Owi ilongekidhila ngaa uudhigu uunene?

1. Omolwashike shi li pandunge okwiilongekidhila iiponga yopaunshitwe?

OKWIILONGEKIDHA komeho yethimbo ohaku hupitha oomwenyo. Pashiholelwa, uuna iiponga yopaunshitwe ya holoka, aantu mboka ye yi ilongekidhila ohashi vulika ya hupe noya vule okukwathela yalwe. Ehangano limwe lyomoEuropa ndyoka hali kambadhala okukwathela aantu, olya ti: “Okwiilongekidha nawa otaku vulu okuhupitha oomwenyo.”

2. Omolwashike tu na okukala twi ilongekidhila uudhigu uunene? (Mateus 24:44)

² “Uudhigu uunene” otawu ke ya inaashi tegelelwa. (Mat. 24:21) Ihe uudhigu uunene otawu ka kala wa yooloka ko kiiponga yilwe oyindji yopaunshitwe, molwaashoka wo otu shi kutya otawu ya. Omimvo 2000 lwaampono dha ka pita, Jesus okwa li a londodha aalanduli ye, ya kale yi ilongekidhila esiku ndyoka. (Lesha Mateus 24:44.) Ngele otwa kala twi ilongekidha otashi ka kala oshipu kutse okwiidhidhimikila ethimbo ndyoka edhigu nokukwathela yalwe ya ninge sha faathana. — Luk. 21:36.

3. Ongiini eidhidhimiko, olukeno nohole tayi vulu oku tu kwathela tu ilongekidhile uudhigu uunene?

³ Natu ka taleni komaukwatya gatatu, ngoka taga vulu oku tu kwathela tu kale twi ilongekidhila uudhigu uunene. Otatu ki inyenga ngiini ngele otwa pulwa tu uvithe etumwalaka edhigu lyepangulo nuuna mboka kaaye shi ooitaali taye tu pataneke? (Eh. 16:21) Otatu ka pumbwa eidhidhimiko tu vulike kuJehova nokukala tu na einekelo kutya ote ke tu gamena. Oshike tatu ka ninga ngele aamwatate oya kanitha iiniwe yawo yimwe nenge omaliko gawo agehe? (Hab. 3:17, 18) Olukeno otalu ke tu inyengitha tu pe aamwatate ekwatho ndyoka ya pumbwa. Oto ki inyenga ngiini ngele otwa ponokelwa kiigwana yi imanga kumwe, e taku tiwa natu kale pehala limwe naamwatate naamwameme uule wokathimbo? (Hes. 38:10-12) Otatu ka pumbwa okukala tu ya hole nohole ya tsa kesipa, opo tu vule okwiidhidhimikila ethimbo ndyoka edhigu.

4. Ombiimbeli oya ulika ngiini kutya otatu vulu okutsikila okukokeka eidhidhimiko, olukeno nohole?

⁴ Oohapu dhaKalunga ohadhi tu ladhipike tu tsikile okukokeka eidhidhimiko, olukeno nohole. Lukas 21:19 otayi ti: “Mokwiidhidhimika otamu ihupithile oomwenyo dheni.” Aakolossa 3:12 otayi ti: “Kaleni mu na olukeno.” Aatessalonika yotango 4:9, 10 otadhi ti: “Oshoka Kalunga mwene okwe mu longa, mu kale mu holathane. . . . Otatu mu indile, mu shi ninge mu vule shito.” Oohapu adhihe ndhoka odha li dha lombwelwa aalongwa mboka ya li nale ya ulike eidhidhimiko, olukeno nohole. Ihe nando ongawo, oya li ya pumbwa okutsikila okukokeka omaukwatya ngaka. Natse otu na okuninga sha faathana. Opo tu vule okuninga ngawo, otatu ka tala nkene Aakriste yonale ya li ya ulike omaukwatya ngoka. Opo nduno, otatu ka tala wo nkene tatu vulu okuholela aalongwa mboka, naashoka otashi ke tu kwathela tu kale twa ilongekidhila uudhigu uunene.

