Iileshomwa moka mwa za omayamukulo gomapulo ngoka ge li mokafo Onkalamwenyo yopaKriste niilonga yetu yokuuvitha
4-10 FEBULUALI
OMALIKO OKUZA MOOHAPU DHAKALUNGA | AAROMA 1–3
“Tsikila okudheula eiyuvo lyoye”
(Aaroma 2:14, 15) Aapagani kaye na ompango, ihe uuna taa gwanitha shoka tashi pulwa kompango pandunge dhawo, nena oyo ompango kuyo yene, nando kaye na ompango. 15 Nena omikalo dhawo otadhi holola kutya shoka tashi pulwa kompango, osha nyolelwa momitima dhawo. Omaiyuvo gawo otaga koleke wo oshili ndjika, oshoka omadhiladhilo tage ya tamaneke nenge tage ya popile.
lv ep.16, okat. 6
Ongiini to vulu okukala wu na eiyuvo ewanawa?
6 Mbela omagano gokukala neiyuvo oge niwe owala kaapiya yaJehova? Tala koohapu dha nwethwa mo dhomuyapostoli Paulus tadhi ti: “Aapagani kaye na ompango, ihe uuna taa gwanitha shoka tashi pulwa kompango pandunge dhawo, nena oyo ompango kuyo yene, nando kaye na ompango. Nena omikalo dhawo otadhi holola kutya shoka tashi pulwa kompango, osha nyolelwa momitima dhawo. Omaiyuvo gawo otaga koleke wo oshili ndjika, oshoka omadhiladhilo tage ya tamaneke nenge tage ya popile.” (Rom. 2:14, 15) Nokuli naamboka kaaye shi nandonando oompango dhaJehova, poompito dhimwe ohayi inyengithwa komaiyuvo gawo, opo ya katuke metsokumwe nomakotampango gopakalunga.
(Aaroma 2:15) Nena omikalo dhawo otadhi holola kutya shoka tashi pulwa kompango, osha nyolelwa momitima dhawo. Omaiyuvo gawo otaga koleke wo oshili ndjika, oshoka omadhiladhilo tage ya tamaneke nenge tage ya popile.
Ongiini to vulu okukala wu na eiyuvo ewanawa?
8 Ongiini to vulu okuninga etokolo lya kankamena keiyuvo lyoye? Aantu yamwe ohaya konakona owala omadhiladhilo nomaiyuvo gawo gomeni e taya tokola kutya oshike taya ka ninga. Opo nduno konima yaashoka otashi vulika ya tye: “Eiyuvo lyandje itaIi nyenyetele ndje mwaashika.” Omahalo gokomutima otashi vulika ga kale ge na oonkondo e taga nwetha mo nokuli eiyuvo lyomuntu. Ombiimbeli otayi ti: “Omwenyo ogwo omunamakoto kombanda yiinima ayihe, nokagu shi kwaaludhwa. Olye ta vulu oku gu uva ko?” (Jer. 17:9) Onkee ano omahalo gokomitima dhetu hago ge na okukala oshinima sha simana tashi tu inyengitha tu ninge omatokolo. Pehala lyaashono, otwa hala okukala hatu tala tango shoka sha hokiwa kuJehova Kalunga.
9 Ngele etokolo lyetu olya kankamena shili keiyuvo lya dheulwa, otashi ku ulika kutya ohatu tila Kalunga, ihe inatu tokola owala ngaashi twa hala. Tala oshiholelwa shimwe tashi opalele. Omupangeli Nehemia omudhiginini okwa li e na uuthemba okufutitha aantu yomuJerusalem oofuto dhontumba nosho wo iifendela. Ihe nando ongaaka ka li e shi ningi. Omolwashike mbela? Omolwaashoka okwa li e tonde unene okukala inaa hokiwa kuJehova molwokuthininika oshigwana She. Okwa ti: ‘Ngame onda longo shi ili lela, oshoka onda tila Kalunga.’ (Neh. 5:15) Osha simanenena okukala tu na etilokalunga lyashili, sha hala okutya, okutila tashi zi komutima okuyemateka Tate yetu gwomegulu. Etilokalunga lya tya ngaaka otali ke tu inyengitha tu konge ewiliko mOohapu dhe ngele tatu ningi omatokolo.
Konga omaliko mOmbiimbeli
(Aaroma 3:4) Itashi vulika! Kalunga oye omunashili, nonando omuntu kehe oye omufundja. Ngaashi enyolo tali ti: “Ngele to popi, aluhe ou li mondjila. Ngele to tamanekwa, ongoye to sindana.”
Omanenedhiladhilo okuza montumwafo ya nyolelwa Aaroma
3:4. Uuna aantu taya popi shoka tashi kondjithathana naashoka shi li mOohapu dhaKalunga otatu ulike kutya “Kalunga oye omunashili” mokwiinekela etumwalaka lye ndyoka li li mOmbiimbeli nokukatuka metsokumwe nehalo lye. Otatu vulu okukwathela yalwe ya tseye kutya Kalunga oye omunashili ngele tatu kutha ombinga nuulaadhi miilonga yokuuvitha Uukwaniilwa noyokuninga aantu aalongwa.
