Onghedi yoye yokwiilikana nai nwefwe mo keendjovo daJesus

“Jesus eshi a mana okupopya eendjovo edi, ovanhu ova kuminwa elongo laye.” — MAT. 7:28.

1, 2. Omolwashike eengudu dovanhu da li da kuminwa onghedi yaJesus yokuhonga?

OTWA pumbwa okutambula ko nokutula moilonga mokukalamwenyo kwetu eendjovo dOmona waKalunga ewifa, Jesus Kristus. Kapa li nande omunhu umwe vali oo a li ha popi novanhu monghedi ya denga mbada ngaashi Jesus, nomolwaasho ovanhu va li va kuminwa omahongo aye oo taa hangwa mEudifo laye lokOmhunda. — Lesha Mateus 7:28, 29.

² Omona waKalunga ka li a honga ovanhu ngaashi ovanongo vomishangwa, ovo eendjovo davo da li de likolelela komahongo ovanhu inava wanenena. Kristus okwa li a honga ovanhu “ngaashi [oo] e neenghono” molwaashi eendjovo odo a li a popya oda dja kuKalunga. (Joh. 12:50) Paife natu ka taleni nghee eendjovo dikwao odo Jesus a li a popya mEudifo laye lokOmhunda tadi dulu okunwefa mo onghedi yetu yokwiilikana.

Inamu ilikana ngaashi ovanaihelele

3. Hokolola pauxupi osho Jesus a li a popya muMateus 6:5.

³ Eilikano oli li oshitukulwa sha fimana shelongelokalunga lashili. Onghee hano, otu na okukala hatu ilikana kuJehova pandjikilile. Ashike omailikano etu oku na okunwefwa mo keendjovo daJesus odo a li a popya mEudifo laye lokOmhunda. Jesus okwa ti: ‘Ngenge tamu ilikana, inamu kala ngaashi ovanaihelele; osheshi ve hole okukala ofika nokwiilikana meeshinagoga nopomashakeneno eendjila, va monike kovanhu. Oshili handi mu lombwele: ovo va pewa ondjabi yavo.’ — Mat. 6:5.

4-6. (a) Omolwashike Ovafarisai va li ve hole okwiilikana ‘ve li ofika meeshinagoga nopomashakeneno eendjila’? (b) Ongahelipi ovanaihelele ovo va li va “pewa ondjabi yavo”?

⁴ Ovahongwa vaJesus kava li ve na okwiilikana ngaashi Ovafarisai “ovanaihelele” ovo va li ve lishii ouyuki nova li have limonikifa ovayuki moipafi yovanhu. (Mat. 23:13-32) Ovanaihelele ovo ova li ve hole okwiilikana ve li ‘ofika meeshinagoga nopomashakeneno eendjila.’ Mbela omolwashike va li hava ningile ngaho? Okwa li have shi ningi opo va ‘va monike kovanhu.’ Ovajuda vomefelemudo lotete ova li ve na onghedindjikilile yokwoongala pamwe opo va ilikane pefimbo lomaxwikiloyambo kotembeli (pomuwoi wongula nosho yo ponhatu yokomatango). Ovakalimo vahapu vomuJerusalem okwa li hava ka ilikana pamwe nongudu yovalongelikalunga kotembeli. Ovajuda ovatilikalunga ovo va li kondje yaJerusalem ova li hava ilikana luvali mefiku ve li ‘ofika meeshinagoga.’ — Yelekanifa naLukas 18:11, 13.

⁵ Molwaashi ovanhu vahapu kava li hava hangika popepi notembeli ile noshinagoga pomafimbo oo okwiilikana, okwa li hava dulu okwiilikanena keshe opo tava hangika. Vamwe okwa li hava kala va hala efimbo lokwiilikana li va hange ‘pomashakeneno eendjila,’ molwaashi okwa li hava kala va hala ‘okumonika kovanhu’ ovo tava ende pomashakeneno eendjila. Ovanaihelele ovo va li ve lishii ouyuki ova li hava “ningi omailikano malemale pamoniko” opo va hokiwe kwaavo tava ende po. (Luk. 20:47) Katu na okukala tu na oikala ya tya ngaho.

