Ontopolwa 6

Jesus Kristus–Okwa Tuminwe kuKalunga?

1, 2. (a) Uunzapo uni po u li po kutya Jesus Kristus okwa li shili omuntu? (b) Opwa tukuluthwa omapulo geni po kombinga yaJesus?

KONYALA kehe gumwe oku uvu kombinga yaJesus Kristus. Ye okwa li e na enwethomo enene mondjokonona li vule lyomuntu kehe i ili. Dhoshili, okalindeli hoka haka longithwa miitopolwa oyindji yuuyuni, oka kankamekwa komumvo ngoka tagu dhiladhilwa kutya omo a valwa! Mwaashono The World Book Encyclopedia otali ti: “Omathimbomumvo komeho gomumvo ngoka ohaku tiwa B.C., nenge komeho yaKristus. Omathimbomumvo konima yomumvo ngoka ohaku tiwa A.D., nenge anno Domini (momuvo gwOmuwa gwetu).”

² Ano kashi shi omuhapo Jesus omuntu a li ko shili. Ye okwa li omulumentu shili ngoka a li kombanda yevi. “Momathimbo gonale aatamaneki yelongelokalunga lyOpakriste nokuli kaya li ya limbililwa okukala po kwaJesus,” Encyclopædia Britannica osho tali ti. Ano Jesus okwa li lye? Okwa tuminwe shili kuKalunga? Omolwashike ye a tseyika nawa ngawo?

OKUKALAPO KWE KWOKOMEHO KWOPANTU

3. (a) Paohapu dhomuyengeli, Maria okwa li e na okweeta omwana gwalye? (b) Osha vulika ngiini omukadhona Maria a vale Jesus?

³ Jesus oye awike omuntu ngono a valwa komukadhona. Edhina lye olya li Maria. Mokupopya okanona ke omuyengeli okwa ti: “Oye ta kala omunene, ye e na okwiithanwa Omuna gwOkombandambanda.” (Lukas 1:28-33; Mateus 1:20-25) Ihe ongiini kwa li tashi vulika komukiintu ngoka inaa monathana nale nomulumentu, a mone okanona? Osha li okulonga kwombepo ondjapuki yaKalunga. Jehova okwa lundululile omwenyo gwOmuna gwopambepo ngoka omunankondo okuza megulu sigo omoshivalelo shomukadhona Maria. Osha li oshikumithalonga! Gumwe ngoka a shiti omukiintu gwotango noonkondo oonkumithi dhokumona aanona, okwa li wo ta vulu shili okweetitha omukiintu okanona nopwaa na he gwopantu. Ombimbeli otayi yelitha: “Ethimbo sho lya thikana, Kalunga okwa tumu Omwana, a valwa komukiintu.”—Aagalati 4:4.

4. (a) Jesus okwa li peni komeho omanga inaa valwa okanona? (b) Oshike sha popiwa kuJesus okuholola kutya ye okwa li po nale megulu?

⁴ Ano omanga Jesus inaa valwa oye omuntu kombanda yevi, ye okwa li omuntu gwopambepo omunankondo megulu. Ngaashi naanaa Kalunga, naye wo okwa li e na olutu lwopambepo ihaalu monika komeho gopantu. (Johannes 4:24) Jesus ye mwene okwa popi olundji kehala lye lya simana ndyoka a li e na megulu. Sikulimwe ye okwa galikana: “Tate, adhimitha ndje pungoye neadhimo ndyoka nda li ndi li na pungoye, manga uuyuni wa li waa ko.” (Johannes 17:5) Ye okwa ti wo kaapulakeni ye: “One yopevi, ongame gwokombanda.” “Ongiini andola, ngele tamu mono Omuna gwOmuntu ta londo ta yi nkoka kwa li shito?” “Manga Abraham kwa li ina valwa, ongame nda li ko.”—Johannes 8:23; 6:62; 8:58; 3:13; 6:51.

5. (a) Omolwashike Jesus i ithanwa “Ohapu,” “omutango” na “Epona”? (b) Omoshilonga shini po shaKalunga Jesus a li e na ombinga?

