‘Ombepo otayi konakona iinima yomuule yaKalunga’

“Ombepo [otayi] konakona ayihe, noyomuule womadhiladhilo gaKalunga.”—1 KOR. 2:10.

1. Paulus okwa li a tsu omuthindo onkandangala yini yombepo ondjapuki mAakorinto yotango 2:10, nomapulo geni taga holoka po?

KATU na tuu olupandu omolwiilonga yombepo ondjapuki yaJehova! Omanyolo otaga popi ombepo yi li omupopili, omagano, omuhempululi naangoka he tu galikanene. (Joh. 14:16; Iil. 2:38; Rom. 8:16, 26, 27) Omuyapostoli Paulus okwa li a tsu ishewe omuthindo konkandangala yilwe ya simanenena ndjoka ombepo ondjapuki tayi dhana sho a ti: “Ombepo [otayi] konakona ayihe, noyomuule womadhiladhilo gaKalunga.” (1 Kor. 2:10) Dhoshili, Jehova oha longitha ombepo ye okuholola oshili kombinga yiinima yomuule yopambepo. Ando katwa li tu na ekwatho ndika, ando katu na euvoko kombinga yomalalakano gaJehova. (Lesha 1 Aakorinto 2:9-12.) Onkee ano, opwa holoka omapulo gontumba: Ongiini ‘ombepo tayi konakona iinima yomuule yaKalunga’? Jehova okwa li a holola iinima mbika okupitila moolye methelemumvo lyotango E.N.? Ongiini ombepo tayi konakona iinima mbika yomuule kunena, notayi shi ningi okupitila moolye?

2. Ombepo ohayi longo momikalo dhopaali dhini?

² Jesus okwa li u ulike omikalo dhopaali moka ombepo ya li tayi ka longa. Nziya manga inaa sa, okwa li a lombwele aayapostoli ye a ti: “Omupopili Ombepo Ondjapuki, ngoka Tate te ke mu tuma medhina lyandje, oye te ke mú longa iinima ayihe, note ke mú dhimbulutha iinima ayihe mbyoka nde yi mú lombwela.” (Joh. 14:26) Onkee ano, ombepo ondjapuki otayi ka kala yi li omulongi gwaantu nomudhimbulukithi. Yi li omulongi gwaantu, otayi ka kwathela Aakriste opo yu uve ko iinima mbyoka ya li inaaya uva ko nale. Yi li omudhimbulukithi, otayi ke ya kwathela ya dhimbulukwe shoka ya li ya yelithilwa noku shi tula miilonga momukalo gu li mondjila.

Methelemumvo lyotango

3. Oohapu dhini dhaJesus tadhi ulike kutya ‘iinima yomuule yaKalunga’ otayi ka kala nokuhololwa kashona nakashona?

³ Jesus okwa li a longo aalongwa ye oshili kombinga yiinima oyindji mbyoka ya li iipe kuyo. Nonando ongawo, oya li ye na oshindji okwiilonga. Jesus okwa li a lombwele aayapostoli a ti: “Ondi na natango odhindji oku mú lombwela, ihe ngashingeyi otamu nyengwa oku dhi uva ko. Ihe Ombepo yoshili nge [tayi] ya, [otayi] ke mú longa oshili ayihe.” (Joh. 16:12, 13) Kungawo, Jesus okwa li u ulike kutya okupitila mombepo ondjapuki, iinima yomuule yombepo otayi ka kala nokuhololwa kashona nakashona.