⁶ Jesus okwa li a popya kutya ovanaihelele ovo ova li va “pewa ondjabi yavo.” Ova li hava kala va halelela okufimanekwa nokutumbalekwa kovanhu vakwao. Ondjabi oyo oyo aike va li tava ka pewa molwaashi Jehova ka li ta ka nyamukula omailikano avo omolwoihelele yavo. Mepingafano naasho, Kalunga okwa li ta ka nyamukula omailikano ovashikuli vaKristus vashili, ngaashi shi liwetikile meendjovo daJesus odo a li a landulifa ko.

7. Okwiilikanena “monduda yoye” osha hala okutya shike?

⁷ ‘Ndelenee ove ngenge to ilikana, inda monduda yoye, idila po oshivelo shoye, u ilikane Xo, ou ha hala meholeko; ndele Xo ou ha mono meholeko, ote ku futu moipafi.’ (Mat. 6:6) Eshi Jesus a li a tya kutya ngeenge to ilikana inda monduda yoye ndele to idile omuvelo woye, ka li a hala okutya omunhu ita dulu okwiilikana moipafi yeongalo. Omayele oo okwa li a yandjwa opo ovanhu vaha ilikane omailikano omoipafi oo taa ilikanwa nelalakano lokuyukifa elitulemo kuvo vene nova fimanekwe kuvamwe. Otu na okukaleka oshitwa osho momadiladilo ngeenge twa pewa oufembanghenda wokwiilikana moipafi yeongalo. Paife natu ka taleni vali kekumaido limwe li na sha neilikano olo Jesus a li a yandja, olo tu na okukala metwokumwe nalo.

8. PaMateus 6:7, onghedi ya puka yokwiilikana ilipi tu na okuhenuka?

⁸ ‘Ngenge tamu ilikana, inamu popyaana ngaashi ovapaani ovo ve shii tava udilwa okupopyaana kweendjovo dihapu.’ (Mat. 6:7) Jesus okwa li a popya vali kombinga yonghedi imwe ya puka yokwiilikana, okweendulula omailikano. Ka li a hala okutya katu na okweendulula omailikano oo taa di komutima nosho yo omautumbulilo olupandu. Jesus naye okwa li a ilikana ta endulula “eendjovo tuu dinya” a li a popya nale, eshi a li moshikunino shaGetsemane onguloshi oyo ya tetekela okufya kwaye. — Mark. 14:32-39.

9, 10. Omeityo lilipi tuhe na okweendulula omailikano?

⁹ Inashi yuka kufye okweendulula omailikano ngaashi “ovapaani.” Ovapaani ovo ohava ‘popyaana’ tava endulula omautumbulilo mahapu inaa fimana oo ve lihonga momutwe. Ovalongeli voshikalunga Baal kava li va mona ekwafo eshi va li tava ifana edina loshikalunga osho ‘okudja ongula fiyo pokati komutenya, tava ti: Akutu Baal, tu nyamukula!’ (1 Eeh. 18:26) Ovanhu vahapu kunena ohava endulula omailikano, tava diladila kutya pamwe omailikano avo otaa ‘udika.’ Ndele Jesus okwe tu kwafela tu mone kutya Jehova iha hokwa ovanhu ovo hava ‘popyaana’ ngeenge tava ilikana, tava endulula omailikano avo malemale. Jesus okwa ti vali:

¹⁰ ‘Hano inamu va fa; osheshi Xo yeni e shi shii eshi mwe shi pumbwa fimbo inamu mu indila.’ (Mat. 6:8) Ovawiliki vahapu velongelokalunga lOshijuda ova li va fa ovapaani molwaashi ova li hava popyaana eendjovo dihapu ngeenge tava ilikana. Omailikano haa ilikanwa tashi di komutima oo a kwatela mo omahambelelo, omapandulo nomaindilo oku li oshitukulwa sha fimana shelongelokalunga lashili. (Fil. 4:6) Ndele osha puka okukala hatu ilikana hatu endulula oinima ya faafana lwoikando hatu diladila pamwe kutya Kalunga okwa dimbwa. Ngeenge hatu ilikana, otu na okudimbuluka kutya ohatu popi naao ‘e shii osho twa pumbwa fimbo inatu mu indila.’

