Kalunga ota ningi shike?

“OMUWA, omolwashike wa kala kokule? Omolwashike wa holama pomathimbo guudhigu?”—EPISALOMI 10:1.

NGELE tatu tala nenge tatu uvu iinenenima yoonkundana, otayi gandja uunzapo kutya otu li ‘momathimbo guudhigu.’ Uuna tse yene twa gumwa komuyonena, koshiponga sha kwata miiti nenge twa silwa gumwe ngoka tu hole, otashi vulika tu pule kutya mbela Kalunga oku wete ngaa shoka tashi ningwa? Oku na ngaa ko nasha? Ye oko ngaa e li shili?

Ihe mbela owa dhiladhilile kutya otashi vulika shoka hatu kala twa tegelela Kalunga a ninge shi ikolelela komadhiladhilo ga puka? Oku shi thaneka: Dhiladhila ando okanona okashona ka geya molwaashoka he a ya kiilonga. Okanona oka yuulukwa he notaka dhiladhila ando kutya ne ye kegumbo. Okanona oku uvite ka fa ke ekelwahi. Momukokomoko gwesiku oka kala nokupula taka ti: “Tate oku li peni?”

Osha yela kutya okudhiladhila kwokanona kaku li mondjila. Pethimbo opo tuu mpoka he yako ota longo opo a sile uukwanegumbo auhe oshimpwiyu. Mbela okudhiladhila kwetu itaku vulu okukala kwa faathana uuna tatu ti: “Ano Kalunga oko ngaa e li”?

Pashiholelwa, aantu yamwe otashi vulika ya kale ya hala ando Kalunga a kale owala ta geele meendelelo mboka ya ninga sha sha puka. Yalwe oya tala ko Kalunga a fa omuntu gwomegulu ngoka hi ithanwa mOshiingilisa Father Christmas ngoka e li po owala okupa aantu omagano, ngaashi iilonga, kuume kopandjokana nenge nokuli okusindana uukalata wiimaliwa.

Omataloko agehe ngoka otaga fekele kutya ngele Kalunga ita katuka pauyuki ngashingeyi nenge ngele ita pe aantu shoka ya hala, osha yela kutya ke na ohenda naasho tatu mono iihuna noke shi oompumbwe dhetu. Ihe shika kashi shi nandonando shoshili! Uushili owo mbono kutya ngashingeyi Jehova Kalunga ota longo opo a sile oshimpwiyu uukwanegumbo awuhe waantu, nonando ite shi ningi momukalo ngoka oyendji ya hala.

Kalunga ota ningi shike nduno? Opo tu yamukule epulo ndyoka, otwa pumbwa okutala kwaashoka sha li sha ningwa po petameko lyondjokonona yaantu sho ekwatathano lyaantu naKalunga lya li lya yonwa po, nonando inashi hala okutya itali vulu okuningululwa.

Iizemo iiwinayi yuulunde

Dhiladhila ando wu wete egumbo ndyoka lya kala okatomeno uule woomvula odhindji. Iipeleki oya ndonyoka, omiyelo odha gwa ko komakandula niinima yopondje oya monithwa iihuna. Nale egumbo ndika olya li monkalo ombwanawa, ihe hasho we li li ngaaka. Molwaashoka olya yonagulwa noonkondo, oku li opalekulula itaku ka kala oshilonga oshipu, noitaku ka ningwa muusiku wumwe.

Ngashingeyi dhiladhila keyonagulo ndyoka lya li lya ningilwa aantu uule woomvula 6 000 ga piti sho oshishitwa ihaashi monika Satana sha li sha heke Adam naEva ya tukulile Kalunga oshipotha. Manga oshiningwanima shoka inaashi ningwa, aaihokani yotango oya li ya nyanyukilwa uukolele wa gwanenena netegameno lyokukala sigo aluhe pamwe noluvalo lwawo lwomonakuyiwa. (Genesis 1:28) Ihe sho ya li ya yono, osha li sha fa Adam naEva ya yonagula uukwanegumbo wopantu mboka wa li tawu ka valwa.

Ino dhiladhila kutya eyonagulo ndyoka lya li lya ningwa kuunashipotha mboka inali kwata miiti. Ombiimbeli otayi ti: “Uulunde owe etwa muuyuni komuntu gumwe [Adam], nuulunde we owe etelele eso.” (Aaroma 5:12) Kakele kokweeta eso, uulunde owa yono po wo ekwatathano lyetu nOmushiti gwetu noshe tu guma palutu, pamadhiladhilo nosho wo pamaiyuvo. Oshizemo ooshono kutya, onkalo yetu oya faathana naandjoka yegumbo lya yonuka. Omulumentu omuyuuki Job okwa li a ngongo paufupi onkalo ndjoka tu li muyo sho a popi kutya omuntu “omasiku ge omafupi nogu udha uupyakadhi.”—Job 14:1.