KALA WU NA EIDHIDHIMIKO

5. Ongiini Aakriste yonale ya li ya idhidhimikile omashongo?

⁵ Aakriste yonale oya li ya pumbwa okwiidhidhimika. (Heb. 10:36) Oya li ye na omaupyakadhi ga faathana naangoka gaantu oyendji yopethimbo ndyoka. Ihe oya li wo ye na omashongo, molwaashoka ye li Aakriste. Oyendji yomuyo oya li ya hepekwa, hakaawiliki owala yelongelokalunga lyOshijuda nokaakwanepangelo Aaroma, ihe nokuyaandjawo wo. (Mat. 10:21) Shimwe ishewe, megongalo oya li ye na okukondjitha enwethomo lyaashunimonima nosho wo omalongo gawo giifundja. (Iil. 20:29, 30) Ihe nando ongawo, Aakriste mboka oya li ya idhidhimike. (Eh. 2:3) Ngiini mbela? Oya li ya idhidhimike nuudhiginini nokulandula iiholelwa yopamanyolo yaamboka ya li ya idhidhimike, ngaashi shaJob. (Jak. 5:10, 11) Oya li ya galikana ya pewe oonkondo. (Iil. 4:29-31) Oya li ya gandja eitulomo kiizemo iiwanawa mbyoka hayi zi mokwiidhidhimika. — Iil. 5:41.

6. Oshike wi ilonga mwaashoka Merita a ningi, opo a vule okwiidhidhimikila omapataneko?

⁶ Otatu vulu wo okwiidhidhimika ngele otwa kala hatu konakona aluhe iiholelwa kombinga yeidhidhimiko mOohapu dhaKalunga nomiileshomwa yetu e tatu tedhatedha kuyo. Pashiholelwa, omumwameme Merita gwokoAlbania, okwa li a vulu okwiidhidhimikila okuhepekwa nayi kuyaandjawo. Okwa ti: “Osha li sha gumu ndje noonkondo sho nda konakona ehokololo lyOmbiimbeli kombinga yaJob. Job okwa li a mono iihuna noonkondo. Ka li e shi kutya oshike tashi etitha omaupyakadhi ge. Okwa ti ishewe: ‘Sigo okusa itandi ki idhimbika uuyuuki wandje.’ (Job 27:5) Onda dhiladhila nkene omaupyakadhi gaJob ga li omadhigu ge vulithe gandje. Nonando Job ka li e shi shoka tashi etitha omaupyakadhi ge, ngame onda li ndi shi kutya oshike tashi etitha gandje.”

7. Nokuli nonando ngashingeyi inatu taalelwa komapyakadhi ga kwata miiti, oshike tu na okwiilonga okuninga ngashingeyi?

⁷ Otatu vulu wo okukokeka eidhidhimiko lyetu mokugalikana Jehova aluhe noku mu lombwela ashihe shoka tatu ipula nasho. (Fil. 4:6; 1 Tes. 5:17) Otashi vulika ngashingeyi katu na omaupyakadhi ga kwata miiti. Ihe nando ongawo, otatu vulu okugalikana Jehova noku mu pula e tu kwathele, uuna twa geya, twa ngwangwana nenge kaatu shi shoka tu na okuninga. Ngele otwa kala hatu galikana aluhe kuKalunga e tu kwathele momaupyakadhi omashona ngashingeyi, itatu ka kakadhala oku shi ninga, sho tatu ka taalelwa komaupyakadhi omanene monakuyiwa. Ihe okuninga ngaaka otaku tu kwathele tu kale tu na uushili kutya Kalunga oku shi lelalela kutya uunake nongiini e na oku tu kwathela. — Eps. 27:1, 3.

8. Oshiholelwa shaMira otashi ulike ngiini kutya okwiidhidhimikila omashongo ngashingeyi otaku vulu oku tu kwathela tu ki idhidhimikile gomonakuyiwa? (Jakob 1:2-4) (Tala wo ethano.)

⁸ Ngele otwa kala aadhiginini kuJehova uuna twa taalela omaupyakadhi ngashingeyi, otashi ke tu kwathela uuna tatu ka taalelwa komaupyakadhi omanene monakuyiwa. (Rom. 5:3) Omolwashike tatu tile ngawo? Aamwatate naamwameme oyendji oya ti kutya ethimbo kehe tayi idhidhimikile onkalo ondhigu, ohashi ya kwathele yi idhidhimikile eshongo ndyoka taye ki iyadha mulyo. Uuna tayi idhidhimikile uupyakadhi kekwatho lyaJehova, ohaya kala ye na eitaalo lya kola kutya Jehova okwa hala oku ya kwathela. Eitaalo ohali ya kwathele wo yi idhidhimikile eshongo ndyoka taye ki iyadha mulyo. (Lesha Jakob 1:2-4.) Omumwameme Mira, omukokolindjila gwokoAlbania, okwa mona kutya okwiidhidhimikila omaupyakadhi ngoka a li e na monakuziwa, osho she mu kwathele a tsikile okwiidhimikila omaupyakadhi ngoka a taalela. Okwe shi zimine kutya omathimbo gamwe oha kala e uvite kutya oye awike e na omaupyakadhi ogendji. Ihe okwa dhimbulukwa kutya Jehova okwe mu yambidhidha shi thike peni momukokomoko gwomimvo 20 dha ka pita. Okwi ilombwele mwene a ti: ‘Kala omudhiginini. Ino etha po okulongela Jehova ngashingeyi, konima sho e ku kwathela wu idhidhimikile oonkalo oondhigu.’ Nangoye oto vulu okutedhatedha kunkene Jehova e ku kwathela wu idhidhimike. Kala wu na uushili kutya oku ku wete ethimbo kehe to idhidhimikile eshongo nonokutya ote ke ku pa ondjambi. (Mat. 5:10-12) Opo nduno ngele uudhigu uunene wa tameke oto ka kala nale wu shi nkene wu na okwiidhidhimika noto ka kala wa tokola toko wu tsikile nokwiidhidhimika.

