Natu holeleni Jesus mokuuvitha nomukumo
“Kalunga okwe tu pe omukumo oku mú hokololela elaka etoye.”—1 TES. 2:2.
1. Omolwashike onkundana ombwanawa yUukwaniilwa yihokitha noonkondo?
KASHI nyanyudha tuu okuuva elaka etoye! Elaka etoye ewanawa unene olyo onkundana ombwanawa yUukwaniilwa waKalunga. Onkundana ndjoka ombwanawa otayi tu shilipaleke kutya okumona iihuna, uuwehame, oluhodhi neso otayi ka hula po. Otayi tu pe etegameno lyokukala nomwenyo sigo aluhe, otayi holola elalakano lyaKalunga notayi tu ulukile nkene tatu vulu okukala nekwatathano lyopahole naye. Nopwaahe na omalimbililo, oto dhiladhila kutya kehe gumwe ota ka kala a nyanyukwa okuuva onkundana ndjoka Jesus u uvithile aantu. Ihe mupyamunene, hasho shi li ngawo.
2. Fatulula oohapu dhaJesus tadhi ti: ‘Ongame nde ya okuhongakanitha aanegumbo.’
2 Jesus okwa lombwele aalongwa ye a ti: “Inamu dhiladhila, ngame onde ya okweeta ombili kombanda yevi. Inandi ya okweeta ombili, ihe egongamwele. Ongame nde ya okuhongakanitha omumati nahe, nomukadhona nayina, noshitenya shomukiintu nayinamweno. Aanegumbo yomuntu ngoka otaa ningi aatondi ye.” (Mat. 10:34-36) Pehala lyokutaamba onkundana ombwanawa, aantu oyendji ohaye yi ekelehi. Yamwe ohayi iningi aatondi yaamboka taye yi uvitha, nonando oye li iilyo yuukwanegumbo wawo.
3. Otwa pumbwa shike opo tu vule okugwanitha po oshilonga shetu shokuuvitha?
3 Ohatu uvitha ooshili ndhoka Jesus a li u uvitha, nongele taye dhi uvu, aantu kunena ohayi inyenge naanaa ngaashi ya li yi inyenge pethimbo lyaJesus. Shika osho tu na okukala twa tegelela. Jesus okwa lombwele aalongwa ye a ti: “Omuyakuli ke shi omunene e vule mwene gwe. Ngele aantu oya tidhagana ndje, nena otaa ke mú tidhagana wo.” (Joh. 15:20) Miilongo oyindji ihatu hepekwa shu ukilila, ihe yamwe oye tu dhina nayalwe kaye na ko nasha netumwalaka lyetu. Onkee ano, otwa pumbwa eitaalo nuulaadhi okwiidhidhimika miilonga yetu yokuuvitha onkundana ombwanawa nomukumo.—Lesha 2 Petrus 1:5-8.
4. Omolwashike Paulus a li e na omukumo okuuvitha?
4 Otashi vulika pomathimbo gamwe shi kale oshidhigu kungoye okukutha ombinga muukalele, nenge pu na ombinga yimwe yuukalele ndjoka ontilithi kungoye. Ngele osho, kala wu shi shi kutya opu na aauvithi aadhiginini yalwe yu uvite ngaaka. Omuyapostoli Paulus okwa li omuuvithi omulaadhi ngoka a li kee na uumbanda nokwa li e uvite ko nawa oshili, ihe nonando ngaaka, pomathimbo gamwe osha li oshidhigu kuye okuuvitha. Okwa li a nyolele Aakriste muTessalonika a ti: “Omwa tseya wo kutya, manga inaatu ya kune muTessalonika, otwa li twa hindwa notwa shekwa muFilippi. Ihe Kalunga okwe tu pe omukumo oku mú hokololela elaka etoye lya zi kuye, nonando opwa li omakondjitho ogendji.” (1 Tes. 2:2) MuFilippi aaleli yoshilongo oya li ya dhengitha Paulus nomweendi pamwe naye Silas noongola, oye ya edhilile mondholongo noku ya tula meti. (Iil. 16:16-24) Nonando ongaaka, Paulus naSilas oya li ye na omukumo okutsikila nokuuvitha. Ongiini tatu vulu okuninga sha faathana? Opo tu mone eyamukulo, natu tale shoka sha li sha kwathele aapiya yaKalunga pethimbo lyonale ya popye nomukumo oshili kombinga yaKalunga nokutala nkene tatu vulu oku ya holela.
