Shoka tatu ilongo kuJesus

Kombinga ‘yehulilo’

Oshike tashi ka hula po?

Aalongwa yaJesus oya li ye mu pula ya ti: ‘Endhindhiliko olini tali holoka, uuna to ya nehulilo lyuuyuni?’ (Mateus 24:3) Mokuyamukula epulo ndyoka, Jesus ina tya kutya evi lyo lyene otali ka hanagulwa po. Metetekelo sho a longitha uutumbulilo ‘uuyuni,’ okwa li ta popi omahangano gopapolotika, gopangeshefa nogopalongelokalunga ngoka taga wilikwa kuSatana. (Mateus 13:22, 40, 49) Sho Jesus a ti: “Notaku ya ihe ehulilo,” okwa li ta popi ehulilo lyomahangano ngoka.—Mateus 24:14.

Jesus okwa hokolola ngiini ehulilo lyuuyuni?

Oshi li “onkundana ombwanawa” uuna uuyuni mbuka waahe na uuyuuki tawu hulu po. Jesus okwa ti: ‘[Onkundana ndjika ombwanawa yuukwaniilwa otayi] ka uvithilwa aantu ayehe, yi ningile iigwana ayihe onzapo; notaku ya ihe ehulilo.’ Jesus okwa li a hokolola ehulilo lyonkalelo yiinima yopethimbo ndyoka a ti: “Otaku kala uudhigu uunene inaau kala ko nale okuza ketameko lyuuyuni sigo ongashingeyi, nongaashi itau ya we. Omasiku ngoka ando itaga fupipikwa, ando kaku na nando omuntu ta hupithwa.”—Mateus 24:14, 21, 22, yelekanitha NW.

Olye taya ka hanagulwa po?

Oomboka owala kaaye hole noihaya longele Jehova naJesus. Aantu ya tya ngaaka ihaya vulika kuKalunga. Jesus okwa ti: “Ngaashi sha li pethimbo lyaNoowa, osho tuu taku ka kala, uuna Omuna gwOmuntu te ya. Ngaashi aantu ya li pethimbo ndiyaka lya tetekele eyelu . . . , yo inaye shi tseya, sigo eyelu lye ya nolye ya hanagula po ayehe.” (Mateus 24:36-39) Jesus okwa ti kutya oyendji oye li mondjila ndjoka tayi fala kehanagulo. Onkee ano, okwa gandja eshilipaleko kutya opu na ‘osheelo oshishona nondjila ya thinana tayi fala komwenyo.’—Mateus 7:13, 14.

Ehulilo lyuuyuni otali ya uunake?

Sho Jesus a li a pulwa kombinga yendhindhiliko lyokuya kwe ‘nolyehulilo lyuuyuni’ okwa yamukula a ti: “Iigwana otayi ka thikama okukondjithathana, iilongo otayi ka matukilathana. Otaku ke ya ondjala nomakakamo gevi . . . . Uulunde otau ka lunda pombanda, nohole yoyendji otayi huhwa.” (Mateus 24:3-12) Oonkundana adhihe oombwinayi ndhoka hatu uvu otadhi ulike kutya masiku epangelo lyaKalunga otali ke etela aantu aavuliki ombili. Jesus okwa ti: “Ngele tamu mono ayihe mbika tayi ningwa, kaleni mu shi shi kutya [uukwaniilwa waKalunga owu] li popepi.”—Lukas 21:31, yelekanitha KB.

Oshike wu na okuninga?

Jesus okwa ti kutya Kalunga “okwa gandja Omwana awike, opo shaa ngoka te mu itaale, kaa kane, ihe a kale e na omwenyo gwaaluhe.” (Johannes 3:16) Owa pumbwa okwiitaala Kalunga nOmwana noku ya tseya nawa. Onkee ano, Jesus okwa ti: “Mboka ye ku tseya, Kalunga awike kashili, noya tseya wo Jesus Kristus, ngoka we mu tumu, oyo mboka ye na omwenyo gwaaluhe.”

Kala wa kotoka opo iimpwiyu nomaupyakadhi kayi ku imbe wu ilonge okukala wu hole Kalunga. Jesus okwa ti: ‘Ikotokeleni ne yene! Inamu etha, omadhiladhilo geni ga luudhikwe kiimpwiyu yopauyuni, opo esiku ndyoka lyaaye mú adhe ombadhilila. Oshoka otali ya ongomwigo.’ Ngele to pulakene kelondodho lyaJesus oto ka ‘pita mwaayihe mbyoka tayi ka ningwa.’—Lukas 21:34-36.

Ngele owa hala okumona uuyelele wa gwedhwa po, tala ontopolwa 9, “Mbela otu li ‘momasiku gahugunina’?” membo Omalongo gashili gOmbiimbeli ogeni naanaa?a

[Enyolo lyopevi]