Omolwashike sha simanenena tu kale twa ‘tonata’?

POMPITO yimwe aalongwa yaJesus oya li ya pula ya ti: ‘Endhindhiliko olini tali holola, uuna to ya nehulilo lyuuyuni?’ (Mat. 24:3) Mokuyamukula epulo ndyoka, Jesus okwa pe aalongwa ye endhindhiliko ndyoka lya li lya yela nawa, li na uuyelele wi ihwa po, tali dhimbululwa nuupu noli li paushili ndyoka li li muMateus ontopolwa 24, Markus ontopolwa 13 nomuLukas ontopolwa 21. Okwa gwedha ko a ti: “Tonateni.”—Mat. 24:42.

Ngele endhindhiliko olya li tali ka kala li iwetikile, omolwashike pwa li pwa pumbiwa elondodho ndika lya gwedhwa po? Tala kiinima iyali mbyoka tayi vulu okuningwa po. Shotango, omapiyaganeko otashi vulika ga ningithe yalwe ya kale kaaye na ko nasha nendhindhiliko, shoka tashi ya ningitha ya kanithe eitaalo lyawo nokukala inaaya tonata. Oshitiyali, Omukriste otashi vulika a mone iinima yontumba yendhindhiliko, ihe oku uvite inaayi mu guma paumwene. Otashi vulika a dhiladhile kutya “uudhigu uunene,” mboka Jesus a hunganeka owu li kokule, onkee ano, ina pumbwa okukala a ‘tonata.’—Mat. 24:21.

“Yo inaye shi tseya”

Jesus okwa li a dhimbulukitha aalanduli ye shoka sha li sha ningilwa aantu yopethimbo lyaNoowa. Noowa okwa li u uvitha e ta tungu onguluwato onene nopethimbo lye uulunde owa li oshinima sha kehe esiku. Nonando ongaaka, oyendji “inaye shi tseya.” (Mat. 24:37-39) Iikala ya tya ngaaka yokwiipwililikila omalondodho oyi li maantu kunena. Pashiholelwa, omandhindhiliko gomoondjila ngoka haga londodha aantu kaaya hinge ondapo ya pitilila ohaga kala ga yela nawa, ihe oyendji ohaye gi ipwililikile. Olundji shoka ohashi ningitha mboka ye na oonkondopangelo ya tulithe moondjila dhoshilando iinima mbyoka tayi kwathele aahingi ya shunithe ondapo yawo pevi. Sha faathana, Omukriste naye ota vulu a kale e wete kutya otu li momasiku gahugunina, ihe iinima mbyoka i ipyakidhila nayo itayi ulike kutya oku shi ethimbo ndyoka tu li mulyo. Arielle, omugundjuka gwoomvula omulongo nasha, gwokoshilongo shi li kUuninginino waAfrika naye okwa li monkalo ya tya ngaaka.

Arielle okwa li e hole okutala ko-TV uudhano wetanga lyaakiintu ndjoka hali umbwa. Sho posikola yawo pwa totwa osipana yetanga ndyoka, okwi i inyolitha a ninge omukwati. Ka li e wete uupambepo we tawu ka ya moshiponga. Oshike sha landula ko? Okwa yelitha a ti: “Ooyakwawo yamwe yomosipana oya li ye na aamati, haya longitha iingangamithi nokuhila omakaya. Oya li haya sheke ndje molwaashoka kanda li handi kutha ombinga miinima mbyoka taya ningi, nonda li tandi dhiladhila kutya otandi vulu okupondola monkalo ndjoka. Uudhano mboka owa li wa gumu nayi uupambepo wandje inaandi shi tegelela. Owo owala wa li momadhiladhilo nosho wo komwenyo gwandje. Pethimbo lyokugongala kwoPakriste, ngele ndi li mOshinyanga shUukwaniilwa omadhiladhilo gandje oga li owala haga kala kokapale ketanga. Onda li nda kanitha uukwatya wopaKriste. Pehala lyokukala ndi hole owala uudhano onda kala owala nehalo lyokusindana. Onda li handi idheula nuudhiginini omolwombepo yethigathanopo ndjoka yi li muungame. Onda li ndi na oshimpwiyu sha pitilila omolwuudhano mboka nowa li wa yono po ekwatathano lyetu nayamwe.