Oya li ya pumbwa omukumo sho ya taalela uutondwe
5. Omolwashike aapiya yaJehova aadhiginini yonale ya li aluhe ya pumbwa omukumo?
5 Jesus Kristus oku li oshiholelwa sha dhenga mbanda shokukala nuulaadhi nomukumo. Ihe okuza petameko lyondjokonona yaantu, ayehe mboka ya li aadhiginini muJehova oya li ya pumbwa omukumo. Omolwashike mbela? Molwaashoka konima yoshipotha muEden, Jehova okwa li a hunganeke kutya otapu ka kala uutondwe pokati kaamboka haye mu longele naamboka haya longele Satana. (Gen. 3:15) Uutondwe mboka owa li wi imonikila mbala sho omulumentu omuyuuki Abel a dhipagwa komumwayina Kain. Konima yethimbo, omulumentu gulwe omudhiginini, Henok, ngoka a li ko manga Eyelu inaali ya, naye okwa li e tondike. Okwa hunganeke kutya Kalunga ote ke ya pamwe naayengeli ye aayapuki omayuvi ogendji okupangula nokugeela aakeenakonasha naKalunga. (Jud. 14, 15) Etumwalaka lye ndyoka kalya li li holike kaantu oyendji. Oya li ye tonde Henok nosha li sha yela kutya ando Jehova ka li e mu kutha po, ando oye mu dhipaga. Henok ka li tuu e na omukumo!—Gen. 5:21-24.
6. Omolwashike Moses a li a pumbwa omukumo okupopya naFarao?
6 Dhiladhila wo nkene Moses a li u ulike omukumo sho a popi naFarao, omupangeli ngoka kaa li owala a talika ko e li omukalelipo gwiikalunga, ihe naye mwene okwa li oshikalunga, omuna gwoshikalunga shetango, Ra. Otashi vulika a li ha galikana kefano lye mwene, ngaashi ooFarao yalwe. Oohapu dhaFarao odha li ompango yaayehe. Farao okwa li omunankondo ngoka e na uuntsa nondudhi noka li e hole okulombwelwa kuyalwe shoka e na okuninga. Moses omusita gwiimuna omwiifupipiki okwa li a holoka iikando niikando koshipala shomulumentu ngoka, nonando ka li e mu hiya noka li a hala oku mu mona. Moses okwa li a hunganeke shike? Omageelo omatilithi. Nokwa li a hala shike? Okwa li a hala okupewa epitikilo opo aapika omamiliyona yaFarao ya ze mo moshilongo. Mbela Moses okwa li a pumbwa omukumo? Osho lela!—Num. 12:3; Heb. 11:27.
7, 8. (a) Aapiya aadhiginini yonale oya li ya adhika komamakelo geni? (b) Oshike sha li sha kwathele mboka yopethimbo lya tetekele Uukriste yu ulike omukumo mokupopila nokuhumitha komeho elongelokalunga lya yela?
7 Omathelemimvo ga landula ko, aapolofeti naapiya yalwe yaKalunga aadhiginini oya tsikile okukala nomukumo mokukala kombinga yelongelokalunga lya yela. Uuyuni waSatana kawa li wu ya hole. Paulus okwa ti: “Yamwe oya dhipagwa nomamanya, yamwe oya tetwa pokati nayamwe oya dhipagwa negongamwele. Oyo oye endagula ya zala iipa yoonzi noyiikombo, oya si oluhepo, oya [tidhaganwa] e taa monithwa iihuna.” (Heb. 11:37) Oshike sha kwathele aapiya yaKalunga mboka aadhiginini kaaya tyololoke? Moovelise dha tetekele, omuyapostoli okwa li a popi shoka sha pe Abel, Abraham, Sara nayalwe oonkondo okwiidhidhimika. Okwa ti: “Oyo inaa mona iinima mbyoka Kalunga e yi ya uvanekela, ihe oye yi talele kokule [neitaalo] noye yi [nyanyukilwa].” (Heb. 11:13) Osha yela kutya aapolofeti ngaashi Elia, Jeremia nayalwe aadhiginini mboka ya tetekele ethimbo lyUukriste noya popile nomukumo elongelokalunga lyashili, nayo oya li ya kwathelwa wo yi idhidhimike omolwokwiinekela omauvaneko gaJehova.—Tit. 1:2.
