ONGULUMAMBO MOINTANETA yiileshomwa yopaMbiimbeli
ONGULUMAMBO MOINTANETA
yiileshomwa yopaMbiimbeli
Oshindonga
  • OMBIIMBELI
  • IILESHOMWA
  • OKUGONGALA
  • w10 10/1 ep. 20-23
  • Mbela oho kwatele komeho ooitaali ooyakweni moku ya simaneka?

Oshitopolwa shika kashi na okavidio.

Opu na epuko lyasha, okavidio itaka yi komeho.

  • Mbela oho kwatele komeho ooitaali ooyakweni moku ya simaneka?
  • Oshungolangelo tayi tseyitha uukwaniilwa waJehova—2010
  • Uupalanyolo uushona
  • Uuyelele wa faathana
  • Oshike sha kwatelwa mokusimaneka yalwe?
  • Simaneka aantu molwaashoka oya shitwa “mondjelo yaKalunga”
  • Iilyo yuukwanegumbo wumwe
  • Omolwashike sha simana okusimaneka yalwe?
  • Oshinakugwanithwa shoka atuhe twa pewa
  • Simaneka mboka ya talika ko ye na ondondo yopevi
  • Ohatu ulike esimaneko sho tatu longitha ethimbo lyetu okukwathela yalwe
  • Kala wa tokola toko okukwatela komeho mokusimaneka ooitaali ooyakweni
  • Oho tula po ngoo oshihopaenenwa mokufimaneka vamwe?
    Oshungolangelo tayi tseyitha uukwaniilwa waJehova—2008
  • Gandja esimano kwaangoka a gwana oku li pewa
    Oshungolangelo tayi tseyitha Uukwaniilwa waJehova (yokukonakonwa) — 2017
  • “Simaneka ho nanyoko”
    Onkalamwenyo yopaKriste niilonga yokuuvitha — Okafo kokulongithwa pokugongala — 2018
Oshungolangelo tayi tseyitha uukwaniilwa waJehova—2010
w10 10/1 ep. 20-23

Mbela oho kwatele komeho ooitaali ooyakweni moku ya simaneka?

“Mokuhola aamwaho kaleni mu ninathane olukeno. Kwatelathaneni komeho mokusimanekathana.”—ROM. 12:10, NW.

1, 2. (a) Ekumagidho lini Paulus a gandja montumwafo ye ndjoka a li a nyolele Aaroma? (b) Omapulo geni tatu ka kundathana?

MONTUMWAFO ye ndjoka a li a nyolele Aaroma, omuyapostoli Paulus okwa li a tsu omuthindo nkene sha simana kutse tu li Aakriste tu kale hatu ulukilathana ohole megongalo. Okwe tu dhimbulukitha kutya ohole yetu “inayi kala niihelele.” Okwa ti wo kutya otu na okukala tu ‘hole aamwatate’ nokwa ti kutya ohole ndjoka oyi na okuulikwa ‘nolukeno.’—Rom. 12:9, 10a, NW.

2 Dhoshili, okukala nohole yaamwayinathana osha kwatela mo oshindji kaashi shi owala okukala tu ya uvitile nawa. Omaiyuvo ga tya ngaaka oge na okuulikwa niilonga. Paushili wo wene, kapu na ngoka ta ka mona ohole yetu ngele inatu yi ulika momikalo dhontumba. Onkee ano, okwa gwedha ko ekumagidho a ti: “Kwatelathaneni komeho mokusimanekathana.” (Rom. 12:10b, NW) Oshike sha kwatelwa mokuulika esimaneko? Omolwashike sha simana tu kwatele komeho mokusimaneka ooitaali ooyakwetu? Ongiini tatu vulu oku shi ninga?

Oshike sha kwatelwa mokusimaneka yalwe?

3. Momalaka moka Ombiimbeli ya nyolwa petameko, oshitya “esimaneko” otashi gandja edhiladhilo lyashike?

3 Oshitya shOshihebeli “esimaneko” otashi ti kutya “oshinima shi na oshiviha oshidhigu.” Omuntu ngoka a simanekwa okwa talika ko e na oshiviha oshidhigu pathaneko nenge e na oshilonga. Oshitya shOshihebeli shoka ohashi tolokwa wo olundji mOmanyolo gOshihebeli shi li “esimano,” shoka tashi ulike kutya ngoka a simanekwa okwa yelwa noonkondo. (Gen. 45:13) Oshitya shOshigreka shoka sha tolokwa “esimaneko” mOmbiimbeli otashi gandja edhiladhilo lyokukala nongushu nenge lyokukala wu na oshilonga. (Luk. 14:10) Eeno, mboka twa simaneka oye na oshilonga kutse.

