Ontopolwa 20

Mbela owi iholele komeho?

MBELA owu shi omuntu gumwe ngoka i iholele komeho?— Otashi vulika u undule po omuntu ngoka e li komeho opo a kale oye gwotango. Mbela owa mona nale oshinima sha tya ngaaka tashi ningwa?— Omulongi Omunene okwa li a mono nokuli aantu aakuluntu taya kambadhala okwiihogololela iipundi yokomeho nenge omahala ngoka ga simana. Jesus shika ka li e shi hole. Natu tale shoka sha li sha ningwapo.

Ombiimbeli otayi tu lombwele kutya Jesus okwa li a hiwa koshituthi oshinene kegumbo lyOmufarisayi ngoka a li omuwiliki gwelongelokalunga a simana. Sho Jesus a thiki mo, okwa li ta tala aayenda mboka nayo ya li ya hiwa sho taye ya mo noya li tayi ihogololele omahala ga simana. Onkee ano, okwa li a hokololele mboka ya hiwa ehokololo. Mbela owa hala oku li uva?—

Jesus okwa ti: “Ngele ku na ngoka e ku hiya koshituthi shohango, ino kuutumba kiipundi ya simana.” Mbela owa tseya kutya omolwashike Jesus a tile ngawo?— Okwa li e shi yelitha kutya otashi vulika pu na gumwe a simana e ku vule a hiwa wo. Onkee ano, ngaashi wu shi wete pethano mpoka, ngoka a hiya aantu koshituthi okwe ya e ta ti: ‘Pa mukweni nguka ehala lyoye e to yi wu ka kuutumba pwaandiyaka lyokonima.’ Mbela omuyenda ngoka okwa li ta ka kala u uvite ngiini?— Okwa li ta ka kala a sa ohoni, molwaashoka aayenda ayehe ooyakwawo oya li taya ka kala taye mu tala sho ta yi a ka kuutumbe kehala lyokonima.

Jesus okwa li u ulike kutya kashi li mondjila okukala twa hala ehala lyokomeho. Onkee ano, okwa ti: ‘Ngele ku na ngoka e ku hiya koshituthi shohango, inda u ka kuutumbe mehala lyokonima, opo ngoka e ku hiya ngele te ya, ote ku lombwele ta ti: “Kuume kandje, ila huka kehala ewanawa.” Opo nduno shika otashi ku simanekitha montaneho yaayenda yalwe ayehe sho taya mono to yi u ka kuutumbe pehala lyokomeho.’—Lukas 14:1, 7-11.

Mbela oshitsa shoka Jesus a li a yelitha mehokololo lye owe shi uva ko?— Natu tale oshiholelwa shika tashi landula, tu tale ngele owe shi uva ko. Natu tye nduno oto londo mombesa moka tamu londo aantu oyendji. Mbela oto ke endelela u londe tango opo wu kuutumbe, omanga omukuluntu ta kala a thikama?— Mbela Jesus ota ka kala e shi hokwa ngele owe shi ningi?—

Otashi vulika gumwe a tye kutya Jesus ke na ko nasha naashoka tatu ningi. Ihe mbela shoka owe shi itaala?— Sho Jesus a li poshituthi oshinene megumbo lyOmufarisayi, okwa li a tala aantu sho tayi ihogololele omahala gokukuutumba. Mbela ito dhiladhila kutya Jesus oku na ohokwe mwaashoka tatu ningi, ngaashi naanaa a li e na ohokwe okutala aantu mboka ya li ya hiwa koshituthi shohango?— Ngashingeyi sho e li megulu, osha yela kutya ote tu tala.

Ngele omuntu oha kambadhala okukala gwotango, otashi vulu okweetitha uupyakadhi. Olundji ohashi etitha oontamanana aantu e taya geye. Omathimbo gamwe shika ohashi holoka po uuna aanona taya londo mombesa. Shampa omweelo gwombesa gwe eguluka, yo aanona otaya matukile mo molwaashoka oya hala okukala kiipundi yokomeho nenge yopomakende. Oshike mbela tashi vulu okuningwa po?— Eeno, otashi vulika ya geelathane.

Okukala wa hala okuninga gwotango otaku vulu okweetitha uupyakadhi owundji. Okwa li nokuli kwe etitha uupyakadhi mokati kaayapostoli yaJesus. Ngaashi twi ilonga mOntopolwa onti-6 yembo ndika, oya li natango ya tsu oompata kombinga yaangoka omunene e vule ooyakwawo. Mbela Jesus okwa li a ningi po shike?— Eeno, okwa li e ya pukulula. Ihe konima yethimbo oya li ya tsu oompata dhilwe. Natu tale nkene dha li dha tameke.

