Natu konakoneni “oinima yomoule yaKalunga”

“Omhepo tai konakona aishe, [mwa kwatelwa oinima yomoule yaKalunga, NW].” — 1 OVAKORINTO 2:10.

1. Eeshili dOmbibeli dimwe dilipi hadi hafifa omukonakonimbibeli mupe?

VAHAPU vomufye meongalo lopaKriste ohatu dimbuluka nghee twa li twa hafa eshi twa hovela okulihonga oshili. Otwa li twe lihonga eityo ledina Jehova; kutya omolwashike a efela okumona oixuna ku kale po; omolwashike ovanhu vamwe tava i meulu nonokutya ovanhu ovadiinini ove na onakwiiwa ya tya ngahelipi. Otashi dulika twa li hatu lesha nale Ombibeli, ndele katwa li tu udite ko oinima oyo molwaashi oya li ye tu holekwa, ngaashi naanaa ya holekwa ovanhu vahapu. Otwa li twa fa omulumenhu wonhumba oo a li tai molweendo ongula youfiku. Eshi a hovela okweenda, kali ta dulu okudidilika mo kutya oinima oyo e wete oikwashike, molwaashi okwa li kwa laula. Ndele eshi eluwa la hovela okutenda, okwa li e wete kutya oinima oyo e wete oikwashike. Eshi etango la pita filufilu, okwa li e wete nawanawa oinima aishe ihokwifa momudingonoko, nokuli naayo ya li kokule. Sha faafana, eshi umwe a hovela oku tu kwafela tu ude ko Omishangwa, katwa li naanaa tu udite ko “oinima yomoule yaKalunga.” — 1 Ovakorinto 2:8-10, NW.

2. Omolwashike ehafo olo hali di mokulihonga Eendjovo daKalunga ihali xulu po?

² Mbela otu na ashike okukala twa wanenwa keshiivo lOmbibeli lopehovelo? Outumbulilo “oinima yomoule yaKalunga” owa kwatela mo okuuda ko ounongo waKalunga oo wa hololelwa Ovakriste okupitila momhepo iyapuki ofimbo wa holekwa ovanhu vamwe. (1 Ovakorinto 2:7) Ounongo waKalunga kau na exulilo, nohatu dulu okukala twa hafa ngeenge otwe u konakona. Ndele nande ongaho, itatu dulu okushiiva keshe shimwe kombinga younongo waKalunga. Ehafo olo twa li tu udite eshi twa hovela okulihonga omahongo Ombibeli opehovelo otali dulu okukalelela ngeenge otwa twikile okukonakona noudiinini “oinima yomoule yaKalunga.”

3. Omolwashike twa pumbwa okukala tu na ekanghameno laasho twa itavela?

³ Omolwashike twa pumbwa okuuda ko “oinima yomoule”? Inatu pumbwa ashike okuuda ko oinima oyo twa itavela, ndele otwa pumbwa yo okukala tu na ekanghameno kutya omolwashike twe i itavelela. Osho otashi ka pameka eitavelo letu nosho yo elineekelo letu moinima oyo twa itavela. Ombibeli otai tu ladipike tu longife ‘eenghono detu dokudiladila’ opo tu ‘shiive okukonakona ehalo laKalunga, naashi shiwa, sha wapalela nosha wana.’ (Ovaroma 12:1, 2, yelekanifa NW.) Okukala tu udite ko kutya omolwashike Jehova a hala tu kale metwokumwe nehalo laye otashi ka pameka etokolo toko letu lokukala twa hala okudulika kuye. Onghee hano, okukala tu shii “oinima yomoule” otaku dulu oku tu kwafela tu pondole ngeenge hatu yelekwa tu longe owii notaku dulu oku tu linyengifa tu kale hatu ‘diinine oilonga iwa.’ — Titus 2:14.