ULIKA OLUKENO

9. Egongalo lyomuAntiokia shomuSiria olya li lyu ulukile ngiini aamwahe olukeno?

⁹ Natu taleni shoka sha li sha ningwa po sho Aakriste yomuJudea ya li ya adhika kondjala onene. Konima sho egongalo lyomuAntiokia shomuSiria lyu uvu kombinga yondjala ndjoka, kapu na omalimbililo kutya oya li ya uvile aamwahe yomuJudea olukeno. Onkee ano, oya li ya ningi po sha ya kwathele aamwatate naamwameme mboka. Oya “tokola kutya kehe gumwe gwomuyo na gandje iikwatha ngaashi ta vulu, opo yi tuminwe aamwayina meitaalo mbeyaka ya kala muJudea.” (Iil. 11:27-30) Nonando aamwatate mboka ya adhika kondjala oya li ya kala kiitopolwa yimwe yokokule, Aakriste yomuAntiokia oya li ya tokola oku ya kwathela. — 1 Joh. 3:17, 18.

10. Omomikalo dhimwe dhini tatu vulu okuulika olukeno, uuna ooitaali ooyakwetu ya gumwa kiiponga yopaunshitwe? (Tala wo ethano.)

¹⁰ Natse otatu vulu okuulika olukeno kunena, ngele otu uvu kutya ooitaali ooyakwetu oya gumwa kiiponga yopaunshitwe. Ohatu gandja nziya omakwatho, tashi vulika mokupula aakuluntugongalo ngele otatu vulu okukwathela moproyeka yontumba, mokugandja omayambidhidho giilonga yomuuyuni awuhe, nenge mokugalikanena mboka ya dhengwa kiiponga yopaunshitwe.b (Omayel. 17:17) Pashiholelwa, mo 2020 Ookomitiye dhokuunganeka Omakwatho gaamboka ya dhengwa kiiponga yopaunshitwe dhi vulithe po 950 odha li dha unganekwa muuyuni awuhe, dhi sile oshimpwiyu mboka ya gumwa komukithi gwekomba. Otwa pandula noonkondo aamwatate naamwameme mboka haya kutha ombinga miilonga yokugandja iikwatha. Molwaashoka oya li ye uvitile aamwahe olukeno ohaye ya pe iipumbiwa, ohaye ya kwathele ya tsikile okulongela Jehova, nopoompito dhimwe ohaya tungulula nenge ya opalekulule omagumbo gawo nomahala gokugongalela. — Yelekanitha 2 Aakorinto 8:1-4.

11. Uuna tatu ulukile yalwe olukeno, ohatu simanekitha Tate yetu gwomegulu ngiini?

¹¹ Uuna tatu ulukile yalwe olukeno molwaashoka ya dhengwa kiiponga yopaunshitwe, yalwe ohaya kala ye wete eiyambo lyetu ndyoka tatu ningi. Pashiholelwa, mo 2019 oshikungulu shombepo shedhina Dorian, osha li sha hanagula po Oshinyanga shUukwaniilwa moBahamas. Manga aamwatate ya li taya tungulula oshinyanga shoka, oya li ya pula omutungi gumwe ngoka kee shi Onzapo yaJehova kutya ote ke ya pula shi thike peni, ngele okwe ya longele iilonga mbyoka ya li ya pumbwa okulongwa. Okwe ya lombwele a ti: “Otandi ke mu pa iilongitho, aaniilonga niitungithi. Onda hala owala oku shi ningila ehangano lyeni, oshoka ondi inyengithwa komukalo moka mwa kwathele ookuume keni.” Aantu oyendji muuyuni kaye shi Jehova. Ihe oyendji ohaya kala ye wete shoka Oonzapo dhaJehova tadhi ningi dhi kwathele yalwe. Inatu nyanyukwa tuu noonkondo, sho tu shi kutya uuna tatu ulukile yalwe olukeno otashi vulu okuningitha aantu ya kale ya hala okutseya oshindji kombinga yaJehova, ngoka “u udha esilohenda.” — Ef. 2:4.