⁵ Omanga Jesus inee ya kombanda yevi, ye okwi ithanwa Ohapu yaKalunga. Edhina ndika otali holola kutya ye okwa li omuhumbati gwoohapu dhaKalunga megulu. Ye okwi ithanwa wo “omutango” osho wo tuu Omuna “Epona” lyaKalunga. (Johannes 1:14; 3:16; Aaheberi 1:6) Osha hala kutya ye okwa shitwa komeho yaamati ayehe yamwe yopambepo yaKalunga, kutya oye awike a shitwa lela kuKalunga shu ukilila. Ombimbeli otayi yelitha kutya Omuna nguka “omutango” okwa kwatha Jehova okushita iinima iikwawo ayihe. (Aakolossa 1:15, 16). Ano sho Kalunga a ti: “Tu umbeni aantu oshifetha shetu,” ye okwa popi nOmwana gwe nguno. Eeno, gumwe ngoka konima e ke ya kombanda yevi nokwa valwa komukiintu, okwa kwatha shili okushita iinima ayihe! Ye okwa kala po nale pamwe naHe megulu uule womimvo inaadhi tseyika!—Genesis 1:26; Omayeletumbulo 8:22, 30; Johannes 1:3.

OKUKALAMWENYO KWE KOMBANDA YEVI

6. (a) Oshike sha ningwa po okathimbo komeho nokonima yokuvalwa kwaJesus? (b) Jesus okwa valelwa peni nopeni a putukile?

⁶ Maria okwa li a yalekwa kuJosef. Ihe sho ye a dhimbulula kutya Maria omusimba, okwa dhiladhila kutya ye okwa monathana nomulumentu gumwe i ili, nomolwashono ye ka li we a hala okuhokana naye. Ihe sho Jehova e mu lombwele kutya uusimba mboka e na oshilonga shombepo Ye ondjapuki, Josef okwa taamba ko Maria, a ninge omukiintu gwe. (Mateus 1:18-20, 24, 25) Konima manga yo ya talele po oshilando shaBetlehem, Jesus okwa valwa. (Lukas 2:1-7; Mika 5:1) Sho Jesus a li natango okahanona, Omukwaniilwa Herodes okwa kambadhala oku mu dhipaga. Ihe Jehova okwa londodha Josef opo a ye ontuku pamwe negumbo lye kuEgipiti. Konima yeso lyOmukwaniilwa Herodes, Josef naMaria oya galuka pamwe naJesus koshilando shaNasaret muGalilea. Hoka ye a putukile.—Mateus 2:13-15, 19-23.

7. (a) Oshike sha ningwa po omanga Jesus a li e na oomvula 12? (b) Iilonga yini po Jesus a li i ilongo mokuputuka kwe?

⁷ Sho Jesus a ningi oomvula 12, okwa yi molweendo pamwe naanegumbo lye kuJerusalem oku ka dhana oshituthi shi ikalekelwa shi ithanwa Opaasa. Hoka ye a kala uule womasiku gatatu motempeli ta pulakene kaalongihapu noku ya pula. Ayehe mboka ye mu uvu oya kuminwa ontseyo ye. (Lukas 2:41-52) Sho Jesus a putukila muNasaret, ye okwi ilongo okukala omuhongi gwiipilangi. Kapu na omalimbililo, ye okwa dheulilwa iilonga mbika komuputudhi gwe he, Josef, oshoka naye wo okwa li omuhongi gwiipilangi.—Markus 6:3, OB-1986; Mateus 13:55, OB-1986.

8. Oshike sha ningwa po omanga Jesus a li e na oomvula 30?

⁸ Muukokele woomvula 30, opwa ningwa elunduluko enene monkalamwenyo yaJesus. Ye okwe ya kuJohannes Omuninginithi nokwa pula okuninginithwa, a ninginithwe thiluthilu momeya gOmulonga gwaJordan. Ombimbeli otayi tu tseyithile: “Jesus sho a [ninginithwa], okwa zi momeya mbalambala, ihe tala, egulu nolye eguluka, nokwa mono Ombepo yaKalunga ya fa onguti ya kuluka noye mu lambela. Ihe tala, megulu mwa zi ewi lya ti: Nguka Omumwandje omuholike nde mu hokwa.” (Mateus 3:16, 17, faathanitha NW.) Johannes ka li nando a limbililwa kusha kutya pamwe Jesus ina tumwa shili kuKalunga.

9. (a) Uunake Jesus a ninga shili Kristus, nomolwashike pethimbo opo tuu mpono? (b) Omushike Jesus i igandja mokuninginithwa kwe?

