Shoka esiku lyaJehova tali ka holola

“Esiku lyOmuwa otali ya lya fa omufuthi . . . , nevi wo niimima ayihe yi li mo otayi ka [monika mo, NW].”—2 PET. 3:10.

1, 2. (a) Ongiini uuyuni wongashingeyi wa kolokosha tawu ka hula po? (b) Omapulo geni tatu ka konakona?

UUYUNI wongashingeyi wa kolokosha owi ikolelela kiifundja yopetameko kutya omuntu ota vulu okupangela evi nomupondo a manguluka ko kuJehova. (Eps. 2:2, 3) Mbela opu na ngaa oshinima shi ikolelela kiifundja tashi vulu okukala sigo aluhe? Hasho nando! Katu na nando okukala twa tegelela uuyuni waSatana wi ihanagule po wo wene. Pehala lyaashono, otawu ka hanagulwa po kuKalunga pethimbo lye lyu uthwa nokomukalo gwe. Okukatukila onkatu kwaKalunga uuyuni mbuka wa kolokosha otaku ku ulika thiluthilu uuyuuki nosho wo ohole ye.—Eps. 92:7; Omayel. 2:21, 22.

² Omuyapostoli Petrus okwa nyola a ti: “Esiku lyOmuwa otali ya lya fa omufuthi. Mesiku tuu ndyoka omagulu otaga ka kana po nomatopo omanene. Iikwakegulu otayi ka pya po e tayi yonuuka po, nevi wo niinima ayihe yi li mo otayi ka [monika mo, NW].” (2 Pet. 3:10) Mbela ‘omagulu nevi’ ngoka ga tumbulwa mpaka ogo oshike? Mbela “iikwakegulu” mbyoka tayi ka kana po oshike? Petrus okwa li a hala okutya shike sho a ti kutya “evi niinima ayihe yi li mo” otayi ka “monika mo”? Okutseya omayamukulo komapulo ngaka otaku ke tu kwathela tu ilongekidhile iiningwanima iitilithi mbyoka tayi ka holoka monakuyiwa yi li popepi.

Omagulu nevi mbyoka tayi ka kana po

3. “Omagulu” ngoka ga tumbulwa muPetrus omutiyali 3:10 ogeni, nongiini taga ka kana po?

³ Sho oshitya “omagulu” sha longithwa mOmbiimbeli pathaneko, olwiindji ohashi thaneke aapangeli mboka ye li pombanda yaapangelwa yawo. (Jes. 14:13, 14; Eh. 21:1, 2) ‘Omagulu ngoka taga ka kana po’ oge lile po epangelo lyopantu ndyoka tali pangele uulikumwe waantu waahe na ko nasha naKalunga. Okukana po kwago “nomatopo omanene” nenge “nomundundumo omunenenene” patoloko lilwe, otaku ulike kehanagulo lyomeendelelo lyomagulu ngaka.

4. Mbela ‘evi’ oshike, nongiini tali ka hanagulwa po?

⁴ ‘Evi’ otali thaneke uuyuni waantu ya topoka ko kuKalunga. Uuyuni wa tya ngawo owa li ko pethimbo lyaNoowa, nowa li wa hulithwa po nEyelu patokolo lyaKalunga. “Ihe omagulu nevi sho yi li ko sigo onena, oya gamenwa kohapu tuu ndjoka yaKalunga, yi ka hanagulwe po nomulilo. Oyo oya pungulilwa esiku, uuna aakeenakonasha naKalunga taa ka pangulwa notaa ka yonagulwa po.” (2 Pet. 3:7) Nonando aakolokoshi ayehe oya li ya hanagulwa po nEyelu pethimbo limwe owala, ehanagulo ndyoka tali ke ya otali ka ningwa poondondo dhi ili nodhi ili pethimbo ‘lyuudhigu uunene.’ (Eh. 7:14) Pondondo yotango yuudhigu uunene mboka, Kalunga ota ka ningitha aapangeli yopapolotika yuuyuni mbuka ya hanagule po “Babiloni Oshinene” shoka tashi ku ulika kutya okwa dhina ohonda ndjoka yi lile po omalongelokalunga. (Eh. 17:5, 16; 18:8) Opo nduno, piita yaArmagedon ndjoka yi li ondondo yahugunina yuudhigu uunene, Jehova ye mwene ota ka komba po oshihupe shuuyuni waSatana.—Eh. 16:14, 16; 19:19-21.