4. Okukonakona Ombibeli okwa kwatela mo shike?

⁴ Opo tu ude ko oinima yomoule yaKalunga, otwa pumbwa okukala hatu konakona. Ndele okukonakona kaku fi ashike okulesha omauyelele ngahenya. Okwa kwatela mo okukonakona ouyelele noukeka opo tu mone nghee wa pambafana noinima oyo tu shii nale. (2 Timoteus 1:13) Okwa kwatela mo okuuda ko omatomheno oo a kwatelwa mo mwaasho sha popiwa. Okukonakona Ombibeli oku na yo okukwatela mo okudilonga shi na sha nanghee hatu dulu okutula moilonga osho twe lihonga mokuninga omatokolo e li pandunge nosho yo mokukwafela vamwe. Kakele kaasho, molwaashi “Omishangwa adishe da yandjwa keenghono dOmhepo yaKalunga odi shii kulonga,” okukonakona Ombibeli kwetu oku na okukwatela mo ‘ondjovo keshe tai di mokanya kaKalunga.’ (2 Timoteus 3:16, 17; Mateus 4:4) Nonande okukonakona Ombibeli otaku pula eenghendabala da mana mo, otaku dulu yo okukala ku hafifa nohatu ka dula okuuda ko noupu “oinima yomoule yaKalunga.”

Jehova oha kwafele ovalininipiki va ude ko oinima yaye yomoule

5. Oolyelye tava dulu okuuda ko “oinima yomoule yaKalunga”?

⁵ Nonande kwa li ho pondola eshi wa li mofikola ile ku shii lela okukonakona, ino diladila kutya ito dulu okuuda ko “oinima yomoule yaKalunga.” Pefimbo loukalele waJesus kombada yedu, Jehova ka li a hololela ovanongo novanaendunge elalakano laye, ndele okwa li e li hololela ovanhu vongaho noinava hongwa, ovo va li ovalininipiki nova wana okuhongwa kuJesus. Ova li tava monika va fa ouhanana ngeenge ova yelekanifwa novanhu ovo va li va hongwa keefikola. (Mateus 11:25; Oilonga 4:13) Omuyapostoli Paulus okwa shangela ovaitaveli vakwao shi na sha naasho ‘Kalunga e shi longekidila ava ve mu hole,’ a ti: “Kalunga okwe shi tu hololela kOmhepo yaye, osheshi Omhepo tai konakona aishe, [mwa kwatelwa oinima yomoule yaKalunga, NW].” — 1 Ovakorinto 2:9, 10.

6. Ovakorinto votete 2:10 ova hala okutya shike?

⁶ Omhepo yaKalunga ohai konakona ngahelipi “aishe, mwa kwatelwa oinima yomoule”? Ponhele yokuhololela Omukriste keshe oshili pauhandimwe, Jehova oha longifa omhepo yaye okuwilika ehangano laye, olo hali yandje eudeko lOmbibeli koshiwana shaye sha hangana. (Oilonga 20:28; Ovaefeso 4:3-6) Omaongalo aeshe mounyuni aushe ohaa kala e na elandulafano lokukonakona Ombibeli la faafana. Oshiwana shaye osha kala tashi konakona omahongo aeshe Ombibeli oule womido da pita. Omhepo iyapuki ohai kwafele Ovakriste momaongalo opo va kale ve na oikala oyo tai va dulifa va ude ko “oinima yomoule yaKalunga.” — Oilonga 5:32.

“Oinima yomoule yaKalunga” oya kwatela mo shike?

7. Omolwashike ovanhu vahapu vehe udite ko “oinima yomoule yaKalunga”?

⁷ Inatu diladila nande kutya “oinima yomoule” oidjuu unene okuudiwa ko. Okushiiva “oinima yomoule yaKalunga” okwa holekwa ovanhu vahapu, ndele hamolwaashi shidjuu unene okuuda ko ounongo waKalunga, ndele omolwaashi Satana okwa pukifa ovanhu va kale inava hala ekwafo olo tava pewa kuJehova okupitila mehangano laYe. — 2 Ovakorinto 4:3, 4.

8. Paulus okwa li ta popi oinima yomoule ilipi metukulwa etitatu lonhumwafo oyo a li a shangela Ovaefeso?

⁸ Etukulwa etitatu lonhumwafo yaPaulus oyo a li a shangela Ovaefeso otai ulike kutya “oinima yomoule yaKalunga” oya kwatela mo eeshili dihapu odo di uditiwe ko nawa kuvahapu vomoshiwana shaJehova. Dimwe domeeshili odo ongaashi okushiiva kutya Oludalo olo la li la udanekwa olo lyelye, okuhoololwa kwovanhu ovo ve na eteelelo loku ka kala meulu nosho yo Ouhamba wopaMessias. Paulus okwa shanga a ti: “[Oshiholekwa] osho inashi [shiivifilwa] ovana vovanhu mefimbo lomapupi onale, ngaashi sha hololelwa paife ovayapostoli vaye ovayapuki novaprofeti mOmhepo, nokutya, ovapaani ovo oonakufyuulula pamwe naavo omolutu limwe ndele ve noshipewa meudaneko muKristus.” Paulus okwa ti kutya okwa li a lombwelwa a ‘hololele aveshe epangelo loshiholekwa [shiyapuki] eshi sha li sha holekwa muKalunga, okudja momafimbo ounyuni onale.’ — Ovaefeso 3:5-9, yelekanifa NW.