(Aaroma 3:24, 25) Ihe molwomagano gesilohenda lye Kalunga ote ya ningi aayuuki, oshoka Jesus Kristus okwe ya kulila. 25 Kalunga okwa gandja Jesus, opo mokusa kwe a ninge iikulila, moka aantu mboka ye mu itaala, taa dhiminwa po oondjo dhawo. Kalunga okwe mu gandja, opo a ulike, nkene ta ningi aantu aayuuki koshipala she. Nale Kalunga okwa li i idhidhimikile nokwe etha oondjo dhaantu, inee ya geela omolwadho.
Omanenedhiladhilo okuza montumwafo ya nyolelwa Aaroma
3:24, 25 — Ongiini ‘ekulilo lyaJesus Kristus’ tali vulu okudhima po ‘oondjo ndhoka’ dhonale komeho manga inaali ningwa? Ehunganeko lyotango ndyoka lya nyolwa muGenesis 3:15 olya li lya gwanithwa momumvo 33 E.N., sho Jesus a dhipagelwa komuti gwomahepeko. (Gal. 3:13, 16) Sho Jehova a popi ehunganeko ndyoka, okwa li e wete ekulilo lya fa lya gandjwa nale molwaashoka kapu na shoka tashi vulu okwiimba Kalunga a gwanithe po elalakano lye. Onkee ano Jehova ota vulu okudhima po oondjo dholuvalo lwaAdam ngele olwi itaala meuvaneko lyeyambo lyaJesus Kristus ndyoka lya li inaali ningwa natango. Omolwekulilo oshi li wo tashi vulika opo aantu mboka ya sa omanga Uukriste inaawu tameka ya ka yumudhwe. — Iil. 24:15.
Elesho lyOmbiimbeli
(Aaroma 1:1-17) Ontumwafo ndjika oya zi kuPaulus, omumati gwaJesus Kristus, a hogololwa nokwi ithanwa kuKalunga, a ninge omuyapostoli okuuvitha elaka lye etoye. 2 Elaka ndyoka etoye Kalunga okwe li uvanekitha nale aahunganeki ye mOmanyolo omayapuki. 3 Olyo tali popi Omwana, Omuwa gwetu Jesus Kristus, ngoka pankalo yopantu a zi moluvalo lwaDavid. 4 Ihe pankalo yopaKalunga mokuyumudhwa kwe kuusi okwa hololwa oye Omuna gwaKalunga, ngoka e na oonkondo. 5 OmolwaKristus ngame onda pewa kuKalunga oshilonga shuuyapostoli kesilohenda, aantu yomiigwana ayihe opo ya vulike kuye noye mu itaale. 6 Nena nane mboka mu li muRoma Kalunga okwe mu ithana, mu ninge aantu yaJesus Kristus. 7 Onkee tandi mu nyolele, ne amuhe mu li muRoma kutya Kalunga oku mu hole, sho e mu ithana, mu ninge aantu ye mwene. Silweni ohenda, ne mu kale mu na ombili yaKalunga Tate noyOmuwa Jesus Kristus. 8 Tango otandi hambelele Kalunga kandje omolwaJesus Kristus, ngele tandi mu dhiladhila one amuhe, oshoka eitaalo lyeni otali hokololwa akuhe muuyuni auhe. 9 Kalunga oye e shi shi kutya ote popi oshili. Oye ngoka handi mu longele nomwenyo gwandje aguhe omokuuvitha elaka etoye tali popi Omwana. 10 Ohandi mu dhimbulukwa aluhe momagalikano gandje nohandi indile wo Kalunga, ngele e shi hala, ndi mone ompito mokathimbo haka kahugunina okuya kune. 11 Onda hala noonkondo oku mu talela po, opo ndi gandje sha kune kombinga yomagano gopambepo. 12 Osho ngaaka otatu vulu okutsaathana omukumo kombinga yeitaalo lyetweni atuhe. 13 Inandi hala oku shi mu holeka, aamwameme, kutya olwindji onda li nda hala okuya kune, ihe sigo oompaka onda mono omaimbo. Onda li nda hala okulikola aayitedhululi mokati keni ongaashi nomiigwana yilwe. 14 Oshoka ondi na ongunga kaantu ayehe, kwaamboka ya huma komeho naamboka inaaya huma komeho, kwaamboka ya longwa naamboka inaaya longwa. 15 Onda hala oku mu uvithila wo elaka etoye, mboka mu li muRoma. 16 Ano ngame inandi sa evaangeli ohoni, oshoka olyo oonkondo dhaKalunga tadhi hupitha ayehe mboka yi itaala. Tango Aajuda nosho wo Aagreka. 17 Oshoka evaangeli otali holola, nkene Kalunga ta ningi aantu aayuuki koshipala she. Shika otashi ningwa keitaalo alike okuza ketameko sigo opehulilo. Ongaashi kwa nyolwa: “Omuntu ngoka a ningi omuyuuki koshipala shaKalunga, ota kala e na omwenyo molweitaalo.”
11-17 FEBULUALI
OMALIKO OKUZA MOOHAPU DHAKALUNGA | AAROMA 4–6
“Kalunga okwe tu hololele kutya oku tu hole”
(Aaroma 5:8) Ihe Kalunga okwe tu hololele kutya oku tu hole, Kristus sho a si peha lyetu, manga twa li aalunde.
(Aaroma 5:12) Uulunde owe etwa muuyuni komuntu gumwe, nuulunde we owe etelele eso. Onkee ano eso olya taandele maantu ayehe, oshoka ayehe oya yono — .