“Iikwakegulu otayi ka . . . yonuuka po”

5. Iikwakegulu yopathaneko oya kwatela mo shike?

⁵ “Omagulu” ngoka “taga ka kana po” oshike? Embwiitya lyOmbiimbeli olya fatulula “iikwakegulu” yi li “omakotampango gopetameko” nenge “iitamekitungithi.” Otali ti kutya oshitya shoka “osha li sha longithwa okufatulula oondanda dhoalfabeta, dhi li iitungithi mbyoka tayi tungu po iitya.” Onkee ano, “iikwakegulu” mbyoka ya tumbulwa kuPetrus otayi ulike kiinima mbyoka hayi ningitha uuyuni wu kale nomaukwatya, iikala, omikalo, nosho wo omalalakano ngoka kaage shi gopakalunga. “Iikwakegulu” oya kwatela mo “ombepo yuuyuni” ndjoka “tayi pangele ngashingeyi aantu mboka ihaa vulika.” (1 Kor. 2:12; lesha Aaefeso 2:1-3.) Ombepo ndjoka oyi li apuhe muuyuni waSatana. Ohayi inyengitha aantu ya dhiladhile, ya pangele, ya popye nokukatuka momikalo ndhoka tadhi ulike omadhiladhilo gaSatana ngoka e li ‘omupangeli gwoonkondo dhombepo yomewangandjo’ omunuuntsa nomunashipotha.

6. Ongiini ombepo yuuyuni hayi iyulike yo yene?

⁶ Onkee ano, mokukala tu shi shi nenge kaatu shi sha, mboka haya kwatwa kombepo yuuyuni ohaye etha omadhiladhilo nomitima dhawo dhi nwethwe mo kuSatana, opo ya kale nomadhiladhilo niikala ya fa ye. Ohashi ya ningitha ya ninge shoka ya hala nokaaye na ko nasha nokulonga ehalo lyaKalunga. Ohayi inyenge koonkalo shi ikwatelela kuuntsa nenge kokwiiholamwene, ohayu ulike iikala yuunashipotha kwaamboka ye na oonkondopangelo nokwiigandja ‘kuuhalu wopantu okuhola mbyoka aantu taye yi tala.’—Lesha 1 Johannes 2:15-17.a

7. Omolwashike tu na ‘okutonatela omitima dhetu’?

⁷ Inashi simana tuu tu ‘tonatele omitima dhetu’ mokukala tu na uunongo wopakalunga mokuhogolola mboka tatu endathana nayo, iileshomwa mbyoka tatu lesha, omainyanyudho getu nosho wo omahala goko-Internet ngoka tashi vulika tu ye kugo! (Omayel. 4:23) Omuyapostoli Paulus okwa nyola a ti: “Kotokeni ano, mwaa yulwe nando okumuntu nomalongo guunongo wopantu nomafundjaleko gaa fele. Ogo ogi ikwatelela komithigululwakalo dhaantu noga za moombepo ndhoka tadhi pangele mewangandjo, ihe ne kaleni muKristus.” (Kol. 2:8) Elombwelo ndyoka olye endelela ngashingeyi sho esiku lyaJehova tali hedha popepi, oshoka uupyu walyo inaawu monika nando onale otawu ka hengumuna po “iikwakegulu” ayihe yuuyuni waSatana, nokuulika kutya itayi ka vula okupita muupyu wondjahi yaKalunga. Shika otashi tu dhimbulukitha oohapu dhaMaleaki 4:1 tadhi ti: “Esiku otali ya, uuna aanuuntsa naadhudhu ayehe taa ka hwama ya fa iihenguti. Esiku ndyoka otaa ka lunguna po thilu noitapu ka thigala nando osha.”

