Mbela oto ka pulakena ngaa komalondodho ga yela gaJehova?

“Ondjila oyo ndjika. Yi landuleni.”—JES. 30:21.

1, 2. Satana okwa tokola toko okuninga shike, nongiini Ombiimbeli tayi vulu oku tu kwathela?

UUNA to ende mondjila mu na endhindhiliko lyu ulika kombinga ya puka, otashi vulika li ku pukithe. Shika otashi vulu okukala sha nika oshiponga ngele owe li landula. Natu tye ando kuume koye okwe ku londodha kutya omulumentu omukolokoshi oye a lundulula endhindhiliko ndyoka owina molwaashoka okwa hala aantu ya puke. Osha yela kutya oto ka pulakena kelondodho ndyoka.

² Satana naye okwa hala oku tu pukitha ngaashi omulumentu ngoka omukolokoshi. (Eh. 12:9) Oha longitha iinima ayihe mbyoka twa kundathana moshitopolwa sha tetekela opo e tu ningithe tu kale ihaatu vulika kuJehova notu ze mondjila ndjoka tayi fala komwenyo gwaaluhe. (Mat. 7:13, 14) Ihe otwi ilonga wo kutya kuume ketu, Jehova Kalunga, ohe tu londodha tu kale twa kotokela omakoto gaSatana. Ngaashingeyi otatu ka kundathana kombinga yiinima ishewe itatu mbyoka Satana ha longitha opo e tu pukithe notatu ka tala wo nkene Ombiimbeli tayi vulu oku tu kwathela tu yande omapukitho ge. Ngele tatu lesha Ombiimbeli natu kale twa fa tu uvite ewi lyaJehova tali tu ziilile konima tali ti: “Ondjila oyo ndjika. Yi landuleni.” (Jes. 30:21) Onkee ano, natu kaleni hatu lesha Ombiimbeli ngele otwa hala okukala hatu vulika komayele ga yela ngoka Jehova he tu pe.

Inamu landula “aalongi aafundja”

3, 4. (a) Omolwashike aalongi aafundja taya vulu okufaathanithwa nomithima dha pwina? (b) Olundji aalongi aafundja ohaya zi naanaa peni, nohaya kala ya hala okuninga shike?

³ Natu tye ando owu li molweendo lwontumba mombuga nowa sa enota. Sho wa tala komeho owa mono kutya oku na omuthima. Owa tokola okuya ko to dhiladhila kutya oto ka adha mo omeya opo wu ikuthe enota. Ihe sho wa thiki po, owa mono kutya kamu na omeya naashoka oshe ku uvitha nayi noonkondo. Oshili otatu vulu oku yi faathanitha nomeya, omanga omuthima tatu vulu oku gu faathanitha naalongi aafundja. Aantu mboka taya dhiladhila kutya ohaya longo aantu oshili, lwahugunina otaye ki ipa owala uusama. Jehova okwa londodha aantu kombinga yaalongi aafundja okupitila momuyapostoli Paulus naPetrus. (Lesha Iilonga 20:29, 30; 2 Petrus 2:1-3.) Mbela aalongi aafundja mboka oyo oolye? Oohapu dhaayapostoli mbaka yaali odha popya kutya aalongi aafundja oya za peni nonokutya ohaya pukitha aantu ngiini.

⁴ Paulus okwa li a lombwele aakuluntugongalo yokuEfeso a ti: ‘Aalumentu yamwe yomokati keni otaa ka kala nokupopya iifundja.’ Petrus naye okwa popya montumwafo ndjoka a li a nyolele omagongalo a ti: “Aalongi aafundja otaa ka holoka mokati keni.” Oohapu ndhoka otadhi ulike kutya aalongi aafundja otaya vulu okuza megongalo. Aalongi aafundja mboka oyo aashunimonima.a (Tala enyolo lyopevi.) Mbela elalakano lyaantu mboka olya shike? Paulus okwa ti kutya ohaya kala ya hala ‘okwiihilila aalongwa’ ngele taya thigi po ehangano lyaJehova. Aalongwa mboka Paulus a li ta popi kombinga yawo pompito mpoka otayu ulike kaalongwa yaJesus Kristus. Aalongwa aafundja ihaya ka ninga aantu aalongwa pondje yegongalo, ihe pehala lyaashoka, ohaya kambadhala okukutha mo nenge okuyaka mo aalongwa megongalo. Jesus okwa li a faathanitha aashunimonima nomambungu ngoka haga li po oonzi. Onkee ano, elalakano lyawo olyo okuteya po eitaalo lyiilyo yegongalo noya hala iilyo yegongalo yi thige po oshili.—Mat. 7:15; 2 Tim. 2:18.

