Kala wa tonata ngaashi Jeremia
“[Ngame Jehova] otandi tonata ndi tale oohapu dhandje dhi tsakanithwe.”—JER. 1:12.
1, 2. Omolwashike okukala kwaJehova a “tonata” taku faathanithwa nomuti gwomumandeli?
GUMWE gwomomiti ndhoka hadhi sheneke tango ndhoka dhi li kiikulundundu yaLibanon naIsraeli, ogwo omumandeli. Oongala dhagwo oondjokahi nenge oontokele ohadhi vulu okumonika pehulilo lela lyaJanuali nenge petameko lyaFebuluali. Edhina lyagwo lyOshihebeli otali ti lelalela “tonata.”
2 Sho Jehova a langeke po Jeremia a ninge omupolofeti gwe, uukwatya mbuka womuti gwomumandeli owa li wa longithwa she eleka okuthaneka oshinima sholela sha simana. Petameko lyuukalele we, omupolofeti nguka okwa li u ulukilwa memoniko oshitayi shomuti ngoka. Shika osha li tashi ti shike? Jehova okwa li a yelitha a ti: “Otandi tonata ndi tale oohapu dhandje dhi tsakanithwe.” (Jer. 1:11, 12) Ngaashi naanaa omuti gwomumandeli hagu kala gwa “tonata” ethimbo lyongula, osho Jehova a kala ‘nokupenduka ongula onene’ a tume aapolofeti ye ya ka londodhe oshigwana she shi na ko nasha niilanduliko mbyoka hayi etithwa kokwaahavulika. (Jer. 7:25, NW) Ka li ta ka vululukwa, sha hala okutya, okwa li ta ka kala a “tonata” sigo oohapu dhe dhopahunganeko dha gwanithwa. Mo 607 K.E.N., peuthwathimbo lye, Jehova okwa li a pangula oshigwana shaJuda oshishuni monima.
3. Otatu vulu okukala nuushili washike kombinga yaJehova?
3 Sha faathana, nokunena Jehova okwa tonata nota gandja eitulomo kokugwanithwa kwehalo lye. Itashi vulika a kale inaa gwanitha oohapu dhe. Okukala kwaJehova a tonata okwe ku guma ngiini? Mbela owi itaala kutya momumvo nguka 2011 Jehova okwa kala a “tonata” shi na ko nasha nokugwanithwa kwomauvaneko ge? Ngele otwa limbililwa shi na ko nasha nomauvaneko gaJehova ngoka itaaga kala inaaga gwanithwa, ngashingeyi olyo ethimbo lyokupenduka moomposi dhopambepo. (Rom. 13:11) E li omupolofeti gwaJehova, Jeremia okwa li a kala a tonata. Ngele tatu konakona kutya omolwashike nongiini Jeremia a kala a tonata mokugwanitha po oshinakugwanithwa shoka a pewa kuKalunga, otashi ke tu kwathela tu mone nkene tatu vulu okutsikila niilonga mbyoka Jehova e tu pa.
Okwa li a pewa etumwalaka lye endelela
4. Omashongo geni Jeremia a li a taalela mokufaalela aantu etumwalaka lye, noshike sha li she li ningi lye endelela?
4 Otashi vulika Jeremia a li e li pokugwanitha oomvula 25 sho a lombwelwa kuJehova a kale omulangeli. (Jer. 1:1, 2) Ihe okwa li u uvite a fa okamatyona kowala, inaa gwana okupopya naakuluntu yomoshigwana, aasamane mboka aakuluntu kuye noye li poondondo dhokupangela. (Jer. 1:6) Okwa li uvithile aantu etumwalaka tali ya shadha nokwe ya tseyithile epangulo etilithi, unene tuu aapilisteli, aapolofeti yiifundja naapangeli nosho wo mboka taa “nduungile nepola” noye mu ‘pilamena.’ (Jer. 6:13; 8:5, 6) Otempeli ombwanawa yomukwaniilwa Salomo ndjoka ya li ya kala ondingandinga yelongelokalunga lyashili uule womathelemumvo gane lwaampono, oya li tayi ka hanagulwa po. Jerusalem naJuda oya li tayi ka mbugalekwa, naakalimo yamo oya li taya ka falwa muupongekwa. Dhoshili, etumwalaka ndyoka Jeremia a li a lombwelwa e li faalele aantu olya li lye endelela.