⁹ Jehova, mokutilila ombepo Ye ondjapuki kombanda yaJesus, okwe mu gwayeke nenge e mu langeke omukwaniilwa gwUukwaniilwa We mboka tau ya. Molwashoka Jesus a gwayekwa ngawo nombepo, ye okwa ningi “Messias” nenge “Kristus,” iitya mbyoka tayi ti “Omugwayekwa” mOshiheberi nomOshigreka. Mwaashono ye okwa ningi shili Jesus Kristus, nenge Jesus Omugwayekwa. Ano omuyapostoli gwe Petrus okwa popi “Jesus Omunasaret Kalunga nkene e mu gwayekitha Ombepo Ondjapuki noonkondo.” (Iilonga 10:38) Noneininginitho lye momeya, Jesus okwi igandja ye mwene kuKalunga okulonga oshilonga shoka Kalunga e mu tumina kombanda yevi. Oshilonga shoka sha simana osha li shike?

MOLWASHIKE YE I ILE KOMBANDA YEVI

10. Omaushili geni po Jesus i ile okuuvitha kombanda yevi?

¹⁰ Oku shi yelitha nawa molwashike ye i ile kombanda yevi, Jesus okwa lombwele omupangeli Omuroma Pontius Pilatus: “Onkee nda valwa nonkee nde ya muuyuni, ndi hokolole oshili.” (Johannes 18:37) Ihe omaushili naanaa geni po ga tuminwa Jesus oku ga tseyitha? Shotango, oshili kombinga yaHe gwomegulu. Ye okwa longo aalanduli ye okugalikana kutya edhina lyaHe li “yapulwe.” (Mateus 6:9) Nokwa galikana: “Edhina lyoye onde li hololele aantu mboka we ya pe ndje yomuuyuni.” (Johannes 17:6) Ye okwa ti wo: “Ondi na okuuvithila iilando yilwe wo evaangeli ly[uukwaniilwa wa]Kalunga, oshoka olyo tuu ndika nde li tuminwa.”—Lukas 4:43, faathanitha NW.

11. (a) Omolwashike Jesus kwa li a simaneka oshilonga she ngawo? (b) Oshike Jesus ine etha nando okulonga? Ano tu na okuninga shike?

¹¹ Oshilonga shino osha li sha simana ngiini ano kuJesus okuuvitha edhina nUukwaniilwa waHe? Ye okwa ti kaalongwa ye: “Iikulya yandje oyo mbika, ndi longe ehalo lyaanguka a tumu ndje, ngame ndi tsakanithe oshilonga she.” (Johannes 4:34) Omolwashike Jesus a tala ko oshilonga shaKalunga sha simana naanaa ngaashi iikulya? Omolwashono Uukwaniilwa owo oshilongitho shoka Kalunga ta ka longitha oku ka gwanithila uuntu oompangela dhe ndhoka oonkumithi. Shika osho Uukwaniilwa mboka tau ka komba po uukolokoshi auhe notau ka simaneka edhina lyaJehova kondhino ndjoka lya dhinwa nayo. (Daniel 2:44, KB; Ehololo 21:3, 4) Onkee ano Jesus ine etha nando okukala inaa tseyitha edhina nUukwaniilwa waKalunga. (Mateus 4:17, KB; Lukas 8:1, KB; Johannes 17:26; Aaheberi 2:12) Aluhe ye okwa popi oshili, nonando sha li sha halika nenge inaashi halika. Ngawo ye okwa tula po oshiholelwa shoka tu na okulandula ngele twa hala okwoopalela Kalunga.—1 Petrus 2:21.

12. Omolwetompelo lini po limwe lya simana Jesus i ile kombanda yevi?

¹² Ihe opo tu vule okumona omwenyo gwaaluhe kohi yepangelo lyUukwaniilwa waKalunga, omwenyombinzi yaJesus oya li yi na okutilwahi meso. Aayapostoli yaali yaJesus oya ti: “[Tse] twa yuukipalithwa mombinzi ye.” “Ombinzi yOmuna [gwaKalunga], Jesus Kristus, otayi tu yogo oondjo adhihe.” (Aaroma 5:9; 1 Johannes 1:7) Ano etompelo lya simana molwashike Jesus i ile kombanda yevi, olya li oku tu sila. Ye okwa ti: “Omuna gwOmuntu ine ya okulongelwa, aawe, okulongela nokugandja omwenyo gwe, gu ninge iikulila yoyendji.” (Mateus 20:28) Ihe otashi ti ngiini kutya Kristus okwa gandja omwenyo gwe “iikulila”? Omolwashike omwenyombinzi ye ya li yi na okutilwahi meso oku tu hupitha?