12. Ongiini okukokeka olukeno kunena, taku tu longekidhile uudhigu uunene? (Ehololo 13:16, 17)

¹² Omolwashike twa pumbwa okuulika olukeno pethimbo lyuudhigu uunene? Ombiimbeli oya ulika kutya mboka itaaya ka ambidhidha omapangelo otaya ka adhika komaupyakadhi ngashingeyi nosho wo pethimbo lyuudhigu uunene. (Lesha Ehololo 13:16, 17.) Aamwatate naamwameme otashi vulika ya pumbwa ekwatho, opo ya vule okumona iinima mbyoka ya pumbwa. Sho Omukwaniilwa gwetu, Jesus Kristus, te ke ya okupangula aantu otashi vulika tu kale twa hala e tu ulukile olukeno noku tu hiye tu “thigulule Oshilongo” shaKalunga. — Mat. 25:34-40.

KALA WU HOLE AAMWAHO

13. Ngaashi sha ulikwa mAaroma 15:7, Aakriste yopetameko oya li ya koleke ngiini ohole yawo yokuholathana?

¹³ Kehe gumwe oku shi kutya Aakriste yonale oya li ye holathane. Ihe mbela osha li ngaa oshipu kuyo okuulukilathana ohole? Natu ka taleni keyooloko ndyoka lya li megongalo lyomuRoma. Yamwe yomaakwanegongalo oya li Aajuda mboka ya longwa okuvulika kOmpango yaMoses, ihe yalwe oya li ya za miigwana yilwe noya za momaputuko gi ili nogi ili. Aakriste yamwe otashi vulika ya li aapika, omanga yamwe ya li kaaye shi aapika. Otashi vulika yamwe ya li nokuli oyo ooyene yaapika. Ongiini Aakriste mbono ya li ya tsikile okuulukilathana ohole, nonando opwa li pu na omayooloko? Omuyapostoli Paulus okwa li e ya ladhipike ya ‘taambathane.’ (Lesha Aaroma 15:7.) Mbela okwa li a hala okutya ngiini? Oshitya sha tolokwa “taamba” otashi ti okutaambela gumwe nombili nenge neyakulo lyaayenda megumbo lyoye nenge mongundu yookuume. Pashiholelwa, Paulus okwa li a lombwele Filemon nkene e na okutaamba ko omupika Onesimus, ngoka a li a fadhuka po, a ti: “Mu taamba ngaashi to taamba ndje.” (Filem. 17) Priskila naAkula nayo oya li ya taamba ko Apollos, ngoka a li kee shi oshindji kombinga yUukriste ngaashi yo, mokuya “naye kaandjawo.” (Iil. 18:26) Aakriste mboka kaya li ya etha omayooloko ngoka ga li mokati kawo ge ya to pole noya li ya taambathana.

14. Anna nomusamane gwe oya li ya ulike ohole ngiini?

¹⁴ Natse otatu vulu okuulukila aamwatate naamwameme ohole mokupanga uukuume nayo nokukala ethimbo pamwe nayo. Naashoka otashi ke ya inyengitha yetu ulukile wo natse ohole. (2 Kor. 6:11-13) Natu ka taleni koshimoniwa shaAnna nomusamane gwe. Nziya sho ya tembukile kUuzilo waAfrika, omolwashinakugwanithwa shawo oshipe shuutumwa, omukithi gwekomba ogwa tameke. Omolwomukithi gwekomba kaya li ya vulu okugongala pamwe negongalo oshipala noshipala noka sha li oshipu kuyo ya tseyathane naamwatate naamwameme. Oya li ya ulukile ngiini aamwahe ohole? Oya li ya longitha omakwatathano gopaintaneta ya kwatathane naamwatate naamwameme yaahoka noku ya lombwela kutya oya halelela oku ya tseya nawa. Omaukwanegumbo oga li ga pandula, omolwohole ndjoka ga li ga ulukilwa kaatumwa, noga tameke oku ya dhengela noku ya tumina omatumwalaka. Omolwashike aatumwa ya li ya kambadhala okutseya nawa aamwatate naamwameme yomegongalo lyawo epe? Anna okwa ti: “Itandi dhimbwa nando ohole ndjoka nda li nda ulukilwa kaamwatate naamwameme, pamwe nooyandjetu wandje, momathimbo omawanawa nomawinayi. Oshiholelwa shawo oshi inyengitha ndje nangame ndi ulukile yalwe ohole.”

