Omalongelokalunga giifundja ihaga longo noihaga popi oshili kombinga yaKalunga

Ngele Kalunga oye ohole, omolwashike iinima oyindji iiwinayi hayi ningwa momalongelokalunga ngoka haga ti kutya oye taga longele? Omolwaashoka omalongelokalunga ngoka giifundja, ohaga longo nohaga popi iifundja kombinga yaKalunga. Iifundja yini haga longo nohaga popi kombinga ye? Kalunga oha kala e shi uvitile ngiini? Ota ka ninga po shike kombinga yiifundja mbyono?

1. Omalongelokalunga giifundja ohaga longo omalongo geni giifundja kombinga yaKalunga?

Omalongelokalunga giifundja oga “pingakanitha oshili yaKalunga niifundja.” (Aaroma 1:25) Pashiholelwa, omalongelokalunga ogendji ihaga longo iilyo yago edhina lyaKalunga. Ihe Ombiimbeli otayi ti kutya edhina lyaKalunga oli na okulongithwa. (Aaroma 10:13, 14) Aawiliki yamwe yomalongelokalunga ohaya ti kutya uuna oshinima oshiwinayi sha ningwa, ehalo lyaKalunga. Ihe shoka kashi shi shoshili. Kalunga haye nando ha etitha iinima iiwinayi. (Lesha Jakob 1:13.) Shiyemateka, aantu oyendji oya hedha kokule naKalunga, omolwiifundja mbyoka yomalongelokalunga.

2. Iinima yini hayi ningwa komalongelokalunga giifundja, kaayi li metsokumwe nehalo lyaKalunga?

Omalongelokalunga giifundja ihaga ungaunga naantu ngaashi Jehova. Ombiimbeli otayi ti kutya ‘oondjo dhomalongelokalunga giifundja odha ndumbala sigo okegulu.’ (Ehololo 18:5) Uule womimvo omathele, omalongelokalunga oga kala nokukutha ombinga mopolotika, okwaambidhidha iita noga etitha omaso gaantu oyendji noonkondo. Aawiliki yomalongelokalunga yamwe ohaya kala ya hala okuninga aayamba nohaya thiminike iilyo yawo yi ya pe iimaliwa, opo ye ki ilandele iinima yondilo. Iinima mbyoka haya ningi, otayi ulike kutya Kalunga kaye mu shi noitaya vulu oku mu kalela po. — Lesha 1 Johannes 4:8.

3. Kalunga oku uvitile ngiini omalongelokalunga giifundja?

Ngele iinima mbyoka hayi ningwa momalongelokalunga giifundja ohayi ku uvitha nayi, sho to tala Jehova oku yi uvitile ngiini? Jehova oku hole aantu, ihe oha kala uvitile nayi aawiliki yomalongelokalunga mboka haya longo iifundja kombinga ye nohaya ungaunga nayi niilyo yawo. Oku uvaneka kutya omalongelokalunga giifundja otaga ka hanagulwa po ‘noitaga ka monika we nando esiku limwe.’ (Ehololo 18:21) Masiku Kalunga ota ka hanagula po omalongelokalunga agehe giifundja. — Ehololo 18:8.

ILONGA OSHINDJI

4. Kalunga ina hokwa omalongelokalunga agehe

Aantu oyendji oyi itaala kutya omalongelokalunga oga fa oondjila dha yoolokathana ndhoka adhihe dhu uka kuKalunga. Ihe mbela shono oshoshili ngaa? Lesha Mateus 7:13, 14, e tamu kundathana epulo tali landula:

• Ombiimbeli otayi ti ngiini kombinga yondjila ndjoka tayi fala komwenyo?

Dhana OKAVIDIO, e tamu kundathana epulo tali landula.

OKAVIDIO: Mbela Kalunga okwa hokwa omalongelokalunga agehe? — Oshitopolwa shokavidio (3:22)

• Mbela Ombiimbeli otayi ti kutya omalongelokalunga agehe otaga nyanyudha Kalunga?