4, 5. Oshike sha kwatelwa mokuulika esimaneko? Shi yelitha.

4 Oshike sha kwatelwa mokusimaneka yalwe? Tango osha kwatela mo nkene twe ya tala ko. Esimaneko olyo euliko lyomontaneho lyankene twa tala ko yalwe. Oku shi popya niitya yimwe, ohatu ulukile yalwe kutya otwe ya simaneka mokukala tu na etaloko li li nawa shi na ko nasha nayo notatu ke shi ulika momukalo ngoka hatu ungaunga nayo.

5 Ongiini Omukriste ta vulu okuulukila ooitaali ooyakwawo esimaneko lyashili ngele ine ya simaneka shili tashi zi komutima? (3 Joh. 9, 10) Ngaashi owala omuti tagu vulu okukala gwa ziza nawa ngele gwa tsikwa mevi li li nawa, esimaneko otali vulu wo okukala lyashili notali kalelele ngele olya mena omidhi momutima. Molwaashoka esimaneko kaali shi lyashili inali mena omidhi momutima, otali ka kana po mbala. Itashi kumitha ano sho Paulus a tetekelitha ekumagidho lye opo u ulike esimaneko noohapu ndhoka tadhi ti: “Ohole inayi kala niihelele.”—Rom. 12:9, KB; lesha 1 Petrus 1:22.

Simaneka aantu molwaashoka oya shitwa “mondjelo yaKalunga”

6, 7. Omolwashike twa pumbwa okukala twa simaneka yalwe?

6 Molwaashoka okuulika esimaneko lyashili oku na okuza komutima, katu na okudhimbwa omatompelo gopamanyolo ngoka tu na gokusimaneka aamwatate ayehe. Onkee ano, natu ka kundathaneni omatompelo gaali gomugo.

7 Aantu inaya fa iishitwa yilwe yokombanda yevi, molwaashoka yo oya shitwa “mondjelo yaKalunga.” (Jak. 3:9) Onkee ano, otu na omaukwatya gopakalunga ngaashi ohole, uunongo nuuyuuki. Ndhindhilika wo oshinima shilwe shoka twa mona okuza kOmushiti gwetu. Omupisalomi okwa ti: “OMUWA . . . , oto hambelelwa sigo okombanda yomagulu . . . Omuntu owe mu shiti e vulike ashike kungoye mwene; owe mu zaleke eadhimo nesimano.” (Eps. 8:1, 4, 5; 104:1)a Aantu oya zalekwa nenge ya pewa kuKalunga etumbalo, eadhimo nosho wo esimano. Kungawo, ngele twa tumbaleka omuntu gulwe, ohatu ulike kutya otwa zimina kutya Jehova oye Onzo yetumba ndyoka li niwe kaantu. Onkee ano, ngele otu na omatompelo gomungunda gokusimaneka aantu, itatu ka kala tuu tu na omatompelo lela gokusimaneka ooitaali ooyakwetu!—Joh. 3:16; Gal. 6:10.

Iilyo yuukwanegumbo wumwe

8, 9. Paulus okwa li a gandja etompelo lini lyokukala twa simaneka ooitaali ooyakwetu?

8 Paulus okwa li a gandja etompelo lilwe kutya omolwashike tu na okukala twa simanekathana. Manga owala inaa gandja ekumagidho kutya aantu oye na okukala ya simaneka yalwe, okwa ti: “Mokuhola aamwaho kaleni mu ninathane olukeno.” Oshitya shOshigreka sha tolokwa “olukeno” otashi ulike kekwatathano lyopothingo ndyoka hali hanganitha uukwanegumbo wu na ohole nohawu ambidhidhathana. Kungawo, mokulongitha oshitya shoka, Paulus okwa tsu omuthindo kutya omakwatathano megongalo oge na okukala ga kola nogopahole ngaashi hashi kala muukwanegumbo mboka wa hangana. (Rom. 12:5) Kakele kaashono, kaleka momadhiladhilo kutya Paulus oohapu ndhoka okwe dhi nyolela Aakriste aagwayekwa, ayehe mboka ya ninga oyana yaHe gumwe, Jehova. Onkee ano, momukalo gwa tongomana oya li uukwanegumbo mboka wa li wu na ekwatathano lyopothingo. Onkee ano, Aakriste aagwayekwa yopethimbo lyaPaulus oya li ye na lela etompelo lya kola lyokusimanekathana. Osha faathana wo nAakriste aagwayekwa kunena.