5, 6. (a) Jehova ota longitha ngiini ongundu yaJeremia kunena? (b) Ekonakono lyetu otali ka gandja eitulomo kushike?
5 Methimbo lyongashingeyi, Jehova okwa pa aantu pahole Aakriste aagwayekwa mboka taya longo pathaneko ye li omulangeli oku ya londodha kutya ota ka pangula uuyuni mbuka. Ongundu yaJeremia ndjika oya kala uule woomvula omilongo tayi londodha aantu ya gandje eitulomo kethimbo moka tu li. (Jer. 6:17) Ombiimbeli otayi tsu omuthindo kutya Jehova, Omudhiginini gwethimbo Omunene, ihe ende kashona. Esiku lye otali ke ya naanaa pethimbo nopotundi ndjoka aantu inaaya nongela.—Sef. 3:8; Mark. 13:33; 2 Pet. 3:9, 10.
6 Kaleka momadhiladhilo kutya Jehova okwa tonata note ke eta po uuyuni we uupe wuuyuuki pethimbo lye. Okukala tu shi kombinga yaashoka oku na okulondodha mboka yongundu yaJeremia nokukwathela ooyakwawo mboka yi iyapulila Kalunga nayo ya kale ya tonata noya tseye kutya etumwalaka lyawo olye endelela noonkondo. Shika oshe ku guma ngiini? Jesus oku ulike kutya ayehe oya pumbwa okupopila Uukwaniilwa waKalunga. Natu konakoneni omaukwatya gatatu ngoka ga li ga kwathele Jeremia a kale a tonata mokugwanitha po oshinakugwanithwa she naashika otashi ke tu kwathela tu ninge sha faathana.
Jeremia okwa li e hole aantu
7. Yelitha nkene ohole ya li yi inyengitha Jeremia u uvithe nonando opwa li oonkalo oondhigu.
7 Oshike sha li shi inyengitha Jeremia u uvithe nonando opwa li oonkalo oondhigu? Ohole yokuhola aantu. Jeremia okwa li a tseya kutya aasita yiifundja oyo ya li taye etitha uupyakadhi owundji mboka wa li wa taalela aantu. (Jer. 23:1, 2) Ontseyo ndjoka oya li ye mu kwathele a longe oshilonga she nohole nonolukeno. Okwa li a hala aantu ooyakwawo yu uve oohapu dhaKalunga noya kale nomwenyo. Okwa li e na ko nasha unene nayo nokwa li a lili omolwuudhigu uunene mboka wa li tawu ke ya adha. (Lesha Jeremia 8:21; 9:1.) Embo lyOontakumandjimbo otali ulike sha yela ohole yaJeremia onene nosho wo okukala kwe e na ko nasha nedhina lyaJehova noshigwana she. (Oontak. 4:6, 9) Kunena uuna wu wete aantu “ya hepekwa noya loloka ya fa oonzi dhaa na omusita,” mbela iho kala nando wa hala oku ya uvithila onkundana yehekeleko yUukwaniilwa waKalunga?—Mat. 9:36.
8. Oshike tashi ulike kutya Jeremia kakwa li a ninga omwenyo omwiinayi sho a li ta hepekwa?
8 Jeremia okwa li a hepekwa kaantu mboka a li a hala okukwathela, ihe nonando ongawo, ine ya shunithila uuwinayi nenge a ninge omwenyo omwiinayi. Okwa li e na eidhidhimiko nohenda, nokuli nonomukwaniilwa omukolokoshi Zedekija. Konima sho Zedekija e mu gandja a ka dhipagwe, Jeremia okwa li natango e mu indile a vulike kuJehova. (Jer. 38:4, 5, 19, 20) Mbela ohole yetu yokuhola aantu onene ngaashi yaJeremia?
