Ontopolwa 31

Olye ta vulu oku ku hekeleka?

MBELA opu na omathimbo gamwe ho kala wu uvite wa yemata nenge wa sa ezaza?— Mbela opu na omathimbo gamwe ho kala to ipula ngele opu na ngaa ngoka e ku hole?— Aanona yamwe osho haya kala taya dhiladhila ngaaka. Ihe Kalunga oku uvaneke a ti: ‘Ngame itandi ku dhimbwa.’ (Jesaja 49:15) Mbela kashi li nawa okudhiladhila kEnyolo ndika?— Eeno, Jehova Kalunga oku tu hole lela.

Omunyoli gumwe gwOmbiimbeli okwa ti: “Tate nameme otaya vulu okweetha ndje, ihe Omuwa ota sile ndje oshimpwiyu.” (Episalomi 27:10) Okukala tu shi Enyolo ndyoka, otashi vulu okukala ehekeleko lyolela kutse, hasho mbela?— Eeno, Jehova ote tu lombwele ta ti: ‘Ino tila— ongame ndi li pungoye, otandi ku kwatha.’—Jesaja 41:10.

Nonando omathimbo gamwe Jehova ohe etha Satana e tu etele uudhigu, ohe mu etha wo a makele aapiya Ye. Oshikando shimwe Ondiaboli oya li ya monitha Jesus iihuna noonkondo shoka sha ningitha Jesus i igidhe kuJehova ta ti: “Kalunga kandje, Kalunga kandje, omolwashike we ekelehi ndje?” (Mateus 27:46) Nonando Jesus okwa li ta mono iihuna, okwa li e shi kutya Jehova oku mu hole. (Johannes 10:17) Ihe Jesus okwa li wo e shi kutya Kalunga ohe etha Satana a makele aapiya Ye nohe etha wo e ya monithe iihuna. Montopolwa yilwe otatu ka yelitha kutya omolwashike Kalunga he etha Satana e shi ninge.

Ngele tu li aanona, olundji ohatu kala twa tila. Pashiholelwa, mbela opu na esiku limwe wa kanene? Mbela owa li wa tila?— Aanona oyendji ohaya kala ya tila. Oshikando shimwe Omulongi Omunene okwa li a hokolola ehokololo kombinga yokukana. Ihe shoka sha li sha kana kashi shi okanona. Osha li onzi.

Aanona otaya vulu okufaathanithwa nonzi. Mbela ongiini tashi vulika? Dhoshili, oonzi kadhi shi oonene nokadhi na oonkondo. Odha pumbwa omuntu ngoka te dhi sile oshimpwiyu noku dhi gamena. Omuntu ngoka ha sile oshimpwiyu oonzi ohi ithanwa omusita.

Jesus okwa li a popi mehokololo lye kombinga yomusita ngoka a li e na oonzi ethele. Ihe yimwe yomoonzi dhe oya li ya kana. Otashi vulika ya li ya hala okutala kutya oshike sha li handiyaka yondundu. Ihe konima yokathimbo, onzi ndjoka oya li ya yi kokule noonkwawo. Mbela oto dhiladhila kutya onzi ndjoka oya li yu uvite ngiini sho ya li ya mono kutya oyo awike yi li po pomudhingoloko mpoka?—

Mbela omusita okwa li ta ka ninga po shike sho a mono kutya onzi yimwe oya kana? Mbela okwa li ta ka tya kutya epuko lyayo, nomolwaashono ite ki ipula nayo? Nenge mbela ota ka thiga oonzi ndhoka 99 pehala lya gamenwa e ta ka konga yimwe ndjoka ya kana? Mbela onzi yimwe oya gwana ngaa okukongwa nuudhiginini?— Ando ongoye wa li onzi ndjoka ya kana, mbela ando oto ka kala wa hala omusita e ye e ku konge?—

Omusita nguka okwa li e hole oonzi dhe adhihe noonkondo, nokuli naandjoka ya kana okwa li e yi hole. Onkee ano, okwa yi opo a ka konge onzi ndjoka ya kana. Onzi ndjoka ya li ya kana kaya li tuu ya nyanyukwa noonkondo sho ya mono omusita te ya. Jesus okwa ti kutya omusita nguka okwa li a nyanyukwa sho a mono onzi ye. Okwa li e yi nyanyukilwa shi vulithe oonzi ndhoka 99 ndhoka dha li inaadhi kana. Mbela olye ta yelekanithwa nomusita gwoonzi gwomehokololo lyaJesus? Mbela olye he tu sile oshimpwiyu ngaashi omusita ngoka a li ha sile oshimpwiyu oonzi dhe?— Jesus okwa ti kutya He gwomegulu, Jehova oye he shi ningi.