11. Oshike osho tu na okudimbuluka ngeenge twa pewa oufembanghenda wokwiilikana moipafi?

¹¹ Eendjovo daJesus odo a li a popya shi na sha nomailikano oo Kalunga ina hokwa odi na oku tu dimbulukifa kutya Kalunga iha hokwa omailikano oo taa ilikanwa taku longifwa oitya ya kitakana noinai pumbiwa. Otu na yo okudimbuluka kutya omailikano oo haa ilikanwa moipafi ihaa ilikanwa nelalakano lokutunhula ovapwilikini ile oku va ningifa va kale tave lipula kutya eilikano otali xulu ngoo. Kakele kaasho, okuninga omashiivifo ile okukumaida ovapwilikini meilikano kaku li metwokumwe neendjovo odo Jesus a li a popya mEudifo lokOmhunda.

Jesus okwe tu honga nghee tu na okwiilikana

12. Outumbulilo “edina loye nali yapulwe” owa hala okutya shike?

¹² Nonande Jesus okwa li a londwela shi na sha nokulongifa nai oufembanghenda munene weilikano, okwa li a honga ovahongwa vaye nghee ve na okwiilikana. (Lesha Mateus 6:9-13.) Oshihopaenenwa sheilikano osho Jesus a li a honga kashi na okulihongwa momutwe nokukala tashi endululwa lwoikando. Ponhele yaasho, Jesus okwe tu pa oshihopaenenwa osho sheilikano opo shi tu kwafele tu lihonge okwiilikana. Pashihopaenenwa, Jesus okwa li a pitifa Kalunga komesho, eshi a hovela neendjovo tadi ti: ‘Tate yetu ou u li meulu! Edina loye nali yapulwe.’ (Mat. 6:9) Ohatu ilikana Jehova hatu ti, “Tate yetu” molwaashi oye Omushiti wetu, oo ha kala “meulu,” olo li li kokule nedu. (Deut. 32:6; 2 Omaf. 6:21; Oil. 17:24, 28) Okulongifa outumbulilo “yetu” pauhapu oku na oku tu dimbulukifa kutya ovaitaveli vakwetu navo ove na ekwatafano lopofingo naKalunga. Ngeenge hatu ilikana hatu ti “edina loye nali yapulwe,” ohatu indile Jehova a katuke eenghatu a yapulife edina laye olo la kala tali shekwa meenghedi dihapu okudja ngoo eshi ounashibofa wa li wa tukulwa muEden. Opo Jehova a nyamukule eindilo olo, ota ka xulifa po oukolokoshi kombada yedu, nokungaho ota ka yapulifa edina laye. — Hes. 36:23.

13. (a) Eindilo kutya “ouhamba woye nau uye” otali ka wanifwa ngahelipi? (b) Okuwanifwa kwehalo laKalunga kombada yedu otaku ka kwatela mo shike?

¹³ ‘Ouhamba woye nau uye; ehalo loye nali wanifwe kombada yedu yo ngaashi meulu.’ (Mat. 6:10) Eendjovo odo otadi tu dimbulukifa kutya “ouhamba” oo epangelo lopaMessias olo li li meke laKristus nosho yo ovanyumunwa “ovayapuki” ovo tava ka pangela pamwe naye. (Dan. 7:13, 14, 18; Jes. 9:5, 6) Ngeenge hatu ilikana ouhamba u “uye,” ohatu indile Ouhamba waKalunga u uye kombada yedu u katukile onghatu ovanhu aveshe ovo ve li omhinge nao. Ouhamba waKalunga otau uya mafiku, notau ka ningifa edu alishe oparadisa omo tamu ka kala ouyuki, ombili nosho yo ehepuluko. (Eps. 72:1-15; Dan. 2:44; 2 Pet. 3:13) Ehalo laJehova otali wanifwa nale meulu, onghee hano, ngeenge hatu ilikana ehalo laKalunga li wanifwe yo kombada yedu ohatu indile Kalunga a wanife po omalalakano aye e na sha nedu, mwa kwatelwa okuhanauna po ovapataneki vaye kunena ngaashi a li a ninga mefimbo lonale. — Lesha Epsalme 83:2, 3, 14-19.

