Jehova ‘ota ka yukifa oinima’

“Kalunga ita yukifile mbela ovahoololwa vaye oshinima shavo ava have mu ifana pombada omutenya noufiku?” — LUKAS 18:7.

1. Oolyelye ve li etwomukumo kwoove, nomolwashike?

EENDOMBWEDI DAJEHOVA mounyuni aushe ohadi hafele eendafano novaitaveli vakwao Ovakriste ovo va kala tava longele Jehova noudiinini oule womido dihapu. Mbela ou shii pauhandimwe vamwe vomovamwatate novamwameme ovaholike ovo va kala tava longele Jehova noudiinini? Otashi dulika u shii omumwameme omunamido oo a ninginifwa nalenale ndele iha faula naanaa okwoongala kwopaKriste. Ile otashi dulika u shii omumwatate omunamido oo a kala ta yambidida noudiinini omalongekido eongalo e na sha nokuya moukalele, a kala te shi ningi oshivike keshe oule womido omilongo. Ovapiya vaJehova ovadiinini vahapu va tya ngaho ova li ve shii ngeno osho Harmagedon okwe uya nale. Ndele nonande ounyuni ou woukolokoshi inau hanaunwa po natango, inashi va teya omukumo vaha kale vali ve lineekela momaudaneko aJehova noinashi nghundipaleka etokolotoko lavo ‘lokulididimika fiyo okexulilo.’ (Mateus 24:13) Ovapiya vaJehova ovadiinini va tya ngaho ove li lela etwomukumo komaongalo omolweitavelo lavo la kola. — Epsalme 147:11.

2. Onghalo ilipi hai tu nyemateke?

² Mepingafano naasho sha popiwa mokatendo kotete, Eendombwedi dimwe, odo da kala tadi endafana neongalo lopaKriste noda kala tadi kufa ombinga moukalele omido dihapu, oda enda tadi nghundipala pamhepo fiyo da efa po okweendafana neongalo lopaKriste. Ohashi tu nyemateke ngeenge ovo twa kala hatu endafana navo meongalo va fiya po Jehova. Ndele nande ongaho, otwa halelela okukwafela ‘eedi odo da kana’ di alukile moufita waye. (Epsalme 119:176; Ovaroma 15:1) Oushili oo kutya vamwe ohava kala ovadiinini kuJehova ofimbo vamwe tave mu fiye po otau pendula omapulo onhumba. Oshike hashi kwafele Eendombwedi dihapu di kale di na eitavelo la kola momaudaneko aJehova nonande pe na dimwe odo hadi efa po eitavelo lado? Oshike tashi ke tu kwafela pauhandimwe opo tuha limbililwe nandenande oushili oo kutya “efiku linene lOmwene,” Jehova, oli li popepi? (Sefanja 1:14) Opo tu mone omanyamukulo komapulo oo, natu konakoneni efaneko lonhumba li li mEvangeli laLukas.

Elondwelo kwaavo tava hangwa ve na omwenyo eshi ‘Omona womunhu te uya’

3. Oolyelye tava dulu okumona ouwa muhapu mefaneko laJesus li na sha nomufiyekadi nomutokoli, nomolwashike hatu dulu okutya ngaho?

³ Jesus okwa popya efaneko li na sha nomufiyekadi nomutokoli muLukas etukulwa eti-18. Efaneko olo ola yukila kwaalo la kundafanwa moshitukulwa sha tetekela, olo tali popi kombinga yomulumenhu oo a li a ka ehela omingome kukaume kaye. (Lukas 11:5-13) Ndele etukulwa eti-17 neti-18 laLukas, omo Jesus a hokolola efaneko li na sha nomufiyekadi nomutokoli, otaa ulike kutya okwa li ta popi shi na sha naavo tava hangwa momwenyo eshi ‘Omona womunhu te uya’ meenghono dOuhamba, sha hala okutya, pefimbo lokukala po kwaJesus, oko kwa hovela mo 1914. — Lukas 18:8.a