5. Aalongi aafundja ohaya heke aantu ngiini?

⁵ Mbela ongiini aalongi aafundja haya heke aantu? Shoka ohaye shi ningi nekoto. Aashunimonima ohaya kambadhala okweeta omalongo gawo megongalo “meholamo,” ngaashi naanaa aalongi yomiyonena haya yakele iinima moshilongo, taye shi ningi meholamo. Aashunimonima ohaya ‘hokololele aantu iifundja’ nenge ohaya kambadhala okuninga omataloko gawo ga kale ga fa goshili, ngaashi naanaa aalongi yomiyonena haya vulu okunyanyangidha oontumwafo ndhoka tadhi monika dha fa dhoshili. Ohaya ningi oonkambadhala opo ya pukithe aantu oyendji ngaashi tashi vulika mokutaandeleka ‘oohedhi oombwinayi.’ Petrus okwa ti wo kutya ohaya ‘pilike’ Omanyolo. Ohaya fatulula Omanyolo momukalo gwa puka opo ya ningithe yamwe yi itaale omalongo gawo. (2 Pet. 2:1, 3, 13; 3:16) Aashunimonima kaye na ko nasha natse shili. Ngele otwe ya landula, otashi ke tu kutha owala mondjila ndjoka tayi fala komwenyo gwaaluhe.

6. Elondodho lini lya yela Ombiimbeli ye tu pa li na ko nasha naalongi aafundja?

⁶ Mbela ongiini tatu vulu okwiigamena kaatu nwethwe mo kaalongi aafundja? Ombiimbeli oya popya kondandalunde shoka tu na okuninga. (Lesha Aaroma 16:17; 2 Johannes 9-11.) Oya popya sha yela ya ti kutya “kaleni kokule nayo,” sha hala okutya, otu na okukala kokule nayo. Elondodho ndyoka lyOmbiimbeli otali vulu okufaathanithwa nelombwelo ndyoka hali gandjwa kundohotola li na ko na sha nokuyanda omuntu ngoka e na omukithi gwomukwau. Ndohotola oku shi shi kutya omukithi ngoka otagu vulu oku ku dhipaga ngele ogwe ku kwata. Elombwelo lye ohali kala lya yela nowu na okuvulika owala kulyo. Ombiimbeli oya ti kutya aashunimonima oye na ‘ehalo ewinayi’ nonokutya ohaya longitha omalongo gawo opo ya nwethe mo yalwe nomadhiladhilo gawo. (1 Tim. 6:3, 4) Jehova naye oku na ko nasha natse ngaashi ndohotola ngoka omwaanawa, nomolwaashoka ote tu lombwele tu yande okukwatathana naalongi aafundja. Onkee ano, natu kaleni twa tokola toko okukala aluhe hatu vulika komalombwelo ge.

7, 8. (a) Oshike tu na okuninga opo tu yande aalongi aafundja? (b) Omolwashike wa tokola toko okuyanda aalongi aafundja?

