Inamu nikitha ombepo ondjapuki yaJehova uuthigwa

“Ombepo Ondjapuki yaKalunga inamu yi nikitha uuthigwa, oshoka oyo oshihako shoku mú ndhindhilikitha.”—EF. 4:30.

1. Jehova okwa ningila shike aantu omamiliyona, noye na oshinakugwanithwa shini?

JEHOVA okwa ningila aantu omamiliyona mboka ye li muuyuni mbuka wu udha uupyakadhi oshinima shi ikalekelwa. Okwe shi ningi tashi wapa opo ya vule okuhedha kuye okupitila mOmwana awike, Jesus Kristus. (Joh. 6:44) Ngoye owu li gumwe gwomoohandimwe mbaka ngele owi iyapulila Kalunga noto kala metsokumwe neiyapulo ndyoka. Wu li omuntu a ninginithwa medhina lyombepo ondjapuki, owu na oshinakugwanithwa shokwiihumbata metsokumwe nombepo ndjoka.—Mat. 28:19.

2. Otatu ka kundathana omapulo geni?

² Tse mboka hatu ‘kunu mombepo’ otu na okuzala omuntu omupe. (Gal. 6:8; Ef. 4:17-24) Ihe omuyapostoli Paulus okwe tu pa omayele nokwe tu londodha twaaha nikithe ombepo yaKalunga uuthigwa. (Lesha Aaefeso 4:25-32.) Ngashingeyi natu konakoneni nawa omayele gaPaulus. Paulus okwa li a hala okutya shike sho a popi okunikitha ombepo ondjapuki yaKalunga uuthigwa? Ongiini mbela gumwe ngoka i iyapulila Kalunga ta vulu okuninga oshinima sha tya ngawo? Ongiini tatu vulu okuhenuka okunikitha ombepo yaJehova uuthigwa?

Shoka Paulus a li a hala okutya

3. Ongiini to ka yelitha shoka sha popiwa mAaefeso 4:30?

³ Tango, ndhindhilika oohapu dhaPaulus ndhoka dha nyolwa mAaefeso 4:30 (OB-1954). Okwa nyola a ti: “Ombepo Ondjapuki yaKalunga inamu [yi] nikitha uuthigwa, oshoka [oyo ye] mú tulwa oshihako sigo esiku lyekulilo.” Paulus ka li a hala ooitaali ooyakwawo aaholike ya tule moshiponga ekwatathano lyawo ewanawa naKalunga. Okwa li taya ka tulwa kombepo yaJehova “oshihako sigo esiku lyekulilo.” Ombepo ondjapuki yaKalunga oya li noyi li oshihako nenge ‘okapilo kaayihe mbyoka a hala okupa’ aagwayekwa mboka ya kakatela uudhiginini wawo. (2 Kor. 1:22) Oshihako otashi ulike kutya oye li omaliko gaKalunga notaya ka mona omwenyo gwomegulu. Nohugunina mboka taya ka ndhindhilikwa otaya ka kala ye li 144 000.—Eh. 7:2-4.

4. Omolwashike sha simana okuhenuka okunikitha ombepo yaKalunga uuthigwa?

⁴ Okunikitha ombepo ondjapuki uuthigwa otaku vulu okuninga onkatu yotango ndjoka tayi fala kokukanitha thiluthilu enwethwomo lyoonkondo dhaKalunga tadhi longo monkalamwenyo yOmukriste. Shoka David a li a popi konima sho a yono naBatseba otashi ulike kutya shika otashi vulika. David sho i iyele ombedhi, okwa li i indile Jehova a ti: “Ino kutha ndje po koshipala shoye; ngoye ino kutha ndje Ombepo yoye ondjapuki.” (Eps. 51:11) Aagwayekwa mboka ya kala yi “idhidhimika sigo okusa” oyo owala taya ka mona “oshishani” shomwenyo ihaagu si megulu. (Eh. 2:10; 1 Kor. 15:53) Aakriste mboka ye na etegameno lyokombanda yevi nayo wo oya pumbwa ombepo ondjapuki ngele oya hala okukakatela uudhiginini wawo muKalunga nokumona omagano ge gomwenyo shi ikolelela keitaalo mekuliloyambo lyaKristus. (Joh. 3:36; Rom. 5:8; 6:23) Onkee ano, atuhe otu na okwiikotokela twaa nikithe ombepo ondjapuki yaJehova uuthigwa.

