Aamwatate aagundjuka, mbela otamu lalakanene ngaa omauthembahenda megongalo?
1. Uunake omumwatate omugundjuka e na okutameka okutula miilonga omayele ngoka ge li muTimoteus gwotango 3:1?
1 “Omulumentu ngoka [ta lalakanene oshilonga shokutonatela, NW] oye okwa hala oshilonga oshiwanawa.” (1 Tim. 3:1) Oohapu ndhoka dha nwethwa mo otadhi ladhipike aamwatate ya lalakanene omalalakano omawanawa ya kale ya gwana okupewa omauthembahenda megongalo. Mbela owu na okukala omukuluntu, opo wu lalakanene omalalakano ngoka? Oshi li nawa wu lalakanene omauthembahenda manga wu li omugundjuka natango. Kungeyi, oto ka vula okumona edheulo nokuulika kutya owa gwana okulangekwa po wu li omuyakuligongalo, nonando owu li omugundjuka lela. (1 Tim. 3:10) Ongiini to vulu okulalakanena omalalakano omawanawa ngele owu li omumwatate omugundjuka a ninginithwa?
2. Ongiini tatu vulu okukokeka ombepo yokwiiyamba noku yi ulika?
2 Eiyambo mwene: Dhimbulukwa kutya oto lalakanene oshilonga shokutonatela, ihe haandondo yasha. Onkee ano, kokeka ehalo lyokukwathela aamwatate naamwameme. Omukalo gumwe oku shi ninga ogwo okutedhatedha koshiholelwa oshiwanawa shaJesus. (Mat. 20:28; Joh. 4:6, 7; 13:4, 5) Pula Jehova e ku kwathele wu kale wu na ohokwe naantu. (1 Kor. 10:24) Mbela oho kwathele ngaa aakokele naamboka taye ehama megongalo? Mbela oho iyamba ngaa wu heye po omwiidhi ngoka gu li pOshinyanga shUukwaniilwa? Oho kutha ngaa ombinga miilonga yokwoopaleka Oshinyanga shUukwaniilwa nenge miilonga yoku shi kaleka monkalo ombwanawa? Mbela oto vulu okwiiyamba wu ninge ko koshipopiwa shoka haangoye wa li wu na oku shi gandja mOsikola yOkudheula Aauvithi? Oto ka mona kutya ngele oho iyamba wu kwathele yalwe otashi ke ku etela enyanyu. — Iil. 20:35.
3. Uupambepo owa simana shi thike peni, nongiini tatu vulu oku wu kokeka?
3 Uupambepo: Osha simanenena opo omumwatate gwoshinakugwanithwa megongalo a kale e na uupambepo wa kola, pehala lyokukala e na iipewa nenge uunongo wopaunshitwe. Omumwatate ngoka a kola pambepo oha tala ko iinima ngaashi Jehova naJesus. (1 Kor. 2:15, 16) Ohu ulike ‘iiyimati yombepo.’ (Gal. 5:22, 23) Omuuladhi ngele tashi ya pokuuvitha evaangeli, ye oha pititha iinima yUukwaniilwa komeho. (Mat. 6:33) Oto vulu okukokeka uukwatya wopambepo mokukala ho konakona paumwene pandjigilile. Shino osha kwatela mo okulesha Ombiimbeli esiku kehe, okulesha Oshungolangelo kehe tayi piti nosho wo o-Awake! Okwiilongekidhila okugongala nosho wo okukala po. (Eps. 1:1, 2; Heb. 10:24, 25) Sho Paulus a li ta ladhipike omugundjuka Timoteus a hume komeho pambepo, Paulus okwa nyola a ti: ‘Tonatela ano elongo lyoye.’ (1 Tim. 4:15, 16) Kala ho ilongekidhile iipopiwa yoye mbyoka wu na mOsikola yOkudheula Aauvithi. Kala ho ilongekidhile uukalele, nokukala ho kutha aluhe ombinga muwo. Itulila po omalalakano gopambepo ngaashi okuya muukokolindjila, miilonga yaBetel, nenge okuya kOsikola yOmbiimbeli yOkudheula Aamwatate Inaaya Hokana, e to ningi oonkambadhala wu adhe omalalakano ngoka. Ngele owa kola pambepo otashi ke ku kwathela wu ‘yande uuhalu womuugundjuka.’ — 2 Tim. 2:22.