“Oshikando shimwe osipana ndjoka tatu dhana nayo oya li ya pewa opelenti. Onda li ndi ilongekidha oku yi kwata mo. Onda galikana kuJehova a kwathele ndje ndi keelele opelenti. Sho nda mana onda mono kutya uupambepo wandje owu li moshiponga. Oshike sha li sha kwathele ndje ndi hwepopale pambepo?

“Onda li nda tala nale oka-DVD, Young People Ask—What Will I Do With My Life?a Ihe onda tokola ndi ka tale ishewe, nopompito ndjika onda li nda tula miilonga shoka shi li mo. Konima yaashoka onda ningi ngaashi André, omugundjuka ngoka a popiwa moka-DVD hoka. Onda li nda tula miilonga shoka André a lombwelwa a ninge komukuluntugongalo kutya na leshe nokutedhatedha Aafilippi 3:8. Nangame osho naanaa nda li nda ningi, nokonima yaashoka onde etha po okudhana mosipana ndjoka.

“Shoka nda ningi osha kwathela ndje lela. Kanda li we ndi na ombepo yethigathanopo noka nda li we nda gwililwa po. Onda li nda nyanyukwa nonda li ndi na ekwatathano lyopothingo nAakriste ooyakwetu. Onda li nda lenga iinima yopambepo. Ngashingeyi ngele ndi li pokugongala ohandi kala te pulakene nohandi ku nyanyukilwa. Uukalele wandje nawo owa hwepopala nohandi kutha uukwathelikokolindjila pandjigilile.”

Ngele opu na sha shoka tashi ku piyaganeke wu kale kuu na ko nasha nendhindhiliko ndyoka Jesus a gandja, katuka oonkatu dha kwata miiti ngaashi Arielle a li a ningi. Oto vulu wu kambadhale iinima tayi landula. Konga uuyelele mo-Watch Tower Publications Index ndjoka yamwe haye yi ithana “okaalita hoka taku ulukile omuntu mpoka pu na omaliko ga holekwa.” Oto ka mona mo omayele taga longo nosho wo nkene yalwe ya li yu ungaunga nomamakelo ngoka tashi vulika wu ki iyadhe mugo. Opo wu mone uuwanawa pakuudha mokugongalo kwopaKriste kala ho ku ilongekidhile nawa nokuninga omaidhimbulukitho. Yamwe oya mona kutya okukuutumba kiipundi yokomeho ohaku ya kwathele. Ngele aapulakeni otaya kutha ombinga, kala ho iteteke wu ninge etyokosha lyoye. Kakele kaashono, kala wa tonata pambepo nokukala ho ndhindhilike oonkundana ndhoka dha kwatela mo endhindhiliko nosho wo iinima yilwe mbyoka tayi ningwa ‘momasiku gahugunina.’—2 Tim. 3:1-5, KB; 2 Pet. 3:3, 4; Eh. 6:1-8.

“Kaleni mwi ilongekidha”

Endhindhiliko lyomasiku gahugunina oli iwetikile muuyuni auhe nolya kwatela mo “aantu ayehe” kombanda yevi. (Mat. 24:7, 14) Aantu omamiliyona oye li miitopolwa mbyoka ya dhengwa ya lila komalega, koondjala, komakakamo gevi nokiiningwanima yilwe. Mepingathano naashoka, aantu yalwe oye li miitopolwa moka mu na ombili nengungumano. Ngele ino mona nale endhindhiliko lyiiningwanima yimwe yomasiku gahugunina, mbela owu na okudhiladhila kutya uudhigu uunene owu li kokule natango? Shoka kashi li pandunge.