9. Omolwashike shi li oufembanghenda okuuda ko “oinima yomoule yaKalunga”?

⁹ Paulus okwa twikila okuyelifa ehalo laKalunga a ti kutya ‘eulu li shiivifilwe keongalo ounongo uhapu waKalunga.’ (Ovaefeso 3:10) Ngeenge Ovaengeli tava tale nghee Jehova ha ungaunga neongalo lopaKriste, ohave lihongo shihapu kombinga younongo waye. Kashi hafifa tuu okukala tu udite ko oinima oyo ihokwifa nokovaengeli! (1 Petrus 1:10-12) Paulus okwa ti yo kutya otu na okukendabala opo tu “dule okukoneka pamwe novayapuki aveshe oumbwalangadja, noule womukokomoko, noule woposhi, noule wopombada” weitavelo lopaKriste. (Ovaefeso 3:11, 18) Natu ka konakoneni oihopaenenwa imwe yoinima yomoule oyo tashi dulika inatu konakona nale.

Oihopaenenwa yoinima yomoule

10, 11. Pamishangwa, Jesus okwa ninga naini oshitukulwa sha fimanenena ‘sholudalo’ ‘lomwalikadi’ waKalunga womeulu?

¹⁰ Otu shii kutya Jesus oye oshitukulwa sha fimanenena ‘sholudalo’ ‘lomwalikadi’ waKalunga womeulu olo la tongwa muGenesis 3:15. Ndele opo tu shi ude ko nawa otashi dulika tu lipule kutya: ‘Onaini Jesus a ninga oshitukulwa shOludalo olo la li la udanekwa? Mbela ofimbo a li ina ninga omunhu wokombada yedu, opokudalwa kwaye e li omunhu wopambelela, opokuninginifwa kwaye ile openyumuko laye?’

¹¹ Kalunga okwa li a udaneka kutya oshitukulwa shehangano laye shomeulu, osho sha popiwa paxunganeko shi li ‘omwalikadi’ waye, osha li tashi ka dala oludalo olo tali ka nyanyaula omutwe weyoka. Ndele opa li pa pita omido omayovi fimbo omwalikadi waKalunga ina dala oludalo olo tali dulu okuxulifa po Satana noilonga yaye. Onghee hano, mexunganeko laJesaja omwalikadi oo okwa popiwa e li “ongadji” nokwa “nyika oufiye.” (Jesaja 54:1, 5, 6) Konima yefimbo, Jesus okwa ka dalelwa muBetlehem. Eshi a vaekwa nomhepo iyapuki konima yeninginifo laye, okwa li a ninga omona waKalunga wopamhepo, nomolwaasho pomhito oyo Kalunga a ti: “Ou Omona wange.” (Mateus 3:17; Johannes 3:3) Kungaho, Jesus oye a li oshitukulwa sha fimanenena ‘sholudalo’ lomwalikadi oo. Konima yefimbo, ovashikuli vaJesus navo ova ka vaekwa nomhepo iyapuki. ‘Omwalikadi’ waJehova oo a kala oule wefimbo e wete a fa “ongadji” okwa ka ‘kuwilila nehafo.’ — Jesaja 54:1; Ovagalati 3:29.

12, 13. Omishangwa dilipi tadi ulike kutya Ovakriste aveshe ovavaekwa ovo ve li kombada yedu ove li “omupiya omudiinini nomunaendunge”?

¹² Oshihopaenenwa oshitivali shoinima yomoule oyo twa hololelwa oshi na sha nelalakano laKalunga li na sha nokuhoolola ovanhu 144 000. (Ehololo 14:1, 4) Otwa itavela notu udite ko kutya ovavaekwa aveshe ovo ve li kombada yedu pefimbo keshe ove li “omupiya omudiinini nomunaendunge,” oo Jesus a ti kutya ota ka pa ovapiya vaye “oikulya” pefimbo la wapala. (Mateus 24:45) Omishangwa dOmbibeli dilipi tadi ulike kutya eudeko olo oli li mondjila? Mbela Jesus okwa li ta ulike kOmukriste keshe oo ta pameke ovamwaxe pamhepo?