4. Jesus okwa popya tete kombinga yashike fimbo ina popya efaneko olo tali hangwa muLukas etukulwa eti-18?

⁴ Fimbo Jesus ina popya efaneko olo li na sha nomufiyekadi nomutokoli, okwa popya kutya oumbangi u na sha nokukala po kwaye meenghono dOuhamba otau ka kala u liwetikile apeshe, ngaashi ashike “oluvadi mokushela kwalo tali minikile kominghulo deulu fiyo okominghulo dikwao.” (Lukas 17:24; 21:10, 29-33) Ndele nande ongaho, ovanhu vahapu kunena, ‘pefimbo eli lexulilo,’ ihava yandje elitulemo koumbangi oo wa yela. (Daniel 12:4) Omolwashike mbela? Omolwaashi ove na oikala ya fa yovanhu vopefimbo laNoa nosho yo laLot, ovo va li ve lipwililikila omalondwelo aJehova. Ovanhu vopefimbo laNoa nolaLot ova kala ashike ‘tava li nokunwa, tava lande nokulandifa, tava twike nokutunga fiyo efiku olo va nyonwa po.’ (Lukas 17:26-29) Heeno, ova li va hanaunwa po, molwaashi ova kala ashike va pwila moinima yonghalamwenyo yakeshe efiku, ponhele yokulihonga kutya ehalo laKalunga olilipi nokudulika kulo. (Mateus 24:39) Nokunena, ovanhu vahapu ova pwila ashike moinima yonghalamwenyo yakeshe efiku nomolwaasho inava didilika oumbangi oo tau ulike kutya ounyuni ou woukolokoshi ou li pokuhanaunwa po. — Lukas 17:30.

5. (a) Jesus okwa li ta londwele oolyelye, nomolwashike? (b) Oshike sha ningifa Ovakriste vamwe va efe po eitavelo lavo?

⁵ Osha yela kutya Jesus okwa li ta londwele ovashikuli vaye vaha kokwe kounyuni waSatana ndele tava ‘shuna koinima oyo va li va fiya po.’ (Lukas 17:22, 31) Mupya munene, Ovakriste vamwe ova yulwa keemwiyo daSatana. Ovakriste va tya ngaho ova kala va teelela olule Harmagedon, efiku olo Jehova ta ka hanauna po ounyuni ou woukolokoshi. Ndele eshi inali uya pefimbo olo va li va teelela, ova teka omukumo, naasho oshe va ningifa va kale ve wete efiku laJehova letokolo la kala ko. Ova enda tava nghundipala pamhepo fiyo va kwatwa omboko koinima yonghalamwenyo yakeshe efiku ndele tava efa po omalipyakidilo opamhepo. (Lukas 8:11, 13, 14) Lwanima, ova ka ‘shuna koinima oyo va li va fiya po.’ Kashi fi tuu oshinima shinyikifa oluhodi!

Otwa pumbwa okukala hatu ‘ilikana alushe’

6-8. (a) Hokolola efaneko laJesus li na sha nomufiyekadi nomutokoli. (b) Oshitwa shilipi Jesus a yelifa mefaneko olo?

⁶ Oshike tu na okuninga opo tu twikile okukala tu na elineekelo filufilu kutya Jehova ota ka wanifa po omaudaneko aye? (Ovaheberi 3:14) Konima eshi Jesus a londwela ovahongwa vaye vaha shune mounyuni waSatana, okwa yelifa kutya oshike tashi dulu oku va kwafela va kale neitavelo la pama.

⁷ PaVangeli laLukas, Jesus okwa li a hokololela ovahongwa vaye “efaneko nhumbi ve nokwiilikana [alushe, OB-1986] va ha loloke, ndele ta ti: Moshilando shimwe omwa li mu na omutokoli weendjovo ina tila Kalunga noina fya ohoni ovanhu. Ndele moshilando osho mwa li omufiyekadi e uya luhapu kuye ndele okwa tya: Yukifa eendjovo detu [nomutamaneki] wange. Ndelenee ye okwa ninga omafiku mahapu ina hala; konima okwe lipopila ta ti: nande ihandi tila Kalunga noihandi fi ohoni ovanhu onda hala oku mu yukifila oshinima shaye, osheshi omufiyekadi ou ta kenyeneke nge, opo a ha twe nge momesho nokuli.”

⁸ Konima yokupopya efaneko olo, Jesus okwa yelifa oshitwa shaye, a ti: “Pwilikineni omutokoli ou mwii eshi ta ti. Hano Kalunga ita yukifile mbela ovahoololwa vaye oshinima shavo ava have mu ifana pombada omutenya noufiku ye a fye ounye ngeno oku va kwafa? Ohandi mu lombwele: ote shi va yukifile divadiva. Ndelenee Omona wOmunhu ngenge te uya, ota hange ko tuu eitavelo kombada yedu?” — Lukas 18:1-8.

