“One ookuume kandje”

“One ookuume kandje, ngele tamu ningi shoka tandi mú lombwele.”—JOH. 15:14.

1, 2. (a) Ookuume kaJesus oya li ye na omaithano ga yoolokathana geni? (b) Omolwashike sha simanenena tu kale ookuume kaJesus?

JESUS okwa li a kuutumba mondjugo yopombanda pamwe naalumentu mboka ya li ye na omaithano ga yoolokathana. Petrus nomumwayina Andreas oya li aayuli yoohi. Mateus okwa li omufendelithi, iilonga mbyoka ya li yi tondike kAajuda. Yamwe yomuyo, ngaashi Jakob naJohannes otashi vulika ya li ye shi Jesus okuza kuunona we. Yalwe yomuyo, ngaashi Natanael, otashi vulika opo owala ye mu tseya. (Joh. 1:43-50) Ihe ayehe mboka ya li muJerusalem ongulohi ndjoka yOpaasa ya simana, oya li ya tompwa kutya Jesus, Omwana gwaKalunga omunamwenyo noye Mesiasa ngoka u uvanekwa. (Joh. 6:68, 69) Osha li shi inyengitha shili omwenyo dhawo moku mu uva ta ti: “Ngame otandi mú ithana ookuume kandje, oshoka iinima ayihe mbyoka nde yi uva kuTate, onde yi mú lombwela.”—Joh. 15:15.

² Oohapu ndhoka Jesus a li a lombwele aayapostoli ye aadhiginini otadhi longo wo nokunena kAakriste ayehe aagwayekwa nokaayendi pamwe nayo, ‘oonzi dhilwe.’ (Joh. 10:16) Kashi na mbudhi kutya otwa li tu na eithano lini, otatu vulu okukala ookuume kaJesus. Uukuume wetu naye owa simanenena, molwaashoka ngele otu li ookuume ke, nena otu li wo ookuume kaJehova. Osha yela kutya itatu vulu okuhedha popepi naJehova ngele inatu hedha tango popepi naKristus. (Lesha Johannes 14:6, 21.) Oshike nduno tu na okuninga opo tu ninge notu kale ookuume kaJesus? Manga inatu kundathana epulo ndyoka lya simana, natu konakoneni oshiholelwa shaJesus shokukala kuume omwaanawa, nokutala kutya otatu ilongo mo shike momukalo moka aalongwa ye ya li yi inyenge omolwuukuume we.

Oshiholelwa shaJesus shokukala kuume omwaanawa

3. Jesus okwa li a tseyika ha panga uukuume noolye?

³ Omukwaniilwa omunandunge Salomo okwa nyola a ti kutya “ookuume kaayamba oyendji.” (Omayel. 14:20) Oohapu ndhoka otadhi ulike iikala yaantu inaaya gwanenena kutya ohaya panga uukuume opo ya pewe sha, pehala lyokugandja sha. Jesus ka li e na iikala iiwinayi ya tya ngaaka. Ina panga uukuume naantu molwaashoka ye li aayamba nenge omolwoondondo dhawo. Eeno, Jesus okwa li e hole shili omulumentu omugundjuka ngoka a li omuyamba nokwe mu hiya a ninge omulanduli gwe. Ihe Jesus okwe mu lombwele a landithe po iinima ye ayihe, iimaliwa e te yi pe oohepele. (Mark. 10:17-22; Luk. 18:18, 23) Jesus okwa li a tseyika ha panga uukuume naantu mboka oohepele noya dhinika, ihe hanaayamba naamboka ya simana.—Mat. 11:19.

4. Ookuume kaJesus oya li ya ningi omapuko geni?

⁴ Ookuume kaJesus oya li haya ningi omapuko. Oshikando shimwe, Petrus okwa li a ndopa okutala ko iinima ngaashi Kalunga he yi tala ko. (Mat. 16:21-23) Jakob naJohannes oya li taya lalakanene esimano sho ya pula Jesus e ya pe omahala ga tumbala mUukwaniilwa we. Oshinima shoka osha li sha geyitha aayapostoli ooyakwawo noya li wo haya kala nokutsa oompata kutya olye omunene. Ihe Jesus okwa li ha pukulula ookuume ke mboka nombili noka li ha kala e ya geela.—Mat. 20:20-28.

5, 6. (a) Omolwashike Jesus a tsikile uukuume noyendji yomaayapostoli ye? (b) Omolwashike Jesus a li a hulitha po uukuume we naJudas?

⁵ Jesus okwa kala kuume kaayapostoli ye mboka inaaya gwanenena, ihe itashi ti kutya ka li kee wete omapuko gawo. Pehala lyaashono, okwa li a hokwa iikala yawo nomaukwatya omawanawa ngoka ye na. Pashiholelwa, Petrus, Jakob naJohannes oya li ya kotha, pehala lyokukwathela Jesus pethimbo ndyoka edhigu a li mulyo. Nonando Jesus okwa li e ya yematela, okwa li a mono kutya oye na iikala yu uka, e ta ti: “Ombepo yomuntu oya hala, ihe onyama onkundi.”—Joh. 13:21-35.