Ongiini Omukriste ta vulu okunikitha ombepo uuthigwa?

5, 6. Ongiini Omukriste ta vulu okunikitha ombepo yaJehova uuthigwa?

⁵ Tu li Aakriste yi iyapulila Jehova, otatu vulu okuhenuka okunikitha ombepo uuthigwa. Shika otashi vulika ngele otwa ‘kala nokweendithwa kombepo nokuuthwa kuyo monkalamwenyo yetu.’ Ngele otatu shi ningi, itatu ka sindwa komahalo omawinayi gopanyama noitatu ka kala tu na omaukwatya ngoka kaage shi gopakalunga. (Gal. 5:16, 25, 26) Ihe shoka otashi vulu okulunduluka. Otatu vulu okunikitha ombepo yaKalunga uuthigwa ngele otwi iyethele tu falafalwe kashona nakashona, tashi vulika tu kale inaatu shi ndhindhilika mo, mokwiihumbata momukalo ngoka gwa pangulwa mOohapu dha nwethwa mo kombepo yaKalunga.

⁶ Ngele otwa tsikile nokwiihumbata mepingathano newiliko lyombepo ondjapuki, otatu yi nikitha uuthigwa nosho wo Jehova, ngoka e li Onzo yombepo ndjoka. Mokukonakona Aaefeso 4:25-32 otatu ku ulukilwa nkene tu na okwiihumbata, notashi vulu oku tu kwathela tu henuke okunikitha ombepo yaKalunga uuthigwa.

Nkene wu na okuhenuka okunikitha Ombepo uuthigwa

7, 8. Yelitha kutya omolwashike tu na okukala hatu popi oshili.

⁷ Otu na okukala hatu popi oshili. Paulus okwa nyola mAaefeso 4:25 a ti: “Onkee ano etheni iifundja. Ihe kehe gumwe na lombwele mukwawo oshili, oshoka tse atuhe iilyo yolutu lwaKristus.” Molwaashoka otwa hangana tu li “iilyo yolutu lwaKristus,” inatu kaleni nando niineya nenge tu kambadhaleni okuningila iinima owina opo tu pukithe aalongelikalunga ooyakwetu, molwaashoka shoka osha faathana owala noku ya fundja. Kehe ngoka ta tsikile nondjila ya tya ngawo ota ka kala kee na ekwatathano naKalunga.—Lesha Omayeletumbulo 3:32.

⁸ Oohapu noonkatu dhomakoto otadhi vulu okuyona po uukumwe wegongalo. Onkee ano, otu na okukala ngaashi omupolofeti omwiinekelwa Daniel, ngoka yalwe kaaya li taya vulu oku mu mona epuko. (Dan. 6:4) Otwa pumbwa wo okukaleka momadhiladhilo omayele gaPaulus kAakriste mboka ye na etegameno lyomegulu kutya oshilyo kehe ‘sholutu lwaKristus’ osha pamba yalwe ayehe nosha pumbwa okukala muukumwe pamwe naalanduli yaJesus aagwayekwa aanashili. (Ef. 4:11, 12) Ngele otu na etegameno lyoku ka kala mOparadisa kombanda yevi sigo aluhe, natse wo otu na okupopya oshili, nomokuninga ngeyi otatu ka ambidhidha uukumwe wuumwayinathana wetu womuuyuni auhe.

9. Omolwashike sha simana noonkondo opo tu longe metsokumwe nAaefeso 4:26, 27?

⁹ Otu na okukondjitha Ondiaboli nokatu na oku yi pa ompito yi tu ehameke pambepo. (Jak. 4:7) Ombepo ondjapuki ohayi tu kwathele opo tu kondjithe Satana. Pashiholelwa, otatu vulu oku shi ninga mokukotokela ondjahi yetu. Paulus okwa nyola ta ti: “Ngele tamu geye, inamu etha ondjahi yeni yi mú fale sigo omokuyona; inamu kala mwa geya esiku alihe. Inamu pa omuhindadhi ompito, e mú sinde.” (Ef. 4:26, 27) Ngele otwa geyithwa, okugalikana meimweneneno noneendelelo otaku vulu oku tu kwathela tu “idhidhimike momwenyo,” nokuulika eipangelo mwene pehala lyokwiihumbata momukalo ngoka tagu vulu okunikitha ombepo yaKalunga uuthigwa. (Omayel. 17:27) Onkee ano, inatu kaleni twa geya opo kaatu pe Satana ompito e tu nwethe mo tu longe sha shoka oshiwinayi. (Eps. 37:8, 9) Omukalo gumwe gwoku mu kondjitha ogwo okukandula po oontamanana metsokumwe nomayele gaJesus.—Mat. 5:23, 24; 18:15-17.