Kalunga okwa li e mu tsu omukumo
9. Otu shi shi ngiini kutya uulaadhi mboka Jeremia a li e na okwa li e wu pewa kuJehova?
9 Sho Jehova a li a popi naye tango, Jeremia okwa li a tindi. Shika otashi tu ulukile kutya uulaadhi nokwaahatengauka hoka a li u ulike ina valwa nako. Oonkondo dha gwedhwa po ndhoka Jeremia a li e na pethimbo lyiilonga ye yuupolofeti okwa li e dhi pewa kuJehova molwaashoka okwa li i inekela thiluthilu muye. Dhoshili, Jehova okwa li e li pamwe nomupolofeti nguka nokwa li e li “omunankondo nomunamatha” kuye molwaashoka okwa li e mu ambidhidha nokwe mu pe oonkondo opo a gwanithe po oshinakugwanithwa she. (Jer. 20:11) Uulaadhi nuudhiginini waJeremia owa li wa faathana naamboka Jesus a li e na pethimbo lyuukalele we kombanda yevi, yamwe oya li taya dhiladhila kutya Jesus oJeremia a yumuka.—Mat. 16:13, 14.
10. Omolwashike taku vulu okutiwa kutya oshihupe shaagwayekwa oshi “vule iigwana niilongo”?
10 E li “omukwaniilwa gwiigwana,”Jehova okwa li a lombwele Jeremia a faalele iigwana niilongo etumwalaka lyepangulo. (Jer. 10:6, 7) Ihe omeityo lini oshihupe shaagwayekwa shi “vule iigwana niilongo”? (Jer. 1:10) Ngaashi omupolofeti gwonale, ongundu yaJeremia oya pewa oshinakugwanithwa kOmunamapangelo gweshito alihe. Aapiya yaKalunga aagwayekwa oya pewa uuthemba she eleka okutseyithila iigwana niilongo muuyuni auhe epangulo lyaKalunga. Molwaashoka oya pewa oonkondo kuKalunga Omukombandambanda notayi longitha elaka lya yela lyomOohapu dhe dha nwethwa mo, otayi uvitha kutya iigwana niilongo yokunena otayi ka hanagulwa po peuthwathimbo lyaKalunga nokaahogololwa ye. (Jer. 18:7-10; Eh. 11:18) Oya tokola toko okwaahe etha okulonga oshilonga shoka ya pewa kuKalunga shokutseyitha muuyuni auhe etumwalaka lyokupangulwa kuJehova.
11. Oshike tashi ke tu kwathela tu tsikile okuuvitha nopwaahe na okweetha nuuna twa taalela oonkalo oondhigu?
11 Okuteka omukumo omathimbo gamwe ngele wa taalelwa komapataneko, kokayoya nenge koonkalo oondhigu, kashi shi oshinima oshipe. (2 Kor. 1:8) Ihe ngaashi Jeremia, natu puleni komeho. Inatu teka omukumo. Kehe gumwe gwomutse na tsikile okugalikana kuKalunga, oku mu inekela nokukala tu na “omukumo” sho tatu kongo ekwatho kuye. (1 Tes. 2:2) Tu li aalongeli yaKalunga kashili, otu na okutsikila okukala twa tonata mokugwanitha po iinakugwanithwa yetu mbyoka twa pewa kuKalunga. Otwa pumbwa okukala twa tokola toko okutsikila okuuvitha nopwaahe na okweetha kombinga yehanagulo lyUukwakriste mboka wa li tawu thanekwa kuJerusalem shonale shoka sha li kaashi shi oshidhiginini. Ongundu yaJeremia itayi ku uvitha owala “kutya ethimbo olya thikana, uuna OMUWA ta hupitha aantu ye,” ihe otayi ku uvitha wo ‘esiku lyonkone yaKalunga ketu.’—Jes. 61:1, 2, yelekanitha KB; 2 Kor. 6:2.
Jeremia okwa li e na enyanyu lyokomutima
12. Omolwashike tatu vulu okuthika pehulithodhiladhilo kutya Jeremia okwa li ha kala a nyanyukwa, noshike sha li she mu kwathele oku shi ninga?