4. Mesiku lyOpentekoste 33 E.N., ombepo ondjapuki oya li ya longo ngiini yi li omulongi nosho wo omudhimbulukithi?

⁴ Mesiku lyOpentekoste 33 E.N., ‘ombepo yoshili’ oya li ye ya noya tililwa Aakriste 120 mboka ya li ya gongala muJerusalem. Uunzapo waashika owa li wu wetike nowu uvitike. (Iil. 1:4, 5, 15; 2:1-4) Aalongwa oya li ya popi momalaka kombinga ‘yiilonga iinene yaKalunga.’ (Iil. 2:5-11) Ndika olya li ethimbo lyokuholola oshinima oshipe. Omupolofeti Joel okwa li a hunganeke etililo ndika lyombepo ondjapuki. (Joel 2:28-32) Aatali oya li ya mono egwanitho lyehunganeko ndika momukalo ngoka kaapwa li nando ogumwe gwomokati kawo e gu tegelela, nomuyapostoli Petrus okwa li e ya yelithile ehumokomeho ndika. (Lesha Iilonga 2:14-18.) Momukalo ngoka ombepo ondjapuki oya li ya ningi yi li omulongi mokuyelithila Petrus kutya shoka aalongwa ya li ya mono osha li egwanitho lyehunganeko ndyoka lyonale. Ombepo oya li ya longo wo yi li omudhimbulukithi, oshoka Petrus ina totha mo owala Joel, ihe nomapisalomi gaali gaDavid wo. (Eps. 16:8-11; 110:1; Iil. 2:25-28, 34, 35) Ayihe mbyoka ya monika nokuuvika kwaamboka ya li ya gongala oya li shili iinima yomuule yaKalunga.

5, 6. (a) Konima yOpentekoste 33 E.N., omapulo geni ga simana ge na ko nasha nehangano epe ga li ga pumbwa okuyamukulwa? (b) Okupitila moolye ekonakono lyomapulo ngoka lya li lya penduthwa, nomatokolo oga li ga ningwa ngiini?

⁵ Opwa li pu na natango iinima oyindji ya pumbwa okuyelithilwa Aakriste yomethelemumvo lyotango. Pashiholelwa, opwa li omapulo kombinga yehangano epe ndyoka lya li lya yi miilonga mesiku lyaPentekoste. Mbela ehangano ndika epe olya li lya ngambekelwa owala Aajuda naamboka yi itedhululithwa e taya ningi yeitaalo lyOshijuda? Mbela otashi vulika wo aantu mboka kaaye shi Aajuda ya taambwe mo mulyo e taya gwayekwa nombepo ondjapuki? (Iil. 10:45) Mbela aalumentu mboka kaaye shi Aajuda oya li ye na okupitithwa etanda tango nokuvulika kOmpango yaMoses? (Iil. 15:1, 5) Ngaka oga li omapulo ga simanenena. Ombepo yaJehova oya li ya pumbiwa opo ya konakone iinima mbika yomuule. Mbela oya li tayi ka longa okupitila moolye?

⁶ Ekonakono lyepulo kehe olya li lya penduthwa okupitila maamwatate mboka ye na oshinakugwanithwa. Petrus, Paulus naBarnabas opo ya li pokugongala hoka kwolutuwiliki noya li ya hokolola nkene Jehova a li u ungaunga naamboka kaaya li Aajuda mboka inaaya pita etanda. (Iil. 15:7-12) Konima yokukonakona uuyelele mbuka pamwe naashoka sha li sha popiwa mOmanyolo gOshihebeli nokekwatho lyombepo ondjapuki, olutuwiliki olwa li lwa ningi etokolo. Opo nduno oya li ya tseyithile omagongalo okupitila montumwafo kombinga yetokolo ndyoka.—Lesha Iilonga 15:25-30; 16:4, 5; Ef. 3:5, 6.

7. Okupitila mushike oshili kombinga yiinima yomuule ya li ya hololwa?

⁷ Iinima oyindji yilwe oya li ya yelithwa okupitila momanyolo ga nwethwa mo gaJohannes, Petrus, Jakob nosho wo Paulus. Ihe pethimbo lyontumba konima sho Omanyolo gopaKriste ga pu okunyolwa, omagano gokuhunganeka nokutseya okwa hulu po. (1 Kor. 13:8) Mbela Ombepo otayi ka tsikila okulonga yi li omulongi nomudhimbulukithi? Mbela otayi ka tsikila nokukwathela Aakriste opo ya konge iinima yomuule yaKalunga? Uupolofeti otawu ulike kutya otashi ka ningwa.