Kalunga okwe tu hololele kutya oku tu hole
5 Paulus okwa li a popi paufupi kombinga yoshinima shika, sho a tameke noohapu ndhika tadhi ti: “Uulunde owe etwa muuyuni komuntu gumwe, nuulunde we owe etelele eso. Onkee ano eso olya taandele maantu ayehe, oshoka ayehe oya yono.” (Rom. 5:12) Otatu vulu okuuva ko oshinima shika molwaashoka Kalunga okwe tu pa uuyelele wu na ko nasha nankene onkalamwenyo yaantu ya tameka. Jehova okwa li a shiti aantu yaali, Adam naEva. Aantu yotango, sha hala okutya, ookukulululwa nayo oya li ya gwanenena ngaashi Omushiti gwawo. Kalunga okwa li owala e ya ngambeka kaaya ninge oshinima shimwe nokwa li e ya lombwele kutya ngele inaya vulika kompango ndjoka otashi ke ya etela eso. (Gen. 2:17) Ihe oya li ya katuka kaashi li pandunge, inaaya vulika kelombwelo lyaKalunga ndyoka li li pandjele, nokungawo oya li ye mu ekelehi e li Omugandjimpango nosho wo Omupangeliawike. — Deut. 32:4, 5.
(Aaroma 5:13, 14) Uulunde omo wa li muuyuni, manga ompango inaayi gandjwa; ihe manga kaakwa li ompango, uulunde owa li inaau yalulwa. 14 Ihe okuza kethimbo lyaAdam sigo okethimbo lyaMoses eso olya pangele maantu ayehe naamboka inaaya yona ngaashi Adam, ngoka a li inaa vulika koshipango shaKalunga Adam okwa li oshiholelwa shaanguka te ke ya.
Kalunga okwe tu hololele kutya oku tu hole
6 Adam okwa li owala a kala e na aanona konima sho a yona nale nokwa taandeleke uulunde niilanduliko yawo maantu ayehe. Dhoshili, kaya li ya yono oshipango shaKalunga ngaashi Adam a li a ningi, onkee kaya li ya geelwa omolweyono lya fa lyaAdam; yo inaya pewa wo omulandu gwompango ndjoka ya li ya pewa Adam. (Gen. 2:17) Nonando ongawo, oluvalo lwaAdam olwa thigulula uulunde. Kungawo uulunde neso oya pangele sigo okethimbo sho Kalunga a li a pe Aaisraeli omulandu gwoompango ndhoka dha li dhu ulike thiluthilu kutya oyo aalunde. (Lesha Aaroma 5:13, 14.) Iilanduliko yuuthigululwalunde otayi vulu okuyelekanithwa nomikithi dhontumba ndhoka tashi vulika tu thigulule kaavali yetu. Nokuli nonando aanona yamwe muukwanegumbo otashi vulika ya thigulule omukithi kaavali yawo, haayehe hashi vulika ye gu thigulule. Ihe shoka hasho shi li ngaaka shi na ko nasha nuulunde. Atuheni otwa thigulula uulunde kuAdam nomolwaashoka atuheni otu na okusa. Mbela onkalo ndjoka ondhigu oyi na ngaa esiku yi ka kandulwe po?
(Aaroma 5:18) Ano ngashika okuyona kwagumwe kwe etele aantu ayehe epangulo, osho tuu wo oshilonga shimwe shuuyuuki otashi mangulula aantu ayehe e taa pewa omwenyo.
(Aaroma 5:21) Oshoka ngashika uulunde wa pangele mokweeta eso, osho tuu wo esilohenda lyaKalunga otali pangele li na uuyuuki, li tu fale momwenyo gwaaluhe omolwaJesus Kristus, Omuwa gwetu.
Kalunga okwe tu hololele kutya oku tu hole
9 Omautumbulilo gOshigreka “okumangululula omuntu” nosho wo ‘okumangulula aantu ayehe e taa pewa omwenyo’ otaga gandja eityo lyashike? Omutoloki gumwe gwOmbiimbeli okwa nyola kombinga yomautumbulilo ngoka a ti: “Omufethelamo ngoka otagu ulike kiinima yopaveta. Otagu ulike kokulundulula kwaKalunga etaloko lye shi na ko nasha nomuntu, ihe itagu ulike kokulundulula kwomuntu iikala ye yomomutima . . . Omufethelamo otagu thaneke Kalunga e li omupanguli ngoka a tokola kutya ngoka ta tamanekwa ke na ondjo, oku shi popya pathaneko. Onkee ano, Kalunga okwa mangulula omutamanekwa ngoka.”
10 ‘Omupanguli gwuuyuni auhe’ omuyuuki okwa li a tokola kutya omuntu omulunde ke na ondjo yasha pakankameno lyashike? (Gen. 18:25) Mokukatuka kwe onkatu ya simanenena, Kalunga okwa li a tumu pahole Omwana awike kombanda yevi. Jesus okwa li a longo ehalo lyaHe thiluthilu, kakele kokumakelwa, kokuhepekwa nosho wo okumonithwa iihuna. Okwa li a kakatele uudhiginini we nokuli sigo omokusa komuti gwomahepeko. (Heb. 2:10) Mokuyamba po omwenyo gwe gwopantu gwa gwanenena, Jesus okwa li a gandja ekulilo ndyoka lya li tali vulu okukulila oluvalo lwaAdam muulunde neso. — Mat. 20:28; Rom. 5:6-8.