Pashiholelwa, tala kwaashoka Jesus a hunganeke kombinga ‘yoondjala nomalega.’ (Luk. 21:11) Shotango, Jesus ina popya kutya iinima mbyoka otayi ka ningwa miitopolwa ayihe pethimbo limwe nenge momukalo gwa faathana. Pehala lyaashono, okwa ti kutya otayi ka ningwa “koombinga noombinga.” Onkee ano, katu na okukala twa tegelela iinima ya faathana yi ningilwe oshita. Oshitiyali, konima owala sho Jesus a tumbula oondjala okwa ti kutya aalanduli ye yamwe oye na okukala ya tonata kaaya kale ya pwila mokulya sho a ti: “Ikotokeleni ne yene! Inamu etha, omadhiladhilo geni ga luudhikwe kiituthi.” (Luk. 21:34) Shika otashi kwathele Aakriste kaaya kale ya tegelela okumona yo yene iinima ayihe mbyoka ya kwatelwa mendhindhiliko. Pehala lyaashono, Jesus okwa ti: ‘Ngele tamu mono ayihe mbika tayi ningwa, kaleni mu shi shi kutya Uukwaniilwa waKalunga owu li popepi.’ (Luk. 21:31, yelekanitha KB.) Ohatu vulu okumona iinima ayihe yendhindhiliko okupitila miikundaneki kutya nduno otu li moshitopolwa shini.

Kala wo wu shi kutya Jehova okwa tula po nale “esiku notundi” moka uudhigu uunene tawu ka tameka. (Mat. 24:36) Iinima mbyoka tayi ningwa kombanda yevi itayi ke mu ningitha a lundulule esiku ndyoka.

Jesus okwa londodha Aakriste kehe mpoka ye li a ti: “Kaleni mwi ilongekidha.” (Mat. 24:44) Otu na okukala aluhe twi ilongekidha. Osha yela kutya itatu vulu okukala twi ipyakidhila nokulesha Ombiimbeli nokuya miilonga yomomapya oowili 24. Shimwe ishewe, kapu na ngoka e shi kutya ota ka adhika ta ningi shike sho uudhigu uunene tawu tameke. Yamwe otashi vulika ya ka adhike taya longo mepya nenge yi ipyakidhila niilonga yomomagumbo. (Mat. 24:40, 41) Oshike nduno tu na okuninga opo tu adhike twi ilongekidha?

Emmanuel nomukadhi Victorine noyanakadhona yahamano ohaya kala moshitopolwa shi li muAfrika moka ihaaya mono iiningwanima ayihe koonono mbyoka ya kwatelwa mendhindhiliko. Onkee ano, oya tokola opo ya kale haya kundathana iinima yopambepo esiku kehe opo shi ya kwathele ya kale yi ilongekidha. Emmanuel okwa ti: “Osha li oshidhigu okumona ethimbo ndyoka tali opalele kwaayehe. Otwa hogolola tu kale hatu lesha okuza pokati kohamano netata lyoheyali yongulonene. Konima ngele twa lesha enyolo lyesiku ohatu ilongekidha uutendo wontumba okuza moshileshomwa shoka tashi ka konakonwa pEkonakonombiimbeli lyEgongalo oshiwike shoka.” Mbela elandulathano ndyoka olye ya kwathela ya kale ya tonata? Osho lela! Emmanuel oye omuunganeki gwolutu lwaakuluntugongalo megongalo lyawo. Olundji Victorine oha kutha uukwathelikokolindjila nokwa kwathela aantu oyendji ye ye moshili. Oyanakadhona ayehe otaya humu nawa komeho pambepo.

Jesus ote tu kumagidha ta ti: “Kotokeni ano, ne mu tonate.” (Mark. 13:33) Ino etha sha shi ku piyaganeke kuu kale wa tonata pambepo. Pehala lyashono, tula miilonga omayele ngoka ge li miileshomwa yetu naangoka hatu mono pokugongala kwegongalo ngaashi Arielle e shi ningi. Kambadhala okuninga sha esiku kehe shopambepo, ngaashi uukwanegumbo waEmmanuel opo wu kale wi ilongekidha nowa ‘tonata.’

[Enyolo lyopevi]

[Ethano pepandja 4]

Okukundathana iinima yopambepo esiku kehe ohaku kwathele Emmanuel nuukwanegumbo we ya ‘kale yi ilongekidha’