⁶ Mepingathano naashoka, Jesus okwa li a hulitha po uukuume pokati ke naJudas Iskariot. Jesus okwa li e shi dhimbulula kutya omutima gwaJudas ogwa nwethwa mo komahalo omawinayi, nonando okwa li ti iningitha a fa kuume ke. Molwaashoka Judas okwa ningi kuume kuuyuni, okwi iningi ye mwene omutondi gwaKalunga. (Jak. 4:4) Onkee ano, Jesus okwa li a laleke Judas a ye sho a lombwele aayapostoli ye 11 aadhiginini kutya oye li ookuume ke.—Mat. 26:20-25.

7, 8. Ongiini Jesus a li u ulukile ookuume ke ohole?

⁷ Jesus ka li ha gandja unene eitulomo komapuko gookuume ke aadhiginini, ihe okwa li e ya ningile uuwanawa. Okwa li a galikana He e ya gamene uuna ye li muudhigu. (Lesha Johannes 17:11.) Jesus okwa li he ya yalele omolwomangambeko gawo. (Mark. 6:30-32) Ka li owala ha kala a hokwa okulombwela aalongwa ye shoka ta dhiladhila, ihe okwa li wo a hala okuuva nkene yu uvite naashoka taya dhiladhila.—Mat. 16:13-16; 17:24-26.

⁸ Jesus okwa longitha onkalamwenyo ye omolwuuwanawa wookuume ke noku ya sila. Okwa li a tseya kutya oku na okugandja omwenyo gwe opo a gwanithe po oshitegelelwa shuuyuuki waHe. (Mat. 26:27, 28; Heb. 9:22, 28) Ihe Jesus oku ulike ohole ye mokugandja omwenyo gwe. Okwa ti: “Ohole onenenene omuntu ta vulu okukala e yi na yokuhola ookuume ke, oyo okugandja omwenyo gwe omolwawo.”—Joh. 15:13.

Aalongwa oyi inyenge ngiini sho Jesus a panga uukuume nayo?

9, 10. Aantu oya li yi inyenge ngiini kokugandja kwaJesus nehalo ewanawa?

⁹ Jesus okwa li a longitha ethimbo lye, ohole ye niiniwe ye nehalo ewanawa. Osha ningitha aantu ya kale ya manguluka okuya kuye noku mu kwathela nenyanyu. (Luk. 8:1-3) Shi ikwatelela koshimoniwa she shoka, Jesus okwa ti: “Gandjeni, Kalunga ote mú pe oshiyelekitho shoka tashi holola iilonga yeni iiwanawa, shu udha, sha thindwa, sha huwa, tashi tika e tashi tulwa mekolo lyeni. Oshoka oshiyelekitho shoka tamu shi yelekitha yakweni, osho Kalunga te ke mú yelekitha.”—Luk. 6:38.

¹⁰ Opu na yamwe mboka ya li haya landula Jesus omolwuuwanawa mboka he ya ningile. Ookuume mboka yiifundja oya shuna monima sho ya li kaye uvite ko nawa oohapu dhe. Pehala lyokukala yi inekela Jesus nonando kayu uvite ko, oya thiki pehulithodhiladhilo lya puka e taye etha oku mu landula. Ihe aayapostoli ye oya li aadhiginini. Uukuume wawo naKristus owa li hawu makelwa, ihe oya li ya ningi ngaashi taya vulu oku mu ambidhidha pomathimbo omawanawa nomawinayi. (Lesha Johannes 6:26, 56, 60, 66-68.) Muusiku we wahugunina sho a li omuntu kombanda yevi, Jesus oku ulike kutya oku hole ookuume ke sho a ti: “One mwa kala pamwe nangame momamakelo gandje agehe.”—Luk. 22:28.

11, 12. Jesus okwa shilipalekele shike aayapostoli ye, noya li yi inyenge ngiini?

¹¹ Konima owala sho Jesus a pandula aayapostoli ye omolwuudhiginini wawo, oye mu thigi po. Oya li ya pitike uumbanda wokutila aantu wu tone ohole yawo yoku mu hola. Ihe Jesus okwe ya dhimine po. Okwa li e yi ihololele konima sho a yumuka noku ya shilipaleka kutya oku li natango kuume kawo. Okwa li wo e yi inekelele oshilonga oshiyapuki shokuninga “aantu ayehe aalongwa” nokuninga oonzapo dhe “sigo omiilongo ayihe yokombanda yevi.” (Mat. 28:19; Iil. 1:8) Aayapostoli oya li yi inyenge ngiini?