Pethimbo lyehulilo

8, 9. Oolye taya ka “adhima” nontseyo yashili yopambepo pethimbo lyehulilo?

⁸ Sho omuyengeli a hunganeke kombinga yethimbo lyehulilo, okwa hunganeke a ti: “Aawiliki aanandunge otaa ka adhima ya fa uuyelele wokegulu. Naamboka ya nongeka aantu oyendji okuninga shoka shu uka, otaa ka adhima ya fa oonyothi aluhe sigo aluhe . . . nontseyo oyindji otayi indjipala.” (Dan. 12:3, 4) Mbela oolye mboka taya ka kala noondunge, naamboka taya ka adhima oolye? Jesus okwa li e eta uuyelele methaneko lye lyiilya nomau. Sho a popi kombinga ‘yehulilo lyuuyuni’ a ti: “Nena aayuuki otaa ka adhima ngetango [mUukwaniilwa waHe, KB].” (Mat. 13:39, 43) Mokuyelitha kwe, Jesus okwa ndhindhilike “aayuuki” ye li “aana yUukwaniilwa,” Aakriste aagwayekwa.—Mat. 13:38, yelekanitha KB.

⁹ Mbela Aakriste aagwayekwa ayehe otaya ka “adhima”? Eeno, mondunge ndjoka, Aakriste ayehe otaya ka kutha ombinga mokuuvitha nokuninga aantu aalongwa nosho wo okutungathana pokugongala. Aagwayekwa otaya ka tula po oshiholelwa. (Sak. 8:23) Onkee ano, kakele kaashika, iinima yomuule oya li tayi ka yelithwa pethimbo lyehulilo. Ehunganeko ndyoka lya nyolwa kuDaniel olya li lya “pungulwa” sigo opethimbo ndyoka. (Dan. 12:9) Ongiini nokupitila moolye ombepo tayi ka konakona iinima mbika yomuule?

10. (a) Okupitila moolye ombepo ya li ya holola oshili kombinga yiinima yomuule pethimbo lyomasiku gahugunina? (b) Fatulula nkene oshili yi na ko nasha notempeli onene yopambepo yaJehova ya li ya yelithwa.

¹⁰ Sho ethimbo tali thiki okuyelitha oshinima shopambepo momasiku getu, ombepo ondjapuki otayi kwathele aakalelipo ‘yomupiya omudhiginini nomunandunge’ mboka ye na oshinakugwanithwa koombelewa oonene opo yu uve ko oshili kombinga yiinima yomuule ndjoka ya li inaayu uviwa ko nale. (Mat. 24:45, KB; 1 Kor. 2:13) Olutuwiliki aluhe otalu konakona omafatululo ngoka taga lundululwa. (Iil. 15:6) Shoka halu ilongo, ohalu shi nyanyangidha omolwuuwanawa waayehe. (Mat. 10:27) Momukokomoko gwethimbo, omayelithilo ga gwedhwa po oga pumbiwa notaga yelithwa wo paushili.—Tala oshimpungu “Nkene ombepo ya holola eityo lyotempeli yopambepo.”

Mona uuwanawa monkandangala ndjoka tayi dhanwa kombepo kunena

11. Aakriste ayehe kunena ohaya mono ngiini uuwanawa monkandangala ndjoka hayi dhanwa kombepo ondjapuki mokuholola iinima yomuule yaKalunga?