“Yukifa eendjovo detu”

9. Enenediladilo lefaneko laJesus li na sha nomufiyekadi nomutokoli olilipi?

⁹ Enenediladilo lefaneko laJesus ola yela nawa. Osho oshi liwetikile ngeenge hatu tale keendjovo odo da popiwa komufiyekadi nomutokoli nosho yo kuJesus. Omufiyekadi okwa indila omutokoli a ti: “Yukifa eendjovo detu [nomutamaneki] wange.” Omutokoli okwa ti: “Onda hala oku mu yukifila oshinima shaye.” Jesus okwa pula a ti: “Kalunga ita yukifile mbela ovahoololwa vaye oshinima shavo?” Opo nee okwa popya shi na sha naKalunga, a ti: “Ote shi va yukifile divadiva.” (Lukas 18:3, 5, 7, 8) Mbela onaini Kalunga ta ka ‘yukifa oinima’?

10. (a) Ouyuki owa li wa wanifwa naini mefelemudo lotete? (b) Kalunga ota ka yukifila ngahelipi ovapiya vaye oinima, note ke shi ninga naini?

¹⁰ Mefelemudo lotete, Jerusalem notembeli yasho osha li sha hangwa ‘komafiku ehandu’ (“omafiku okuwanifa ouyuki,” NW) eshi sha hanaunwa po mo 70 O.P. (Lukas 21:22) Ovapiya vaJehova vokunena ova teelela eshi Jehova ta ka yukifa oinima ‘mefiku laye linene.’ (Sefanja 1:14; Mateus 24:21) Pefimbo olo, Jehova ota ka ‘alulila ovahepeki’ voshiwana shaye “omahepeko” eshi Jesus Kristus ta ka ‘handukila ava inava shiiva Kalunga noitava dulika kevangeli.’ — 2 Ovatessaloniki 1:6-8; Ovaroma 12:19.

11. Omeityo lilipi Kalunga ta ka yukifila ovapiya vaye oinima “divadiva”?

¹¹ Ndele mbela otu udite ko ngahelipi eshilipaleko laJesus olo tali ti kutya Jehova ota ka wanifa ouyuki “divadiva”? Eendjovo daKalunga otadi ulike kutya nonande ‘ohe tu tale onheni,’ ota ka wanifa diva ouyuki pefimbo laye la wapala. (Lukas 18:7, 8, NW; 2 Petrus 3:9, 10) Eshi Eyelu la li le uya pefimbo laNoa, ovakolokoshi ova li va hanaunwa po nopehe na okwoongaonga. Sha faafana, pefimbo laLot, ovakolokoshi ova li va hanaunwa po komundilo wa dja meulu. Jesus okwa ti: “Osho ngaha taku ka ningwa efiku olo Omona wOmunhu ta holoka.” (Lukas 17:27-30) Natango, ovakolokoshi otava ka ‘vakelwa kehanauno.’ (1 Ovatessaloniki 5:2, 3) Onghee hano, natu kale nelineekelo kutya Jehova ita ka efa nande ounyuni waSatana u twikile okukala po ngeenge efimbo laye lokuyukifa oinima la fiki.

Kalunga ‘ota ka yukifa oinima’

12, 13. (a) Oshilihongomwa shilipi hatu lihongo mefaneko laJesus li na sha nomufiyekadi nomutokoli? (b) Omolwashike tu na oushili kutya Jehova ota ka uda omailikano etu ndele te tu yukifile oinima?

¹² Efaneko laJesus li na sha nomufiyekadi nomutokoli otali divilike oshilihongomwa shimwe vali sha fimana. Mokuyelifa efaneko olo, Jesus okwa ti: “Pwilikineni omutokoli ou mwii eshi ta ti. Hano Kalunga ita yukifile mbela ovahoololwa vaye oshinima shavo?” Apa Jesus ka li ta ti kutya Jehova ota ka ungaunga novapiya vaye monghedi oyo omutokoli oo a li a ungaunga nomufiyekadi. Ndele ponhele yaasho, Jesus okwa li ta hongo ovashikuli vaye kutya Jehova iha ungaunga novanhu monghedi ya fa yomutokoli oo. Mbela Jehova nomutokoli womefaneko laJesus ova yoolokafana meenghedi dilipi?