Konga omaliko mOmbiimbeli
(Aaroma 6:3-5) One omu shi shi nawa kutya uuna ndoka twa shashwa, otwa yi muukumwe naJesus Kristus notwa yi wo muukumwe naye meso. 4 Mokushashwa; kwetu otwa si notwa fumvikwa pamwe naye. Ihe ngaashi Kristus a yumudhwa kuusi koonkondo dheadhimo lyaHe, osho natse wo otatu vulu okweenda mokukalamwenyo okupe. 5 Oshoka ngele twa faathana naye mokusa kwa fa kwe, osho wo otatu ka faathana naye mokuyumudhwa kuusi ngaashi ye.
Omanenedhiladhilo okuza montumwafo ya nyolelwa Aaroma
6:3-5 (OB-1954) — Okuninginithwa “muukumwe naJesus Kristus” nosho wo ‘muukumwe neso lye’ otaku ti shike? Ngele Jehova a gwayeke aalanduli yaKristus nombepo ondjapuki, otaya kala ya hangana naJesus noya ninga iilyo yegongalo lyaagwayekwa ndyoka li li olutu lwaKristus ngoka e li omutse gwalyo. (1 Kor. 12:12, 13, 27; Kol. 1:18) Okuninginithwa muKristus Jesus osho tashi ti ngaaka. Aakriste aagwayekwa oya ‘ninginithwa muKristus nomeso lye,’ molwaashoka onkalamwenyo yawo oyi li metsokumwe neyambo lye nokaye na we etegameno lyasha lyokukala nomwenyo gwaaluhe kombanda yevi. Onkee ano, eso lyawo olyopayambo ngaashi owala lyaJesus, nonando lyawo kali na ongushu yasha yekulilo. Okuninginithwa kwawo meso lyaKristus ohaku hulu ngele ya si sho taya yumudhilwa omwenyo gwomegulu.
(Aaroma 6:7) Oshoka omuntu ngele okwa sa, nena okwa mangululwa moonkondo dhuulunde.
Ootatekulululwa mboka ya sa oye na etegameno lini?
Uuna aawinayi ya yumudhwa, mbela otaya ka pangulwa shi ikolelela komapuko ngoka ya ninga nale? Hasho nando. Aaroma 6:7 otaya ti: “Omuntu ngele okwa sa, nena okwa mangululwa moonkondo dhuulunde.” Aawinayi otaya ka kala ya futila po oondjo dhawo ngele ya si. Onkee ano, otaya ka pangulwa shi ikolelela kwaashoka taya ka ninga ngele ya yumuka, ihe hakwaashoka ya ninga sho kaaya li ye na owino yasha manga inaaya sa. Ongiini taya ka mona uuwanawa?
Elesho lyOmbiimbeli
(Aaroma 4:1-15) Otatu ti ngiini ano kombinga yatatekulu Abraham pazimo? Oye okwa mono shike? 2 Ngele Abraham okwa ningi omuyuuki koshipala shaKalunga molwaashoka e shi ningi, nena ota vulu oku shi itangela, ihe hakoshipala shaKalunga. 3 Oshoka enyolo otali ti: “Abraham okwi itaale Kalunga, nomolweitaalo ndika Kalunga okwe mu tala ihe omuyuuki.” 4 Omuntu ngoka ta longo, oha futwa, nondjambi ye itayi talwa kutya oshinima sha gandjwa omagano, aawe, otayi talwa oshinima e shi ilongele ye mwene. 5 Omuntu ngoka iti ilongele sha, ihe okwi itaala Kalunga, ngoka ta taamba omulunde a kale kee na oondjo, ota talwa omuyuuki koshipala shaKalunga omolweitaalo lye. 6 Shika osho naanaa shoka David e shi popi, sho a ti kutya omulumentu omunelago oye ngoka Kalunga te mu tala omuyuuki pwaa na iilonga: 7 “Aanelago aantu mboka Kalunga e ya dhimina po omayono gawo, oomboka oondjo dhawo dha siikilwa. 8 Omuntu omunelago oye ngoka Omuwa itaa yalula we oondjo dhe.” 9 Ano elago ndino tali popiwa kuDavid olyaamboka ya fukalekwa ayeke? Aawe, olyaamboka wo inaa fukalekwa. Oshoka otwa ti: “Abraham okwi itaale Kalunga, nomolweitaalo ndika Kalunga okwe mu tala ihe omuyuuki.” 10 Shika osha ningwa uunake? Ndishi omanga Abraham a li inaa fukalekwa. 11 Tango okwi itaale, opo ihe okwa fukalekwa, nokufukalekwa kwe okwa ningi ihe endhindhiliko tali koleke kutya Kalunga okwa tala Abraham omuyuuki koshipala she, sho i itaala. Ngashingeyi Abraham oye he yopambepo yaayehe mboka yi itaala Kalunga noya taambwa aayuuki koshipala she, nonando inaa fukalekwa. 12 Oye wo he yaamboka ya fukalekwa, hamolwaasho owala ya fukalekwa, ihe omolwaasho ye li meitaalo ndyoka tate Abraham a li e li na, manga inaa fukalekwa. 13 Kalunga oku uvanekele Abraham, uuyuni u ninge we nowoluvalo lwe. Euvaneko ndika inali ningwa ando molwaasho Abraham a gwanitha ompango, ihe omolwaasho i itaala, naKalunga okwe mu tala omuyuuki. 14 Oshoka ngele omauvaneko gaKalunga otaga pewa mboka taa gwanitha ompango, nena eitaalo lyomuntu itali kwatha sha nomauvaneko gaKalunga kage na oshilonga. 15 Ano ompango otayi etelele ondjahi yaKalunga; ihe hoka kwaa na ompango, kaku na wo eyono lyompango.
