayambeko ngoka twa pewa. Oshizemo, otatu vulu okukala twa pandula noonkondo, twa nyanyukwa notu na etaloko li li nawa.—Aafilippi 4:6.

Oshiholelwa: Jesus okwa li u ulike olupandu omolwomukalo ngoka He e mu uvu nokwa yamukula omagalikano ge.—Johannes 11:41.

Omagalikano gokupula edhiminopo. Uuna tatu pula edhiminopo kuKalunga, ohashi tu kwathele tu kale tu na eiyuvo ewanawa, tu ulike kutya otwi iyela ombedhi nohashi tu dhimbulukitha kutya uulunde oshinima sha kwata miiti. Itatu ka kala twa gwililwa po kokukala tu uvite tu na ondjo.

Oshiholelwa: David okwa li a galikana opo u ulike kutya okwi iyela ombedhi nokwa nika oluhodhi.—Episalomi 51.

Omagalikano gokupula ewiliko nuunongo. Opo tu pule Jehova e tu wilike nenge e tu pe uunongo, otwa pumbwa okuninga omatokolo ge li mondjila ngoka taga vulu oku tu kwathela tu kale twi ifupipika shili. Otashi vulu oku tu dhimbulukitha omangambeko getu noku tu kwathela tu kale twi inekela Tate yetu gwomegulu.—Omayeletumbulo 3:5, 6.

Oshiholelwa: Salomo okwa li a pula neifupipiko a pewe ewiliko nuunongo opo a vule okupangela oshigwana shaIsraeli.—1 Aakwaniilwa 3:5-12.

Omagalikano ngele omuntu e li muudhigu. Ngele otwa lombwele Kalunga shoka shi li momitima dhetu uuna tu na uupyakadhi wopamaiyuvo, omitima dhetu otadhi ka pepelelwa notatu ka kala twi inekela muye pehala lyokwiinekela mutse yene.—Episalomi 62:8.

Oshiholelwa: Omukwaniilwa Asafa okwa li a galikana sho a li a taalelwa kaatondi ye.—2 Ondjalulo 14:11.

Omagalikano gokugalikanena mboka ye na ompumbwe. Omagalikano ga tya ngaaka ohage tu kwathele tu kondjithe okukala twi ihole notu kale tu na ohenda nosho wo olukeno.

Oshiholelwa: Jesus okwa li a galikana omolwaalanduli ye.—Johannes 17:9-17.

Omagalikanohambelelo. Uuna tatu hambelele Jehova omolwiilonga ye iikumithi nosho wo omaukwatya ge, otatu ka kala twe mu simaneka notu na olupandu olunene. Omagalikano ngoka otaga vulu wo oku tu kwathela tu hedhe popi lela naKalunga Tate yetu.

Oshiholelwa: David okwa li a hambelele Kalunga nomutima aguhe omolwiilonga ye.—Episalomi 8.

Eyambeko lilwe ndyoka tatu vulu okumona okupitila megalikano olyo ‘ombili yaKalunga ndjoka tayi gamene oomwenyo dhetu.’ (Aafilippi 4:7) Okukala tu na ombili muuyuni mbuka wa piyagana oshi li elalekonuuyamba ndyoka lya pumba lela. Ombili ohayi tu etele nokuli uuwanawa wopalutu. (Omayeletumbulo 14:30) Ihe mbela omauwanawa ngoka otatu vulu oku ga mona koonkondo dhetu yene? Nenge opu na oshinima shimwe sha simanenena shoka sha kwatelwa mo?

[Oohapu dha simana pepandja 10]

Egalikano ohali etele aantu omauwanawa ogendji gopalutu, gopamaiyuvo nuunene tuu gopambepo

7 Mbela Kalunga ota ka pulakena nokuyamukula omagalikano getu?

EPULO ndyoka li li pombanda olya pendutha ohokwe onene nolya ningitha aantu ya kale ya halelela okumona eyamukulo. Ombiimbeli otayi ulike kutya Jehova oha pulakene komagalikano kunena. Kutya nduno ota pulakene komagalikano getu nenge hasho, oshi ikolelela unene kutse.