14. Omolwashike sha wapala okwiilikana Kalunga e tu pe ‘omungome wonena,’ ile tu tye wefiku olo tuu olo?

¹⁴ ‘Omungome wetu womafiku aeshe u tu pa yo nena.’ (Mat. 6:11; Luk. 11:3) Ngeenge hatu ilikana ngaho, ohatu indile Kalunga etu pe oikulya oyo twa pumbwa “nena,” ile tu tye mefiku olo tuu olo. Osho otashi ulike kutya otwa itavela kutya Jehova ota dulu okufiloshisho eemhumbwe detu defiku keshe. Ndele osho itashi ti kutya otu na okwiilikana Jehova e tu pe oikulya ihapu sha pitilila. Okwiindila Jehova a file oshisho eemhumbwe detu defiku keshe otashi dulika shi tu dimbulukife kutya Kalunga okwa li a lombwela Ovaisrael va ongele omanna a henena ‘efiku keshe.’ — Ex. 16:4.

15. Yelifa kutya osha hala okutya shike ngeenge hatu ilikana hatu ti: “Tu kufila po omatimba etu, ngaashi nafye yo hatu kufile po ovanamatimba nafye.”

¹⁵ Eindilo likwao olo Jesus a ka shikulifa ko moshihopaenenwa shaye sheilikano otali tu kwafele tu yukife elitulemo letu koshinima shimwe osho twa pumbwa okuninga. Jesus okwa ti: ‘Tu kufila po omatimba etu, ngaashi nafye yo hatu kufile po ovanamatimba nafye.’ (Mat. 6:12) Jehova ote ke tu dimina po ashike omatimba etu ngeenge otwa “kufile po” ovo va nyona kufye. (Lesha Mateus 6:14, 15.) Otu na okukala hatu dimine po vamwe nehalo liwa. — Ef. 4:32; Kol. 3:13.

16. Osha hala okutya shike ngeenge hatu ilikana hatu ti ino tu twala momayeleko ndele tu xupifa komunawii?

¹⁶ ‘Ino tu twala momayeleko, ndelenee tu xupifa [komunawii, NW].’ (Mat. 6:13) Mbela eendjovo odo oda hala okutya shike? Oshinima shimwe sha yela oshosho kutya: Jehova ihe tu yeleke tu nyone. (Lesha Jakob 1:13.) Ndele Satana ‘omunawii’, oye “omuhongauli.” (Mat. 4:3) Ashike Ombibeli oya ti kutya Jehova oha efa oinima i ningwe. (Rut 1:20, 21; Omuud. 11:5) Onghee hano, ngeenge hatu ilikana hatu ti: “Ino tu twala momayeleko,” ohatu indile Jehova aha efe tu liyandje ngeenge hatu yelekwa tu nyone kuye. Hauxuuninwa, ngeenge hatu ilikana hatu ti “tu xupifa komunawii,” ohatu indile Jehova aha efe Satana e tu finde. Ohatu dulu okukala noushili kutya Jehova ‘ite ke tu efa tu yelekwe nomayeleko e dule eenghono detu.’ — Lesha 1 Ovakorinto 10:13.

Kaleni ‘nokwiindila, okukonga nokukonghola’

17, 18. Okukala hatu ‘indile, hatu kongo nohatu konghola’ osha hala okutya shike?

¹⁷ Omuyapostoli Paulus okwa li a ladipika ovaitaveli vakwao a ti: “Diinineni mokwiilikana.” (Rom. 12:12) Jesus naye okwa li a yandja eladipiko la yukila oko eshi a ti: ‘Indileni, ndee tamu pewa; kongeni, ndee tamu mono; kongholeni, ndee tamu yeululwa. Osheshi keshe tuu ou ta indile ota pewa, naau ta kongo, ota mono, naau ta konghola, oye ta yeululwa.’ (Mat. 7:7, 8) Osha yuka okukala hatu ‘indile’ oshinima keshe osho shi li metwokumwe nehalo laKalunga. Omuyapostoli Johannes okwa li a koleka eendjovo odo daJesus eshi a ti: “Elineekelo eli letu tu li na [muKalunga] oleli: ngenge hatu mu indile sha pahalo laye, ote tu udu.” — 1 Joh. 5:14.