⁷ Oshike sha kwatelwa mokuyanda aalongi aafundja? Inatu ya taamba momagumbo getu nenge tu ya popithe. Natu ikelele wo okulesha omambo gawo, okutala oopolohalama dhawo dhoko-TV nokulesha uuyelele mboka ya tula ko-Internet, nenge tu ninge omatyokosha kombinga yiinima mbyoka ya shanga ko. Mbela omolwashike tu na okukala twa tokola toko okuyanda aashunimonima? Etompelo lya simanenena olyo kutya otu hole “Kalunga omunashili.” Onkee ano, inatu hala nandonando okupulakena komalongo giifundja ngoka ge li ompinge noshili yOohapu dhaKalunga. (Eps. 31:5, NW; Joh. 17:17) Otu hole wo ehangano ndyoka Jehova ta longitha opo e tu longe ooshili dhinyanyudha. Ehangano ndyoka lyaJehova olye tu longa ooshili kombinga yedhina lye neityo lyalyo nosho wo elalakano lye li na ko nasha nevi, shoka hashi tu ningilwa ngele twa si nosho wo etegameno li na ko nasha neyumuko. Mbela ito dhimbulukwa enyanyu ndyoka wa li wu na sho wi ilongo oshikando shotango ooshili ndhoka nosho wo dhilwe ishewe? Ano inatu etha nando tu nwethwe mo komalongo giifundja ngoka tage ke tu gamuna ko kehangano ndyoka lye tu longa ooshili dha tya ngaaka.—Joh. 6:66-69.

⁸ Inatu hala nando okulandula aalongi aafundja, kashi na nduno mbudhi kutya otaye tu lombwele shike. Inatu pumbwa okupulakena kaalongi aafundja mboka ya fa omithima dha pwina. Mboka haya pulakene komalongo gawo, otaye ki ipa uusama konima yethimbo. Onkee ano, otu na okukala twa tokola toko okukala aadhiginini kuJehova nosho wo kehangano lye. Ehangano lyaJehova kapu na esiku lya li lye tu yemateka nohali tu pe aluhe omeya ogendji ga yogoka goshili yOohapu dhaKalunga.—Jes. 55:1-3; Mat. 24:45-47.

Ino pulakena ‘koongano’ nenge komahokololo giifundja

9, 10. Elondodho lini Paulus a li a pe Timoteus li na ko nasha nomahokololo giifundja, nokwa li e na shike momadhiladhilo? (Tala enyolo lyopevi.)

⁹ Otatu vulu okukana ngele otwa adha gumwe a pungulula endhindhiliko limwe lyontumba lyomoondjila. Ethimbo limwe otashi vulika shikale oshipu okundhindhilika kutya endhindhiliko lyontumba olya pungululwa, ihe otashi vulu okukala oshidhigu oku shi ndhindhilika mo omathimbo gamwe. Ohashi kala wo oshidhigu omathimbo gamwe okundhindhilika mo iifundja yaSatana. Otatu vulu okupukithwa nuupu komalongo ge gamwe giifundja ngele inatu kotoka. Onkee ano, omuyapostoli Paulus okwe tu londodha kombinga yiifundja ya tya ngaaka nokwa ti kutya iifundja mbyoka oyo “oongano.” (Lesha 1 Timoteus 1:3, 4.) Oongano nenge omahokolo giifundja ngoka ogeni noshike tashi vulu oku tu kwathela tu yande oku ga pulakena? Otwa pumbwa okukonga eyamukulo lyepulo ndyoka opo tu vule okutsikila okweenda mondjila ndjoka tayi fala komwenyo gwaaluhe.

¹⁰ Paulus okwa li a londodha omukuluntugongalo Timoteus montumwafo ye yotango ndjoka a li e mu nyolele shi na ko nasha nomahokololo giifundja. Okwa li a lombwele Timoteus kutya oku na okukaleka egongalo lya yela nokukwathela aamwahe ya kale aadhiginini kuJehova. (1 Tim. 1:18, 19) Oshitya shOshigreka shoka sha tolokwa “oongano,” shoka Paulus a li a longitha, otashi ti “iifundja” nenge “omitoto.” Embo limwe lyedhina The International Standard Bible Encyclopaedia olya ti kutya omahokololo giifundja otagu ulike komahokololo gomalongelokalunga ngoka kaage shi goshili. Sho Paulus a longitha oshitya shoka, otashi vulika a li ta dhiladhila komahokololo giifundja gomalongelokalunga ngoka ga za komahokololo ngoka ga totwa kaantu nohaga limbilike yalwe.b (Tala wo enyolo lyopevi.) Paulus okwa ti wo oongano nenge omahokololo ga tya ngaaka oga nika oshiponga, molwaashoka ohage “eta owala omaludhi.” Shoka otashi ulike kutya aantu mboka haya pulakene komahokololo ga tya ngaaka ohaya tameke owala okuludhika kombinga yiinima mbyoka kaayi shi yoshili nohaya longitha ethimbo olindji taya kambadhala okukonga omayamukulo. Satana oha longitha omahokololo ngoka ga totwa kaantu nosho wo omahokololo giifundja gomalongelokalunga opo a ningithe aantu kaaya gandje eitulomo kiinima mbyoka ya simanenena. Ihe elombwelo lyaPaulus olya yela ndyoka tali ti: Ino pulukena koongano nenge komahokololo giifundja!