Jesus okwa li a shadha aawiliki yomalongelokalunga yopethimbo lye mboka ya li ya galikana niihelele noyehole owala okwiimonikitha montaneho. Okwa ti kutya aalumentu mboka oya li taya ka “pewa ondjambi yawo,” sha hala okutya, taya ka pewa owala esimano kaantu ndyoka ya li ya halelela, ihe itaya ka pewa shoka ya pumbwa, sha hala okutya, Kalunga ita ka pulakena komagalikano gawo. (Mateus 6:5) Sha faathana, nokunena aantu oyendji ohaya galikana pahalo lyawo, ihe halyaKalunga. Molwaashoka ihaya landula omakotampango gOmbiimbeli ngoka twa zi nokukundathana, Kalunga ihe ya pulakene.

Ihe ongiini kombinga yoye? Mbela Kalunga ota ka pulakena omagalikano goye noku ga yamukula? Eyamukulo kali na ko nasha nomuhoko gwoye, uukwashigwana nenge neputuko lyoye. Ombiimbeli otayi tu shilipaleke tayi ti: “Kalunga aantu ayehe ohe ya tala ye thike pamwe. Ngoka he mu tila noha longo shoka shu uka, Kalunga ote mu taamba, na kale ogwomoshigwana sha tya ngiini.” (Iilonga 10:34, 35) Mbela oohapu ndhoka ongoye tadhi popi? Ngele oho tila Kalunga, nena owe mu simaneka lela noho tila oku mu yemateka. Ngele oto lalakenene okulonga uuyuuki, osha hala okutya, oto lalakanene okulonga shoka Kalunga ta popi kutya osho shi li mondjila, ihe ito landula ehalo lyoye nenge lyaantu ooyakweni. Mbela owa hala shili Kalunga a pulakene omagalikano goye? Ombiimbeli otayi ku ulukile nkene wu na okugalikana opo Kalunga e ku pulakene.a

Dhoshili, aantu oyendji oya hala Kalunga a yamukule omagalikano gawo pashikumithalonga. Ihe nokuli nopethimbo lyOmbiimbeli Kalunga iikumithalonga ya tya ngaaka okwa li he yi longo omalupita. Omathimbo gamwe pokati kiikumithalonga opwa li hapu piti omathelemimvo gontumba opo ku landule nawa oshikwawo. Niishewe Ombiimbeli otayi ulike kutya ethimbo lyokulonga iikumithalonga olya hulila pethimbo lyaayapostoli. (1 Aakorinto 13:8-10) Mbela shika otashi ti kutya Kalunga iha yamukula omagalikano gaantu kunena? Hasho nando. Tala komagalikano gamwe ngoka a li a yamukula.

Kalunga oha gandja uunongo. Jehova oye Onzo ya shiga ko yuunongo auhe washili. Ohe wu gandja nehalo ewanawa nokwa manguluka kwaamboka ya hala okuwilikwa kuye nohaya kambadhala okukala aanongo.—Jakob 1:5.

Kalunga oha gandja ombepo ye ondjapuki ndjoka hayi tu etele uuwanawa owundji. Ombepo ondjapuki oyo oonkondo dhaKalunga tadhi longo. Kaku na oonkondo dhilwe dhi vule ndhoka. Otadhi vulu oku tu kwathela tu idhidhimikile omamakelo. Otadhi vulu oku tu etela ombili uuna tu li muupyakadhi. Otadhi vulu oku tu kwathela tu kokeke omaukwatya galwe omawanawa noga simana. (Aagalati 5:22, 23) Jesus okwa li a shilipaleke aalanduli ye kutya Kalunga oha gandja omagano ngaka gombepo ye ondjapuki nehalo ewanawa.—Lukas 11:13.

Kalunga oha gandja ontseyo kwaamboka taye mu kongo ya mana mo. (Iilonga 17:26, 27) Muuyuni auhe omu na aantu mboka taya kongo oshili ya mana mo. Oya hala okutseya Kalunga, sha hala okutya, ya hala okutseya edhina lye, elalakano lye li na ko nasha nevi nosho wo naantu nonkene taya vulu okuhedha popepi naye. (Jakob 4:8) Oonzapo dhaJehova olundji ohadhi tsakaneke aantu ya tya ngawo nohadhi yamukula nenyanyu omapulo ngoka tadhi longitha Ombiimbeli.

Mbela shika osho she ku inyengitha wu taambe ko oshifo shika? Mbela nangoye oto kongo Kalunga? Otashi vulika nguka ogwo omukalo moka Kalunga ta yamukula omagalikano goye.

[Enyolo lyopevi]