10, 11. Omolwashike kaatu na okuyaka nenge tu ninge shoka shaahe li pauyuuki?

¹⁰ Inatu igandjeni nando okehongololo limwe tu yake nenge tu kale ihaatu popi oshili. Shi na ko nasha nuufuthi, Paulus okwa nyola ta ti: “Omufuthi na ethe po okuyaka kwe, ye a tameke okwiilongela sha pamukalo omwaanawa, ye a vule ihe okukala e na sha okukwatha oohepele.” (Ef. 4:28) Ngele Omukriste ngoka i iyapulila Jehova okwa yaka, paulela ota ka ‘kwatitha edhina lyaKalunga oshidhila’ moku li shekitha. (Omayel. 30:7-9) Nokuli, nonando omuntu ohepele kashi li mondjla a yake. Mboka ye hole Kalunga nosho wo ooyakwawo oye shi shi kutya okuyaka oku li oshinima shaahe li nando pauyuki.—Mark. 12:28-31.

¹¹ Paulus ina tumbula owala shoka kaatu na okuninga, ihe oku ulike wo shoka tu na okuninga. Ngele ohatu uthwa monkalamwenyo yetu kombepo ondjapuki nokweendithwa kuyo, otatu ka longa nuudhiginini opo tu vule okusila uukwanegumbo wetu oshimpwiyu nokukala wo ‘tu na sha okukwatha oohepele.’ (1 Tim. 5:8) Jesus naalongwa ye oya li ye na okampunda kiimaliwa yokukwathela oohepele, ihe omukengeleli Judas Iskariot okwa li a yaka mo iimaliwa yimwe. (Joh. 12:4-6) Judas paushili ka li ta wilikwa kombepo ondjapuki. Tse mboka hatu wilikwa kombepo ondjapuki yaKalunga, “otwa hala okweenda nuuyuuki miinima ayihe,” ngaashi Paulus a li a ningi. (Heb. 13:18, OB-1954) Onkee ano, otu na okuhenuka kaatu nikithe ombepo yaJehova uuthigwa.

Nkene tu na okuhenuka okunikitha ombepo uuthigwa

12, 13. (a) Ngaashi shu ulikwa mAaefeso 4:29, oohapu dha tya ngiini tu na okuhenuka? (b) Oohapu dhetu odhi na okukala dha tya ngiini?

¹² Otu na okukala hatu kotokele okupopya kwetu. Paulus oku uvitha ta ti: “Inamu popya oohapu oombwinayi. Popyeni ashike oohapu ndhoka oombwanawa tadhi tungu nodha pumbiwa, opo aapulakeni yeni ye dhi hokwe.” (Ef. 4:29) Ishewe, omuyapostoli ina popya owala shoka kaatu na okuninga, ihe okwe tu lombwele wo shoka tu na okukala hatu ningi. Tu li kohi yenwethomo lyombepo yaKalunga, otatu ki inyengithwa tu ‘popye oohapu ndhoka oombwanawa tadhi tungu opo aapulakeni yetu ye dhi hokwe.’ Natango, katu na okweetha “oohapu oombwinayi” dhi pite momakana getu. Oshitya shOshigreka shoka sha tolokwa noshitya “oombwinayi” osha longithwa okufatulula iiyimati, oohi nenge onyama yo ola. Ongaashi ngaa hatu ningwa nayi kiikulya ya tya ngawo, otu tonde wo okupopya hoka Jehova e ku tala ko okuwinayi.