¹³ Omutokoli womefaneko laJesus okwa li “mwii,” ofimbo “Kalunga [oku li] omutokoli omuyuki.” (Epsalme 7:12; 33:5) Omutokoli oo ka li nande e na ko nasha nomufiyekadi, ndele Jehova oku na ko nasha novanhu aveshe pauhandimwe. (2 Omafimbo 6:29, 30) Omutokoli oo ka li a hala okukwafela omufiyekadi, ndele Jehova okwa halelela okukwafela filufilu ovo tave mu longele. (Jesaja 30:18, 19) Mbela oshike hatu lihongo moshinima osho? Oshilihongomwa oshosho kutya, ngeenge omutokoli oo mwii okwa li a pwilikina keindilo lomufiyekadi ndele te mu yukifile oinima, nopehe na omalimbililo, Jehova ota ka pwilikina komailikano ovapiya vaye ndele te va yukifile oinima. — Omayeletumbulo 15:29.

14. Omolwashike tu na okukala neitavelo la pama kutya efiku laKalunga letokolo otali ke uya?

¹⁴ Molwaashi Jehova ita kala ina yukifa oinima, ovo inava itavela vali kutya efiku laye letokolo otali ke uya otave like koshitai va londa ko. Omolwashike mbela? Omolwaashi kungaho otava ulike kutya inave lineekela kutya Jehova ota dulu okuwanifa po omaudaneko aye. Ndele oulineekelwa waJehova itau dulu okutuwa omhata. (Job 9:12) Epulo la fimanenena olo tu na okulipula ololo kutya: ‘Mbela ohatu ka kala ngoo ovadiinini pauhandimwe?’ Osho osho naanaa Jesus a kundafana pexulilo lefaneko laye li na sha nomufiyekadi nomutokoli.

“Omona wOmunhu ngenge te uya, ota hange ko tuu eitavelo la tya ngaho kombada yedu?”

15. (a) Jesus okwa li a pula epulo lilipi, nomolwashike? (b) Epulo lilipi tu na okulipula pauhandimwe?

¹⁵ Jesus okwa pula epulo eli lihokwifa neenghono, a ti: “Omona wOmunhu ngenge te uya, ota hange ko tuu eitavelo [la tya ngaho] kombada yedu?” (Lukas 18:8, yelekanifa neshangelo lopedu mo-NW.) Eshi Jesus a longifa outumbulilo “eitavelo la tya ngaho” ka li ta popi eitavelo lakwalukeshe, ndele okwa li ta popi eitavelo ngaashi olo la li li niwe komufiyekadi womefaneko laye. Jesus ka li a yandja enyamukulo kepulo olo, ndele okwa li ashike e li pula opo a ningife ovahongwa vaye ve lipule kutya eitavelo lavo ola tya ngahelipi. Mbela eitavelo lavo ola li tali ka enda tali nghundipala ndele tava ka shuna koinima oyo va fiya po? Ile mbela ova li ve na eitavelo la fa lomufiyekadi womefaneko laJesus? Kunena, nafye otu na okulipula pauhandimwe kutya: ‘Mbela eitavelo lange ola tya ngahelipi pataleko “lOmona wOmunhu”?’

16. Omufiyekadi womefaneko laJesus okwa li e na eitavelo la tya ngahelipi?

¹⁶ Opo tu ka mone ouwa eshi Jehova ta ka yukifa oinima, otwa pumbwa okuhopaenena omufiyekadi womefaneko laJesus. Mbela omufiyekadi oo okwa li e na eitavelo la tya ngahelipi? Okwa li a ulika kutya oku na eitavelo la tya ngahelipi mokutwikila ‘okuya komutokoli ta ti: Yukifa eendjovo detu.’ Omufiyekadi oo okwa li a pula noudiinini a yukifilwe oinima komutokoli mwii. Ovapiya vaKalunga vokunena navo ove na okukala ve na elineekelo kutya Kalunga ote ke va yukifila oinima, nonande otashi dulika va kale va teelela efimbo lile. Natango, ove na okuulika kutya ove lineekela omaudaneko aKalunga, mokukala tava ilikana alushe, tave “mu ifana pombada omutenya noufiku.” (Lukas 18:7) Ndele ngeenge Omukriste okwa efa po okwiilikana opo Jehova a yukife oinima, osho otashi ka ulika kutya ine lineekela vali kutya Jehova ota ka yukifila ovapiya vaye oinima.

