Uunake muuyuni tamu ka kala kaamu na okatongo?

“ONDI na etegameno.” Oomvula 50 dha piti, mo 28 Auguste 1963, omuwiliki gwongundu yuuthemba womuntu moAmerika, Martin Luther King, Jr., okwa li a popi oohapu ndhoka moshipopiwa she sha tseyika nawa. King okwe endulula oohapu ndhoka oonkonekwedhi sho ta popi kombinga yetegameno lye kutya sikulimwe aantu onaya ka kale muuyuni kaamu na uukwamuhoko nenge okatongo. Nonando etegameno lye okwa li owala e li lombwele aapulakeni muAmerika, olya hokiwa kaantu yomiigwana oyindji.

Oomwedhi ndatu konima yoshipopiwa she, mo 20 Novomba 1963, iilongo yi vulithe 100 oya li ya taamba ko Etseyitho lya za kIilongo ya Hangana li na ko nasha nokuhulitha po omilandu adhihe dhuukwamuhoko. Ooveta dhilwe odha li dha taambwa ko muuyuni awuhe moomvula omilongo ndhoka dha ka landula ko. Oonkambadhala adhihe ndhoka otadhi ningitha omuntu i ipule kutya: Odhe eta po nduno elunduluko lyashike?

Mo 21 Maalitsa 2012, amushangandjayi gwIigwana ya Hangana, Ban Ki-moon, okwa ti: “Opu na omauvathano ogendji niilongitho oyindji nosho wo ompangela ya kwatela mo ashihe nkene tu na okuhulitha po uukwamuhoko, okatongo, uumbanda nokutonda aakwiilongo nosho wo iikala yilwe yokwaaidhidhimikilathana muuyuni awuhe. Ihe nonando ongaaka, uukwamuhoko otawu tsikile okumonitha aantu omamiliyona iihuna muuyuni awuhe.”

Nomiilongo moka tamu ningwa ehumokomeho lyontumba lyokukondjitha okatongo nosho wo oonkalo dhilwe dhi na ko nasha nako, mbela otaku vulu ngaa okutiwa kutya oonkambadhala ndhoka dha ningwa po odha hulitha po shili okatongo hoka ke li momitima dhaantu nenge odhe ka hulitha po owala kombanda? Yamwe otaya ti kutya odhe ka keelela owala, ihe itadhi vulu oku ka hulitha po. Omolwashike? Omolwaashoka oke li momadhiladhilo nomomaiyuvo gaantu.

Onkee ano, oonkambadhala kehe tadhi ningwa dhokuhulitha po okatongo kadhi na owala okuhulitha po iilonga yako, ihe okukwathela omuntu a lundulule etaloko lye shi na ko nasha naantu yomomihoko nenge yoongundu dhilwe. Mbela shika otashi vulu ngaa okuningwa? Ngele otashi vulika, oshi na okweendwa ngiini? Natu tale kiiholelwa mbyoka tayi ke tu kwathela tu mone kutya aantu otaya vulu oku ke etha po nosho wo kutya opu na sha shoka tashi vulu oku ya kwathela ye ke ethe po.

OMBIIMBELI OYE YA KWATHELA YE ETHE PO OKATONGO

Linda: Onda valelwa moSouth Africa. Onda li nda dhina Omusouth Africa kehe ngoka kee shi oshilumbu nonda li nde mu tala ko inaa longwa, kee shi ku inekelwa noku li owala omupika gwiilumbu. Onda li ndi na okatongo okawinayi nokanda li nokuli nde shi dhimbulula. Ihe sho nda tameke okukonakona Ombiimbeli, onda tameke oku ke etha po. Onda li ndi ilongo kutya “Kalunga aantu ayehe ohe ya tala ye thike pamwe.” (Iilonga 10:34, 35; Omayeletumbulo 17:3) Aafilippi 2:3 oya li ya kwathele ndje ndi mone kutya ngele ohandi tala ko kehe gumwe e vule ndje, otandi ka vula oku ka etha po. Okuvulika komakotampango gOmbiimbeli ngoka okwa kwathele ndje ndi kale ndi hole aantu yalwe kutya nduno oyolwaala luni. Ngashingeyi ondi uvite nda manguluka ko kokatongo.

Michael: Onda putukila moshitopolwa shaAustralia moka mu na aatiligane oyendji, nonda kala ndi tonde noonkondo Aayasia, unene tuu Aachiina. Uuna tandi hingi ohauto e tandi mono omuntu ta monika a fa Omuasia, ohandi kweyulula ekende e tandi mu igidha tandi ti: “Muasia ngweye! Shuna koshilongo sheni!” Konima yethimbo sho nda tameke okukonakona Ombiimbeli, onda mono kutya Kalunga hasho a tala ko aantu ngawo. Oku ya hole, kutya nduno oyapeni nenge oya fa peni. Ohole ye ndjoka oya ningitha ndje ndi kale ndi ya hole. Oshinyanyudha okuninga omalunduluko omanene ga tya ngaaka. Ngashingeyi ohandi nyanyukilwa noonkondo okweendathana naantu yokiilongo ayihe noyomomaputuko agehe. Shika osha kwathele ndje ndi kale ndi na etaloko li li nawa noshe etela ndje enyanyu.