¹³ Kalunga okwa li a lombwela oshiwana shaIsrael a ti: “Onye eendombwedi dange . . . nomupiya wange, ou nde mu hoolola.” (Jesaja 43:10) Ndele mo 11 aNisan 33 O.P, Jesus okwa li a lombwela ovawiliki vaIsrael kutya Kalunga okwe va kufa oufembanghenda wokukala omupiya waYe ve li oshiwana. Jesus okwa ti: ‘Ouhamba waKalunga otau mu kufwa ndele tau pewa ovanhu, hava imike oiimati yawo.’ Jesus okwa li a lombwela eemhunga dovanhu a ti: “Tala, ongulu yeni otai mu fiilwa i kale ongaho.” (Mateus 21:43; 23:38) Nonande Ovaisrael ova li omupiya waJehova, ka va li ovadiinini novanaendunge. (Jesaja 29:13, 14) Lwanima, mefiku omo tuu omo Jesus okwa li a pula a ti: “Olyelye hano omupiya omudiinini nomunaendunge”? Paulelalela okwa li a hala okutya: ‘Oshiwana oshinaendunge shilipi tashi pingena po Israel shi ninge omupiya waKalunga omudiinini?’ Omuyapostoli Petrus okwa li a yandja enyamukulo eshi a lombwela eongalo lOvakriste ovavaekwa a ti: ‘Nye oshiwana shiyapuki, novana vaye mwene.’ (1 Petrus 1:4; 2:9) Oshiwana osho shopamhepo, ‘Israel yaKalunga,’ osho sha ninga “omupiya” waJehova mupe. (Ovagalati 6:16) Ngaashi ashike oilyo aishe yaIsrael shonale ya li “omupiya” umwe, Ovakriste aveshe ovavaekwa ovo ve li kombada yedu pefimbo keshe navo ove li “omupiya omudiinini nomunaendunge.” Kashi fi tuu oufembanghenda okukala hatu mono “oikulya” okupitila momupiya waKalunga!

Oto dulu okuhafela ekonakonombibeli lopaumwene

14. Omolwashike okukonakona Ombibeli haku eta ehafo ku dule ashike oku i lesha ngahenya?

¹⁴ Ngeenge twa yelifilwa ouyelele mupe wopamishangwa, mbela ihatu kala twa hafa eshi tau pameke eitavelo letu? Nomolwaasho okukonakona Ombibeli haku kala ku hafifa ku dule ashike oku i lesha ngahenya. Onghee hano, ngeenge to lesha oishangomwa yopaKriste, lipula kutya: ‘Ongahelipi eyelifo eli handi dulu oku li faafanifa nouyelele oo ndi shii nale kombinga yoshikundafanwa eshi handi konakona? Omishangwa dilipi vali ile ouyelele oo handi dimbuluka oo tau yandje oumbangi wa wedwa po u na sha nexulifodiladilo olo li li moshitukulwa shonhumba?’ Ngeenge owa pumbwa okuninga omapekaapeko a wedwa po, shanga omapulo oo wa hala okumona omanyamukulo kombinga yao ndele to teelele u konge ouyelele oo konima yefimbo.