¹⁸ Omayele aJesus e na sha nokukala hatu ‘indile nosho yo okukonga’ otaa ulike kutya otu na okudiinina meilikano. Osha fimana yo okukala hatu ‘konghola’ opo tu dule okuya mOuhamba nokuhafela omanangeko noupuna ao. Ndele mbela ohatu dulu ngoo okukala nelineekelo kutya Kalunga ota ka nyamukula omailikano etu? Heeno, ohatu dulu okukala nelineekelo ngeenge otu li ovadiinini kuJehova, molwaashi Kristus okwa ti: “Osheshi keshe tuu ou ta indile ota pewa, naau ta kongo, ota mono, naau ta konghola, oye ta yeululwa.” Oimoniwa ihapu yovapiya vaJehova otai ulike shili kutya Kalunga oku li “Omuudi womailikano.” — Eps. 65:3.

19, 20. Paendjovo daJesus odo di li muMateus 7:9-11, omeityo lilipi Jehova a fa xe omudali wopanhu omunahole?

¹⁹ Jesus okwa faafanifa Jehova naxe wopanhu omunahole, oo ha pe ovana vaye oinima iwa. Diladila nee ngeno opo u li eshi Jesus ta yandje oshipopiwa shaye osho hashi ifanwa Eudifo lokOmhunda, nou udite ta ti: ‘Omu na tuu omunhu mokati keni, omona ngenge te mu indile omungome, ndee te mu pe emanya, ndele, ngenge te mu indile oshi, ndee te mu pe eyoka? Hano onye ovai, ngenge mu shii okupa ovana veni oipewa iwa, unene tuu Xo yeni meulu ota yandje ouwa kuava, tave mu indile!’ — Mat. 7:9-11.

²⁰ Nonande ooxe vopanhu ‘ovai’ meityo olo kutya inava wanenena, ove hole ovana vavo paushitwe. Xe yopanhu omunahole iha ningi onyanya ovana vaye, ndele oha kendabala alushe oku va pa “oipewa iwa.” Molwaashi Tate yetu womeulu omunahole oha ungaunga nafye ngaashi omudali wopanhu, ohe tu pe “oipewa iwa,” ngaashi omhepo iyapuki. (Luk. 11:13) Omhepo iyapuki otai dulu oku tu kwafela tu longele Jehova monghedi oyo ta hokwa, e li Omuyandji ‘woshipewa keshe shiwa noshali keshe ya wanenena.’ — Jak. 1:17.

Natu twikileni okumona ouwa meendjovo daJesus

21, 22. Oshike shididilikwedi shi na sha nEudifo lokOmhunda, nou udite ngahelipi shi na sha neendjovo odo Jesus a li a popya?

²¹ Kombada yedu alishe shidalelwe ku yandjwe oshipopiwa sha denga mbada ngaashi osho hashi ifanwa Eudifo lokOmhunda. Eudifo olo olididilikwedi molwaashi otali tu hongo shihapu kombinga yaKalunga. Ngaashi twe shi mona moitukulwa itatu ya pambafana ei twa kundafana, ohatu dulu okumona ouwa muhapu ngeenge otwa tula moilonga oilihongomwa yomEudifo lokOmhunda. Eendjovo daJesus otadi dulu okuxwepopaleka okukalamwenyo kwetu paife notadi tu pe yo eteelelo li na sha nonakwiiwa ihafifa.

²² Moitukulwa ei itatu ya pambafana otwa kundafana mo ashike omamona onhumba opamhepo omEudifo laJesus lokOmhunda. Onghee hano, itashi kumwifa eshi ovanhu ovo va li va uda oshipopiwa osho va li va “kuminwa elongo laye.” (Mat. 7:28) Nafye osho tu na okukala tu udite ngaho ngeenge otwa yadifa omadiladilo etu nomitima detu neendjovo odo dOmuhongi Munene, Jesus Kristus nosho yo neendjovo daye dikwao di na ondilo.

Oto nyamukula ngahelipi?

• Jesus okwa li a popya shike shi na sha nomailikano ovanaihelele?

• Omolwashike tuhe na okweendulula omautumbulilo ngeenge hatu ilikana?

• Omaindilo elipi taa hangwa moshihopaenenwa sheilikano laJesus?

• Ongahelipi hatu dulu okukala hatu ‘indile, hatu kongo nosho yo okukonghola’?

[Efano pepandja 15]

Mbela ou shii kutya omolwashike sha yuka okwiilikana tu pewe omungome wetu wefiku keshe?