15. Oshike tatu ilongo koshiholelwa shaVanessa shi na ko nasha nokuhola aamwatate naamwameme ayehe? (Tala wo ethano.)

¹⁵ Oyendji yomutse otu li momagongalo moka mu na aamwatate naamwameme ya za momaputuko ga yoolokathana noye na omaukwatya ga yoolokathana. Otatu vulu okukoleka ohole yetu yoku ya hola mokugandja eitulomo komaukwatya gawo ngoka omawanawa. Omumwameme gwedhina Vanessa, ngoka ha kala moNew Zealand, okwa li ha mono oshidhigu okukala e na ekwatathano ewanawa nayamwe yomegongalo lyawo. Ihe okwa tokola kutya pehala lyoku ya yanda, ota kala ha kala pamwe nayo ethimbo ele. Sho e shi ningi oshe mu kwathele a mone shoka Jehova e hole muyo. Vanessa ota ti: “Molwaashoka omusamane gwandje okwa li omutonatelishikandjo otwa li hatu kala pamwe naamwameme naamwatate oyendji mboka ye na omaukwatya ga yoolokathana nonda li nda mono oshipu okukala pamwe nayo. Ngashingeyi ondi hole aamwatate yomaukwatya ga yoolokathana. Osha yela kutya Jehova naye oku shi hole, molwaashoka oye e tu nanena atuhe kuye.” Ngele otwi ilongo okutala ko yalwe ngaashi Jehova he ya tala ko, otatu ulike kutya otu ya hole. — 2 Kor. 8:24.

16. Omolwashike ohole yokuhola aamwatate naamwameme tayi ka kala ya simana, pethimbo lyuudhigu uunene? (Tala wo ethano.)

¹⁶ Pethimbo lyuudhigu uunene otatu ka pumbwa okukala tu hole aamwatate naamwameme. Uuna uudhigu uunene wa tameke, openi tatu ka adha egameno? Natu taleni shoka Jehova a li a lombwele oshigwana she shi ninge, sho Babilonia shonale sha li sha ponokelwa. Okwa ti: “Ne aantu yandje, indeni momagumbo geni, mu iyedhilile mo. Holameni okathimbo, manga ondjahi yaKalunga tayi pitilile po.” (Jes. 26:20) Otashi vulika tatu ka kala twa pumbwa okulandula omalombwelo ngoka pethimbo lyuudhigu uunene. Pethimbo ndyoka uutumbulilo “momagumbo geni” otashi vulika wu ka ukithwe komagongalo getu. Pethimbo lyuudhigu uunene Jehova oku uvaneka kutya ote ke tu gamena, ngele otwa tsikile okukala twa hangana naamwatate naamwameme. Onkee ano, natu longe nuudhiginini ngashingeyi tu kale hatu idhidhimikile aamwatate naamwameme, nokukala wo tu ya hole. Osha simana tu ninge ngaaka, oshoka otashi vulika osho tashi ke tu etela ehupitho.

ILONGEKIDHA NGASHINGEYI

17. Ngele otwa kala twi ilongekidha ngashingeyi, oshike tatu ka vula okuninga pethimbo lyuudhigu uunene?

¹⁷ “Esiku enene lyOmuwa” otali ka kala edhigu noonkondo kaantu ayehe. (Sef. 1:14, 15) Oshigwana shaJehova otashi ka hepekwa wo. Ihe ngele otwa kala twi ilongekidha ngashingeyi, otatu ka vula okukala twa ngungumana nokukwathela yalwe. Otatu ka idhidhimikila uupyakadhi kehe mboka tashi vulika wu tu adhe. Uuna ooitaali ooyakwetu taya mono iihuna, otatu ka ninga nawa ngele otwe ya kwathele moku ya ulukila olukeno noku ya pa shoka ya pumbwa. Ngele otwi ilongo okukala tu hole aamwatate naamwameme ngashingeyi, otatu ka kala tu ya hole unene monakuyiwa. Opo nduno Jehova ote ke tu pa ondjambi yomwenyo gwaaluhe muuyuni moka iiponga yopaunshitwe nuudhigu kehe itaawu ka dhimbulukiwa we. — Jes. 65:17.