15. Okukonakona ouyelele ulipi haku eta ehafo, nongahelipi taku dulu oku tu etela ouwa tau kalelele?

¹⁵ Okukonakona ouyelele mupe ulipi taku dulu okweetela omunhu ehafo? Ouyelele wa tya ngaho otau dulu okukwatela mo okukonakona moule omahangano e lili noku lili oo Kalunga a ninga omolwouwa wovanhu. Okukonakona omaxunganeko oo taa ulike kuJesus Kristus ile okukonakona ovelishe novelishe yembo limwe lomomambo Ombibeli opaxunganeko otaku ka pameka eitavelo loye. Oto ka pameka yo eitavelo loye mokukonakona ondjokonona yokunena yEendombwedi daJehova, to longifa embo Jehovah’s Witnesses—Proclaimers of God’s Kingdom, ngeenge oli li melaka olo ho dulu okulesha.a Okukonakona “Omapulo a dja kovaleshi” oo haa nyanyangidwa mOshungonangelo otaku ke ku kwafela yo u ude ko nawa omishangwa donhumba. Eshi to endulula “Omapulo a dja kovaleshi,” didilika omatomheno opamishangwa oo a yandjwa opo ku fikwe pexulifodiladilo lonhumba. Osho otashi ke ku kwafela u deule ‘eenghono doye dokukoneka’ nou kale u na eendunge dokuyoolola. (Ovaheberi 5:14, NW) Eshi to konakona Ombibeli, ninga omadidilikoshango mOmbibeli yoye ile mombapila opo u mone ouwa tau kalelele mekonakono loye nou dule okukwafela vamwe.

Kwafela ounona va kale hava hafele okukonakona Ombibeli

16. Ongahelipi to dulu okukwafela ounona va kale hava hafele okukonakona Ombibeli?

¹⁶ Ovadali otava dulu okukwafela ovana vavo va kale ve na ehalo lokulya eendja dopamhepo. Inamu diladila nande kutya ounona itava dulu okuuda ko oinima yomoule. Ngeenge owa pe ounona oshikundafanwa shonhumba va konge ouyelele omolwokulilongekidila ekonakonombibeli loukwaneumbo, oto dulu oku va pula osho ve lihonga. Mekonakono loukwaneumbo weni otamu dulu okukwatela mo eemhito dokulideula opo mu kwafele ounona va kale ve shii okupopila eitavelo lavo nokuulika kutya osho va hongwa oshoshili. Kakele kaasho, oto dulu okulongifa okabroshure “See the Good Land” b opo u honge ounona oilongo oyo ya tumbulwa mOmbibeli noku va ulikila eenhele odo da tumbulwa melesho lOmbibeli lokoshivike.

17. Omolwashike twa pumbwa okukala nondjele shi na sha nekonakonombibeli lopaumwene?

¹⁷ Okukonakona Ombibeli paumwene otaku dulu okukala ku tunhula notaku pameke eitavelo, ndele ou na okukala wa lungama opo kuha mane po efimbo lokulilongekidila okwoongala. Okwoongala oko onghedi imwe omo Jehova he tu hongo okupitila ‘momupiya omudiinini nomunaendunge.’ Ndele nande ongaho, okukonga omauyelele a wedwa po otaku dulu oku tu kwafela tu yandje omilombo tadi ti sha, ngaashi pEkonakono lEmbo lomEongalo ile pefimbo lomanenediladilo elesho lOmbibeli lokoshivike mOfikola yOukalele wOpauteokratika.

18. Omolwashike eenghendabala odo hatu ningi mokukonakona “oinima yomoule yaKalunga” tadi ti sha?

¹⁸ Okukonakona paumwene Eendjovo daKalunga moule otaku dulu yo oku ku kwafela u ehene popepi naye. Ombibeli oya popya shi na sha nongushu yekonakono la tya ngaho ya ti: ‘Epopilo lounongo olo ngaashi epopilo loimaliwa. Ndelenee ekwafo lokushiiva ololo kutya ounongo otau kwatelele omwenyo ou e u na.’ (Omuudifi 7:12) Onghee hano, eenghendabala odo to ningi opo u ude ko moule oinima yopamhepo otadi ti sha shili. Ombibeli oya udanekela ovo tava twikile okukonga omauyelele kutya ‘otava ka mona eshiivo lokushiva Kalunga.’ — Omayeletumbulo 2:4, 5.

[Omashangelo opedu]

Oto dulu okuyelifa?

• “Oinima yomoule yaKalunga” oshike?

• Omolwashike tuhe na okweefa po okukonakona oinima yomoule yaKalunga?

• Omolwashike Ovakriste aveshe tava dulu okumona ehafo olo hali di mokuuda ko “oinima yomoule yaKalunga”?

• Ongahelipi to dulu okumona ouwa pauyadi oo hau di mokuuda ko “oinima yomoule yaKalunga”?

[Efano pepandja 28]

Onaini Jesus a li a ninga Oludalo la udanekwa?

[Efano pepandja 31]

Ovadali otava dulu okupa ovana vavo oshikundafanwa shonhumba va ka konge ouyelele omolwokulilongekidila ekonakonombibeli loukwaneumbo