‘Evi niinima ayihe yi li mo otayi ka monika mo’

8. Ongiini evi nosho wo iinima ayihe yi li mo tayi ka “monika mo”?

⁸ Petrus okwa li a hala okutya shike sho a nyola kutya ‘evi niinima ayihe mbyoka yi li mo otayi ka monika mo’? Uutumbulilo “monika mo” otawu vulu wo okutolokwa kutya “sha tulwa pomutenya.” Petrus okwa li a hala okutya pethimbo lyuudhigu uunene, Jehova ota ka tula pomutenya uuyuni waSatana nokuulika kutya owu li ompinge naye nosho wo nUukwaniilwa we nowa gwana okuhanagulwa po. Jesaja 26:21 okwa popi pahunganeko kombinga yethimbo ndyoka, a ti: “OMUWA ote ya ta zi monkalelo ye, a geelele oonakukala kombanda yevi oondjo dhawo. Aadhipagi mboka ya dhipaga aantu meholamo kombanda yevi, otaa ka hololwa, nevi itali ka holeka we mboka ya dhipagwa.”

9. (a) Oshike tu na okutinda, nomolwashike? (b) Oshike tu na okukokeka, nomolwashike?

⁹ Mesiku lyaJehova mboka ya zulwa kuuyuni nosho wo kombepo yawo ya kolokosha otaya ku ulika uukwatya wawo wolela nokudhipagathana nokuli. Dhoshili, otashi vulika omaludhi ogendji gomainyanyudho gelongithonkondo ngoka ga ha kunena taga nwetha mo omadhiladhilo goyendji opo ngele ethimbo tali thiki, otaya ka kala yi ilongekidha ‘okukwata kehe omuntu e li puye, e mu dhipage.’ (Sak. 14:13) Inashi simana tuu ano tu tinde kehe ookino, omambo, uudhano woovidio niinima ya tya ngaaka mbyoka tashi vulika yi ete mutse uukwatya mboka wu tondike kuKalunga, ngaashi uuntsa nosho wo ohole yelongithonkondo! (2 Sam. 22:28; Eps. 11:5) Pehala lyaashono, natu kokeke iiyimati yombepo ondjapuki yaKalunga, molwaashoka omaukwatya ga tya ngawo itaga ka pya po sho uupyu wopathaneko wesiku lyaJehova tawu ke ya.—Gal. 5:22, 23.

“Egulu epe nevi epe”

10, 11. “Egulu epe” nosho wo “evi epe” oshike?

¹⁰ Lesha 2 Petrus 3:13. “Egulu epe” olyo Uukwaniilwa waKalunga womegulu, mboka wa dhikwa po momvula 1914 sho “omathimbo gaapagani” ga hulu po. (Luk. 21:24, KB) Uukwaniilwa waKalunga owo epangelo lya thikama po muKristus Jesus nosho wo 144 000 mboka taya ka pangela pamwe naye, noyendji yomuyo oya mona nale ondjambi yawo yomegulu. Aahogololwa mbaka otaya thanekwa membo lyEhololo ye li “oshilando oshiyapuki, Jerusalem oshipe, tashi kuluka megulu tashi zi kuKalunga, sho opalekwa nosha longekidhwa, ngashika omufuko a zalekwa okutsakaneka omulumentu gwe.” (Eh. 21:1, 2, 22-24) Ngaashika owala Jerusalem shokombanda yevi omo mwa li hamu kala epangelo lyaIsraeli shonale, Jerusalem oshipe nosho wo Omufuko gwasho oya ninga po epangelo lyuuyuni mbuka wongashingeyi. Oshilando shika shomegulu otashi ka ‘kuluka megulu’ mokugandja eitulomo lyasho kevi.

¹¹ “Evi epe” otali thaneke uulikumwe uupe waantu kombanda yevi mboka yu ulika kutya oye na ehalo okuvulika kUukwaniilwa waKalunga. Oparadisa yopambepo ndjoka aantu yaKalunga taya tyapula nokuli nongashingeyi otayi ka kala pehala lyayo lyolela ‘muuyuni uuwanawa mboka tawu ya.’ (Heb. 2:5, KB) Ongiini tatu vulu okukala oshitopolwa shuuyuni mbuka uupe?