11. Satana okwa longitha ngiini omalongelokalunga giifundja opo a pukithe aantu, notu na okuvulika kelondodho lini?

¹¹ Omahokololo gamwe giifundja ogeni taga vulu oku tu pukitha ngele inatu kotoka? Paulelalela, omahokololo giifundja oga kwatela mo elongo kehe lyomalongelokalunga ndyoka tali tu ningitha tu ethe po “elongo lyashili,” sha hala okutya, tu pilamene oshili. (2 Tim. 4:3, 4) Satana oku na iineya noha longitha omalongelokalunga giifundja opo a pukithe aantu. Onkee ano, Ombiimbeli otayi ti kutya ohi ishitukitha“omuyengeli guuyelele.” (2 Kor. 11:14) Pashiholelwa, oongeleka dhUukwakriste ohadhi ti kutya otadhi landula Kristus, ihe ohadhi longo aantu omalongo giifundja ngaashi Uukwatatu nosho wo omulilo gwoheli. Ohadhi longo wo aantu kutya opu na oshinima shimwe shoka hashi hupu po ngele omuntu okwa si shoka hashi tsikile okukala nomwenyo. Aantu oyendji ohaya dhiladhila kutya Kalunga okwa hokwa iituthi ngaashi Okrismesa nosho wo Opaasa. Ihe iinima mbyoka aantu haya ningi piituthi ya tya ngaaka oya za komalongelokalunga giifundja. Ihe tse katu na esiku tu pu kithwe komahokololo giifundja ngele otwa kala hatu vulika kelondodho lyaKalunga li na ko nasha nokukala kaatu na ekwatathano nomalongelokalunga giifundja nohatu yanda ‘okukala nekwatathano naashoka sha nyata.’—2 Kor. 6:14-17.

12, 13. (a) Omalongo giifundja gaSatana gatatu ogeni, noshili oyini kombinga yago? (b) Oshike tu na okuninga po ngele inatu hala okupukithwa kuSatana okupitila momahokololo giifundja?

¹² Opu na wo omalongo galwe gaali giifundja ngoka Satana ha longitha opo e tu pukithe ngele inatu kotoka. Natu ka kundathaneni gatatu gomugo, lyotango: Omuntu oto vulu okuninga owala kehe shoka wa hala; oto vulu okutokola mwene pokati kaashoka sha puka naashoka shi li mondjila. Olundji ohatu uvu aantu taya popi oohapu dha tya ngaaka, ngaashi koo-TV, moomuvi, miifo, miifokundaneki nosho wo ko-Internet. Natse otatu vulu okunwethwa mo nuupu tu kale hatu dhiladhila momukalo gwa tya ngaaka nokuninga shoka aakuuyuni taya popi, molwaashoka ohatu uvu iifundja ya tya ngaaka tayi popiwa ethimbo kehe. Ihe oshili oyo kutya aantu oya pumbwa okulombwelwa kuKalunga kutya oshike shi li mondjila naashoka sha puka. (Jer. 10:23) Elongo lyiifundja etiyali olyo kutya Kalunga ke na esiku e ete po omalunduluko gasha kombanda yevi. Edhiladhilo lya tya ngaaka olya ningitha aantu ya kale owala taya dhiladhila kwaashoka tashi ningwa pethimbo mpoka, ihe ihayi ipula kombinga yonakuyiwa nenge kombinga yaashoka tashi nyanyudha Kalunga. Natse oshi na uupu tu nwethwe mo komadhiladhilo ga tya ngaaka e tatu ‘kala aananyalo nenge kaatu na iiyimati.’ (2 Pet. 1:8, KB) Oshili oyo kutya masiku Jehova ote ke eta omalunduluko kombanda yevi, nonkalamwenyo yetu oyi na okuulika kutya otwi itaala shili oshinima shoka. (Mat. 24:44) Elongo etitatu lyiifundja olyo kutya: Kalunga ke na ko nasha natse shili. Satana okwa hala oku tu ningitha tu itaale kutya inatu gwana okukala twa hokiwa nenge tu holike kuKalunga. Ngele otwi itaale iifundja mbika yaSatana otashi vulika tu ethe po okulongela Jehova. Ihe oshili oyo kutya Jehova oku hole aapiya ye ayehe, nakehe gumwe okwe mu lenga noonkondo.—Mat. 10:29-31.

