SHOKA TASHI ETA ENYANYU MEGUMBO
Kala ho popi nomumwoye gwoomvula omulongo nasha itoo nyenyeta
“Sho omumwandjekadhona a li e na oomvula 14 okwa tameke okukala ha shuna ndje ko. Ngele onde mu lombwele te ti: ‘Itu ka lyeni,’ oha yamukula ndje ta ti: ‘Ote li nge ethimbo lyandje lya adha.’ Shampa nde mu pula ngele iilonga mbi nde mu pe okwe yi mana ngaa, okwa li ha yamukula ndje ta ti: ‘To piyaganeke ndje utale!’ Olundji otwa li hatu nyenyeta mokule.” — MAKI, JAPANI.a
Ngele ngoye omuvali gwokanona koomvula omulongo nasha, eshongo limwe lya kwata miiti notali pula eidhidhimiko otashi vulika li kale oontamanana. Maria, meme gwokanona koomvula 14 gwokuBrasilia, ota ti: “Ohashi geyitha ndje noonkondo ngele omumwandjekadhona ita vulika. Ohatu geye e tatu tameke okunyenyeta.” Carmela gwokuItalia naye okwa li a taalela eshongo lya faathana. Ota ti: “Aluhe uuna tatu nyenyeta nomumwandjemati ohatu geye, noha zi po te ki ipatela mondunda.”
Omolwashike aagundjuka oyendji ye na oonkalankongo? Oya nwethwa mo kuyakwawo? Otashi vulika. Ombiimbeli otayi ti kutya ookuume otaya vulu okunwetha mo omuntu nawa nenge nayi. (Omayeletumbulo 13:20; 1 Aakorinto 15:33) Nokuli omainyanyudho ngoka ge holike kaagundjuka kunena ohagu ulike kutya aagundjuka yomanganga oyo ye li nawa.
Ihe opu na wo iinima yilwe tashi vulika yi nwethe mo omugundjuka, ihe ngele owe yi tseya oshipu okuungaunga nayo. Natu tale kiiholelwa.
OMUGUNDJUKA OTI ILONGO OKUTOMPATHANA
Omuyapostoli Paulus okwa nyola a ti: “Ngame sho nda li okanona, onda popi, nda dhiladhila nonda yeleke [nenge nda tompathana] pakanona; ihe sho nda ningi omulumentu, onde etha ayihe yopakanona.” (1 Aakorinto 13:11) Ngaashi oohapu dhaPaulus tadhi popi, aanona naakuluntu ihaya dhiladhila sha faathana. Ngiini?
Aanona ohaya dhiladhila kutya oshinima kehe oshi na okukala shi li mondjila nenge sha puka. Mepingathano naashoka, aakuluntu ohaya vulu okuuva ko iinima inaayi yela nawa nohaya vulu okudhiladhila muule manga inaaye ya pehulithodhiladhilo nenge inaaya ninga etokolo. Pashiholelwa, aakuluntu olundji ohaya tala kwaashoka sha kwatelwa moshinima nohaya dhiladhila kutya oonkatu dhawo otadhi ka nwetha mo yalwe ngiini. Otashi vulika yi igilila okudhiladhila ngaaka. Ihe aagundjuka opo taye shi ilongo.
Ombiimbeli otayi kumagidha aagundjuka ya kokeke “uunkulungu” wawo, ngaashi okudhiladhila kwawo. (Omayeletumbulo 1:4) Nokuli Ombiimbeli otayi kumagidha Aakriste ayehe ya longithe ‘oondunge’ dhawo. (Aaroma 12:1, 2; Aahebeli 5:14) Ihe omathimbo gamwe omugundjuka otashi vulika a nyenyete nangoye nomuunima uushona, molwaashoka ke na uunkulungu wokudhiladhila wa gwana. Nenge a popye oshinima shoka inaa dhiladhila nawa. (Omayeletumbulo 14:12) Ngele osha ningwa, ongiini to vulu okutompathana naye pehala lyokunyenyeta?
KAMBADHALA OKUNINGA NGEYI: Dhimbulukwa kutya omugundjuka otashi vulika ti ilongo nkene e na okutompathana notashi vulika ini itula mo mwaashoka ta popi. Opo wu tale ngele okwi itula mo, tango mu pandula sho a holola omaiyuvo ge. (“Ondi uvite kutya oto ti ngiini, nonando itandi tsu kumwe nasho ashihe.”) Opo nduno mu kwathela a dhiladhilulule shoka ta popi. (“Oto dhiladhila mbela kutya shono to popi osho hashi kala ngawo aluhe?”) Otashi vulika omugundjuka a dhiladhilulule shoka a li ta popi.