18-24 FEBULUALI
OMALIKO OKUZA MOOHAPU DHAKALUNGA | AAROMA 7–8
“Mbela owa ‘tegelela nondjuulukwe onene’?”
(Aaroma 8:19) Kehe shoka shomeshito otashi tegelele nondjuulukwe onene eholoko lyaana yaKalunga.
Natu etheni tu longwe emanguluko lyashili kuJehova
17 Paulus okwa nyola kombinga yemanguluko ndyoka Jehova ta ka pa aapiya ye yokombanda yevi a ti: “Kehe shoka shomeshito otashi tegelele nondjuulukwe onene eholoko lyaana yaKalunga.” Okwa gwedhwa ko a ti: “Oku na esiku ndyoka, uuna eshito alihe tali ka manguluka muupika weyonuuko, li ye memanguluko nomeadhimo lyaana yaKalunga.” (Rom. 8:19-21) Oshitya “eshito” movelise ndjika otashi thaneke aantu mboka ye na etegameno lyoku ka kala nomwenyo kombanda yevi. Otaya ka mona uuwanawa ‘peholoko lyaana yaKalunga,’ sha hala okutya, aagwayekwa. Eholoko “lyaana yaKalunga” ohali tameke uuna taya yumudhilwa omwenyo gwomegulu, opo ya ka kwathele Kristus sho te ya okukomba uuwinayi auhe kombanda yevi nokuhupitha “engathithi lyaantu,” nenge ongundu onene yi ye muuyuni uupe. — Eh. 7:9, 14.
(Aaroma 8:20) Oshoka kehe shimwe shomeshito osha gandjwa monkalo yaa na ekwatho, hakehalo lyasho shene, ihe oKalunga e shi utha. Ihe nando ongaaka, okwa kala etegameno.
Otatu nyanyukilwa etegameno ndyoka tu na
11 Jehova okwa li a pe aantu ‘etegameno’ sho a li u uvaneke kutya ote ke ya hupitha ‘keyoka,’ ano tu tye kuSatana Ondiaboli okupitila ‘moluvalo’ lu uvanekwa. (Eh. 12:9; Gen. 3:15) Jesus Kristus oye oshitopolwa shotango ‘sholuvalo’ ndoka. (Gal. 3:16) Eso neyumuko lyaJesus olya pe aantu ekankameno lya kola lyokukala ye na etegameno lyokumangululwa muulunde nomeso. “Eholoko lyaana yaKalunga” olya pambathana lela negwanithopo lyetegameno ndika. Aagwayekwa mboka ye na esimano enene oye li oshitopolwa oshitiyali ‘sholuvalo.’ Otaya ka ‘hololwa’ pamwe naKristus sho taya ka hanagula po onkalelo ya kolokosha yuuyuni waSatana. (Eh. 2:26, 27) Shika otashi ka tya ehupitho koonzi dhilwe ndhoka tadhi ka hupa po puudhigu uunene. — Eh. 7:9, 10, 14.
(Aaroma 8:21) kutya oku na esiku ndyoka, uuna eshito alihe tali ka manguluka muupika weyonuuko, li ye memanguluko nomeadhimo lyaana yaKalunga.
Otatu nyanyukilwa etegameno ndyoka tu na
12 ‘Eshito’ nenge tu tye aantu, otaya ka mona epepelelo pethimbo lyElelo lyOomvula Eyuvi lyaKristus. Pethimbo ndyoka ‘aana yaKalunga’ otaya ka “hololwa” ishewe sho taya ka longa pamwe naKristus ye li aasaaseri ye etele aantu omauwanawa ngoka ga ningwa taga wapa okupitila mekuliloyambo lyaJesus. ‘Eshito,’ nenge tu tye aantu mboka ye li aapangelwa yUukwaniilwa womegulu, otaya ka tameka okumona epepelelo kiilanduliko yuulunde neso. Kashona nakashona aantu aavuliki otaya ka ‘mangululwa muupika weyonuko.’ Ngele oya kala aadhiginini kuJehova muule woomvula adhihe eyuvi nopethimbo lyokumakelwa kwahugunina hoka taku ka ningwa pehulilo lyoomvula ndhoka, omadhina gawo otaga ka nyolwa ‘membo lyaanamwenyo’ sigo aluhe. Otaya ka ya “memanguluko nomeadhimo lyaana yaKalunga.” (Eh. 20:7, 8, 11, 12) Kali shi tuu etegameno lya dhenga mbanda!
Konga omaliko mOmbiimbeli
(Aaroma 8:6) Okukala pamadhiladhilo guuntu otashi eta eso, ihe okukala mewiliko lyOmbepo otashi eta omwenyo nombili.
Oto dhimbulukwa?