¹¹ Aakriste ayehe aadhiginini ohaya mono uuwanawa monkandangala ndjoka hayi dhanwa kombepo ondjapuki mokuholola iinima yomuule yaKalunga. Ngaashi Aakriste yomethelemumvo lyotango, natse kunena ohatu konakona uuyelele, nombepo ondjapuki ohayi tu kwathele tu wu uve ko nokonima yethimbo ohatu wu dhimbulukwa noku wu tula miilonga. (Luk. 12:11, 12) Inatu pumbwa elongo lya gwedhwa po opo tu uve ko oshili kombinga yiinima yomuule yopambepo ndjoka ya kala ya nyanyangidhwa. (Iil. 4:13) Ongiini tatu vulu okuhwepopaleka euvoko lyetu lyiinima yomuule yaKalunga? Tala komaetopo ngaka.

12. Opoompito dhini tu na okugalikana tu pewe ombepo ondjapuki?

¹² Galikana wu pewe ombepo ondjapuki. Uuna tu li pokukonakona uuyelele wopamanyolo, tango otu na okupula ombepo ondjapuki megalikano opo yi tu wilike. Shika oshoshili nonando otu li otse atuke nenge ethimbo ndyoka tu na efupi. Omaindilo geifupipiko ga tya ngaaka otaga ka nyanyudha omutima gwaTate yetu gwomegulu. Ngaashi Jesus a li e shi ulike, Jehova ota ka gandja ombepo ye ondjapuki nehalo kwaamboka taye mu indile.—Luk. 11:13.

13, 14. Okwiilongekidhila okugongala otaku dhana onkandangala yini mokuuva ko iinima yomuule yaKalunga?

¹³ Ilongekidhila okugongala. Ohatu pewa “iikulya pethimbo” okuza kongundu yomupiya. “Omupiya” oha gwanitha po iitegelelwa ye moku tu pa uuyelele wopamanyolo nomokulongekidha omalandulathano molwokukonakona nosho wo molwokugongala. Oku na omatompelo ga konakonwa nawa sho ta pula “ooitaali” ayehe ya konakone uuyelele wontumba. (1 Pet. 2:17; Kol. 4:16; Jud. 3) Ohatu longele kumwe nombepo ondjapuki sho tatu ningi shoka tatu vulu okulandula omaetopo ngoka ga tulwa po.—Eh. 2:29.

¹⁴ Sho tatu ilongekidhile okugongala kwopaKriste, oshi li nawa ngele tatu tala Omanyolo ngoka inaaga tothwa mo nokukambadhala okuuva ko nkene kehe enyolo lya pambathana noshileshwa shoka tashi konakonwa. Okuninga ngaaka pandjigilile otaku ka hwepopaleka euvoko lyetu lyOmbiimbeli kashona nakashona. (Iil. 17:11, 12) Okukonga Omanyolo otaku tu kwathele opo oohapu dhamo dhi kale momadhiladhilo getu shoka hashi ningitha opo ombepo ondjapuki yi vule oku tu kwathela tu dhi dhimbulukwe. Natango, ngele twa mono enyolo mOmbiimbeli, shika ohashi thigi efano momadhiladhilo getu notashi vulu oku tu kwathela tu dhimbulukwe enyolo ndyoka kutya oli li peni uuna twe li pumbwa.

15. Omolwashike tu na okukala aluhe hatu lesha iileshomwa pethimbo, nongiini to vulu oku shi tsakanitha?

¹⁵ Kala aluhe ho lesha iileshomwa yoye pethimbo. Iinima yimwe mbyoka ya nyanyangidhwa ihayi konakonwa pokugongala, ihe oya longekidhwa omolwuuwanawa wetu. Nokuli niifo mbyoka hatu gandja muukalele oye tu nyolelwa wo. Muuyuni mbuka wi ipyakidhila opu na omathimbo gamwe tu na okutegelela gumwe nenge oshinima shontumba. Ngele ohatu kala twa humbata iileshomwa mbyoka inaatu lesha nenge inaatu mana oku yi lesha, otatu vulu okulongitha oompito ndhika okulesha mo. Yamwe ohaya kambadhala okupulakena uungalo wiileshomwa yetu omanga taye ende nenge ye li miiyenditho. Iileshomwa ayihe mbika oya konakonwa nawa noya nyolwa opo yi nyanyukilwe kaaleshi nohayi indjipalitha olupandu lwetu lwiinima yopambepo.—Hab. 2:2.