YE OKWA GANDJA OMWENYO GWE IIKULILA

13. (a) Iikulila oshike? (b) Iikulila yashike ya futwa kuJesus oku tu mangulula muulunde neso?

¹³ Oshitya “iikulila” ohashi longithwa olundji ngele gumwe a kwatwa po ombambyona. Konima omukwati gwomuntu ombambyona ota ti kutya ye ota ka shunitha omuntu nguka ngele pwa futwa iimaliwa yongandi oyo iikulila. Ano iikulila oyo oshinima shoka hashi eta po emangululo lyomuntu okuza muukwatwa. Olyo oshinima shoka hashi futwa opo kaa kanithe omwenyo gwe. Omwenyo gwaJesus gwopantu ngoka gwa gwanenena ogwa gandjwa gu mangulule aantu muupika wuulunde neso. (1 Petrus 1:18, 19; Aaefeso 1:7) Omolwashike emangululo lya tya ngaaka lya li lya pumbiwa?

14. Omolwashike ekulilo lyaJesus lya li lya pumbiwa?

¹⁴ Osha li omolwashoka Adam, kuku yetu atuhe, okwa tukuluthile Kalunga oshipotha. Oshilonga she shuukwaanampango oshe mu ningi omulunde oshoka Ombimbeli otayi yelitha kutya “uulunde owo okuyona ompango.” (1 Johannes 3:4; 5:17) Ano oshilanduliko ye ka li we a gwana okutaamba omagano gaKalunga gomwenyo gwaaluhe. (Aaroma 6:23) Mwaashono Adam okwi ikanithile omwenyo gwa gwanenena gwopantu meviparadisa. Ihe ye okwa kanithile wo aanona ye ayehe mboka ya zi muye etegameno ndika ekumithi. Otashi vulika u pule: ‘Ihe omolwashike aanona ye ayehe haa si, nonando osha li Adam ngoka a yono?’

15. Omolwashike aanona yaAdam ye li muuwehame notaa si ngele oye kwa li a yono?

¹⁵ Osha li omolwashoka Adam, sho a yono, okwa taambekidha uulunde neso maanona ye, sha kwatela mo aantu ayehe mboka ye li po nena. (Job 14:4; Aaroma 5:12) “Ayehe ya yono nokaye na eadhimo lyaKalunga,” osho Ombimbeli tayi ti. (Aaroma 3:23; 1 Aakwaniilwa 8:46) Nomuyuki David okwa ti: “Ongame nda valelwa muulunde, meme okwa vala ndje muulunde.” (Epsalmi 51:7) Ano aantu otaa si omolwuulunde mboka ya thigulula kuAdam. Osha li nduno tashi vulika ngiini eyambo lyomwenyo gwaJesus li mangulule aantu ayehe muupika wuulunde neso?

16. (a) Kalunga okwa holola ngiini edhiginino lyompango ye kutya ‘omwenyo omomwenyo gu na okugandjwa’ sho ye a gandja ekulilo? (b) Omolwashike kwa li Jesus oye awike omuntu ngoka a vulu okufuta iikulila?

¹⁶ Ekotampango mompango yaKalunga koshigwana shaIsrael olyo tali ti sha mpaka. Otali ti kutya ‘omwenyo omomwenyo gu na okugandjwa.’ (Eksodus 21:23; Deutoronomium 19:21) Mokwaavulika kwe Adam, omulumentu ngoka a gwanenena okwa kanitha omwenyo gwa gwanenena meviparadisa kuye mwene nokaanona ye ayehe. Jesus Kristus okwa gandja omwenyo gwa gwanenena gwe opo a lande ko ngoka gwa kanithwa kuAdam. Eeno, Jesus okwi “igandja ye mwene iikulila ya faathana yaayehe.” (1 Timoteus 2:5, 6, NW) Molwashoka Jesus okwa li naanaa omulumentu a gwanenena ngaashi sha li Adam, ye okwi ithanwa “Adam ngoka a hugunine.” (1 Aakorinto 15:45) Kapwa li nando omuntu a li a vula okugandja ekulilo, Jesus tuu awike. Shika omolwashoka Jesus oye awike omulumentu a li po ngoka a li e thike puAdam oye omwana gwaKalunga gwopantu a gwanenena.—Epsalmi 49:8; Lukas 1:32; 3:38.