Eyooloko lini li li pokati ‘kokukala pamadhiladhilo guuntu nokukala mewiliko lyombepo’? (Rom. 8:6)
Ngoka ha kala pamadhiladhilo guuntu, oha pangelwa komahalo gopantu noha landula uuhalu we wuulunde. Olundji oha popi noha humitha komeho omadhiladhilo gopantu. Omuntu ngoka ha kala mewiliko lyombepo, onkalamwenyo ye nomadhiladhilo ge ohayi kala yi ikolelela kiinima yopakalunga; oha wilikwa kombepo ondjapuki. Ngoka ha kala pamadhiladhilo guuntu, otashi ti eso, omanga ngoka ha kala mewiliko lyombepo, tashi ti omwenyo nombili. — w16.12 ep. 15-17.
(Aaroma 8:26, 27) Osho wo Ombepo ote tu kwatha muunkundi wetu. Oshoka katu shi nkene tu na okwiindila, ihe Ombepo oye mwene te tu galikanene nomifudho kaadhi shi kutumbulwa. 27 Ihe Kalunga ngoka ha mono muule womitima dhaantu, oku shi omadhiladhilo gOmbepo. Oshoka Ombepo sho ta galikanene aantu koshipala shaKalunga, ote shi ningi wo pahalo lyaKalunga.
Omagalikano goye otaga holola shike kombinga yoye?
20 Omathimbo gamwe otashi vulika tu kale kaatu shi shoka tu na okutya momagalikano getu gopaumwene. Paulus okwa nyola a ti: “Katu shi nkene tu na okwiindila, ihe Ombepo oye mwene te tu galikanene nomifudho kaadhi shi kutumbulwa. Ihe Kalunga ngoka ha mono muule womitima dhaantu, oku shi omadhiladhilo gOmbepo.” (Rom. 8:26, 27) Jehova okwa nyolitha omagalikano ogendji mOmbiimbeli. Omaindilo ngoka okwa li e ga taamba ko ongo ga za kutse nokungeyi okwa li e ga yamukula. Kalunga oku tu shi nokwa tseya iinima mbyoka ombepo ye ya popya okupitila maanyoli yOmbiimbeli. Jehova oha yamukula omagalikano getu uuna ombepo tayi tu “galikanene.” Ihe sho tatu ilongo nawa Oohapu dhe, otatu ka kala tu shi kombinga yaashoka tu na okugalikana.
Elesho lyOmbiimbeli
(Aaroma 7:13-25) Ano shoka oshiwanawa oshe etele ndje eso? Aawe, itashi vulika! Eso olye etwa kuulunde. Uulunde owa longitha shoka oshiwanawa nowe etele ndje eso, opo u holoke puuyelele kutya owo uulunde. Ano mokulongitha oshipango uulunde owa holola kutya owo uulundelela. 14 Otse otu shi shi kutya ompango oyopambepo, ihe ngame omuntu tandi ka sa, nda landithwa po ndi kale omupika guulunde. 15 Kandi shi shi shoka tandi shi longo, oshoka ihandi longo shoka nda hala oku shi longa, ihe ohandi longo shoka ndi tonde. 16 Ngele ano ohandi longo shoka inaandi shi hala, nena otandi zimine kutya ompango oyi li mondjila. 17 Ano hangame we handi longo ngeyi, ihe uulunde mbuka wa kala mungame. 18 Oshoka ondi shi shi kutya mungame, nokutya muuntu wandje kamu na nando uuwanawa washa. Oshoka nonando mungame omu na ehalo okulonga uuwanawa, itandi shi vulu. 19 Uuwanawa mboka nda hala oku u ninga, ihandi u longo, ihe uuwinayi mboka inaandi u hala, owo he longo. 20 Ngele ohe longo shoka inaandi shi hala, nena otashi ti kutya hangame we handi shi longo, ihe uulunde mbuka wa kala mungame. 21 Onkee ano mokukala kwandje ondi wete ompango ndjika kutya nando ndi kale nda hala okulonga uuwanawa, uuwinayi auke he longo. 22 Meni lyandje onda hokwa ompango yaKalunga. 23 Ihe ondi wete ompango onkwawo yi li molutu lwandje tayi kondjitha ndjoka ya ziminwa komadhiladhilo gandje. Oyo oya kwata ndje, ndi kale omupika gwompango yuulunde yi li molutu lwandje. 24 Ongame omuntu omukweyi! Olye ta mangulula ndje molutu nduka talu etele ndje eso? 25 Kalunga na hambelelwe omolwaJesus Kristus, Omuwa gwetu! Onkee ano ngame mwene ohandi longo owala pampango yaKalunga nomadhiladhilo gandje, ihe nuuntu wandje ohandi longo pampango yuulunde.
25 FEBULUALI–3 MAALITSA
OMALIKO OKUZA MOOHAPU DHAKALUNGA | AAROMA 9–11
“Omuti gwolumono gwopathaneko”
(Aaroma 11:16) Ngele okapambu kotango koshikwiila taka pewa Kalunga, nena oshikwiila ashihe oshe wo. Omidhi dhomuti ngele odha pewa Kalunga, nena iitayi oye wo.
‘Ano uuwindji wuunongo waKalunga ou thike peni!’