¹² Aayapostoli oya li ya ningi ngaashi taya vulu okuuvitha onkundana yUukwaniilwa. Kekwatho lyombepo ondjapuki oya li yu udhitha Jerusalem ashihe nelongo lyawo. (Iil. 5:27-29) Kaya li ya mbandapala sho ya tilithwa kutya otaya dhipagwa ngele otaya vulika koshipango shaJesus shokuninga aantu aalongwa. Konima owala yomimvo omishona sho ya pewa elombwelo ndyoka kuJesus, omuyapostoli Paulus okwa nyola a ti kutya onkundana ombwanawa oyu uvithilwa “aantu ayehe yomuuyuni.” (Kol. 1:23) Aayapostoli yaJesus oya li yu ulike shili kutya oya pandula uukuume mboka wu li pokati ke nayo.

13. Aalongwa yaJesus oya li ya pitike elongo lye li ya nwethe mo momikalo dhini?

¹³ Mboka ya ningi aalongwa ye oya li wo ye etha elongo lye li nwethe mo onkalamwenyo yawo. Shika osha li tashi pula ya ninge omalunduluko omanene meihumbato lyawo nomonkalamwenyo yawo. Aalongwa aape yamwe oya li omashenge, aahondeli, oonkolwi naafuthi. (1 Kor. 6:9-11) Yamwe oya li ye na okulundulula iikala yawo shi na ko nasha naantu yomihoko dhilwe. (Iil. 10:25-28) Ihe oya li ya vulika kuJesus. Oya li yi ihula omuntu omukulu, e taya zala omuntu omupe. (Ef. 4:20-24) Oya li yi ilongo “omadhiladhilo gaKristus,” etaloko lye nokuholela okudhiladhila kwe nonkene ha katuka.—1 Kor. 2:16.

Uukuume wetu naKristus kunena

14. Jesus oku uvaneka ta ka ninga shike pethimbo ‘lyehulilo lyuuyuni’?

¹⁴ Aakriste yomethelemumvo lyotango oya li ye shi Jesus nenge ye mu mona konima yeyumuko lye. Tse inatu mona ompito ndjoka. Ihe ongiini tatu vulu okukala ookuume kaKristus? Omukalo gumwe omokuvulika komalombwelo ngoka hatu pewa kongundu yomupiya omudhiginini nomunandunge, ndjoka ya thikama po maamwahe aagwayekwa nombepo yaJesus mboka ye na natango omwenyo kombanda yevi. Jesus oku uvaneke kutya pethimbo ‘lyehulilo lyuuyuni,’ ota ka langeka po omupiya ngoka ‘a tonatele iinima ye ayihe.’ (Mat. 24:3, 45-47) Kunena, aantu oyendji mboka ya hala okuninga ookuume kaKristus kaye shi iilyo yongundu yomupiya. Okuvulika komalombwelo gongundu yomupiya omudhiginini otashi nwetha mo ngiini uukuume wawo naKristus?

15. Oshike tashi ulike kutya omuntu onzi nenge oshikombo?

¹⁵ Lesha Mateus 25:31- 40. Jesus okwi ithana iilyo yongundu yomupiya omudhiginini aamwahe. Meyele lye kombinga yokuyoolola oonzi miikombo, Jesus okwe shi popi sha yela kutya ngele otatu ningi nayi aamwahe ye, nena oye tatu ningi nayi. Okwa ti kutya omuntu oku na okuungaunga nawa ‘naamwahe aashuushuka ye’ opo u ulike kutya ye onzi nokee shi oshikombo. Onkee ano, okwaambidhidha aamwahe yaKristus oku li omukalo okuulika kutya mboka ye na etegameno okukala kombanda yevi oya lenga uukuume wawo naye.

16, 17. Ongiini tatu vulu okuulika kutya otu li ookuume yaamwahe yaKristus?

¹⁶ Ngele owu na etegameno lyokukala nomwenyo kombanda yevi kohi yUukwaniilwa waKalunga, ongiini to vulu okuulukila aamwahe yaKristus ohole? Natu taleni omikalo ndatu. Gwotango, okukutha ombinga miilonga yokuuvitha nomutima aguhe. Kristus okwa lombwele aamwahe yu uvithe onkundana ombwanawa muuyuni auhe. (Mat. 24:14) Ihe otashi ka kala oshidhigu koshihupe shaamwahe yaKristus okuuvithila aantu kombanda yevi alihe ngele itaya kwathelwa koonzi dhilwe. Ethimbo kehe iilyo yoonzi dhilwe tayi uvitha, otayi kwathele lela aamwahe yaKristus okugwanitha po oshilonga shoka oshiyapuki. Kristus nongundu yomupiya omudhiginini nomunandunge ohaya pandula unene ngele tatu shi ningi.