9 Ongiini kombinga yaamboka ye li iilyo ‘yoonzi dhilwe’? (Joh. 10:16) Nonando inaya ninga natango oyana yaKalunga, oshi li mondjila yi ithanathane omumwatate nomumwameme molwaashoka oye li uukwanegumbo wumwe wopaKriste wa hangana womuuyuni auhe. (1 Pet. 2:17; 5:9) Kungawo, ngele mboka yiilyo yoonzi dhilwe oyu uvite ko thiluthilu shoka taya ti ngele taya longitha oshitya “omumwatate” nenge “omumwameme,” otaya vulu nduno wo okukala ye na etompelo lya kola lyokusimaneka ooitaali ooyakwawo.—Lesha 1 Petrus 3:8.

Omolwashike sha simana okusimaneka yalwe?

10, 11. Omolwashike sha simana okusimaneka yalwe?

10 Omolwashike sha simana okusimaneka yalwe? Omolwetompelo ndika: Okukala twa simaneka aamwatate naamwameme, ohatu kutha ombinga onene mokukaleka egongalo alihe li li nawa noli li muukumwe.

11 Dhoshili, otu shi shi kutya okukala tu na ekwatathano lyopothingo naJehova nokumona ekwatho lyombepo ye oyo yi li oonzo dha simana dhoonkondo ndhoka tu na tu li Aakriste yashili. (Eps. 36:7; Joh. 14:26) Pethimbo olyo tuu ndyoka, uuna ooitaali ooyakwetu tayu ulike kutya oye tu tala ko tu na oshilonga, ohashi tu ladhipike. (Omayel. 25:11) Ohatu kala tu uvite twa tsuwa omukumo uuna yalwe ye tu pandula noye tu simaneka. Ohashi tu gwedhele ko oonkondo tu tsikile nokweenda nenyanyu notu na etokolotoko sho tatu ende mondjila ndjoka tayi fala komwenyo. Nopwaahe na omalimbililo osho wa li wu uvite ngaaka.

12. Ongiini kehe gumwe gwomutse ta vulu okugwedha kombepo yohole ndjoka yi li megongalo?

12 Molwaashoka Jehova oku shi nawa ompumbwe yetu ndjoka twa valwa nayo yokukala twa hala okukala twa simanekwa, ote tu ladhipike okupitila mOohapu dhe tu ‘kwatelathane komeho mokusimanekathana.’ (Rom. 12:10, NW; lesha Mateus 7:12.) Aakriste ayehe mboka haya tula momitima dhawo omayele ngoka ohaya gwedha wo kombepo yohole ndjoka hayi kala mokati kuumwayinathana wopaKriste. Onkee ano, otatu ningi nawa ngele tatu ipula tatu ti: ‘Ondi ihula uunake okuulika okupitila moohapu dhandje nenge miilonga yandje kutya onda simaneka omumwatate nenge omumwameme megongalo tashi zi komutima?’—Rom. 13:8.

Oshinakugwanithwa shoka atuhe twa pewa

13. (a) Olye e na okukwatela komeho mokusimaneka yalwe? (b) Oohapu dhaPaulus ndhoka dhi li mAaroma 1:7 otadhi ulike shike?

13 Olye e na okukwatela komeho mokuulika esimaneko? Montumwafo ye ndjoka a li a nyolele Aahebeli, Paulus okwa hokolola aakuluntugongalo Aakriste ye li ‘aawiliki [nenge “aakwatelikomeho,” KB] yeni.’ (Heb. 13:17) Odhoshili kutya aakuluntugongalo ohaya kwatele komeho iilonga oyindji. Nonando ongawo, ye li aasita yoonzi, osha yela kutya oya pumbwa okukwatela komeho mokusimaneka ooitaali ooyakwawo, mwa kwatelwa aakuluntugongalo ooyakwawo. Pashiholelwa, uuna aakuluntugongalo ya gongala ya kundathane oompumbwe dhegongalo, ohaya simanekathana mokupulakena nawa komatyokosha ngoka taga ningwa kaakuluntugongalo ooyakwawo. Natango, ohaya ulike esimaneko ngele taya kala ye na ko nasha nomataloko nosho wo nomatyokosha gaakuluntugongalo ayehe uuna taya ningi etokolo lyontumba. (Iil. 15:6-15) Ihe otu na okudhimbulukwa kutya ontumwafo yaPaulus ndjoka a li a nyolele Aaroma kaya li owala yu uka kaakuluntugongalo, ihe nosho wo kegongalo alihe. (Rom. 1:7) Kungawo, moku shi tamununa mo, ekumagidho lyokukwatelathana komeho mokusimanekathana otali longo wo kutse atuhe kunena.