¹³ Oohapu dhetu nadhi kale oombwanawa, dhohenda ‘nodha towala omongwa.’ (Kol. 3:8-10; 4:6, OB-1954) Aantu oye na okukala ye wete kutya tse otu ili ngele tayu uvu shoka tatu popi. Onkee ano, natu kwatheleni yalwe mokupopya “oohapu ndhoka oombwanawa tadhi tungu.” Ano natu kaleni tu uvite ngaashi omupisalomi ngoka i imbi a ti: “Oohapu dhomokana kandje nomadhiladhilo gokomwenyo gwandje nage ku opalele, Omuwa, emanya lyandje nomukulili gwandje.”—Eps. 19:15, OB-1954 (19:14, OB-1986).

14. PAaefeso 4:30, 31, otu na okweetha po shike?

¹⁴ Otu na okweetha uululu, ondjahi, omakudhilo nosho wo uuwinayi kehe. Konima sho a londodha kombinga yokunikitha ombepo yaKalunga uuthigwa, Paulus okwa nyola ta ti: “Etheni ano uululu auhe, ondjahi nonkone, omakudhilo nenge omatukano, uuwinayi kehe nau mú kale kokule.” (Ef. 4:30, 31) Tu li aantu inaatu gwanenena, atuheni otwa pumbwa okulonga nuudhiginini tu pangele omadhiladhilo getu nosho wo iilonga yetu. Ihe ngele otwa kala nokupangelwa ‘kuululu auhe, kondjahi nosho wo konkone,’ otatu ka nikitha ombepo yaKalunga uuthigwa. Osha faathana wo ngele otwa kala nokudhimbulukwa uuwinayi mboka twa ningilwa, okuulika iikala yonkone nokwaahadhimina po mboka ye tu ninga nayi. Ngele otwa tameke nokuli okwiipwililikila omayele gOmbiimbeli, otatu vulu okukokeka iikala mbyoka tayi vulu oku tu ningitha tu yone kombepo ondjapuki notashi vulika tu ka mone iilanduliko ya nika oshiponga.

15. Ngele otwa ningilwa sha oshiwinayi, oshike tu na okuninga po?

¹⁵ Otwa pumbwa okukala nolukeno nokudhiminathana po. Paulus okwa nyola a ti: “Ihe kalathaneni mu na uukuume nolukeno. Silathaneni ohenda nokudhiminathana po oondjo, ngashika naanaa Kalunga e mú dhimine po oondjo dheni molwaKristus.” (Ef. 4:32) Nonando otwe ehamekwa unene kuuwinayi twe wu ningilwa, natu dhimine po ngaashi Kalunga he shi ningi. (Luk. 11:4) Natu tye ando omwiitaali omukwetu okwa popya oshinima shontumba oshiwinayi kombinga yetu. Opo tu kandule po omukundu, otatu yi kuye tu popye naye. Sho twa popi naye, okwi iyele ombedhi nokwa pula a dhiminwe po. Otwe mu dhimina po, ihe otwa pumbwa okuninga po oshindji shi vulithe pwaashoka. Levitikus 19:18 ota ti: “Mukweni inamu kala mu mu nine iikonene noku mu tonda, ihe holeni mukweni, ngaashi mu ihole ne yene. Ongame OMUWA.”

Otwa pumbwa okukala twa tonata

16. Gandja oshiholelwa shoka tashi ulike kutya otashi vulika twa pumbwa okuninga omalunduluko opo kaatu nikithe ombepo yaJehova uuthigwa.

¹⁶ Nokuli nomeholamo, otatu vulu okumakelwa tu ninge oshinima shontumba shoka tashi yemateke Kalunga. Pashiholelwa, otashi vulika omumwatate a kale ha pulakene komusika kaadhi li nawa kAakriste. Konima yethimbo, eiyuvo lye otali piyaganekwa molwaashoka okwa li i ipwililikile omayele gOmbiimbeli ngoka ga za miinyolomwa ‘yomupiya omudhiginini nomunandunge.’ (Mat. 24:45, KB) Otashi vulika a galikane kombinga yuupyakadhi mbuka nokudhimbulukwa oohapu dhaPaulus dhi li mAaefeso 4:30. Molwaashoka ka li a hala okuninga sha shoka tashi vulu okunikitha ombepo yaKalunga uuthigwa, okwa tokola toko okuhenuka oomusika tadhi limbilike. Jehova ota ka yambeka iikala yomumwatate. Onkee ano natu kaleni aluhe twa kotoka opo twaaha nikithe ombepo yaKalunga uuthigwa.

