Natu holeleni Jesus mokulonga aantu nohole
“Noshitonale inaku monika omuntu ta popi ngashika omulumentu ngwiyaka.”—JOHANNES 7:46.
1. Aantu oya li yi inyenge ngiini kelongo lyaJesus?
DHILADHILA owala nkene sha li shinyanyudha okupulakena kuJesus ta longo aantu. MOmbiimbeli otatu lesha kombinga yankene elongo lye lya gumu aantu mboka a longo. Pashiholelwa, omunyoli gwEvaangeli, Lukas, okwa hokolola kutya aantu yomoshilando moka Jesus a putukila ‘oya kuminwa oohapu oombwanawa dha zi mokana ke.’ Mateus okwa ti kutya aantu mboka ya li ya pulakene kuJesus sho e ya longo mEuvitho lyokOndundu, “oya kuminwa elongo lye.” Johannes naye okwa ti kutya aalangeli mboka ya li ya tumwa okukwata Jesus oya shuna iikaha yowala taya ti: “Noshitonale inaku monika omuntu ta popi ngashika omulumentu ngwiyaka.”—Luk. 4:22; Mat. 7:28; Joh. 7:46.
2. Jesus okwa li a longitha omikalo dhini okulonga aantu?
2 Aalangeli mboka kaya li ya puka. Nopwaahe na omalimbililo, Jesus okwa li Omulongi omunenenene ngoka a li ko nale. Okwa li a longo aantu momukalo gwa yela nawa nomupu nokapwa li pu na gumwe ngoka ta vulu oku mu pataneka. Okwa longitha omathaneko nomapulo nuukeka. Okwa li a longo aantu ayehe mboka a popi nayo, kutya nduno aanamadhina nenge oohepele. Osha li oshipu okuuva ko ooshili ndhoka e ya longo, nonando odha li dhomuule. Ihe iinima mbyoka hayo owala ya ningitha Jesus a kale Omulongi omunene.
Uukwatya wa pumbiwa unene mokulonga aantu owo ohole
3. E li omulongi, Jesus okwa li a yooloka ko ngiini kaawiliki yelongelokalunga yopethimbo lye?
3 Osha yela kutya mokati kaalongimpango nAafarisayi omwa li yamwe mboka aanandunge noye na ontseyo nowino noya li taya vulu okulonga aantu. Oshike sha li sha ningi omukalo gwaJesus gwokulonga aantu gu kale gwa yooloka ko kugwawo? Aawiliki yelongelokalunga yopethimbo ndyoka kaya li ye hole aantu yowala. Pehala lyaashono, oya li ye ya dhina noku ya tala ko ‘ye li kohi yethingo lyaKalunga.’ (Joh. 7:49) Mepingathano naashoka, Jesus okwa li e yu uvitile ohenda, oshoka oya li ya “hepekwa noya loloka ya fa oonzi dhaa na omusita.” (Mat. 9:36) Okwa li omunahenda nomunambili. Natango, aawiliki yelongelokalunga kaya li ye hole shili Kalunga. (Joh. 5:42) Ihe Jesus okwa li e hole He nokwa li a nyanyukwa okulonga ehalo lyaHe. Aawiliki yelongelokalunga oya li ya goyokitha oohapu dhaKalunga opo dhi popye ngaashi ya hala, ihe Jesus okwa li e hole “oohapu dhaKalunga.” Okwa li e dhi longo aantu, okwe dhi ya yelithile, okwa li e dhi popile nokukala metsokumwe nadho. (Luk. 11:28) Okwa li e hole unene aantu, naashoka osha li shi iwetikile mwaashoka e ya longo nankene u ungaunga nayo.
4, 5. (a) Omolwashike sha simana okulonga aantu nohole? (b) Omolwashike ontseyo nuunkulungu ya pumbiwa wo uuna tatu longo aantu?
4 Ongiini kombinga yetu? Tu li aalanduli yaKristus, otwa hala oku mu holela muukalele wetu nomonkalamwenyo yetu. (1 Pet. 2:21) Onkee ano, elalakano lyetu kali shi owala okulonga aantu ontseyo yOmbiimbeli, ihe otwa hala wo okukala tu na omaukwatya gaJehova, unene tuu ohole. Kutya nduno otu na ontseyo oyindji nenge onshona owala, nenge otu li oonkulungu mokulonga aantu nenge hasho, ohole yetu otayi ke tu kwathela unene opo tu adhe omitima dhaamboka tatu uvithile. Opo tu shi pondole shili miilonga yetu yokuninga aantu aalongwa, otu na okuholela Jesus tu ya longe nohole.
5 Ihe opo tu kale aalongi aawanawa, otwa pumbwa ontseyo yaashoka tatu longo aantu notwa pumbwa uunkulungu wokulonga ontseyo ndjoka. Jesus okwa li a kwathele aalongwa ye ya kale nontseyo nosho wo nuunkulungu, nokupitila mehangano lye Jehova ote tu kwathele tu shi ninge wo kunena. (Lesha Jesaja 54:13; Lukas 12:42.) Nonando ongaaka, elalakano lyetu oli na okukala lyokulonga aantu tashi zi komutima, haku ya leshela owala. Ngele otu na ontseyo, uunkulungu nohole, otatu ka mona iizemo yi li nawa lela. Ano ongiini tatu vulu okuulukila aantu ohole uuna tatu ya longo? Jesus naalongwa ye ya li ye shi ningi ngiini? Natu tale.