14. (a) Gandja ethaneko lyeyooloko ndyoka li li pokati kokuulika esimaneko nokukwatelathana komeho mokusimanekathana. (b) Epulo lini tatu vulu okwiipula?

14 Ndhindhilika wo oshinima shika shomomayele gaPaulus. Ina ladhipika owala ooitaali ooyakwawo muRoma ya simanekathane, ihe okwa ti wo kutya oye na okukwatelathana komeho mokusimanekathana. Eyooloko oli li peni? Dhiladhila kombinga yoshiholelwa shika: Mbela omulongisikola ota ka ladhipika aailongi mboka ye shi nale okulesha yi ilonge okulesha? Aawe, oshoka oye shi nale okulesha. Pehala lyaashono, omulongi ota ka kala a hala okukwathela aailongi ya hwepopale mokulesha kwawo. Sha faathana, okukala tu na ohole ndjoka hayi tu inyengitha tu simanekathane, okwe tu ndhindhilikitha mo nale tu li Aakriste yashili. (Joh. 13:35) Ihe ngaashi naanaa aailongi mboka ye shi nale okulesha taya vulu okuhwepopala mokulesha kwawo, natse otatu vulu okuninga ehumokomeho mokukwatelathana komeho mokusimanekathana. (1 Tes. 4:9, 10) Oshinakugwanithwa shoka osha pewa kehe gumwe gwomutse. Otatu vulu okwiipula: ‘Mbela ohandi kwatele komeho mokusimaneka yalwe megongalo?’

Simaneka mboka ya talika ko ye na ondondo yopevi

15, 16. (a) Uuna tatu ulike esimaneko, oolye kaatu na okudhimbwa, nomolwashike? (b) Oshike tashi vulu okuholola kutya otwa simaneka aamwatate naamwameme tashi zi komutima?

15 Uuna tatu ulike esimaneko, oolye megongalo kaatu na okudhimbwa? Oohapu dhaKalunga otadhi ti: “Ngoka ta sile ohepele ohenda, ota pungula kOMUWA, OMUWA ote ke mu futila iilonga ye iiwanawa.” (Omayel. 19:17) Ongiini ekotampango ndyoka tali adhika moohapu ndhoka li na oku tu inyengitha sho tatu kambadhala okukwatela komeho mokusimanekathana?

16 Oto shi zimine kutya aantu oyendji ohaya vulu okuulika kutya oya simaneka mboka ye ya li pombanda, ihe aantu oyo tuu mbaka otashi vulika ya ungaunge naantu mboka ye wete kutya oye li pevi lyawo momukalo kaagu shi gwesimaneko. Ihe Jehova hasho e li ngaaka. Okwa ti: “Ote simaneke mboka haa simaneke ndje.” (1 Sam. 2:30; Eps. 113:5-7) Jehova oha simaneke mboka haye mu longele noye mu simaneka. Ihi ipwililikile ‘oohepele.’ (Lesha 1 Samuel 2:8; 2 Ondjal. 16:9) Dhoshili, otwa hala okuholela Jehova. Kungawo, ngele otwa hala tu mone kutya otatu shi enditha ngiini mokusimaneka yalwe shili, otatu ningi nawa ngele tatu ipula epulo ndika: ‘Ongiini handi ungaunga naamboka kaaye na oondondo dhopombanda nenge kaaye na iinakugwanithwa megongalo?’ (Joh. 13:14, 15) Eyamukulo kepulo ndyoka otali ulike kutya otwa simaneka yalwe shi thike peni tashi zi komutima.—Lesha Aafilippi 2:3, 4.

Ohatu ulike esimaneko sho tatu longitha ethimbo lyetu okukwathela yalwe

17. Omukalo guni omunene moka tatu vulu okukwatela komeho mokusimaneka yalwe, nomolwashike shi li ngawo?

17 Omukalo guni omunene moka tatu vulu okukwatela komeho mokusimaneka ayehe megongalo? Omokulongitha ethimbo lyetu mokukwathela yalwe. Omolwashike osho shi li ngaaka? Tu li Aakriste, otu na onkalamwenyo yi na omaipyakidhilo ogendji nohashi kutha po ethimbo lyetu olindji okugwanitha po iinakugwanithwa yetu ya simana megongalo. Onkee ano, itashi kumitha sho twa tala ko ethimbo li li oshinima shi na ondilo. Otu shi shi wo kutya katu na okukala twa hala aamwatate naamwameme ya longithe ethimbo lyawo lya pitilila moku tu kwathela. Sha faathana, otatu shi pandula uuna yalwe megongalo yu uvite ko kutya kaye na okukala ya hala ethimbo lyetu olindji lya pitilila.