17. Omolwashike tu na okudiinina okwiilikana nokukala tu na eitavelo la kola kutya efiku laJehova letokolo otali ke uya?

¹⁷ Eenghalo domufiyekadi womefaneko laJesus otadi tu kwafele tu mone kutya otu na omatomheno mahapu okukala hatu ilikana alushe. Natu tale keyooloko olo li li pokati keenghalo domufiyekadi oo nodetu. Omufiyekadi oo okwa li ha i komutokoli nonande kapa li oo he mu ladipike e shi ninge, ndele fye ohatu ladipikwa kEendjovo daKalunga tu ‘diinine okwiilikana.’ (Ovaroma 12:12) Omufiyekadi oo ka li e na eshilipaleko kutya eindilo laye otali ka udika, ndele Jehova okwe tu shilipaleka kutya ote ke tu yukifila oinima. Jehova okwe tu shilipaleka okupitila momuprofeti waye Habakuk, a ti: “Ngenge la kala ko, li teelela. Osheshi olo tali ka fika shili, lo itali ka fyaala ko.” (Habakuk 2:3; Epsalme 97:10) Natango, omufiyekadi ka li e na omukwafi oo te mu popile eshi a li ha i komutokoli, ndele fye otu na omukwafi munene, Jesus, oo e “li kolulyo laKalunga, note tu ilikanene yo.” (Ovaroma 8:34; Ovaheberi 7:25) Onghee hano, ngeenge omufiyekadi oo a li moudjuu okwa kala ha ka popya lwoikando nomutokoli nelineekelo kutya ote ke mu yukifila oinima, mbela fyeni katu na okukala tu na eitavelo la kola kutya efiku laJehova letokolo otali ke uya?

18. Eilikano ohali pameke ngahelipi eitavelo letu noku tu kwafela tu mone ouwa mouyuki waJehova?

¹⁸ Efaneko li na sha nomufiyekadi otali tu hongo kutya eilikano neitavelo oya pambafana neenghono nonokutya okudiinina okwiilikana otaku tu kwafele tu kondjife oinima oyo tai dulu okunyona po eitavelo letu. Ndele osho inashi hala okutya okulifefa omwiilikani washili otaku amene eitavelo loye liha nyonwe po. (Mateus 6:7, 8) Otu na okwiilikana tashi di komutima, tu na elineekelo filufilu muKalunga. Kungaho, opo ashike hatu ka ehena popepi naKalunga, nota ka pameka eitavelo letu. Natango, molwaashi otwa pumbwa okukala tu na eitavelo opo tu ka xupifwe, Jesus okwe tu ladipika tu ‘ilikane tuha loloke.’ (Lukas 18:1; 2 Ovatessaloniki 3:13) Doshili, okuuya ‘kwefiku linene lOmwene’ inaku likolelela komailikano etu, molwaashi efiku olo otali ke uya kutya nee ohatu ilikana ile hasho. Ndelenee okumona kwetu ouwa pauhandimwe mouyuki waKalunga noku ka xupa moita yaye otaku ka kala kwe likolelela kongushu yeitavelo letu noyomailikano etu.

19. Ohatu ulike ngahelipi kutya otwa itavela filufilu kutya Kalunga ota ka ‘yukifa oinima’?

¹⁹ Dimbuluka epulo olo Jesus a pula a ti: “Omona wOmunhu ngenge te uya, ota hange ko tuu eitavelo la tya ngaho kombada yedu?” Enyamukulo kepulo olo lihokwifa neenghono olilipi mbela? Inatu hafa tuu eshi tu li mokati kovapiya vaJehova ovadiinini omamiliyona mounyuni aushe, ovo tava ulike okupitila momailikano avo, melidiiniko lavo nosho yo moudiinini wavo kutya ove na eitavelo la tya ngaho! Heeno, nonande ohatu nyematekwa kokuhenouyuki oko ku li mounyuni ou waSatana, otwa itavela filufilu kutya Kalunga ‘ota ka yukifila ovahoololwa vaye oinima.’

[Eshangelo lopedu]

Oto dimbuluka?

• Oshike hashi ningifa Ovakriste vamwe va kanife eitavelo lavo?

• Omolwashike hatu dulu okukala noushili kutya efiku laJehova letokolo otali ke uya?

• Omolwomatomheno elipi tu na okudiinina okwiilikana?

• Ongahelipi okudiinina okwiilikana taku dulu oku tu kwafela tuha kanife eitavelo letu?

[Efano pepandja 19]

Enenediladilo lefaneko laJesus li na sha nomufiyekadi nomutokoli olilipi?

[Omafano pepandja 21]

Ope na ovanhu omamiliyona kunena ovo va itavela filufilu kutya Kalunga ota ka ‘yukifa oinima’