4. Esimano lini hali zi mokukala omwiinekelwa nomudhiginini?
4 Kala omwiinekelwa nomudhiginini: Aamwatate mboka ya li ya pewa oshinakugwanithwa shokutopolela Aakriste mboka itaya vulu okwiikwatha iikulya methelemumvo lyotango oya li “ye shi kwiinekelwa” noya li aadhiginini. Kungeyi, aayapostoli kaya li tayi ipula ngele otaya ka longo tuu iilonga yawo. Shika osha li sha kwathele aayapostoli ya gandje eitulomo kiinima yilwe ya simana. (Iil. 6:1-4) Onkee ano, ngele owa pewa oshinakugwanithwa megongalo, shi longa noonkondo dhoye adhihe. Holela Noowa ngoka a li a landula nawa omalombwelo ngoka a li a pewa sho ta tungu onguluwato. (Gen. 6:22) Jehova okwa simaneka aantu aadhiginini. Ngele omuntu omudhiginini, otu ulike kutya okwa koka pambepo. — 1 Kor. 4:2; tala oshimpungu “Uuwawanawa mboka hawu zi mokudheulwa.”
5. Omolwashike aamwatate aagundjuka ye na okulalakanena omauthembehenda megongalo?
5 Ngaashi sha hunganekwa, Jehova ota ningitha oshigwana she shi indjipale. (Jes. 60:22) Aantu yethike 250 000 lwaampono ohaya ninginithwa omumvo kehe. Omolwomwaalu gwaantu oyendji aape mboka haye ya moshili, opwa pumbiwa aalumentu mboka ya pyokoka pambepo ya pewe iinakugwanithwa momagongalo. Ngashingeyi opu na iilonga mbyoka tayi tu kaleke twi ipyakidhila miilonga yaJehova, shi vulithe nale. (1 Kor. 15:58) Ne aamwatate aagundjuka, mbela otamu lalakanene ngaa omauthembehenda giilonga? Ngele osho, omwa hala iilonga iiwanawa lela.
[Oohapu dha simana pepandja 2]
Omolwomwaalu gwaantu oyendji aape mboka haye ya moshili, opwa pumbiwa aalumentu mboka ya pyokoka pambepo ya pewe iinakugwanithwa momagongalo
[Oshimpungu pepandja 3]
Uuwawanawa mboka hawu zi mokudheulwa
Aamwatate aagundjuka mboka ya pyokoka ohaya mono uuwanawa ngele aakuluntugongalo taye ya pe iinakugwanitha noku ya dheula. Esiku limwe konima yokugongala, omutonatelishikandjo okwa li a kuutumba komutuni ta ladhipike omuuvithi gumwe. Ihe popepi naye opwa li pwa thikama okamati okagundjuka. Okwa li e ka pula ngele oka hala okupopya naye. Okamati hoka oka li ke mu yamukula kutya oka pewa oshinakugwanithwa shokwoopaleka omutuni no-vacuum cleaner konima yokugongala kehe. Aavali yako oya li ya thikama ya ye, ihe ko ka kali ka hala okuya omanga inaaka gwanitha po oshilonga shoka ka pewa. Omutonatelishikandjo okwa li a nyanyukwa shili. Okwa ti: “Aakuluntugongalo megongalo ndyoka ohaya dheula aluhe aamwatate aagundjuka moku ya pa iinakugwanithwa yontumba. Omolwoshinima shoka uuna tandi talele po egongalo lyawo ohaya kala ye na omumwatate omugundjuka ngoka taya popile a langekwe po e li omuyakuligongalo.”