Jehova Kalunga oye Omusita Omunene gwoshigwana she. Oku hole ayehe mboka haye mu longele, mwa kwatelwa naanona ngaashi ngoye. Ina hala nando ogumwe gwomutse e ehamekwe nenge a hanagulwe po. Dhoshili, oshi li nawa okukala tu shi kutya Kalunga oku na ko nasha natse noonkondo.—Mateus 18:12-14.

Mbela owi itaala ngaa lela muJehova Kalunga?— Mbela oku li omuntu gwolela kungoye?— Oshoshili kutya itatu vulu okumona Jehova. Molwaashoka oku li Ombepo. Oku na olutu ihaalu monika. Ihe oku li omuntu gwolela noha vulu oku tu mona. Ohe shi mono uuna twa pumbwa ekwatho. Otatu vulu okupopya naye megalikano, ngaashi naanaa hatu popi naantu yalwe huka kombanda yevi. Jehova okwa hala tu kale hatu ningi ngaaka.

Onkee ano, ngele owa nika oluhodhi nenge wu uvite ezaza, mbela owu na okuninga po shike?— Popya naJehova. Hedha kuye note ke ku hekeleka noku ku kwathela. Dhimbulukwa kutya Jehova oku ku hole, nonando oho kala wu uvite wa fa wu li ongoye awike. Natu kuthe Oombiimbeli dhetu. MEpisalomi 23, petameko lyovelise yotango otatu lombwelwa taku ti: “OMUWA oye omusita gwandje; inandi pumbwa sha. Oye ta gondjithile ndje momizile omitalala e ta fala ndje koondombe dhomeya omandjengwa.”

Ndhindhilika shoka omunyoli a gwedha ko movelise 4 a ti: “Nonando ondi na okweenda mesilu lyomilema thokothoko, itandi tila sha, oshoka OMUWA, ou li pungame. Ondhimbo yoye nolwoondje lwoye ohayi gamene ndje.” Aantu mboka haya longele Jehova Kalunga osho haya kala yu uvite ngaaka. Ohaya kongo ehekeleko kuye uuna ye li muudhigu. Mbela nangoye osho ho kala wu uvite ngaaka?—

Ngaashi naanaa omusita omunahole ha sile oshimpwiyu oshigunda she, osho naJehova ha sile oshimpwiyu aantu ye. Ohe yu ulukile ondjila ndjoka ye na okweenda nayo, nohaye mu landula nenyanyu. Nonando oya kale muudhigu, inaya pumbwa okutila sha. Omusita oha longitha ondhimbo ye nenge olwoondje lwe a gamene oonzi kiinamwenyo mbyoka tashi vulika yi dhi ehameke. Ombiimbeli oya hokolola kombinga yomusita omugundjukam, David nkene a li ha gamene oonzi dhe koonkoshi nokomamwanka. (1Samuel 17:34-36) Oshigwana shaKalunga oshi shi shi kutya ote ke shi gamena wo. Molwaashoka Kalunga oku li pamwe nasho, ohashi kala shi uvite sha gamenwa.

Jehova oku hole lela oonzi dhe, nohe dhi sile oshimpwiyu pahole. Ombiimbeli otayi ti kutya Jehova oku li ngaashi ‘omusita ta litha oshigunda she; oonzigona ote dhi gongele pamwe noku dhi humbata momaako ge.’—Jesaja 40:11.

Mbela itashi ku uvitha nawa okutseya kutya Jehova osho e li ngawo?— Mbela owa hala okukala gumwe gwomoonzi dhe? Oonzi ohadhi pulakene kewi lyomusita gwadho. Ohadhi kala popepi naye. Mbela oho pulakene ngaa kuJehova?— Mbela oho kala ngaa popepi naye?— Onkee ano, ino pumbwa nando okukala wa tila. Oshoka Jehova ota ka kala pamwe nangoye.

Jehova oha sile oshimpwiyu pahole mboka haye mu longele. Natu leshe shoka Ombiimbeli tayi ti kombinga yaashika, mEpisalomi 37:25; 55:22 naLukas 12:29-31.

[Ethano pepandja 163]

Mbela oto dhiladhila kutya okanzi haka ka kana oku uvite ngiini?

[Ethano pepandja 164]

Olye ta yelekanithwa nomusita ngoka a hupitha onziye?

[Ethano pepandja 165]

Mbela Jehova ogwolela kungoye ngaashi naanaa tate gwoye nenge aantu yalwe?

[Ethano pepandja 166]

Ngaashi omusita ha gamene oonzi dhe, olye mbela ta vulu oku tu kwathela ngele tu li muupyakadhi?