13 Omuyapostoli Paulus okwa tsikile ta yelekanitha mboka taya ningi oshitopolwa sholuvalo lwaAbraham niitayi yolumono lwopathaneko. (Rom. 11:21) Olumono nduka lwa helelwa otalu thaneke okugwanithwa kwelalakano lyaKalunga shi na ko nasha nehangano ndyoka a ninga naAbraham. Omidhi dhalwo omiyapuki notadhi thaneke Jehova ngoka oye ha gandja omwenyo kuIsraeli shopambepo. (Jes. 10:20; Rom. 11:16) Ekota lyagwo otali thaneke Jesus e li oshitopolwa sha simanenena sholuvalo lwaAbraham. Iitayi yagwo otayi thaneke “omwaalu gwa gwana” gwaamboka ya kwatelwa moshitopolwa oshitiyali sholuvalo ndoka.
(Aaroma 11:17) Iitayi yimwe yolumono ndoka lwa helelwa, oya teywa ko, e taku tsikwa ihe oshitayi sholumono lwomiihwa. Ne aapagani omwa fa naanaa olumono ndoka lwomiihwa, ihe ngashingeyi otamu yamu mekota lyolumono lwa helelwa iikulya iitoye.
(Aaroma 11:20, 21) Shika oshoshili. Oyo oya teywa ko, oshoka inaa itaala, manga ngoye owa tulwa peha lyawo, oshoka owi itaala. Ihe ino shi inenepekela, shila kala wa tila. 21 Oshoka Kalunga ngele ina hupitha Aajuda mboka iitayi yopanshitwe, nangoye wo ite ku hupitha.
‘Ano uuwindji wuunongo waKalunga ou thike peni!’
15 Ano Jehova okwa li a ningi po shike opo a gwanithe elalakano lye? Paulus okwa yelitha kutya iitayi yolumono lwomiihwa oya li ya tsikwa kolumono lwa helelwa, opo yi pingene po mbyoka ya tewa ko. (Lesha Aaroma 11:17, 18.) Kungawo, Aakriste aagwayekwa yomiigwana, ngaashi yamwe mboka ya li megongalo lyaRoma, oya li ya tsikwa pathaneko kolumono nduka lwopathaneko. Komukalo nguka oya li ya ningi oshitopolwa sholuvalo lwaAbraham. Petameko, oya li ya fa iitayi yolumono lwomiihwa, kaya li ye na ompito yasha yokukala oshitopolwa shehangano ndika lyi ikalekelwa. Ihe Jehova okwa li e ya egululile ompito, opo ya ninge Aajuda yopambepo. — Rom. 2:28, 29.
(Aaroma 11:25, 26) Aamwameme, opo mwaa kale tamu landula oondunge dheni yene, onda hala oku mu tseyithila oshiholekwa shika kutya kombinga yimwe Aaisraeli oya adhika keikukutiko tali kala sigo omwaalu gwa gwana gwaapagani gwe ya kuKalunga. 26 Ano Aaisraeli ayehe otaa ka hupithwa, ngaashi enyolo tali ti: “Omuhupithi ota zi muSion, oye ota kombo mo okudhina Kalunga moluvalo lwaJakob.
‘Ano uuwindji wuunongo waKalunga ou thike peni!’
19 Eeno, elalakano lyaJehova li na ko nasha ‘naIsrael yaKalunga’ oli li tali gwanithwa momukalo omukumithi. (Gal. 6:16, KB) Ngaashi sha popiwa kuPaulus, “Aaisraeli ayehe otaa ka hupithwa.” (Rom. 11:26) Peuthwathimbo lyaJehova, “Aaisraeli ayehe,” sha hala okutya, Aaisraeli yopambepo ayehe yi ihwa po, otaya ka kala aakwaniilwa naasaaseri megulu. Kapu na sha tashi vulu okwiimba elalakano lyaJehova li gwanithwe.
Konga omaliko mOmbiimbeli
(Aaroma 9:21-23) Oshoka omuhongi gwiiyuma kehe oku na oonkondo dhokuutha eloya, e li ninge ngaashi a hala, ye a honge meloya tuu ndyoka oshuma shimwe shi na ondilo noshikwawo shombiliha. 22 Ano Kalunga osho a ningi ngaaka. Oye okwa li a hala okuholola ondjahi ye nokuulika oonkondo dhe, ihe okwi idhidhimike nokwa sile olukeno olunene aantu mboka ye na okugeelwa noya tegelela okuyonwa po. 23 Oye okwa li wo a hala okuholola uuwindji weadhimo lye, ndyoka e li zaleke tse mboka e tu sile ohenda nokwe tu longekidha oku li taamba.
Pitika egeeloputudho lyaJehova li ku zule
5 Ongiini ngele aantu oya tindi okuzulwa kOmuhongi gwiiyuma Omunene molwaashoka ye na omanganga? Ongiini nduno ha longitha oonkondopangelo dhe e li Kalunga? Dhiladhila kwaashoka hashi ningilwa eloya ngele olya kala itaali vulu okuhongwa oshiyuma shoka sha halika. Omuhongi gwiiyuma ota vulu okuhonga oshiyuma shimwe shi ili ta longitha eloya ndyoka nenge e li ekelehi owala. Pakukala, uuna eloya kaali na we oshilonga, omuhongi gwiiyuma oye ha kala e na epuko. Shika hasho nando shi li ngaaka nOmuhongi gwetu. (Deut. 32:4) Uuna omuntu iti iyetha a zulwe kuJehova, epuko ohali kala aluhe lyomuntu ngoka. Jehova oha longitha oonkondopangelo dhe e li omuhongi gwiiyuma mokulundulula omukalo gwe gwokuungaunga naantu shi ikolelela kunkene tayi inyenge kokuzulwa kuye. Mboka hayi iyetha ya zulwe kuye ohaya kala ye na oshilonga. Pashiholelwa, Aakriste aagwayekwa oye li ‘iiyuma yesilohenda’ mbyoka ya hongwa yi ‘ninge iiyuma yi na ondilo.’ Mepingathano naashono, mboka haya tsu ondumbo naKalunga ohaya ka ninga ‘iiyuma yondjahi, mbyoka yo opala okuyonwa po.’ — Rom. 9:19-23, yelekanitha OB-1954.
