Mbela omalongelokalunga agehe oge li mondjila?

MUUYUNI mbuka tu li omu na omalongelokalunga ogendji. Eyalulo limwe ndyoka opo lya ningilwe olyu ulike kutya opu na omalongelokalunga 19 ngoka ogo thimba yi na ongodhi nagamwe omashona ge li 10 000. Shoka osha ningitha aantu ya kale taya hogolola omalongelokalunga ngoka ya hala. Onkee ano, mbela oshi na ngaa oshilonga kutya owu li melongelokalunga lini?

Aantu yamwe ohaya ti kutya omalongelokalunga ga yoolokathana oga fa oondjila dha yoolokathana ndhoka adhihe dhu uka kondundu yimwe. Kuyo kashi na eyooloko kutya nduno ondjila yini wa hogolola molwaashoka oondjila adhihe odhu uka kumwe akuke. Ohaya ti kutya oku na owala Kalunga gumwe Omunankondoadhihe, onkee ano, omalongelokalunga agehe ogu uka kuye.

Mbela oondjila adhihe odhu uka ngaa kuKalunga?

Jesus Kristus gumwe gwomaalongi yelongelokalunga ngoka a li ko mondjokonona, okwa popi kombinga yaashika sho a lombwele aalongwa ye a ti: “Indeni mo mu pitile mosheelo shoka sha patekidha, oshoka osheelo shoka oshinene nondjila ndjoka ya mbwalangandja otayi fala mekano, noku na oyendji mboka taye yi lamba. Ihe osheelo shoka oshishona nondjila ndjoka ya thinana otayi fala komwenyo, naashona yowala mboka taa yi mono.”—Mateus 7:13, 14.

Mbela sho Jesus a popi ngaaka, okwa li a hala okutya omalongelokalunga gamwe otaga “fala mekano”? Nenge okwa li te ya longo kutya oomboka owala kaaye shi ooitaali oyo ye li mondjila ndjoka ya mbwalangandja, omanga mboka yi itaala muKalunga kashi na nduno mbudhi kutya oye li melongelokalunga lini oyo owala ye li mondjila ndjoka tayi fala komwenyo?

Konima sho Jesus a popi kutya oku na owala oondjila mbali okwa gwedha ko ta ti: “Angaleni aahunganeki aafundja mboka taye ya kune molupe lwoonzi, ihe meni lyawo omambungu haga lyana.” (Mateus 7:15) Okwa popi ishewe ta ti: “Hakehe ngoka ti ithana ndje Omuwa, Omuwa, ta yi moshilongo shegulu, aawe, oye tuu ngoka ta gwanitha ehalo lyaTate yomegulu.” (Mateus 7:21) Ngele oku na ngoka hi iti kutya ye omupolofeti nenge ta ti kutya Jesus oye “Omuwa” gwe osha yeleka okutiwa kutya oku li melongelokalunga lyontumba. Osha yela nawa kutya Jesus okwa li ta londodha kutya hamalongelokalunga agehe ge li mondjila nonokutya haalongi yomalongelokalunga ayehe ye na okwiinekelwa.

Mbela otashi wapa ngaa omuntu a mone kutya ondjila ndji ya thinana oyini po?

Molwaashoka haandjila adhihe dhu uka kuKalunga, mbela ongiini to vulu okumona kutya ondjila yini ya thinana yomwaandhoka omayovi tayi fala komwenyo? Tala koshiholelwa shika: Dhiladhila owala ando wa kanena moshilando oshinene. Owa tokola wu pule ekwatho. Omuntu gumwe okwe ku lombwele nomukumo wu ye nondjila ndjoka yu uka kuuzilo. Gumwe okwe ku lombwele wu ye naandjoka yu uka kuuninginino. Omukwawo okwe ku lombwele wu hogolole ondjila kehe ndjoka wa hala okuya nayo. Hugunina omuntu gumwe okwe ku ulukile mokaalita hoka ke shi okwiinekelwa kutya ondjila yini wu na okuya nayo. Opo nduno okwe ku pe okaalita opo wu vule oku ka longitha mondjila yoye. Mbela ito ka kala tuu wu na etegameno kutya oto ka thika hoka to yi?

Onkee ano, ngele tashi ya pokuhogolola ondjila yelongelokalunga ndyoka li li mondjila otwa pumbwa okaalita kopambepo ke shi okwiinekelwa. Mbela opu na tuu okaalita ka tya ngaaka? Eeno, opo ke li. Okaalita hoka oko Ombiimbeli, ndjoka tayi ti: “Enyolo kehe olya nyolithwa kOmbepo yaKalunga noli na oshilonga shokulonga oshili, okukumagidha, okupukulula nokuulukila omuntu ondjila yu uka.”—2 Timoteus 3:16.

Otashi vulika wu na Ombiimbeli melaka lyoye ndjoka to vulu okulongitha yi li okaalita kopambepo. Oonzapo dhaJehova ndhoka hadhi nyanyangidha oshifo shika, odhi na etoloko lyOmbiimbeli li shi okwiinekelwa ndyoka hali ithanwa o-New World Translation of the Holy Scriptures. Onkee ano, ngele ku shi gumwe gwomOonzapo dhaJehova otashi vulika wu hogolole wu longithe omatoloko gamwe gi ili opo wu vule okuyoolola kutya elongelokalunga lini li li mondjila nenge lya puka. Onkee ano, oshifo shika osha longitha etoloko lyOmbiimbeli ndyoka hali longithwa komalongelokalunga galwe.

Sho to lesha oshitopolwa tashi landula, yelekanitha shoka wu shi nale naashoka Ombiimbeli tayi ti. Kaleka momadhiladhilo oohapu dhaJesus ndhoka tadhi popi kombinga ya nkene tatu vulu okudhimbulula mo elongelokalunga ndyoka li li mondjila naandyoka lya puka. Jesus okwa ti: “Omuti omwaanawa otagu imi iiyimati iiwanawa, ihe omuti omwiinayi otagu imi iiyimati iiwinayi. Omuti omwaanawa kagu wapa okwiima iiyimati iiwinayi, nomuti omwiinayi kagu wapa okwiima iiyimati iiwanawa.” (Mateus 7:17, 18) Ngashingeyi lesha kombinga yiiyimati iiwanawa yi li owala itatu mbyoka Ombiimbeli ya ti kutya ota yi ka dhimbululitha mo “omuti omwaanawa.”

[Oohapu dha simana pepandja 3]

Ombiimbeli oya fa okaalita ke shi okwiinekelwa hoka taka vulu okukwathela omuntu a mone elongelokalunga ndyoka li li mondjila