16. Mbela uuwanawa wuni hawu zi mokunyola pombapila omapulo ngoka hage ya momadhiladhilo getu nomokukonga omayamukulo gago?

¹⁶ Kala ho tedhatedha. Uuna to lesha Ombiimbeli nenge iileshomwa mbyoka ya kankamena kuyo, kutha ethimbo lyokudhiladhila. Sho to landula nawa omadhiladhilo taga landulathana mokulesha kwoye, otashi vulika pu holoke omapulo. Oto vulu okunyola pombapila omapulo ga tya ngawo noku ga konakona konima yethimbo. Olwindji uuna tatu kongo omayamukulo komapulo getu ohashi tu fala mokukonakona iinima yomuule. Euvoko ndyoka hatu mono mo ohali ningi oshitopolwa shomaliko getu gopaumwene moka tatu vulu okupalulwa ngele twe shi pumbwa.—Mat. 13:52.

17. Ohamu konakona shike mekonakono lyuukwanegumbo nenge lyopaumwene?

¹⁷ Tulii po ethimbo lyekonakono lyuukwanegumbo. Olutuwiliki ohalu tu kumagidha atuhe tu ikalekele ongulohi nenge ethimbo lilwe oshiwike kehe omolwekonakono lyopaumwene nenge lyuukwanegumbo. Molwaashoka elandulathano lyetu lyokugongala olya lundululwa, oshe tu pa ompito tu tule miilonga omayele ngaka. Ohamu konakona shike kongulohi yEkonakono lyUukwanegumbo? Yamwe ohaya lesha Ombiimbeli nokukonga uuyelele kombinga yoovelise ndhoka hadhi eta omaipulo momadhiladhilo gawo nokundhindhilika efatululo efupi mOombimbeli dhawo. Omaukwanegumbo ogendji ohaga longitha ethimbo okutala nkene ge na okutula miilonga iinima mbyoka tayi konakonwa. Omitse dhuukwanegumbo dhimwe ohadhi hogolola iitopolwa mbyoka yu uvite kutya uukwanegumbo owa pumbwa okukonakona nenge mbyoka yi na ko nasha niinima nenge nomapulo ngoka uukwanegumbo wa pula ga konakonwe. Nopwaahe na omalimbililo, momukokomoko gwethimbo otamu ka dhiladhila kombinga yiinima yilwe mbyoka tayi vulu okukonakonwa.a

18. Omolwashike kaatu na okukala nuumbanda wokukonakona oshili kombinga yiinima yomuule yOohapu dhaKalunga?

¹⁸ Jesus okwa li a ti kutya ombepo oya li tayi ka longa yi li omukwathi. Onkee ano, katu na okukala nuumbanda wokukonakona oshili kombinga yiinima yomuule yOohapu dhaKalunga. Oshili ya tya ngawo oyi li oshitopolwa ‘shontseyo yokutseya Kalunga’ yi na ondilo notwa hiywa tu yi konakone. (Lesha Omayeletumbulo 2:1-5.) Ohayi holola oshindji kombinga ‘yaashoka Kalunga e shi longekidhila mboka ye mu hole.’ Sho tatu ningi oonkambadhala okwiilonga oshindji kombinga yOohapu dhaKalunga, ombepo ondjapuki otayi ke tu kwathela, molwaashoka “Ombepo [otayi] konakona ayihe, noyomuule womadhiladhilo gaKalunga.”—1 Kor. 2:9, 10.

[Enyolo lyopevi]

Oto yamukula ngiini?