(Aaroma 10:2) Ngame mwene otandi vulu oku ya hokolola kutya oye na ehwamo lyokulongela Kalunga, nonando kaye na uunongo oku shi ninga lela.
it-1-E ep. 1260, okat. 2
Efupa, Ondumbo
Uulaadhi wa puka. Omuntu ota vulu okukala e na uulaadhi wokuninga oshinima shontumba, ihe ota vulu wo okukala a puka e ta kala inaa hokiwa we kuKalunga. Shoka osha li sha ningilwa Aajuda oyendji yomethelemumvo lyotango. Oya li ya kongo uuyuuki okupitila miilonga yawo mbyoka haya longo shi ikolelela kOmpango yaMoses. Ihe Paulus okwa li a ulike kutya uulaadhi wawo owa puka, molwaashoka kaya li ye na ontseyo yashili. Onkee ano, kaya li aayuuki koshipala shaKalunga. Oya li ye na okumona omapuko gawo nokugalukila kuKalunga okupitila muKristus, opo ya kale aayuuki noya manguluke ko kOmpango. (Rom 10:1-10) Saulus gwokuTarsus ngoka a li e na uulaadhi wa pitilila meitaalo lyOshijuda, okwa li ha ‘tidhagana egongalo lyaKalunga kee na ohenda nokwa li a ningi ashihe shoka ta vulu oku li hanagula po.’ Okwa li ‘kee na okantongo kasha’ kombinga yokudhiginina Ompango. (Gal 1:13, 14; Fil 3:6) Ihe okukala kwe ependa meitaalo lyopaShijuda okwa li kwa puka. Ihe nonando ongaaka, okwa li e na omutima omuwanawa, naashoka osho sha li shi inyengitha Kalunga e mu sile ohenda okupitila muKristus sho e mu tala ko kutya ota vulu oku mu longela. — 1Tim 1:12, 13.
Elesho lyOmbiimbeli
(Aaroma 10:1-15) Aamwameme, ondi na ehalo momwenyo gwandje, Aaisraeli ya hupithwe, onkee ohandi ya galikanene. 2 Ngame mwene otandi vulu oku ya hokolola kutya oye na ehwamo lyokulongela Kalunga, nonando kaye na uunongo oku shi ninga lela. 3 Oshoka inaa tseya nkene Kalunga ta ningi aantu aayuuki koshipala she. Oyo otaa kambadhala okutota ondjila yawo yene yo inaa gama kondjila ndjoka yaKalunga yokuninga aantu aayuuki. 4 Oshoka ompango oya hulu, sho Kristus e ya, opo kehe ngoka ti itaale, a ninge omuyuuki koshipala shaKalunga. 5 Moses ota nyola kombinga yomuntu ngoka ta ningi omuyuuki koshipala shaKalunga mokugwanitha ompango ta ti: “Omuntu ngoka ta gwanitha shoka tashi pulwa kompango, ota kala e na omwenyo molwayo.” 6 Ihe shoka tashi popiwa kombinga yomuntu ta ningi omuyuuki koshipala shaKalunga molweitaalo, osho shika: “Ino ilombwela mwene, u tye: Olye ta londo, a ye megulu?” nokutya e ke ete Kristus. 7 “Ino tya wo: Olye ta kulukile muule mwiya?” nokutya e ke ete ko Kristus kuusi. 8 Shika otashi ti: “Oohapu dhaKalunga odhi li popepi nangoye, mokana koye nomomwenyo gwoye.” Odho oohapu ndhoka tatu dhi uvitha notadhi pula eitaalo. 9 Ngele to hempulula nokana kutya Jesus oye Omuwa, nowi itaala momwenyo gwoye kutya Kalunga okwe mu yumudha kuusi, nena oto hupithwa. 10 Oshoka ngoka i itaala nomwenyo gwe aguhe, ota ningi omuyuuki koshipala shaKalunga, naangoka ta hempulula nokana ke, ota hupithwa. 11 Oshoka enyolo otali ti: “Kehe ngoka te mu itaale, ita sithwa ohoni.” 12 Mpaka kapu na eyooloko pokati kAajuda naapagani. Kalunga oye Omuwa gwaayehe noha gandja ayihe yomuuyamba we kwaayehe mboka taye mu ithana. 13 Ngaashi enyolo tali ti: “Kehe ngoka ti ithana edhina lyOmuwa, ota hupithwa.” 14 Ihe otaye mu ithana ngiini, ngele inaye mu itaala? Notaa itaale ngiini, ngele inaa uvithilwa? 15 Noohapu otadhi uvithwa ngiini, ngele aayuvithi inaa tumwa ko? Ngaashi enyolo tali ti: “Osho opala ngiini, aantu mboka taye ya okuuvitha elaka etoye!”