17. Uunake pwa futwa iikulila kuKalunga?

¹⁷ Jesus okwa sile muukokele woomvula 33¹/2. Ihe mesiku etitatu konima yeso lye, ye okwa yumuka. Konima yomasiku omilongo ne, ye okwa shuna kegulu. (Iilonga 1:3, 9-11) Hoka ye e li ishewe omuntu gwopambepo “e tu holokele koshipala shaKalunga,” a humbata ondjele yekuliloyambo lye. (Aaheberi 9:12, 24) Pethimbo ndyoka opwa futwa iikulila kuKalunga megulu. Ngashingeyi uuntu owa li tau vulu okumona emangululo. Ihe uunake tatu ka taamba ekwatho lyalyo?

18. (a) Ongiini tatu vulu okumona ekwatho mekulilo nokuli ngashingeyi? (b) Ekulilo otali vulikitha shike methimbo tali ya?

¹⁸ Nokuli ngashingeyi otatu vulu okumona ekwatho mekuliloyambo lyaJesus. Ngiini? Moku li itaala, otatu vulu okukala twa yela momeho gaKalunga nokumona esiloshimpwiyu lye lyohole nohenda. (Ehololo 7:9, 10, 13-15) Oyendji yomutse otwa ninga nale uulunde uutilithi omanga inaatu ilonga sha kombinga yaKalunga. Ihe nonena otatu ningi omapuko, sikulimwe nokuli ngoka omanenenene. Ihe omolwekulilo otatu vulu tu pule nemanguluko ekuthilo lyoondjo kuKalunga, neinekelo kutya ye ote tu uvu. (1 Johannes 2:1, 2; 1 Aakorinto 6:9-11) Nomasiku ngono ge li po komeho, ekulilo otali ke tu egululila ondjila oku ka taamba omagano gaKalunga gomwenyo gwaaluhe monkalelo ye ompe yuuyuki. (2 Petrus 3:13) Opo nduno ayehe mboka ye na eitaalo mekulilo otaa ka manguluka muupika wuulunde neso. Otaa vulu oku ka kala neinekelo lyomwenyo gwaaluhe megwaneneno!

19. (a) Egandjo lyekulilo otali ku inyengitha ngiini? (b) Ongiini omuyapostoli Paulus a ti tu na okuholola olupandu lwetu molwekulilo?

¹⁹ Owu uvite ngiini sho wi ilongo kombinga yekulilo? Shika itashi pupyaleke nando omutima gwoye kombinga yaJehova Kalunga okutseya kutya ye oku na ko nasha nangoye noonkondo sho a gandja Omwana omuholike gwe molwoye? (Johannes 3:16; 1 Johannes 4:9, 10) Ihe dhiladhila wo kohole yaKristus. Ye okwi ile kombanda yevi nehalo ewanawa e tu sile. Itatu kala nando twa pandula? Omuyapostoli Paulus okwa yelitha nkene tu na okuulika olupandu lwetu sho ye a ti: “Oye okwa si peha lyaayehe, opo mboka ye na omwenyo, yaa ikalele we yo yene, aawe, oongoka tuu e ya sile nokwe ya yumukile.” (2 Aakorinto 5:14, 15) Oto ka ulika tuu olupandu lwoye mokulongitha omwenyo gwoye u kalele Kalunga nOmwana gwe gwomegulu Jesus Kristus?

MOLWASHIKE JESUS A LONGA IIKUMITHALONGA

20. Otatu tseyithilwa shike kombinga yaJesus mokwaaludha kwe omunashilundu?

²⁰ Jesus okwa tseyika nawa omolwiikumithalonga mbyoka a longo. Ye okwa si ohenda aantu mboka ya li muudhigu, nokwa kala nehalo enene okulongitha oonkondo ndhoka a pewa kuKalunga e ya kwathe. Pashiholelwa, omuntu ngoka a li e na uuvu uuwinayi woshilundu okwe ya kuye e ta ti: “Ongoye ngele wa hala, oto vulu okwaaludha ndje. Jesus okwe mu sa ohenda, okwa ganeke oshikaha she nokwe mu gumu ko nokwa ti: Onda hala, yela!” Nomulumentu okwa aluka!—Markus 1:40-42.