17. Oshike tashi vulu okuholoka po ngele inatu tonata nokugalikana?

¹⁷ Ngele inatu tonata tse ihatu galikana, otashi vulika tu igandje moonyata nenge kiilonga ya puka mbyoka tayi vulu okunikitha ombepo uuthigwa. Molwaashoka ombepo ondjapuki ohayi imike omaukwatya ngoka ge li metsokumwe nuukwatya waTate gwetu gwomegulu, otayi vulu okunikithwa uuthigwa nenge yi geyithwe, oshinima shoka paushili inaatu hala nando okuninga. (Ef. 4:30) Aalongimpango Aajuda yomethelemumvo lyotango oya li ya popi papuko kutya iikumithalonga mbyoka Jesus a li ta longo oya li tayi zi kuSatana. (Lesha Markus 3:22-30.) Aatondi mboka yaKristus oya ‘sheke ombepo ondjapuki,’ nokungeyi oya li ya yono eyono ndyoka itaali vulu okudhiminwa po. Inatu hala nando tu ninge sha faathana!

18. Ongiini tatu vulu okutseya kutya inatu ninga eyono itaali vulu okudhiminwa po?

¹⁸ Molwaashoka inatu hala nokuli okukala tu li monkalo moka tu li pokuyona eyono ndyoka itaali vulu okudhiminwa po, otwa pumbwa okudhimbulukwa shoka Paulus a popi kombinga yokwaahanikitha ombepo uuthigwa. Ihe ongiini ngele otwa yona sha kwata miiti? Ngele otwi iyela ombedhi notwa kwathelwa kaakuluntugongalo, otatu vulu okuthika pehulithodhiladhilo kutya Kalunga okwe tu dhimina po nonokutya inatu yona kombepo ondjapuki. Kekwatho lyaKalunga, otatu vulu wo okuhenuka okunikitha ombepo ondjapuki uuthigwa momukalo kehe.

19, 20. (a) Iinima yimwe yini twa pumbwa okuhenuka? (b) Otu na okukala twa tokola toko okuninga shike?

¹⁹ Okupitila mombepo ye ondjapuki, Kalunga oha humitha komeho ohole, enyanyu nosho wo uukumwe woshigwana she. (Eps. 133:1-3) Onkee ano, otu na okwiidhilika kaatu nikithe ombepo ondjapuki uuthigwa mokukutha ombinga moluhoko nenge mokupopya iinima mbyoka tayi vulu okunkundipaleka esimano lyaamboka ye li aasita ya langekwa po nombepo ondjapuki. (Iil. 20:28; Jud. 8) Pehala lyaashono, otu na okuhumitha komeho uukumwe nokusimanekathana megongalo. Dhoshili, katu na okukala muungundu mboka tawu eta etopoko mokati koshigwana shaKalunga. Paulus okwa nyola ta ti: “Aamwameme, otandi mú kumagidha medhina lyOmuwa gwetu Jesus Kristus: Uvathaneni mwaashihe shoka tamu shi popi, opo mokati keni mwaa kale omatopoko. Kaleni nekwatathano, mu na edhiladhilo limwe nelalakano limwe.”—1 Kor. 1:10.

²⁰ Jehova oku na ehalo oku tu kwathela tu henuke okunikitha ombepo ondjapuki uuthigwa nota vulu oku shi ninga. Natu tsikileni okugalikana tu pewe ombepo ondjapuki notu kale twa tokola toko twaa yi nikithe uuthigwa. Natu tsikileni ‘okukuna mombepo’ mokukonga twa mana mo ewiliko lyayo ngashingeyi nosigo aluhe.

Oto yamukula ngiini?

• Okunikitha ombepo yaKalunga uuthigwa otashi ti shike?

• Ongiini omuntu i iyapulila Jehova ta vulu okunikitha ombepo ye uuthigwa?

• Omomikalo dhini tatu vulu okuhenuka okunikitha ombepo ondjapuki uuthigwa?

[Ethano pepandja 30]

Kandula po oontamanana mbala

[Ethano pepandja 31]

Iiyimati yini tayi ulike okupopya kwoye?