18. Ongiini tatu vulu okuulika kutya otu na ehalo lyokulongitha ethimbo lyetu okukwathela ooitaali ooyakwetu?

18 Nonando ongaaka, tse (unene tuu mboka tu li aatonateli megongalo) ohatu dhimbulula wo kutya ngele otu na ehalo lyokuya moshipala iilonga yetu opo tu longithe ethimbo lyetu mokukwathela ooitaali ooyakwetu, otashi ulike kutya otwe ya simaneka. Omomukalo guni mbela? Mokweetha omaipyakidhilo getu tu longithe ethimbo lyetu mokukala naamwatate otwa fa tatu ya lombwele tatu ti: ‘Omu na oshilonga noonkondo kungame noshi li sha simana kungame ndi longithe ethimbo lyandje mokukala nane shi vulithe okutsikila naashoka tandi longo.’ (Mark. 6:30-34) Okwaahaninga ngaaka, nasho oshi li wo shoshili. Ngele inatu hala tu ethe po omaipyakidhilo getu opo tu longithe ethimbo lyetu mokukala naamwatate, otashi vulika tu yu uvithe kutya inaya simana lela kutse. Dhoshili, oshi uvitikiwe ko nawa kutya opu na omathimbo gamwe uuna oshinima shontumba shoka she endelela itaashi vulu okuyiwa moshipala. Natango, okukala tu na ehalo nenge okukala inaatu hala tu longithe ethimbo lyetu mokukwathela yalwe, otashi ka ulika kutya esimaneko ndyoka tu na momitima lyokusimaneka aamwatate naamwameme oli thike peni.—1 Kor. 10:24.

Kala wa tokola toko okukwatela komeho mokusimaneka ooitaali ooyakweni

19. Kakele kokulongitha ethimbo lyetu, omomukalo gulwe guni tatu vulu okuulika kutya otwa simaneka ooitaali ooyakwetu?

19 Opu na omikalo dhilwe dha simana moka tatu vulu okuulika kutya otwa simaneka ooitaali ooyakwetu. Pashiholelwa, uuna tatu longitha ethimbo lyetu mokukala nayo, otu na wo oku ya ulukila oku na ko nasha kwetu. Natango, Jehova okwe tu tulila po oshiholelwa. Omupisalomi David okwa ti: “OMUWA oha tonatele aayuuki noha pulakene okulila kwawo.” (Eps. 34:15) Ohatu kambadhala oku mu holela mokutaalelitha omeho nomakutsi getu kaamwatate, sha hala okutya, okugandja eitulomo kuyo, unene tuu kwaamboka taye ya kutse ya hala ekwatho. Mokuninga ngaaka ohatu ulike kutya otwe ya simaneka.

20. Omadhimbulukitho geni twa pewa kombinga yokuulika esimaneko tu na okukaleka momadhiladhilo?

20 Ngaashi twe shi kundathaneni, otwa hala okukaleka momadhiladhilo kutya omolwashike tu na okukala twa simaneka ooitaali ooyakwetu tashi zi komutima. Natango, ohatu kongo oompito tu kale yotango okuulika esimaneko lyetu, mwa kwatela wo naamboka kaaye na oondondo dhopombanda. Mokukatuka oonkatu ndhika, otatu ka nkondopaleka ekwatathano lyuumwayinathana nuukumwe megongalo. Onkee ano, atuheni natu tsikileni okuulika esimaneko, ihe unene tuu tu kwatele komeho mokusimanekathana. Mbela owa tokola toko okuninga ngaaka?

[Enyolo lyopevi]

a Oohapu dhaDavid mEpisalomi eti-8 odhi li wo pauprofeti, tadhi hunganeke kombinga yomulumentu a gwanenena Jesus Kristus.—Heb. 2:6-9.

Oto dhimbulukwa?

• Oshike sha kwatelwa mokusimaneka yalwe?

• Otu na omatompelo geni gokukala twa simaneka ooitaali ooyakwetu?

• Omolwashike sha simana okusimanekathana?

• Omomikalo dhini tatu vulu okuulika kutya otwa simaneka ooitaali ooyakwetu?

    Ndonga Publications (1987-2025)
    Za mo
    Inda mo
    • Oshindonga
    • Tumina yalwe
    • Hogolola
    • Copyright © 2025 Watch Tower Bible and Tract Society of Pennsylvania
    • Ngele to longitha ongulumambo yetu
    • Uuyelele wiinima yopaumwene
    • Privacy Settings
    • JW.ORG
    • Inda mo
    Tumina yalwe