Ilongekidhila esiku enene lyaJehova

12. Omolwashike esiku lyaJehova tali ka halukitha uuyuni?

¹² Paulus naPetrus ayehe oya hunganeka kutya esiku lyaJehova otali ya “ongomufuthi” te ya meholamo, pethimbo inaali tegelelwa. (Lesha 1 Aatessalonika 5:1, 2.) Nokuli nAakriste yashili mboka haya kala ya tegelela esiku ndyoka, otaya ka kumithwa kokuya kwalyo ohaluka. (Mat. 24:44) Ihe uuyuni otawu ka ningilwa shi vulithe pokukala owala wa kumwa. Paulus okwa nyola a ti: “Manga aantu [mboka yi iteka Jehova] ye li mokutya: ‘Ope li nawa, naayihe oya gamenwa,’ nena ehanagulo otali ya adha. Itaa ka vula okuya ontuku, oshoka otashi ka kala ngaashi omusimba ta adhika koshitheta.”—1 Tes. 5:3.

13. Ongiini tatu vulu okuhenuka twaa pukithwe keigidho ndyoka tali ti: “Ope li nawa, naayihe oya gamenwa”?

¹³ Eigidho ndyoka tali ti: “Ope li nawa, naayihe oya gamenwa!” otali ka kala owala iifundja iikwawo yoondemoni ya nwethwa mo; ihe nonando ongaaka, itayi ka pukitha aapiya yaJehova. Paulus okwa nyola a ti: “Ne kamu shi yomomilema, esiku ndyoka li mú adhe ando ohaluka ngaashi omufuthi. One amuhe aantu yomuuyelele noyomomutenya.” (1 Tes. 5:4, 5) Onkee ano, natu kaleni muuyelele, kokule nomilema dhuuyuni waSatana. Petrus okwa nyola a ti: “Okuume kandje, shika omu shi shi nale. Onkee ano kaleni mwa tonata, opo mwaa pukithwe komapukitho gaantu kaaye na ompango e tamu gu ko kekankameno lyeni lya kola.” —2 Pet. 3:17.

14, 15. (a) Jehova ohe tu simanekitha ngiini? (b) Oohapu dhini dha nwethwa mo tu na okudhiladhila kombinga yadho?

¹⁴ Ndhindhilika kutya Jehova ine tu lombwela owala tu ‘kale twa tonata’ nokwaahaninga po sha we. Pehala lyaashono, okwe tu simanekitha moku tu kwathela tu ‘tseye shoka tashi ka ningwa’ monakuyiwa.

¹⁵ Shinikitha oluhodhi, nonando ongawo, yamwe kaaye na ko we nasha nenge nokuli ya dhina omadhimbulukitho ge na ko nasha nokukala ya tonata. Otashi vulika ya tye kutya ‘otwa kala nokuuva edhimbulukitho ndyoka uule woomvula omilongo.’ Onkee ano, oohandimwe mboka oye na okukaleka momadhiladhilo kutya sho taya popi ngaaka, oya tula momalimbililo shoka Jehova nOmwana ya popi, ihe kashi shi owala shoka ongundu yomupiya omudhiginini ya popi. Jehova okwa ti: “Tegelela.” (Hab. 2:3) Jesus okwa popi sha faathana a ti: “Tonateni, oshoka inamu tseya, esiku olini Omuwa gweni te ya.” (Mat. 24:42) Mokugwedha po, Paulus okwa nyola a ti: “Ne aantu omu na okwaadhika mwa tya ngiini? Omu na okwiiyapulila Kalunga noku mu igandjela, sho mwa tegelela esiku lyaKalunga.” (2 Pet. 3:11, 12) Ongundu yomupiya omudhiginini nosho wo olutuwiliki lwayo kaye na esiku ya ka kale kaaye na ko nasha noohapu ndhoka dha kwata miiti.