Opu na oshinima shimwe shoka wu na okutakamitha: Uuna to popi nomugundjuka ino pumbwa okuulika kutya ongoye wu li mondjila. Nonando owu kale wu wete omugundjuka a fa inaa taamba ko shoka to ti, otashi vulika a kale i ilonga mo sha moonkundathana, nonando ku wete a za mo nasha nenge itaa zimine. Ino kumwa ngele konima yomasiku gontumba omugundjuka ta tameke okupopya oohapu ndhoka wa li to mu lombwele, tashi vulika ta ti kutya omayele ge mwene.
“Omathimbo gamwe tse nomumwandjemati otwa li hatu nyenyeta kombinga yiinima iishona, ngaashi kombinga yokuhepitha iinima nenge kombinga yokuhinda okamwayinakadhona. Ihe poompito odhindji okwa li ha kala a fa a hala ndi mu pule kutya ota dhiladhila ngiini nokuulukila ndje kutya oku shi uvite ko ngiini, e tandi ti: ‘Ohoo! Osho shi li ngawoo!’ nenge ‘Osho wu uvite ngawoo!’ Ando ogwo omukalo nda li handi longitha ngono, ando otwa vulu okuyanda omaludhi ogendji.” — Kenji, Japani.
OTI ILONGO KUTYA OKWA THIKAMA PENI
Aavali aanandunge ohaya kwathele oyana yoomvula omulongo nasha ya kale haya popi ya manguluka kutya oya thikama peni
Oshinima sha simana mokuputudha omugundjuka osho oku mu dheula a kale e shi okukala kuye mwene uuna kee li we pungoye. (Genesis 2:24) Shoka sha kwatelwa mo medheulo ndyoka oku mu kwathela a kale e shi kutya ye omuntu e li ngiini, ano kutya oku na omaukwatya geni, okwi itaala shike nomithikampango dhini hi iyutha kudho. Omugundjuka ngoka a tokola kutya okwa hala okukala omuntu e li ngiini iha dhiladhila owala kiilanduliko uuna ta thiminikwa kookuume a ninge shoka sha puka. Ohi ipula wo ngeyi: ‘Mbela ngame omuntu a tya ngiini? Ohandi iyutha komithikampango dhini? Omuntu ngoka hi iyutha komithikampango ndhoka ota ka ninga ngiini ngele okwi iyadha monkalo ya fa ndjika?’ — 2 Petrus 3:11.
Ombiimbeli otayi popi kombinga yaJosef, omugundjuka ngoka a li e shi kutya okwa thikama peni. Pashiholelwa, sho a li ta makelwa komukulukadhi gwaPotifar a lale naye, okwe mu yamukula a ti: “Ondi longe ngiini uuwinayi u thike mpoka, ndi yone kuKalunga?” (Genesis 39:9) Nonando Aaisraeli pethimbo mpoka kaya li natango ya pewa ompango tayi keelele oluhondelo, Josef okwa li e lu tala ko ngaashi Kalunga e lu tala ko. Nokuli oohapu dhe “ondi longe ngiini” otadhi ulike kutya okwa li a tala ko oohapu dhaKalunga dha fa omayele ge mwene. — Aaefeso 5:1.
Omumwoye gwomugundjuka naye opo ti ilongo kutya ye omuntu e li ngiini. Shika oshinima oshiwanawa, oshoka ngele oku shi kutya okwa thikama peni, ota ka vula okwiidhidhimikila omathiminiko goomakula noku ga sinda. (Omayeletumbulo 1:10-15) Ihe oshinima osho tuu shoka, otashi vulika shi mu ningithe e ku pataneke. Ngele okwe shi ningi, oto ka ninga nduno ngiini?
KAMBADHALA OKUNINGA NGEYI: Pehala lyokunyenyeta naye, endulula owala shoka a popi. (“Andiya ndi tale ngele ondi ku uvite. Ndishi oto ti . . . ”) Opo nduno, mu pula ishewe omapulo. (“Omolwashike wu uvitile ngawo?” nenge “Omolwashike to dhiladhila ngawo?”) Teka mo shoka shi li momutima gwe. Mu etha a popye kutya okwa thikama peni. Ngele shoka ta popi inashi puka, mu ulukila kutya owa simaneka eiyuvo lye nonando ito tsu kumwe lela nalyo.