Aayapostoli naantu yalwe oya li taye ende pamwe naJesus oshikando shahugunina yu uka koshilando shaJerusalem. Jesus okwa popi nayo kombinga yUukwaniilwa we, onkee ano, Jakob naJohannes oya li taya dhiladhila kombinga yokupangela pamwe naye ye li aakwaniilwa. Oya li nokuli ya popi nayina, Salome kombinga yaashoka. (Mateus 27:56; Markus 15:40) Onkee ano, sho ya li mondjila okuya kuJerusalem, Salome okwa yi kuJesus e ta tsu oongolo koshipala she te mu pula e mu ningile sha.

Jesus okwe mu pula a ti: “Owa hala shike?” Salome okwa yamukula a ti kutya okwa hala Jesus a pitike oyanamati ya kuutumbe puye mUukwaniilwa we, gumwe kolulyo lwe nomukwawo okolumoho. Mbela oto dhiladhila kutya aayapostoli yakwawo omulongo oya li yu uvite ngiini sho ya li yu uvu kutya Jakob naJohannes oya tuma yina kuJesus e ke ya pulile sha?—

Eeno, oya li ya geyela noonkondo Jakob naJohannes. Ano Jesus okwa li a pe aayapostoli ye ayehe omayele omawanawa. Jesus okwe ya lombwele kutya aapangeli yiigwana oye hole okukala aanankondo noya simana. Ohaya kala ya hala pondondo yopombanda mpoka kehe gumwe ta vulika kuyo. Ihe Jesus okwa li a lombwele aalanduli ye kutya yo kaye na okukala ngaaka. Pehala lyaashono, okwe ya lombwele a ti: ‘Ngoka gwomune a hala a ninge gwotango, oye na kale omupika gweni.’ Dhiladhila owala kwaashika.—Mateus 20:20-28.

Mbela owu shi kutya omupika oha longo shike?— Oha longele aantu yalwe, ihe haye ha longelwa kuyalwe. Oha pewa ondondo yopevi, ihe haandjoka yopombanda. Dhimbulukwa kutya Jesus okwa ti kutya ngoka a hala okukala gwotango oku na okukala ngaashi omupika gwayakwawo.

Mbela oto dhiladhila kutya shika otashi ti shike kutse?— Mbela omupika ota vulu okutsa oompata namwene gwe kutya olye ta kuutumba kiipundi ya simana nenge kutya olye ta ka pewa iikulya tango? Oto dhiladhila ngiini?— Jesus okwa li e shi yelitha kutya omupika oha tala ko aluhe mwene gwe e mu vule.—Lukas 17:7-10.

Onkee ano, pehala lyokukambadhala okukala gwotango, otu na okuninga shike?— Eeno, otu na okukala nayalwe tu li ngaashi omupika. Shika otashi ti kutya otu na okutala ko yalwe ye li komeho getu noya simana ye tu vule. Mbela oto vulu okudhiladhila omikalo moka to vulu okutala ko yalwe ye li komeho goye?— Omolwashike itoo shuna kepandja 40 nosho wo 41 e to tala natango omikalo dhimwe moka to vulu okutala ko yalwe ye li komeho goye moku ya longela sha.

Dhimbulukwa kutya Omulongi Omunene naye okwa li a tala ko yalwe ya simana ye mu vule moku ya longela sha. Ngele natse ohatu pititha yalwe komeho moku ya longela sha, otatu ka nyanyudha Omulongi Omunene naHe, Jehova Kalunga.

Natu leshe Omanyolo gamwe gOmbiimbeli ngoka tage tu ladhipike tu kale hatu pititha yalwe komeho: Lukas 9:48; Aaroma 12:3 nAafilippi 2:3, 4.

[Ethano pepandja 107]

Mbela owa mona nale aantu taya kambadhala okukala oyo yotango?

[Omathano pepandja 109]

Oshiilongomwa shini Jesus a li a longo aantu sho e ya hokololele kombinga yaamboka ya li yi ihogololele iipundi ya simana nenge yokomeho?

[Ethano pepandja 110]

Salome ota pula Jesus e mu ningile shike, noshizemo osha li shike?