16. Iikala yini tu na okuhenuka, nomolwashike?

¹⁶ Dhoshili, ‘omumati omwiinayi’ oye e ya pehulithodhiladhilo ndyoka kutya Mwene gwe okwa kala ko. (Mat. 24:48) Omumati omwiinayi oku li gumwe gwomongundu ndjoka ya hokololwa muPetrus omutiyali 3:3, 4. Petrus okwa nyola a ti: “Pomasiku gopehulilo otaku ka holoka aantu mboka taa endithwa kuuhalu wawo,” nokusheka mboka ye na esiku lyaJehova momadhiladhilo. Eeno, pehala lyokutula eitulomo kiinima yUukwaniilwa, aasheki ye li ngawo oya tula owala eitulomo kuyo yene nosho wo komahalo gawo gopaumwene. Inatu kokeka nando iikala yokwaahavulika ya tya ngaaka. Pehala lyaashono, natu ‘taleni kontalanteni yOmuwa gwetu yi li ompito yetu okuhupithwa’ mokukala twi ipyakidhila mokuuvitha Uukwaniilwa nokuninga aantu aalongwa nokukala twaahe na oshimpwiyu sha pitilila kombinga yethimbo ndyoka Jehova Kalunga te ke eta iiningwanima mbyoka.—2 Pet. 3:15; lesha Iilonga 1:6, 7.

Inekela muKalunga kehupitho

17. Aakriste aadhiginini oya li yi inyenge ngiini kelondodho lyaJesus lyokuthiga po Jerusalem, nomolwashike?

¹⁷ Konima sho omatanga gaRoma ga li ga kondeke Judea mo 66 E.N., Aakriste aadhiginini oya li ya vulika kelombwelo lyaJesus lyokuthiga po oshilando Jerusalem manga kuyele. (Luk. 21:20-23) Omolwashike ya li ya katuka mbala nopandunge? Nopwaahe na omalimbililo, oya li ya kaleke momadhiladhilo elondodho lyaJesus. Dhoshili, oya li ya tegelela etokolo lyawo li kale lya kwatela mo omaudhigu, ngaashi Kristus a li e ya londodha. Ihe pethimbo olyo tuu ndyoka, oya li ye shi shi kutya Jehova itake etha mboka aadhiginini muye.—Eps. 55:22.

18. Ongiini oohapu dhaJesus ndhoka dhi li muLukas 21:25-28 tadhi nwetha mo nkene wa tala ko uudhigu uunene mboka wu li pokuya?

¹⁸ Natse wo otu na okwiinekela muJehova thiluthilu, molwaashoka oye awike ta ka kala ehupitho lyetu uuna uuyuni mbuka wongashingeyi tawu adhika kuudhigu uunene mondjokonona yaantu ayehe. Momukokomoko gwethimbo ngele uudhigu uunene wa tameke ihe manga Jehova inaa pangula uuyuni awuhe, “aantu otaa ka sa omoluumbanda mokutegelela mbyoka tayi ka adha evi alihe.” Onkee ano, manga aatondi yaKalunga taya kakama kuumbanda, aapiya aadhiginini yaJehova itaya ka kala nuumbanda. Mepingathano naashoka, otaya ka nyanyukwa molwashoka oye shi shi kutya ehupitho lyawo oli li popepi.—Lesha Lukas 21:25-28.

19. Oshike tashi ka konakonwa moshitopolwa tashi landula?

¹⁹ Eeno, kapu na tuu onakuyiwa yinyanyudha ndjoka ya tegelela mboka taya kala ya topoka ko kuuyuni ‘nokiikwagulu’ yawo! Onkee ano, ngaashi oshitopolwa tashi landula tashi yelitha, ngele otwa hala okumona omwenyo, otu na okuninga oshindji shi vule owala okuhenuka shoka oshiwinayi. Otwa pumbwa okukokeka uukwatya mboka tawu nyanyudha Jehova nosho wo okulonga iilonga mbyoka a taamba ko.—2 Pet. 3:11.

[Enyolo lyopevi]

Oto vulu okuyelitha?

• Oshike tashi thanekwa kiinima tayi landula:

‘Egulu nevi’ lyongashingeyi?

“Iikwagulu”?

‘Egulu epe nevi epe’?

• Omolwashike hatu kala twi inekela muKalunga thiluthilu?

[Ethano pepandja 17]

Ongiini to vulu “okugamena omutima gwoye” nokukala wa topoka ko kuuyuni?

[Ethano pepandja 18]

Ohatu ulike ngiini kutya otwa ‘tala ontalanteni yOmuwa gwetu yi li ehupitho’