Sandra: Meme okwa za koUmunede moDelta State, moNigeria. Ihe aakwawo yatate oya za koEdo State nohaya popi Oshiesan. Molwomayooloko ngaka, meme okwa kala ha ningwa okatongo kaakwawo yatate sigo okusa kwe. Onkee ano, onda li nda gana kutya itandi kala nando ndi na ekwatathano nomuntu ha popi Oshiesan nenge ndi hokanwe komuntu a za koEdo State. Ihe sho nda tameke okukonakona Ombiimbeli, onda tameke okukala ndi na etaloko lyi ili. Molwaashoka Ombiimbeli otayi ti kutya Kalunga ke na ontondo nonokutya okwa hokwa kehe gumwe ngoka he mu tila, osha kwathele ndje ndi kale ndi hole aantu yomomihoko noyomalaka agehe. Onda lundulula iikala yandje nonda kala ndi na ombili naapambele yatate. Okuvulika komakotampango gOmbiimbeli okwa kwathele ndje ndi kale nda nyanyukwa nondi kale ndi na ombili yopamadhiladhilo. Okwa kwathele ndje wo ndi kale handi tsu ndi thithe naantu yomomaputuko galwe, yomomihoko dhilwe, yomomalaka galwe nenge yomiigwana yilwe. Omusamane gwandje okwa za nokuli kuEdo State noha popi Oshiesan.

Mbela omolwashike Ombiimbeli ya vula okukwathela aantu mbaka nosho wo yalwe ye ethe po okatongo? Omolwaashoka oyo Oohapu dhaKalunga. Oyi na oonkondo okulundulula omadhiladhilo gomuntu nosho wo nkene a tala ko yalwe. Niishewe Ombiimbeli otayi ulike kutya oshike ishewe twa pumbwa okuninga tu ethe po thiluthilu okatongo.

UUKWANIILWA WAKALUNGA OTAWU KA HULITHA PO THILUTHILU OKATONGO

Nonando ontseyo yOmbiimbeli otayi vulu oku tu kwathela tu pangele notu ethe po omadhiladhilo omawinayi, opu na iinima yilwe iyali mbyoka tayi tu imbi tu ethe po okatongo thiluthilu. Shotango, uulunde nokwaagwanenena. Ombiimbeli otayi shi popi sha yela kutya ‘kaku na ngoka inaa yona.’ (1 Aakwaniilwa 8:46) Kutya nduno otatu kambadhala shi thike peni, otu na uunkundi meni lyetu ngaashi wa popiwa komuyapostoli Paulus sho a ti: “Nando ndi kale nda hala okulonga uuwanawa, uuwinayi auke he longo.” (Aaroma 7:21) Onkee ano, omathimbo nomathimbo omitima dhetu inaadhi gwanenena ohadhi tu dhiladhilitha “omadhiladhilo omawinayi” ngoka taga vulu oku tu ningitha tu kale tu na okatongo.—Markus 7:21.

Oshitiyali, enwethomo lyaSatana Ondiapoli. Ombiimbeli otayi mu hokolola kutya oye “omudhipagi” notayi ti kutya ota “pukitha uuyuni auhe.” (Johannes 8:44; Ehololo 12:9) Shika otashi holola kutya omolwashike okatongo ke li apuhe nomolwashike aantu ya nyengwa okuhulitha po okayoya, okatongo, edhipago lyuukwamuhoko nosho wo okwaaidhidhimikila aantu yomihoko dhilwe, yomalongelokalunga galwe noyoondondo dha yooloka ko kudhawo.

Onkee ano, opo okatongo ka hulithwe po thiluthilu, uulunde, okwaagwanenena nosho wo enwethomo lyaSatana Ondiapoli, oyi na tango okuhulithwa po. Ombiimbeli otayi popi kutya Uukwaniilwa waKalunga otawu ke shi ninga.

Jesus Kristus okwa li a longo aalongwa ye okugalikana ngeyi: “Oshilongo shoye nashi ye, Ehalo lyoye nali gwanithwe kombanda yevi wo ngaashi megulu.” (Mateus 6:10) Oshilongo shaKalunga nenge Uukwaniilwa waKalunga owo tawu ka hulitha po okwaanuuyuuki akuhe, mwa kwatelwa okwaaidhidhimikilathana nosho wo okatongo.

Uukwaniilwa waKalunga ngele we ya nokupangela kombanda yevi, Satana ota ka “mangwa” e ta kala iti inyenge “opo kaa vule we okupukitha aantu.” (Ehololo 20:2, 3) Notaku ka kala nduno ‘evi epe’ nenge aantu mboka ‘aayuuki.’a—2 Petrus 3:13.

Aantu mboka otaye ke ya megwaneneno ya mangululwa ko kuulunde. (Aaroma 8:21) Ye li aalelwa yUukwaniilwa waKalunga, ‘itaya ka longa uuwinayi nenge iikolokosha.’ Omolwashike? “Oshoka evi otali ka udha okutseya OMUWA.” (Jesaja 11:9) Pethimbo mpoka aantu ayehe otaye ki ilonga oondjila dhaJehova Kalunga notaya ka holela omaukwatya ge omawanawa. Shika otashi ka hulitha po okatongo nenge okayoya, “oshoka Kalunga oha ningile aantu ayehe shi thike pamwe.”—Aaroma 2:11.