12 Jeremia okwa li ha nyanyukilwa iilonga ye yokuuvitha. Okwa li a lombwele Jehova a ti: “Owa lombwele ndje, nonda pulakene ohapu kehe. Ngame ogwoye, OMUWA Omunankondoawike, nomolwaashoka oohapu dhoye dhu udhitha omwenyo gwandje enyanyu nelago.” (Jer. 15:16) Osha li uuthembahenda kuJeremia okukala omukalelipo gwaKalunga kashili nokuuvitha oohapu dhe. Shihokitha osho kutya sho Jeremia a li a pulakene kaantu sho taye mu sheke, okwa li a kanitha enyanyu. Sho a li a dhiladhila kuuwanawa nesimano lyetumwalaka lyaKalunga, okwa ka kala ishewe a nyanyukwa.—Jer. 20:8, 9.
13. Omolwashike okwiipalutha nooshili dhomuule dhopambepo kwa simana opo tu kale twa nyanyukwa?
13 Opo tu kale twa nyanyukwa miilonga yokuuvitha pethimbo lyetu, otwa pumbwa okwiipalutha ‘niikulya ya kola,’ ooshili dhomuule dhOohapu dhaKalunga. (Heb. 5:14) Okukonakona iinima muule ohaku tungu eitaalo. (Kol. 2:6, 7) Ohaku tu kwathele tu uve ko nkene iilonga yetu hayi vulu okuguma omutima gwaJehova. Ngele otatu nyengwa okumona ethimbo lyokulesha nolyokukonakona Ombiimbeli, otu na okutalulula elandulathano lyetu. Nokuli nando okukonakona ominute omishona nokutedhatedha esiku kehe, otaku ke tu hedhitha popepi lela naJehova notaku ka humitha komeho ‘enyanyu nelago lyokomwenyo,’ ngaashi sha li sha ningilwa Jeremia.
14, 15. (a) Iiyimati yini Jeremia a li a mono molwaashoka a li a gwanitha po nuudhiginini oshinakugwanithwa she? (b) Oshigwana shaKalunga kunena oshi uvite ko shike shi na ko nasha niilonga yokuuvitha?
14 Jeremia okwa li a tseyitha etumwalaka lyaJehova lyomalondodho nolyepangulo kee na oluthuwo, ihe okwa li e na momadhiladhilo oshinakugwanithwa she ‘shokutunga nokutsika.’ (Jer. 1:10) Iilonga ye yokutunga noyokutsika oya li yi imike iiyimati. Aajuda yamwe nosho wo mboka kaaye shi Aaisraeli oya li ya hupu mehanagulo lyaJerusalem ndyoka lya li lya ningwa mo 607 K.E.N. Yamwe yomuyo mboka ya li ya hupu Aarekab, Ebed-melek naBaruk. (Jer. 35:19; 39:15-18; 43:5-7) Ookuume mbaka yaJeremia aadhiginini naatilikalunga otaya thaneke mboka ye na kunena etegameno lyoku ka kala kombanda yevi mboka ye li ookuume kongundu yaJeremia. Ongundu yaJeremia oya nyanyukwa noonkondo sho tayi tungu pambepo “engathithi lyaantu” ndika. (Eh. 7:9) Sha faathana, ooyakwawo yaagwayekwa mbaka aadhiginini ohaya mono enyanyu enene mokukwathela mboka ye na omitima dhu uka ya tseye oshili.
15 Oshigwana shaKalunga oshi uvite ko kutya okuuvitha onkundana ombwanawa kaku shi owala okuuvithila mboka taye yi pulakene, ihe oku li wo iilonga yokulongela Kalunga ketu. Kutya nduno otwa mona omuntu ngoka ta pulakene nenge hasho, okulongela Jehova iilonga iiyapuki okupitila mokuuvitha kwetu otaku tu etele enyanyu enene.—Eps. 71:23; lesha Aaroma 1:9.
Kala wa “tonata” mokugwanitha po oshinakugwanithwa shoye!
16, 17. Ehololo 17:10 nosho wo Habakuk 2:3 otu ulike ngiini kutya ethimbo lyetu olye endelela?
16 Uuna tatu konakona ehunganeko lya nwethwa mo ndyoka li li mEhololo 17:10, otatu mono kutya otali tsu omuthindo kutya ethimbo moka tu li olye endelela. Omukwaniilwa omutiheyali, sha hala okutya, epangelo enankondo lyuuyuni lyopaali lyaAnglo-Amerika, olya tameka okupangela. Otatu lesha shi na ko nasha nalyo taku ti: “Ngele [omupangeli omutiheyali] te ke ya, ota ka pangela owala okathimbo okafupi.” Ngashingeyi “okathimbo okafupi” hoka, oke li popepi nokuhula po. Omupolofeti Habakuk ote tu shilipaleke shi na ko nasha nehulilo lyuuyuni mbuka ta ti: “Ethimbo lyokutsakanithwa kwemoniko inali thikana manga. Ihe ethimbo otali ya mbala, . . . Ngele sha fa tashi dhikala, shi tegelela ashike; otashi ka ningwa.”—Hab. 2:3.