Oshinima oshiwanawa ngele omugundjuka oku shi kutya okwa thikama peni noku shi kutya ye omuntu a tya ngiini. Nokuli Ombiimbeli otayi ti kutya Aakriste kaye na okukala ya fa aanona aashona mboka “haa tengatengithwa nohaa alaalithwa kombepo kehe yomalongo gaantu aafundja.” (Aaefeso 4:14) Ano ladhipika omugundjuka noku mu etha i ilonge okukala e shi kutya ye omuntu a tya ngiini nokwa thikama peni.
“Shampa aamwandjekadhona ya mono kutya onda hala okupulakena kuyo, ohaya kala ya hala okuninga shoka tandi ya lombwele, nonando hasho ya li taya dhiladhila. Kandi hole oku ya thiminika ya dhiladhile ngaashi ngame, ihe ohandi ye etha ya mone kuyo yene kutya oya thikama peni.” — Ivana, Czech Republic.
KALA HO TIVUKA, IHE INO YA LELA ONDEMBULA
Ngaashi uunona uushona, aagundjuka yamwe oye na egamo lyokutsikila okupula aavali yawo oshinima shontumba sigo ya zimine. Ngele shika ohashi ningwa olundji maandjeni, kala we shi kotokela. Nonando okupitika omumwoye a ninge shoka wa li we mu indika otashi mu mweneke, otashi mu longo kutya ngele okwa hala sha oku na okunyenyeta. Oshike tashi kandula po uupyakadhi mboka? Landula omayele gaJesus: ‘Oohapu dheni nadhi tye: Eeno, eeno, nenge aawe, aawe.’ (Mateus 5:37) Omugundjuka ita ka nyenyeta unene nangoye ngele oku shi kutya iho ninguluka nuupu.
Ihe nonando ongawo, kala ho tivuka. Pashiholelwa, pula okamwoye ka yelithe kutya omolwashike ka hala ethimbo ndyoka wa ti naka kale hake ya megumbo kongulohi li lundululwe esiku ndyoka. Ngele owe shi zimine, itashi ti kutya oho ninguluka nuupu, ihe oto landula owala omayele gOmbiimbeli ngoka taga ti: “Kaleni mu na olukeno naantu ayehe.” — Aafilippi 4:5.
KAMBADHALA OKUNINGA NGEYI: Gongaleni mu kundathane kombinga yethimbo ndyoka wa hala omumwoye a kale he ya megumbo kongulohi noyoompango dhilwe dhomegumbo. Omumwoye na kale e shi shi kutya owu na ehalo oku mu pulakena nokutala kiinima ayihe ya kwatelwa mo manga inoo ninga etokolo. Roberto, omusamane gwokoBrasilia, ota ti: “Aagundjuka oya pumbwa okutseya kutya aavali yawo otaya ka zimina ngele shoka taya pula kashi li kondje yomakotampango gOmbiimbeli.”
Ashike aavali inaya gwanenena. Ombiimbeli otayi ti: “Tseni atuheni ohatu puka olwindji.” (Jakob 3:2) Ngele owa mono kutya otashi vulika ongoye we etitha oontamanana, ino ongaonga okupa okamwoye ombili. Ngele owa zimine kutya owa ninga epuko, otashi ka gandja oshiholelwa oshiwanawa sheifupipiko komumwoye, notashi ke mu ningitha a ninge sha faathana.
“Esiku limwe konima sho nda fululuka, onda pe omumwandjemati ombili sho ndu uyagana naye. Shika osha li she mu kwathele wo a fululuke nosha li oshipu kuye okupulakena kungame.” — Kenji, Japani.
a Omadhina moshileshwa shika hago gawo.
IPULA TO TI . . .
Mbela omomikalo dhini tashi vulika handi tukula oontamanana pokati ketu nomumwandje gwoomvula omulongo nasha?
Ongiini tandi vulu okulongitha uuyelele mbuka wu li moshileshwa shika ndi uve ko nawa omumwandje gwoomvula omulongo nasha?
Ondi na okuninga po shike opo tu vule okukala hatu kundathana nomumwandje gwoomvula omulongo nasha itaatu nyenyeta?