21. Ongiini Jesus a kwatha oongundu dhaantu?

²¹ Dhiladhila natango oshiningomwa shimwe shOmbimbeli, ihe yeleka eiyuvo lyaJesus omolwaantu mboka ya li po: “Naantu oyendjiyendji ye ya kuye noye eta iilema niitiningili naaposi noombolo nooyakwawo oyendji noye ya langeke koompadhi dhe; oye nokwe ya aludha, nongundu yaantu oya kumwa, sho ya mono, oombolo taa uvu, iilema ya aluka, iitiningili ye ende naaposi oya tonata; noya hambelele Kalunga kaIsrael.”—Mateus 15:30, 31.

22. Oshike tashi holola kutya Jesus okwa li e na ko nasha shili naantu mboka ye a kwatha?

²² Uushili kutya Jesus okwa li e na ko nasha shili naantu mbaka ya li muuwehame, nokwa li a hala shili oku ya kwatha, ou wetike mwaashono ye a lombwele ishewe aalongwa ye. Ye okwa ti: “Ongame ondu uvitile aantu mbaka ohenda, oshoka yo ya menekela pungame omasiku gatatu, yo kaa na shoka taa li; ihe ongame inandi hala oku ya laleka nondjala, yaa loloke mondjila.” Opo tuu mpoka Jesus okwa palutha “aalumentu omayuvi gane, aakiintu naanona inaa yalulwa,” niikwiila owala iheyali noohi dhimwe pashikumithalonga.—Mateus 15:32-38.

23. Oshike shi inyengitha Jesus okuyumudha omumati gwomuselekadhi?

²³ Esikulimwe Jesus okwa tsakaneke ongundu yoosa tayi zi moshilando shaNain. Ombimbeli otayi shi hokolola ngaashi tashi landula: “Ano sho a thiki popepi nosheelo shoshilando, tala, omusi okwi iindwa mo, omumati epona lyayina, omuselekadhi. . . . Omuwa sho e mu mono, okwe mu uvitile olukeno.” Oluhodhi lwe olwe mu gumu unene. Opo nduno Jesus okwa ti komudhimba: “Omugundjuka, otandi ku lombwele, penduka po.” Oshikumithi shili! “Onakusa okwa kuutumba nokwa tameke okupopya. Oye nokwe mu pe yina.” Dhiladhila owala nkene yina a li e uvite! Ando okwa li ongoye, ando owu uvu ngiini? Onkundana yoshiningomwa shika oshindhindhilikwa oya taandele apuhe popepi nokokule. Ano itashi kumitha kutya Jesus okwa tseyika nawa ngawo.—Lukas 7:11-17.

24. Iikumithalonga yaJesus oya holola shike kombinga yonakuyiwa?

²⁴ Ihe iikumithalonga yaJesus oya li owala ekwatho lyopokathimbo. Aantu mboka ye a aludhile, natango oya ka alukwa ishewe. Naamboka a yumudhile, oya ka sa ishewe. Ihe iikumithalonga yaJesus oyu ulike kutya ye okwa tuminwe kuKalunga, nokutya ye okwa li shili Omwana gwaKalunga. Noyu ulike kutya omaupyakadhi agehe gaantu otaga vulu okukandulwa po koonkondo dhaKalunga. Eeno, osha li sha hololwa owala paufupi mwaashono tashi ka ningwa kombanda yevi kohi yUukwaniilwa waKalunga. Pethimbo ndyoka aasindjala otaa ka paluthwa, aavu otaa ka aludhwa, naasi otaa ka yumudhwa nokuli! Osho wo tuu omikithi, eso nomaupyakadhi gamwe gi ili itage ke eta we nando okwaanelago. Alikana otashi ka kala ngiini elaleko nuuyamba!—Ehololo 21:3, 4; Mateus 11:4, 5.

OMUPANGELI GWUUKWANIILWA WAKALUNGA

25. Omoombinga ndatu dhini po okukalamwenyo kwaJesus taku vulu okutopolwa?

²⁵ Okukalamwenyo kwOmwana gwaKalunga okwa thikama moombinga ndatu. Tango, opwa li omimvo odhindji inaadhi tseyika ndhoka ye a kala pamwe naHe megulu nale omanga ye inaa ninga omuntu. Olutiyali, opwa li omimvo 33¹/2 ndhoka a kala kombanda yevi konima yokuvalwa kwe. Nongashingeyi oye ishewe omuntu gwopambepo megulu. Ehala lini po a kala e na megulu okuza meyumuko lye?