Ihe mbela Kalunga okwa li e etha aantu konima sho Adam naEva ya yono? Aawe nando! Dhoshili, okuza nale sigo ongashingeyi Tate yetu gwomegulu okwa kala ta longo pehala lyuukwanegumbo waantu. Opo wu kale wu na olupandu lwaashoka te tu ningile, konakona oonkatu ndatu ndhoka dha pumbiwa opo egumbo li opalekululwe nankene onkatu kehe ya pambathana naashoka Kalunga a ninga po opo a galulile aantu monkalo moka ya li.

1 Konima yokukonakona egumbo ndyoka lya yonuka, mwene gwalyo okwa li e na okutokola ngele ote ke li opalekulula nenge ote li kumuna po.

Mbala konima yoshipotha shoka sha li sha tukulwa muEden, Jehova Kalunga okwa li a popi elalakano lye lyokugalulila aantu monkalo moka ya li. Okwa li a lombwele oshishitwa ihaashi monika shoka sha li sha tukuluthitha oshipotha a ti: “Otandi tula etondathano pokati keni nomukiintu, nopokati koluvalo lwoye noluvalo lwe. Oluvalo lwe otalu nyanyula omutse gwoye, ongoye noto mu tsu moshithi shompadhi ye.”—Genesis 3:15.

Sho a popi oohapu ndhoka, Jehova oku uvaneke okuhanagula po ngoka a li a tukula oshipotha muEden. (Aaroma 16:20; Ehololo 12:9) Natango Jehova okwa li a hunganeke kutya “oluvalo” ndoka talu ke ya monakuyiwa otalu ka kulila aantu muulunde.a (1 Johannes 3:8) Omauvaneko ngoka otagu ulike uushili waashoka Kalunga ta ka gwanitha po: Okwa li ta ka opaleka eshito lye, ihe ite ke li hanagula po. Ihe okugalulila aantu monkalo moka ya li otashi ka pula ethimbo.

2 Omusindingulu okwa longekidha omutungilo gwegumbo nkene tali ka opalekululwa.

Jehova Kalunga okwa li a pe Aaisraeli oompango nokulongekidha omutungilo gwotempeli ndjoka ya li ye na oku mu longelela mo. Ombiimbeli otayi ti: “Mbika ayihe oyo omuzizimba gwowala gwiinima yokomeho.” (Aakolossa 2:17) Ngaashi omutungilo gwegumbo, iinima mbika otayi thaneke sha shilwe oshinene.

Pashiholelwa, Aaisraeli oya li haya gandja omafikiloyambo opo ya vule okudhiminwa po oondjo dhawo. (Levitikus 17:11) Oshilonga shoka osha li tashi thaneke eyambo enene ndyoka lya li tali ka gandjwa oomvula omathele komeho, eyambo ndyoka lya li tali ke shi ninga tashi wapa opo aantu ya dhiminwe po shili.b Omutungilo gwetsalihangano notempeli moka Aaisraeli ya li haya longelele mo Jehova ogwa li tagu thaneke oonkatu ndhoka Mesiasa ngoka a li te ke ya a li ta ka katuka, okuza peso lye lyeyambo sigo oosho a londo a yi megulu.—Tala oshimpungu pepandja 7.

3 Omutungi ngoka ta ka landula omutungilo e ta ka opalekulula egumbo okwa hogololwa.

Jesus okwa li Mesiasa u uvanekwa ngoka ta ka landula omutungilo ngoka gwa li gwa tulwa po komayambo gAaisraeli nokwa li ta ka gandja omwenyo gwe opo a kulile aantu. Dhoshili, Johannes omuninginithi okwa li i ithana Jesus “Onzigona yaKalunga, tayi kutha po oondjo dhuuyuni!” (Johannes 1:29) Jesus okwa li a taamba ko nehalo ewanawa oshilonga shoka. Okwa ti: “Ngame onda za megulu; inandi ya okugwanitha ehalo lyandje mwene, ihe olyaanguka a tuma ndje.”—Johannes 6:38.

Ehalo lyaKalunga shi na ko nasha naJesus olya li lya kwatele mo kutya ita ka ‘gandja omwenyo gwe owala, a hupithe oyendji,’ ihe ota ka ninga wo ehangano naalanduli ye oku ya pa Uukwaniilwa. (Mateus 20:28; Lukas 22:29, 30, KB) Uukwaniilwa mboka owo Kalunga ta ka longitha opo a gwanithe po elalakano lye shi na ko nasha naantu. Etumwalaka kombinga yUukwaniilwa waKalunga ohali ithanwa “elaka etoye” nenge onkundana ombwanawa molwaashoka otawu yelitha kutya Kalunga okwa dhika po epangelo megulu ndyoka tali ka pangela iinima ayihe kombanda yevi.—Mateus 24:14; Daniel 2:44.c

Iilonga yokwoopalekulula otayi tsikile

Manga inaa londa a ye megulu, Jesus okwa li a lombwele aalanduli ye a ti: “Ningeni aantu ayehe aalongwa yandje, mu ya [ninginithile, NW] medhina lyaHe nolyOmwana nolyOmbepo Ondjapuki . . . Ihe ngame otandi kala pamwe nane omasiku agehe sigo ehulilo lyuuyuni.”—Mateus 28:19, 20.