¹³ Otu na okukala twa kotoka ethimbo alihe opo kaatu kale tatu dhiladhila ngaashi aantu yomuuyuni waSatana. Iinima mbyoka haya popi nenge haya dhiladhila otashi vulika yi kale tayi monika ya fa yoshili omathimbo gamwe. Ihe natu dhimbulukweni kutya Satana okwa hala oku tu enda mevi, nokapu na gumwe a pyokoka mokupukitha aantu e mu vule. Onkee ano, otu na okukala hatu pulakene neitulomo komalondodho ngoka twa pewa mOmbiimbeli ngele inatu hala okupukithwa koongano dhaSatana.—2 Pet. 1:16.

Ino “landula Satana”

14. Elondodho lini Paulus a li a gandja kaaselekadhi yamwe aagundjuka, nomolwashike atuheni twa pumbwa okugandja eitulomo kulyo?

¹⁴ Natu tye ando mondjila yontumba omu na endhindhiliko lya nyolwa taku ti: “Ndjika oyo ondjila yokulandula Satana.” Nopwaahe na omalimbililo, kapu na Omukriste ta ka kala a hala okuya nondjila ya tya ngaaka. Ihe nonando ongaaka, Aakriste yashili nayo otashi vulika ya ‘landule Satana.’ Omuyapostoli Paulus okwe tu lombwela nkene shoka tashi vulu okuningwa. (Lesha 1 Timoteus 5:11-15.) Nonando pompito ndjoka Paulus okwa li ta popi kombinga yaaselekadhi yamwe aagundjuka yopethimbo lye yomegongalo lyopaKriste, natse otatu vulu okwiilonga mo sha moohapu ndhoka. Aaselekadhi mboka kaya li ya ndhindhilika mo kutya otaya longele Satana, ihe iinima mbyoka ya li haya ningi nosho wo mbyoka ya li haya popi otayi ulike kutya oye ya li taya longele shili. Oshike tashi vulu oku tu kwathela kaatu kale tatu longele Satana noinaatu shi nongela? Ngashingeyi natu ka kundathaneni kombinga yelondodho ndyoka Paulus a li gandja li na ko nasha noluhoko.

15. Satana okwa hala tu kale hatu ningi shike, na Paulus okwa popya kutya iinima yini Satana ha longitha opo e tu ningithe tu longe ehalo lye?

