OSHILESHWA 17
Jesus oku na omaukwatya geni?
Uuna tatu ilongo kombinga yiinima mbyoka Jesus a popi nokwa ningi sho a li kombanda yevi, ohatu ndhindhilike muye omaukwatya ngoka hage tu nanene kuye nokuHe, Jehova. Gamwe gomomaukwatya ge ngoka ogeni? Ongiini tatu vulu okuholela Jesus monkalamwenyo yetu?
1. Omomikalo dhini Jesus a fa He?
Jesus okwa li ha kala a tala He omunahole, Jehova, sho ta longo pamwe naye megulu, uule womimvo omabiliyona. Shono oshe mu ningitha a kale ha dhiladhila, ha katuka noha kala u uvite ngaashi he. (Lesha Johannes 5:19.) Jesus okwa li nokuli a holele uukwatya waJehova thiluthilu, shoka she mu ningitha a tye: “Kehe ngoka a mono ndje, okwa mona wo Tate.” (Johannes 14:9) Sho to ilongo kombinga yuukwatya waJesus, oto ka tseya nawa Jehova. Pashiholelwa, momukalo moka Jesus a li u ulukile aantu olukeno, otagu ulike kutya Jehova oha kala e tu uvitile ngiini.
2. Jesus oku ulike ngiini kutya oku hole Jehova?
Jesus okwa ti: “Uuyuni ou na okutseya kutya ngame ondi hole Tate. Onkee otandi longo ayihe, ngaashi a lombwele ndje.” (Johannes 14:31) Sho a li kombanda yevi, Jesus okwa li a ulike kutya oku hole He noonkondo mokuvulika kuye nonando osha li oshidhigu oku shi ninga. Okwa li wo e hole okupopya kombinga yaHe nokukwathela yalwe ya kale ye na ekwatathano naYe. — Johannes 14:23.
3. Jesus oku ulike ngiini kutya oku hole aantu?
Ombiimbeli otayi popi Jesus tayi ti kutya ‘enyanyu lye olya li okunyanyukilwa aana yaantu.’ (Omayeletumbulo 8:31) Okwa li a ulike enyanyu ndyoka nenge ohole sho a tsu aantu omukumo noku ya kwathela nehalo ewanawa. Okwa li a longo iikumithalonga mbyoka yu ulike oonkondo dhe nosho wo olukeno lwe. (Markus 1:40-42) Okwa li a ungaunga naantu ayehe nohenda noka li e na okatongo. Oohapu ndhoka a li a popi odha hekeleke nodha gandja etegameno kaanamitima omiwanawa ayehe mboka ye mu pulakene. Jesus okwa li e na ehalo lyokumona iihuna nokusa, molwaashoka oku hole aantu ayehe. Ihe oku hole unene mboka haya vulika komalongo ge. — Lesha Johannes 15:13, 14.
ILONGA OSHINDJI
Ilonga oshindji kombinga yuukwatya waJesus. Tala wo nkene wu na okuulika ohole nokukala ho gandja ngaashi ye.
4. Jesus oku hole He
Oshiholelwa shaJesus ohashi tu longo nkene tu na okuulika kutya otu hole Kalunga. Lesha Lukas 6:12 nosho wo Johannes 15:10; 17:26. Ngele mwa lesha enyolo kehe, kundathaneni epulo tali landula:
Omomikalo dhini tatu vulu okuholela Jesus, opo tu ulike kutya otu hole Jehova?
Jesus okwa li e hole He gwomegulu nokwa li ha popi naye pandjigilile
5. Jesus okwa li e na ko nasha noompumbwe dhayalwe
Jesus okwa li ha pititha komeho unene oompumbwe dhayalwe, pehala lyoompumbwe dhe. Nonando poompito dhimwe okwa li ha kala a vulwa, okwa li a longitha ethimbo lye noonkondo dhe a kwathele aantu. Lesha Markus 6:30-44, e tamu kundathana omapulo taga landula:
Mehokololo ndika, Jesus oku ulike ngiini kutya oku na ko nasha naantu? — Tala ovelise 31, 34, 41 no 42.
Oshike shi inyengitha Jesus a kwathele aantu? — Tala ovelise 34.
Molwaashoka Jesus oha ulike uukwatya wa fa waJehova, shono otashi ku longo shike kombinga yaJehova?
Omomikalo dhini tatu vulu okuholela Jesus mokukala tu na ko nasha naantu?
6. Jesus oha gandja
Jesus okwa li ha gandja, nonando ka li e na iinima oyindji, nokwe tu ladhipika natse tu kale hatu gandja. Lesha Iilonga 20:35, e tamu kundathana epulo tali landula:
Shi ikolelela kwaashono sha popiwa kuJesus, oshike tashi tu kwathele tu kale twa nyanyukwa?
Dhana OKAVIDIO haka, e tamu kundathana epulo tali landula.
Omomikalo dhimwe dhini tatu vulu okugandja, nonando katu na iinima oyindji?
Owe shi tseya ngaa?
Ombiimbeli otayi tu longo tu galikane kuJehova okupitila medhina lyaJesus. (Lesha Johannes 16:23, 24.) Uuna tatu galikana ngawo, otatu ulike kutya otwa pandula shoka Jesus e tu ningila, opo tu vule okupanga uukuume naJehova.
AANTU YAMWE OHAYA TI: “Kalunga ke na ko nasha nokumona iihuna kwetu.”
Molwaashono Jesus ohu ulike uukwatya wa fa waHe, shono ha ningi ohashi ulike ngiini kutya Jehova oku na ko nasha natse?
OWI ILONGO SHIKE?
Jesus oku hole Jehova nosho wo aantu. Molwaashoka Jesus okwa fa He, sho to ende to mu tseya nawa, oto ka tseya wo nawa Jehova.
Omapulo geendululo
Ongiini tatu vulu okuulika kutya otu hole Jehova, ngaashi Jesus?
Ongiini tatu vulu okuulika kutya otu hole aantu, ngaashi Jesus?
Uukwatya waJesus wuni wu hole unene?
UUYELELE WA GWEDHWA PO
Tala kuukwatya wumwe waJesus mboka tatu vulu okuholela.
“Opo wu holele Jesus, owu na okukala . . .” (Jesus oye ondjila, noshili nomwenyo, epandja 317)
Ilonga kutya omolwashike twa pumbwa okugalikana medhina lyaJesus.
“Omolwashike tu na okugalikana medhina lyaJesus?” (Oshungolangelo, 1 Febuluali 2008)
Mbela Ombiimbeli oya popya kutya Jesus okwa li a tya ngiini?
“Jesus okwa li a tya ngiini?” (Oshitopolwa shi li kepandja lyetu lyokointaneta)
Oshike tatu ilongo kunkene Jesus a li a ungaunga naakiintu?
“Kalunga okwa simaneka aakiintu nokwe ya tala ko ye na oshilonga” (Oshungolangelo, 1 Septemba 2012)