17 Ipula to ti: ‘Mbela onkalamwenyo yandje otayi ulike kutya ethimbo lyetu olye endelela? Mbela onkalamwenyo yandje otayi ulike kutya onda tegelela ehulilo li ye mbala? Nenge mbela omatokolo gandje niinima mbyoka nda pititha komeho otayi ulike kutya inandi tegelela ehulilo li ye ethimbo kehe nenge nokuli kutya kandi na uushili ngele otali ke ya?’
18, 19. Omolwashike ngashingeyi haalyo ethimbo lyokusa uunye?
18 Iilonga yongundu yomulangeli inayi pwa natango. (Lesha Jeremia 1:17-19.) Inatu nyanyukwa tuu sho oshihupe shaagwayekwa sha thikama itaashi tengauka, sha fa “ongudhi yosheela” nosho wo “oshilando sha kola”! Aagwayekwa mboka oyi ‘izaleka oshili yi ninge epaya moombunda dhawo,’ nokungawo oye etha Oohapu dhaKalunga dhi ya koleke sigo ya mana okulonga oshilonga shawo. (Ef. 6:14) Mboka yomongundu onene oya tokola toko okwaambidhidha nuudhiginini ongundu yaJeremia mokulonga oshilonga shawo shoka ya pewa kuKalunga, ngaashi aagwayekwa taye shi ningi.
19 Ngashingeyi halyo ethimbo lyokusa uunye miilonga yokuuvitha Uukwaniilwa, ihe olyo ethimbo lyokukonakona shoka sha nyolwa muJeremia 12:5. (Lesha.) Atuheni otwa taalelwa komamakelo ngoka taga pula eidhidhimiko. Omamakelo ngoka geitaalo otaga vulu okuyelekanithwa “naantu” mboka tu na okuthigathana nayo mokumatuka. Nonando ongaaka, sho “uudhigu uunene” tawu hedha popepi, otwa tegelela omaupyakadhi gi indjipale. (Mat. 24:21) Okuungaunga nomaupyakadhi ogendji ngoka ge li komeho, otaku vulu okufaathanithwa nokumatuka ‘methigathano nuukambe.’ Otashi ka pula omuntu eidhidhimiko olindji opo a matuke pamwe nuukambe tawu yanda omalondo. Onkee ano, osha simana noonkondo opo tu idhidhimikile omamakelo ngoka ge tu taalela ngashingeyi, ngoka tashi vulika tage tu ningi tu kale twi ilongekidhila ngoka ge li komeho.
20. Owa tokola toko okuninga shike?
20 Atuheni otatu vulu okuholela Jeremia nokugwanitha po oshinakugwanithwa shetu shokuuvitha nomupondo. Omaukwatya ngaashi ohole, uulaadhi nenyanyu oga li gi inyengitha Jeremia a longe nuudhiginini muukalele uule woomvula 67. Okusheneka onsheno oombwanawa kwomuti gwomumandeli otaku tu dhimbulukitha kutya Jehova ota ka kala a “tonata” shi na ko nasha noohapu dhe opo dhi gwanithwe. Ano otu na omatompelo omawanawa lela okuninga sha faathana. Jeremia okwa kala a “tonata,” natse otatu vulu oku shi ninga.
Oto dhimbulukwa?
• Ohole oya li ya kwathele ngiini Jeremia a kale a “tonata” mokugwanitha po oshinakugwanithwa she?
• Omolwashike twa pumbwa okupewa uulaadhi kuKalunga?
• Oshike sha li sha kwathele Jeremia a kale a nyanyukwa?
• Omolwashike wa hala okukala wa “tonata”?
[Omathano pepandja 31]
Mbela oto ka tsikila okuuvitha nonando opu na omapataneko?