¹⁷ Omukalo omutiyali ngoka oonzi dhilwe tadhi vulu okukwathela aamwahe yaKristus ogwo okwaambidhidha pashimaliwa iilonga yokuuvitha. Jesus okwa ladhipike aalanduli ye yi ikongele ookuume “neliko lyomuuyuni mbuka.” (Luk. 16:9) Shika inashi hala kutya otu na okulanda uukuume naJesus nenge naJehova. Pehala lyaashono, otu na okulongitha iiniwe yetu yopamaliko tu humithe komeho iilonga yUukwaniilwa, shoka tashi ulike uukuume nohole ‘yashili ndjoka tayi iholola miilonga,’ ihe hamokupopya owala. (1 Joh. 3:16-18) Ohatu ambidhidha pashimaliwa ongundu ndjoka uuna tu li miilonga yokuuvitha, ngele tatu ambidhidha iilonga yokutunga nokwoopaleka nawa omahala getu moka hatu gongalele nosho wo ngele tatu ambidhidha iilonga yokuuvitha muuyuni auhe. Jehova naJesus ohaya pandula omayambidhidho ngoka tatu gandja, kutya nduno omashona nenge ogendji.—2 Kor. 9:7.

18. Omolwashike tu na okuvulika komayele gOmbiimbeli ngoka tatu pewa kaakuluntugongalo?

¹⁸ Omukalo omutitatu ngoka atuhe tatu ulike kutya otu li ookuume yaKristus ogwo okutaamba ko ewiliko ndyoka tatu pewa kaakuluntugongalo. Aalumentu mbaka oya hogololwa kombepo ondjapuki kohi yewiliko lyaKristus. (Ef. 5:23) Omuyapostoli Paulus okwa nyola a ti: “Vulikeni kaawiliki yeni, [ne] mu landule omalombwelo gawo.” (Heb. 13:17) Omathimbo gamwe otashi vulika shi kale oshidhigu okuvulika komayele gOmbiimbeli ngoka tatu pewa kaakuluntugongalo. Otashi vulika tu shi uunkundi wawo notashi vulu oku tu ningitha tu dhine omayele gawo. Ihe Kristus, Omutse gwegongalo okwa hokwa okulongitha aalumentu mboka inaaya gwanenena. Onkee ano, omukalo moka hatu inyenge komalombwelo gawo ogwa guma uukuume wetu naKristus. Ngele ihatu konenene omapuko gawo nokulandula ewiliko lyawo nenyanyu, otatu ku ulika kutya otu hole Kristus.

Openi tatu vulu okwaadha ookuume aawanawa?

19, 20. Uukuume wa tya ngiini tatu vulu okupanga megongalo, nomoshitopolwa tashi landula otatu ka kundathana shike?

¹⁹ Jesus ihe tu sile owala oshimpwiyu okupitila maasita aanahole, ihe okwe tu pa wo oomeme naamwatate nosho wo aamwameme yopambepo megongalo. (Lesha Markus 10:29, 30.) Aakwanezimo yoye oya li yi inyenge ngiini sho wa tameke okweendathana nOonzapo dhaJehova? Otashi vulika ya li taye ku ambidhidha sho to kambadhala wu hedhe popepi naKalunga nosho wo naKristus. Ihe Jesus okwa londodha kutya ethimbo limwe “aanegumbo yomuntu ngoka otaa ningi aatondi ye.” (Mat. 10:36) Itashi talaleke tuu okutseya kutya megongalo omu na ookuume yashili ye vule aamwameme yopanyama!—Omayel. 18:24.

²⁰ Paulus okwa li a panga uukuume wopothingo naantu oyendji, naashika oshi iwetikile momakundo ngoka e ya tumine pehulilo lyombapila ndjoka a nyolele egongalo lyomuRoma. (Rom. 16:8-16) Omuyapostoli Johannes okwa hulitha ontumwafo noohapu tadhi ti: “Kundila po ookuume ketu ayehe.” (3 Joh. 15) Osha yela kutya naye okwa li e na ookuume oyendji. Ongiini tatu vulu okuholela Jesus naalongwa ye yopetameko mokupanga uukuume wa kola naamwatate naamwameme yopambepo noku wu kaleka po? Oshitopolwa tashi landula otashi ka yamukula epulo ndika.

Oto yamukula ngiini?

• Oshiholelwa shini Jesus e tu tulila po shokupanga uukuume?

• Aayapostoli oyi inyenge ngiini sho Jesus a panga uukuume nayo?

• Ongiini tatu vulu okuulika kutya otu li ookuume kaKristus?

[Ethano pepandja 21]

Jesus okwa li a hokwa okuuva omadhiladhilo gookuume ke nankene yu uvite

[Omathano pepandja 23]

Ongiini tatu vulu okuulika kutya otu na ehalo lyokukala ookuume kaKristus?