8 Aapiya aadhiginini mboka ya tetekele Uukriste oya li ya tegelela onakuyiwa yi li nawa noyihokitha. Uuna taya ka yumuka, hugunina otaya ka kala ya gwanenena ‘nokumangululwa muupika weyonuko’ okupitila miilonga yaKristus Jesus, omupristeli omukuluntu naapristeli ooyakwawo 144 000. (Rom. 8:21) Natango, Jeremia naapiya yalwe yaKalunga yonale mboka ya li ye na omukumo, oya li ya ladhipikwa keshilipaleko lye ndyoka a lombwele Jeremia a ti: “Otaye ke ku kondjitha, ihe itaye ku sindi, oshoka ondi li pamwe nangoye notandi ku hupitha. Ongame OMUWA nda popi.” (Jer. 1:19) Kunena, uuna tatu dhiladhila kombinga yomauvaneko gaKalunga gomonakuyiwa neshilipaleko lye kutya ote tu gamene pambepo, otashi tu koleke wo.—Omayel. 2:7; lesha 2 Aakorinto 4:17, 18.
Ohole oya li yi inyengitha Jesus u uvithe nomukumo
9, 10. Omomikalo dhini Jesus a li u ulike omukumo sho a li koshipala (a) shaawiliki yelongelokalunga, (b) shongundu yaakwiita, (c) shomupristeli omukuluntu, (d) noshaPilatus?
9 Omuholelwa gwetu, Jesus, okwa li u ulike omukumo momikalo dhi ili nodhi ili. Pashiholelwa, nonando Jesus okwa li e tondike kaanenentu, ina hekula shoka Kalunga a li a hala aantu ya tseye. Ka li a tila okwaaneka pomutenya aawiliki yelongelokalunga aanankondo omolwokwiishi kwawo uuyuuki nosho wo omolwomalongo gawo giifundja. Aalumentu mboka ya li ya gwana okupangulwa, naJesus okwe shi ya lombwele niitya yu ukilila noya yela. Pompito yimwe, okwa ti: “Yayee, one aalongimpango naafarisayi! One aafudhime, sho mwa fa oombila dha kolongwa nodho opala okutalwa kombanda, ihe meni lyadho odhu udha omasipa gaasi nonyata ayihe. Osho nane wo kombanda paantu omu na eholoko lyuuyuuki, ihe meni omu udha uufudhime nuulunde.”—Mat. 23:27, 28.
10 Sho ongundu yaakwiita ye ya kuJesus moshikunino shaGetsemane, okwa li e yi ihololele nomukumo. (Joh. 18:3-8) Konima okwa li a falwa kOsanhedrin nokwa pulapulwa komupristeli omukuluntu. Nonando Jesus okwa li e shi kutya omupristeli omukuluntu ota kongo etompelo oku mu dhipagitha, ka li a tila okukoleka kutya oye Kristus nosho wo Omuna gwaKalunga. Okwa gwedha ko a ti kutya otaye ke mu mona “a kuutumba kolulyo lwaKalunga note ke ya te ende kiikogo yokegulu.” (Mark. 14:53, 57-65) Konima yaashoka, Jesus okwa mangwa nokufalwa koshipala shaPilatus, ngoka a li ta vulu oku mu mangulula. Ihe Jesus ka li a yamukula sho ta lundilwa. (Mark. 15:1-5) Ayihe mbyoka oya li tayi pula omukumo.
11. Ekwatathano lini li li pokati komukumo nohole?
11 Jesus okwa li a lombwele Pilatus a ti: “Osho nda valelwa nonde ya muuyuni mbuka, opo ndi popye oshili.” (Joh. 18:37) Jehova okwa li a lombwele Jesus u uvithe onkundana ombwanawa, naJesus okwa li a nyanyukwa oku shi ninga molwaashoka okwa li e hole He gwomegulu. (Luk. 4:18, 19) Jesus okwa li e hole wo aantu. Okwa li e shi kutya oya li ye li monkalamwenyo ondhigu. Sha faathana, okuuvitha kwetu nomukumo nokwaahe na uumbanda okwa kankamena kohole yetu yokuhola Kalunga nooyakwetu.—Mat. 22:36-40.