¹⁵ Satana ina hala tu lombwele yalwe kombinga yaashoka twi itaala nokwa hala wo tu ethe po okuuvitha onkundana ombwanawa. (Eh. 12:17) Okwa hala tu kale hatu longitha ethimbo lyetu olindji mokuninga iinima mbyoka kaayi li pandunge nenge mbyoka tayi etitha etopoko mokati koshigwana shaJehova. Omuyapostoli Paulus okwa tumbula omikalo dhimwe ndhoka Satana ha longitha opo e tu ningithe tu gwanithe po ehalo lye. Pashiholelwa, okwa ti kutya aaselekadhi yopethimbo lye oya li ‘aananyalo omolwokweendagula’ kwawo. Aaselekadhi mboka oya li haya longitha ethimbo lyawo olindji mokutalela po ookuume kawo nokupopya iinima mbyoka inaayi simana. Onkee ano, otu na okuyanda iikala ya tya ngaaka. Pashiholelwa, otashi vulika tu kale hatu longitha ethimbo lyetu olindji mokulesha omatumwalaka nenge mokutumina yalwe omatumwalaka moka hamu kala mwa popiwa iinima inaayi simana, nomathimbo gamwe otashi vulika nokuli kaayi shi yoshili. Paulus okwa ti wo kutya aaselekadhi yopethimbo lye oya li ‘aapopyagani’ nenge tu tye oya li ye hole oluhoko. Aantu mboka ye hole oluhoko omathimbo gamwe ohaya popile yalwe muuwinayi. Shoka osha nika oshiponga molwaashoka aantu mboka ye hole oluhoko ohaya vulu okuninga aalundili nenge aafundja. Olundji iifundja ya tya ngaaka ohayi etitha omaludhi nenge oontamanana pokati kaantu. (Omayel. 26:20) Aalundili oya faathana owala naSatana Odiaboli, nokuli nonando inaye shi nongela.c Paulus okwa li wo a popi kutya aaselekadhi yopethimbo lye oya li hayi ‘itula miinima yaantu.’ Oya li haya kambadhala okulombwela yalwe kutya oye na okukala nonkalamwenyo ya tya ngiini, ihe kapu na nando omuntu e na uuthemba wokuninga ngaaka. Iinima ayihe mbyoka otayi vulu oku tu imba kaatu kale tatu ipula kombinga yiilonga ya simana mbyoka Jehova e tu pa. Otu na okukala hatu longitha ethimbo lyetu miilonga yokuuvitha Uukwaniilwa waKalunga. Ngele otwe etha po iilonga mbyoka, kungawo otatu tameke okulandula Satana, nongele otwa gama kombinga ye, otashi ulike kutya otwa tsa ondumbo naJehova. Atuheni otu na okuhogolola kutya otwa gama kombinga yalye.—Mat. 12:30.

16. Oshike tu na okuninga ngele inatu hala okulandula Satana?

¹⁶ Itatu ka landula Satana nandonando, ngele otwa kala hatu vulika komayele gOmbiimbeli. Paulus okwa popya iinima yimwe mbyoka tayi vulu oku tu kwathela kaatu landule Satana. Okwa ti kutya otu na okukala ‘twi ipyakidhila aluhe niilonga yOmuwa.’ (1 Kor. 15:58) Ngele otwa kala twi ipyakidhila niilonga yaJehova, itatu ka kala tu na ethimbo lyokuninga iinima mbyoka inaayi simana nosho wo mbyoka tayi vulu oku tu etela oshiponga. (Mat. 6:33) Paulus okwa ti wo kutya otu na okukala hatu popi oohapu ‘ndhoka oombwanawa tadhi tungu.’ (Ef. 4:29) Onkee ano, katu na okukala hatu hokola yalwe nenge hatu pulakene komaluhoko. (Tala oshimpungu “Umbila omalwenya mombepo.”) Ngele otwa kala twi inekela aamwatate naamwameme notwe ya simaneka, otatu ka kala hatu ya popile aluhe muuwanawa. Paulus okwe tu kumagidha wo a ti: ‘Inamu idhopa miinima yaantu.’ (1 Tes. 4:11, NW) Natu kale hatu ulukile yamwe kutya otu na ko nasha nayo shili, ihe natu shi ninge momukalo gwesimaneko. Ihe otu na okudhimbulukwa kutya aantu ohaya kala ye na iiholekwa yawo notashi vulika ya kale inaaya hala okupopya kombinga yayo nenge yi tseyike kuyamwe. Kakele kaashono, otu na okudhimbulukwa kutya katu na okuningila yamwe omatokolo miinima mbyoka ya pumbwa okuninga omatokolo kuyo yene.—Gal. 6:5.

17. (a) Omolwashike Jehova e tu pa omalondodho agehe ngoka twa zi nokukundathana? (b) Otu na okukala twa tokola toko okuninga shike?