Onkee ano, okugalulila aantu monkalo moka ya li kakwa li taku ka hula neso lyaJesus. Okwa li taku ka tsikila sigo “ehulilo lyuuyuni,” ethimbo ndyoka Uukwaniilwa waKalunga tawu ka tameka okupangela ombanda yevi. Ethimbo ndyoka olya thika nale. Shika otu shi shi molwaashoka endhindhiliko ndyoka Jesus a li a hunganeke shi na ko nasha ‘nehulilo lyuuyuni’ otali gwanithwa ngashingeyi.d—Mateus 24:3-14; Lukas 21:7-11; 2 Timoteus 3:1-5.

Kunena miilongo 236, Oonzapo dhaJehova ohadhi vulika kelombwelo lyaJesus lyoku ka uvitha onkundana ombwanawa yUukwaniilwa waKalunga. Dhoshili, oshifo shika to lesha osha longekidhwa nelalakano lyoku ku kwathela wu ilonge oshindji kombinga yUukwaniilwa mboka nosho wo shoka tawu ka gwanitha. Pepandja 2 lyoshifo kehe shOshungolangelo, oto ka adha po oohapu ndhika tadhi ti: “[Oshifo] shika . . . otashi hekeleke aantu nonkundana ombwanawa kutya masiku Uukwaniilwa waKalunga mboka wu li epangelo lyolela lyomegulu, otawu ka hulitha po uukolokoshi auhe nokuninga evi oparadisa. Otashi humitha komeho eitaalo mokwiitaala Jesus Kristus, ngoka a si opo tu vule okumona omwenyo gwaaluhe nota pangele ngashingeyi e li Omukwaniilwa gwUukwaniilwa waKalunga.”

Ngashingeyi otashi vulika natango wu uve kombinga yomaponokelo giikulo nenge iiponga yopaunshitwe nenge wu silwe gumwe ngoka wu hole. Ihe okukonakona Ombiimbeli otaku ke ku kwathela wu mone kutya Kalunga ina ekelahi aantu. Mepingathano naashoka, “ke li kokule nomuntu nando ogumwe.” (Iilonga 17:27) Euvaneko lye lyokugalulila aantu monkalo ndjoka aavali yetu ya li ya kanitha, otali ka gwanithwa shili.—Jesaja 55:11.

[Omanyolo gopevi]

[Omusholondondo/Omathano pepandja 7]

(Opo wu mone nkene uuyelele wu unganekwa, tala oshileshomwa)

“Efano lyuuyapuki wo wene”—Shoka etsalihangano lya li tali thaneke

OSHIYAMBELO

Okukala kwaKalunga a taamba ko eyambo lyaJesus.—AAHEBELI 13:10-12.

OMUSAASERI OMUKULUNTU

Jesus.—AAHEBELI 9:11.

1 MEsiku lyEkwatakanitho, omusaaseri omukuluntu okwa li ha gandja omayambo omolwoondjo dhoshigwana. —LEVITIKUS 16:15, 29-31.

1 Mo 14 Nisan, 33 E.N., Jesus okwa li a gandja po omwenyo gwe pehala lyetu.—AAHEBELI 10:5-10; 1 JOHANNES 2:1, 2.

UUYAPUKI

Onkalo moka mu li Jesus omwana awike gwopambepo.—MATEUS 3:16, 17; AAROMA 8:14-17; AAHEBELI 5:4-6.

ETOPOLITHO

Olutu lwaJesus, ongamba ndjoka ya topola pokati onkalamwenyo yokombanda yevi nonkalamwenyo yomegulu.—1 AAKORINTO 15:44, 50; AAHEBELI 6:19, 20; 10:19, 20.

2 Omusaaseri omukuluntu okwa li ha yi kombinga onkwawo yetopolitho ndyoka lya topola ko Uuyapuki kUuyapukielela.

2 Konima sho a yumudhwa, Jesus okwa li a fa a piti melapi lyetopolitho a yi kombinga onkwawo sho a londo a yi megulu ‘e tu popile koshipala shaKalunga.’—AAHEBELI 9:24-28.

UUYAPUKIELELA

Egulu.—AAHEBELI 9:24.

3 Sho a li mUuyapukielela, omusaaseri omukuluntu okwa li ha shashamine ombinzi yoshinamwenyo shoka sha yambwa po komeho goshikethahangano.—LEVITIKUS 16:12-14.

3 Sho a gandja ongushu yombinzi ye ndjoka ya tika, Jesus okwa ningi ekwatakanitho lyashili omolwoondjo dhetu.—AAHEBELI 9:12, 24; 1 PETRUS 3:21, 22.