Ombepo ondjapuki otayi tu nkondopaleke tu uvithe nomukumo
12. Oshike sha li sha nyanyudha aalongwa yaJesus yopetameko?
12 Miiwike mbyoka ya landula eso lyaJesus, aalongwa ye oya li ye na etompelo okukala ya nyanyukwa sho Jehova e ya gwedhele aalongwa aape. Mesiku limwe owala, Aajuda naamboka ya taamba ko elongelokalunga lyOshijuda 3 000 mboka ya za miilongo oyindji noya li muJerusalem okudhana Opentekoste, oya li ya ninginithwa. Osha yela kutya kehe gumwe ngoka a li muJerusalem okwa li a popi oshinima shoka. Ombiimbeli otayi ti: “Iilongankondo niikumithalonga oyindji mbyoka Kalunga e yi longitha aayapostoli, oye etele kehe gumwe uumbanda netilo.”—Iil. 2:41, 43.
13. Omolwashike aamwatate ya li ya galikana ya popye nuulaadhi, noshilanduliko osha li shike?
13 Aawiliki yelongelokalunga oya li ya geya noonkondo noya kwata Petrus naJohannes. Oye ya edhilile mondholongo sigo esiku lya landula noku ya indika yaa popye we kombinga yaJesus. Sho ya mangululwa, oya li ya hokololele aamwatate ashihe shoka sha ningwa po, naayehe oya li ya galikana kombinga yomahepeko ngoka ge ya taalela ya ti: ‘Omuwa, pa aamati yoye oohapu dhoye, tu popye nuulaadhi auhe twaa na uumbanda.’ Oshilanduliko osha li shike? “Oyo ayehe oyu udhithwa Ombepo Ondjapuki e taa tameke okupopya nuulaadhi oohapu dhaKalunga.”—Iil. 4:24-31.
14. Ongiini ombepo ondjapuki hayi tu ambidhidha miilonga yetu yokuuvitha?
14 Ndhindhilika kutya ombepo ondjapuki yaJehova ndjoka yi na oonkondo oya kwathele aalongwa ya popye oohapu dhaKalunga nuulaadhi. Opo tu popye kombinga yoshili nayalwe, nokuli naamboka haya pataneke etumwalaka lyetu, inashi ikolelela kutse yene. Jehova ote tu pe ombepo ondjapuki ngele tatu mu pula oku shi ninga. Kekwatho lyaJehova, natse otatu vulu okuulika uulaadhi opo tu sinde omahepeko ngoka twa taalela, kutya nduno ogoludhi luni.—Lesha Episalomi 138:3.
Aakriste kunena ohayu uvitha nomukumo
15. Ongiini oshili hayi hongakanitha aantu kunena?
15 Oshili otayi tsikile nokuhongakanitha aantu pethimbo lyetu, ngaashi sha li pethimbo lyonale. Yamwe ohayi inyenge nawa, ihe yalwe kayu uvite ko elongelokalunga lyetu nokaye li hole. Yamwe ohaye tu ula nayi, ohaye tu sheke noye tu tonde nokuli, naanaa ngaashi Jesus a li a hunganeke. (Mat. 10:22) Pomathimbo gamwe, iikundaneki ohayi nyola uuyelele wa pengithwa nenge omitotolombo kombinga yetu. (Eps. 109:1-3) Ihe nonando ongaaka, muuyuni auhe oshigwana shaJehova otashi uvitha nomukumo onkundana ombwanawa.