• Ombepo ohayi tu kwathele tu konakone ‘iinima yomuule yaKalunga” momikalo dhopaali dhini?

• Ombepo ondjapuki oya holola oshili kombinga yiinima yomuule methelemumvo lyotango okupitila moolye?

• Ongiini ombepo ondjapuki hayi yelitha iinima kunena?

• Oshike to vulu okuninga opo wu mone uuwanawa monkandangala ndjoka hayi dhanwa kombepo?

[Oshimpungu pepandja 30]

Nkene ombepo ya holola eityo lyotempeli yopambepo

Yimwe ‘yomiinima yomuule yaKalunga’ mbyoka ya li ya hololwa methelemumvo lyotango oya li kutya etsalihangano nootempeli ndhoka dha holoka po konima yethimbo odha li tadhi thaneke oshinima oshinene shoshili shopambepo. Paulus okwa li i ithana oshinima shika shoshili kutya oshi li ‘otempeli yo yene ndjoka ya tungwa kOmuwa, hakomuntu.’ (Heb. 8:2) Ndjika oya li otempeli onene yopambepo, ndjoka yi li elongekidho lya li lya ningwa tashi wapa keyambo lyaJesus Kristus nokuusaaseri we.

‘Otempeli yo yene’ oya holoka po mo 29 E.N. sho Jesus a ninginithwa na Jehova okwa li e mu taamba e li ngoka ta ka ninga eyambo lya gwanenena. (Heb. 10:5-10) Konima yeso neyumuko lye, Jesus okwa li a yi mUuyapukielela wotempeli yopambepo nokwa li a gandja ongushu yeyambo lye “koshipala shaKalunga.”—Heb. 9:11, 12, 24.

Menyolo lilwe, omuyapostoli Paulus okwa li a nyola kombinga yAakriste aagwayekwa ye li ‘taya koko sigo taya ningi otempeli ondjapuki mOmuwa.’ (Ef. 2:20-22) Mbela otempeli ndjika oya li tayi ka kala ‘otempeli yo yene’ ndjoka konima e yi hokolola montumwafo ye kAahebeli? Aapiya yaJehova osho ya li taya dhiladhila uule woomvula omilongo. Osha li tashi monika sha fa Aakriste aagwayekwa oya li ya longekidhwa kombanda yevi opo ya ka ninge ‘omamanya’ gotempeli yaJehova yomegulu.—1 Pet. 2:5.

Ihe lwokuuka komvula 1971, iilyo yongundu yomupiya mbyoka yi na oshinakugwanithwa oya tameke okuuva ko kutya otempeli ndjoka ya popiwa kuPaulus mAaefeso itashi vulika yi kale otempeli onene yaJehova yopambepo. Ngele ‘otempeli yo yene’ oya li ya thikama po mAakriste aagwayekwa mboka ya yumuka, oya li tayi ka kala po konima ngele eyumuko lyawo lya tameke pethimbo ‘lyokukala po kwOmuwa.’ (1 Tes. 4:15-17, NW) Ihe Paulus okwa popi kombinga yetsalihangano a ti: ‘Etsali ndika olyo efano tali ulike ethimbo lyongashingeyi.’—Heb. 9:9.

Mokukonakona nawa iinima mbika nosho wo omanyolo galwe, osha li sha yela mo nawa kutya otempeli yopambepo kayi li metifa lyokutungwa nosho wo kutya Aakriste aagwayekwa kaye shi “omamanya” ngoka haga longekidhwa kombanda yevi opo ga kwatelwe moku yi tunga. Pehala lyaashono, Aakriste aagwayekwa otaya yakula mehale nosho wo mUuyapuki wotempeli yopambepo nokupa Kalunga esiku kehe “omahambelelondjambo.”— Heb. 13:15, KB.

[Ethano pepandja 31]

Ongiini tatu vulu okuhwepopaleka euvoko lyetu ‘lyiinima yomuule yaKalunga’?