26. Muudhiginini we kombanda yevi, Jesus okwa holola kutya ye okwa gwana okukala shike?

²⁶ Osha yela kutya Jesus oku uthilwa a kale omukwaniilwa. Nokuli omuyengeli okwa tseyithile Maria: “Ota ningi omukwaniilwa . . . sigo aluhe, nuukwaniilwa we kau na mpoka tau hulu po.” (Lukas 1:33) Methimbo lyuukalele we kombanda yevi aluhe okwa kala nokupopya kombinga yUukwaniilwa waKalunga. Okwa longo aalanduli ye okugalikana: “Uukwaniilwa woye nau ye; ehalo lyoye nali gwanithwe kombanda yevi wo ngaashi megulu.” Osho wo ye okwe ya kumagidha: “Kongeni tango uukwaniilwa.” (Mateus 6:10, 33, KB) Muudhiginini we kombanda yevi, Jesus oku ulike kutya ye okwa gwana shili okukala omukwaniilwa gwUukwaniilwa waKalunga. Konima yokushuna kwe megulu ye okwa tameke mbala okupangela e li omukwaniilwa?

27. (a) Oshike Jesus a ningi konima yokushuna kwe megulu? (b) Oshike sha li oshilonga shotango shaJesus oye omukwaniilwa gwUukwaniilwa waKalunga?

²⁷ Aawe, ye ine shi ninga. Omuyapostoli Paulus otu ulike kEpsalmi 110:1 nokwa yelitha: “Nguka [Jesus] sho a gandja eyambo limwe alike molwoondjo, okwa kuutumba kolulyo lwaKalunga, a kale ko aluhe, nota tegelele ihe, aatondi ye ya tulwe oshipundi shokoompadhi dhe.” (Aaheberi 10:12, 13) Jesus okwa kala a tegelela kelombwelo lyaJehova: “Pangela mokati kaaniita nangoye!” (Epsalmi 110:2) Sho tuu ethimbo ndyoka lya thikana, ye okwa tameke okuyogola egulu kuSatana naayengeli ye. Oshizemo molugodhi ndoka megulu osha popiwa moohapu ndhika ngaashi tashi landula: “Ngashingeyi ehupitho noonkondo [nuukwaniilwa owa ningi waKalunga] ketu, nepangelo olyaKristus gwe, oshoka omuli gwaamwameme yetu okwa umbwa mo, oongoka kwi he ya li kuKalunga omutenya nuusiku.” (Ehololo 12:10, faathanitha KB.) Ngaashi twa mono montopolwa ya tetekele yembo ndika, uushili otau holola kutya olugodhi nduka olwa ningwa nale, noshilanduliko kutya Jesus Kristus ota pangele ngashingeyi mokati kaaniita naye.

28. (a) Masiku Kristus ota ka ninga shike? (b) Tu na okuninga shike opo tu vule okukala megameno lye?

²⁸ Masiku Kristus naayengeli ye megulu otaa ka hanagula po omapangelo agehe guuyuni ngoka ge li po ngashingeyi kombanda yevi. (Daniel 2:44; Ehololo 17:14) Ombimbeli otayi ti kutya ye oku na “egongamwele lya tsa, a dhenge nalyo iigwana; oye te ya litha nodhimbo yosheela.” (Ehololo 19:11-16) Opo tu gamenwe methimbo lyehanagulo tali ya, tu na okwiitaala muJesus Kristus. (Johannes 3:36) Tu na okuninga aalongwa ye nokwiigandja kuye, ye Omukwaniilwa gwetu gwomegulu. Oto ke shi ninga?

[Picture on page 58]

Jesus okwa thigi po iilonga yokuhonga iipilangi okwiininginitha nokwa ningi omugwayekwa gwaJehova

[Picture on page 63]

Jesus okwa li e thike pomulumentu a gwanenena Adam

[Pictures on page 64]

Jesus okwi inyengithwa kohenda okukwatha aavu naasindjala

[Picture on page 67]

Mokuyumudha aasi, Jesus okwa holola shoka ta ka longa oshindji unene uuna Uukwaniilwa waKalunga tau pangele