16. Oshimoniwa shini tashi ulike kutya ngele otu na omukumo, otashi vulu okulundulula etaloko lyaamboka tatu uvithile?
16 Ngele otu na omukumo, otashi vulu okulundulula etaloko lyaantu li na ko nasha netumwalaka lyUukwaniilwa. Omumwameme muKyrgyzstan okwa hokolola a ti: “Manga ndi li miilonga yokuuvitha, omunegumbo gumwe okwa li a lombwele ndje: ‘Ondi itaala muKalunga, ihe inandi itaala muKalunga kAakriste. Ngele owe ya ishewe pomweelo gwegumbo lyandje, otandi ke ku saagidhila ombwa yandje.’ Konima ye okwa li ongolombwa ya mangwa nelyenge. Ihe pethimbo lyoshikonga shokugandja okafo Onkundana yUukwaniilwa Onomola 37, ke na oshipalanyolo ‘Ehulilo lyomalongelokalunga giifundja oli li popepi!,’ onda tokola okushuna kegumbo ndyoka nedhiladhilo kutya otashi vulika ndi ka tsakaneke oshilyo shilwe shuukwanegumbo womulumentu ngoka. Ihe omulumentu oye tuu ngoka okwa li e egulula omweelo. Mbalambala onda galikana kuJehova nopo nduno onda ti: ‘Wa lala po tate. Onda dhimbulukwa shoka twa li twa popi konima yomasiku gatatu, nonda dhimbulukwa wo ombwa yoye. Ihe itandi vulu okupitilila po egumbo lyoye inaandi ku pa okafo haka, oshoka nangame ondi itaala muKalunga kamwe kashili, ngaashi ngoye. Masiku Kalunga ota ka hanagula po omalongelokalunga ngoka ge mu dhina. Oto vulu okwiilonga oshindji kwaashoka mokulesha okafo haka.’ Onda kumwa unene sho omulumentu ngoka a taamba okafo Onkundana yUukwaniilwa. Konima yaashoka onda yi kegumbo lya landula ko. Sho pwa piti owala ominute omishona, omulumentu ngoka okwa landula ndje ta tondoka e na okafo Onkundana yUukwaniilwa meke lye. Okwa ti: ‘Onde ka lesha. Mbela onda pumbwa okuninga shike opo ndaa geelwe kuKalunga?’” Omulumentu ngoka okwa tameke okukonakona Ombiimbeli nokonima okwa tameke okuya kokugongala.
17. Ongiini omukumo gwomumwameme gwa nkondopaleke omukonakonimbiimbeli ngoka a li e na uumbanda?
17 Omukumo gwetu otagu vulu okukwathela yalwe ya kale wo nomukumo. MuRusia omumwameme gumwe okwa li a gandja oshifo kugumwe ngoka ya li ye li pamwe naye mombesa. Opo nduno, omulumentu gumwe okwa nuka poshipundi she, e ta yakula omumwameme oshifo noku shi tonyagula, e te shi umbile pevi. Omulumentu ngoka okwa tuku omumwameme, e te mu thiminike e mu pe ondjukithi ye noku mu londodha kaaha uvithe we momukunda ngoka. Omumwameme okwa galikana kuJehova e mu kwathe nokwa dhimbulukwa oohapu dhaJesus ndhoka tadhi ti: “Inamu tila mboka taa dhipaga olutu.” (Mat. 10:28) Omumwameme okwa thikama e ta popi a ngungumana ta ti: “Itandi ku pe ondjukithi yandje notandi ka tsikila okuuvitha momukunda ngoka.” Opo nduno okwa zi mo mombesa. Omumwameme ka li e shi kutya mombesa moka omwa li wo omukonakonimbiimbeli gwe. Omukonakoni ngoka ka li ha yi kokugongala kwopaKriste omolwuumbanda wokutila aantu. Ihe konima sho a mono omukumo gwomumwameme, omukonakoni ngoka okwa li a tokola okutameka okuya kokugongala.
18. Oshike tashi ke ku kwathela wu uvithe nomukumo, ngaashi Jesus a ningi?
18 Muuyuni mbuka wi iteka Kalunga, otashi pula omukumo okuuvitha ngaashi Jesus a li u uvitha. Oshike tashi ke ku kwathela wu shi ninge? Okukala wu na etegameno lyonakuyiwa, okukala wu hole Kalunga naantu ooyakwetu nosho wo okugalikana kuJehova e ku pe omukumo. Dhimbulukwa aluhe kutya hangoye awike, molwaashoka Jesus oku li aluhe pamwe nangoye. (Mat. 28:20) Ombepo ondjapuki otayi ke ku nkondopaleka. Jehova ote ke ku laleka nuuyamba noku ku ambidhidha. Onkee ano, natu kale tu na omukumo nokupopya tatu ti: “Omuwa oye omukwathi gwandje, itandi tila sha. Omuntu ota ningi ndje shike?”—Heb. 13:6.
Oto yamukula ngiini?
• Omolwashike aapiya yaKalunga ya pumbwa omukumo?
• Shi na ko nasha nokukala nomukumo, otatu ilongo shike . . .
kaapiya aadhiginini mboka ya li ko manga Kristus inee ya?
kuJesus Kristus?
kAakriste yopetameko?
kAakriste ooyakwetu kunena?
[Ethano pepandja 23]
Jesus ka li a tila okwaaneka pomutenya aawiliki yelongelokalunga
[Ethano pepandja 25]
Jehova ote tu pe omukumo okuuvitha