¹⁷ Otatu pandula Jehova sho e tu londodha sha yela kombinga yiinima mbyoka kaatu na okulandula. Otu na okudhimbulukwa aluhe kutya Jehova okwe tu pa omalondodho agehe ngoka molwaashoka oku tu hole noonkondo. Jehova ina hala tu pukithwe nenge tu kale hatu hepekwa kuSatana. Odhoshili kutya ondjila ndjoka Jehova a hala tu ende nayo oya thinana, ihe ondjila ndjoka oyo owala tayi fala komwenyo gwaaluhe. (Mat. 7:14) Onkee ano, otu na okukala twa tokola toko opo tu kale hatu pulakene aluhe kewi lyaJehova ngele te tu lombwele ta ti: “Ondjila oyo ndjika. Yi landula.”—Jes. 30:21.

[Omanyolo gopevi]

Oto yamukula ngiini?

Ongiini to vulu okuulika kutya oho vulika komalondodho ngoka taga adhika momanyolo taga landula?

• 2 Petrus 2:1-3

• 1 Timoteus 1:3, 4

• 1 Timoteus 5:11-15

[Oshimpungu/Omathano pepandja 19]

Umbila omalwenya mombepo

Natu ka taleni kehokololo limwe lyonale lyOshijuda ndyoka tali ulike kutya oluhoko oshinima oshiwinayi noonkondo.

Omulumentu gwontumba okwa li a taandelitha oluhoko nokulundila omulumentu gumwe omunandunge gwomomukunda gwawo. Konima yethimbo lyontumba, omulumentu ngoka okwa li a yi komulumentu ngoka omunandunge opo e ke mu pe ombili noku mu pula e mu dhimine po. Nakupopya iifundja okwa li a pula omulumentu omunandunge a ti: “Ondi na okuninga shike opo ndi ku ulukile kutya ondi ipa uusama sho nda kala handi ku popile muuwinayi?” Omulumentu ngoka omunandunge okwe mu yamukula a ti: “Onda hala owala wu ningile ndje oshinima shimwe. Inda manga e to kutha oshigwilo shu udha omalwenya, shi teta e to umbile omalwenya ngoka mombepo.” Omulumentu ngoka ka li a tseya kutya omolwashike omulumentu omunandunge a li e mu lombwele a ninge oshinima sha tya ngaaka, ihe nando ongaaka, okwe ke shi ninga. Lwahugunina, okwa ka galukila komulumentu ngoka omunandunge e te mu pula ta ti: “Ngashingeyi owa dhimina ndje po nee?” Opo nduno omulumentu ngoka omunandunge okwe mu lombwele a ti: “Shuna manga u ka gongele omalwenya agehe ngoka ga li moshigwilo.” Omulumentu ngoka okwe mu yamukula a ti: “Itandi vulu we oku ka gongela omalwenya ngoka oshoka oga pepwa po nale kombepo.” Opo ihe omulumentu ngoka omunandunge okwe mu lombwele ta ti: “Ngaashi naanaa omalwenya ngoka wa kutha moshigwilo gi ihanena kehe pamwe, iifundja yoye nayo oyi ihanena nale kehe pamwe. Ano ngaashi naanaa itoo vulu we okugongela omalwenya ngeyaka, ito vulu okuningitha aantu ya dhimbwe iinima mbyoka we ya lombwela.”

Oshiilongomwa osho shika kutya itatu vulu we okuninga po sha ngele otwa lundile yamwe nenge twa taandelitha oluhoko. Omathimbo gamwe itatu vulu okuninga po shi na ko nasha niilanduliko mbyoka tayi vulu okweetithwa koohapu dhetu. Onkee ano, manga inaatu popila omuntu omukwetu muuwinayi, natu dhimbulukwe kutya oohapu ndhoka hatu popi ohadhi taandele ngaashi naanaa omalwenya haga halakanene mombepo.

[Ethano pepandja 16]

Ongiini aantu yamwe tashi vulika ya hiye aashunimonima momagumbo gawo?