5. Omalongelokalunga giifundja ihaga ulike kutya oge hole Kalunga

Omalongelokalunga agehe giifundja ohaga ningi iinima yi ili noyi ili, kaayi li metsokumwe nehalo lyaKalunga. Oshinima shimwe oshiwinayi noonkondo shoka haga ningi, okukutha ombinga miita. Opo wu mone oshiholelwa shimwe, dhana OKAVIDIO, e tamu kundathana omapulo taga landula.

OKAVIDIO: Shoka oongeleka dha ninga pethimbo lyIita Iitiyali yUuyuni (2:22)

• Oongeleka odhindji odha ninga shike pethimbo lyIita Iitiyali yUuyuni?

• Owu uvitile ngiini shoka dha ninga?

Lesha Johannes 13:34, 35; 17:16, e tamu kundathana omapulo taga landula:

• Jehova oha kala u uvitile ngiini omalongelokalunga sho haga kutha ombinga miita?

• Omalongelokalunga ogo hage etitha iinima iiwinayi oyindji mbyoka hayi ningwa. Omomikalo dhini omalongelokalunga ga ndopa okuulika kutya oge hole Kalunga?

6. Kalunga okwa hala aantu ya ze mo momalongelokalunga giifundja

Lesha Ehololo 18:4,a e tamu kundathana epulo tali landula:

• Owu uvite ngiini sho wa tseya kutya Kalunga okwa hala okuhupitha aantu mboka ya pukithwa komalongelokalunga giifundja?

7. Tsikila okwiilonga kombinga yaKalunga kashili

Mbela omalongelokalunga giifundja oge na okuguma etaloko lyoye li na ko nasha naKalunga? Dhiladhila komumati gwontumba ngoka ha tindi omapukululo omawanawa ngoka ha pewa kuhe. Omumati ngoka oha zi mo owala megumbo e ta ka ninga iinima iiwinayi. Ihe he ina panda shoka ha ningi. Omolwashike kaatu na okupa he ombedhi omolweihumbato ewinayi lyomwanamati ngoka?

• Mbela oshi li ngaa pauyuuki okupa Jehova ombedhi nokweetha po okwiilonga kombinga ye, omolwiinima iiwinayi mbyoka hayi ningwa komalongelokalunga giifundja?

OWI ILONGO SHIKE?

Omalongelokalunga giifundja ihaga longo aantu oshili nohaga ningi iinima iinyanyalithi, nonando ohaga ti kutya otaga longele Kalunga. Kalunga ote ke ga hanagula po.

Omapulo geendululo

• Owu uvitile ngiini shoka omalongelokalunga giifundja ga longa aantu nosho wo iinima mbyoka ga ninga?

• Jehova oku uvitile ngiini omalongelokalunga giifundja?

• Kalunga ota ka ningila shike omalongelokalunga giifundja?

UUYELELE WA GWEDHWA PO

Ilonga kombinga yomikalo mbali moka omalongelokalunga ihaaga nyanyudha Kalunga.

“Mbela omalongelokalunga agehe oga faathana? Agehe otaga longele ngaa Kalunga paushili?” (Oshitopolwa shi li kepandja lyetu lyokointaneta)

Omolwashike Jehova a hala tu mu longele pamwe nayalwe?

“Oshi na ngaa oshilonga okukala melongelokalunga lyontumba?” (Oshitopolwa shi li kepandja lyetu lyokointaneta)

Omusita gumwe okwa li a limbililwa elongelokalunga moka e li. Ihe shoka inashi mu imba i ilonge oshili kombinga yaKalunga.

“Omolwashike omusita gumwe a thigi po ongeleka ye?” (Penduka mo! Febuluali 2015)

Omimvo omathele, omalongelokalunga oga kala nokupopya iifundja kutya Kalunga ke na ko nasha naantu, ye oku na onyanya. Tala itatu yomuyo.

“Iifundja mbyoka hayi ningitha Kalunga a talike ko kutya ke shi omunahole” (Oshungolangelo, 1 Novomba 2013)