Otu na okukala tu hole Jehova
6. Ohatu popi ngiini kombinga yomuntu ngoka tu hole?
6 Ohatu nyanyukilwa okupopya kombinga yiinima mbyoka tu hole, naantu otaya vulu okumona enyanyu lyetu nuulaadhi wetu ngele tatu shi ningi. Shika ohashi kala unene ngaaka ngele tatu popi kombinga yomuntu ngoka tu hole. Olundji ohatu kala nehalo okulombwela yalwe shoka tu shi kombinga yomuntu ngoka. Ohatu mu tanga noku mu simaneka noku mu popila muuwanawa. Ohatu shi ningi molwaashoka otwa hala yalwe ya kale ye hole omuntu ngoka nomaukwatya ge naanaa ngaashi tse tu mu hole.
7. Ohole yaJesus yokuhola Kalunga oye mu inyengitha a ninge shike?
7 Manga inaatu kwathela yalwe ya kale ye hole Jehova, otu na oku mu tseya nokukala tu mu hole. Oshi li ngaaka, molwaashoka elongelokalunga lyashili olyi ikolelela kohole yokuhola Kalunga. (Mat. 22:36-38) Jesus okwa tula po oshiholelwa sha gwanenena. Okwa li e hole Jehova nomutima gwe aguhe, nomadhiladhilo ge agehe, nomwenyo gwe aguhe nonoonkondo dhe adhihe. Jesus okwa li e shi He nawa, molwaashoka okwa li a kala pamwe naye megulu oomvula odhindji, tashi vulika omamiliyona omayovi. Oshizemo osha li shike? Okwa ti: “Ondi hole Tate.” (Joh. 14:31) Jesus okwa li u ulike ohole ndjoka mwaashoka a popi nokwa ningi. Oye mu inyengitha a longe aluhe shoka sho opalela Kalunga. (Joh. 8:29) Oye mu ningitha a pangule aawiliki yelongelokalunga aafudhime mboka yi iti kutya oye lile po Kalunga. Oye mu ningitha wo a popye kombinga yaJehova nokukwathela yalwe ya tseye Jehova nokukala ye mu hole.
8. Ohole yokuhola Kalunga oya li yi inyengitha aalongwa yaJesus ya ninge shike?
8 Ngaashi Jesus, aalongwa ye yomethelemumvo lyotango oya li ye hole Jehova, nohole ndjoka oya li ye yi inyengitha yu uvithe onkundana ombwanawa nuulaadhi nonehwamo. Oya li yu udhitha Jerusalem nelongo lyawo, nonando aakwatelikomeho yelongelokalunga oya li taye ya kondjitha. Aalongwa kaya li taya vulu okumwenena shoka ya mona naashoka yu uvu. (Iil. 4:20; 5:28) Oya li ye shi kutya Jehova oku li pamwe nayo note ke ya laleka nuuyamba, nokwa li e shi ningi shili. Dhoshili, konyala oomvula 30 konima yeso lyaJesus, omuyapostoli Paulus okwa li a nyola kutya onkundana ombwanawa oya li yu uvithilwa “aantu ayehe yomuuyuni.”—Kol. 1:23.
9. Ongiini tatu vulu okukoleka ohole yetu yokuhola Kalunga?
9 Ngele otwa hala lela oku shi pondola tu li aalongi, natse otu na wo okushilipaleka opo tu tsikile okukoleka ohole yetu yokuhola Kalunga. Ongiini tatu vulu oku shi ninga? Omokupopya olundji naKalunga okupitila megalikano. Otatu koleke wo ohole yetu yokuhola Kalunga mokukonakona Oohapu dhe, mokulesha iileshomwa ya kankamena kOmbiimbeli nomokukala pokugongala kwopaKriste. Ngele ontseyo yetu yokutseya Kalunga tayi koko, omitima dhetu otadhi ka kala dhu udha ohole yoku mu hola. Opo nduno, ngele tatu ulike ohole yetu yokuhola Kalunga okupitila moohapu dhetu nomiilonga yetu, yalwe otaye ke shi mona notaya vulu okuhililwa kuye.—Lesha Episalomi 104:33, 34.
Otu na okukala tu hole shoka hatu longo aantu
10. Oshike tashi ndhindhilikitha omulongi omwaanawa?
10 Oshinima shoka tashi ndhindhilikitha omulongi omwaanawa osho kutya oku hole shoka ha longo aantu. Oku na okwiitaala kutya shoka ta longo aantu oshoshili noshi na oshilonga nosho wo ongushu. Ngele omulongi oku na ko nasha naashoka ta longo aantu, uulaadhi we otawu ka kala wu iwetikile nokunwetha mo unene aantu mboka ta longo. Ihe ngele omulongi ke na ko nasha naashoka ta longo aantu, nena ongiini ta vulu okutegelela aalongwa ye ya kale nolupandu lwaashoka te ya longo? Ino dhiladhila nando kutya oshiholelwa shoye wu li omulongi gwOohapu dhaKalunga itashi ka nwetha mo aalongwa yoye. Jesus okwa ti: “Omulongwa kehe ngoka a pwa okulongwa, oku thike pomulongi gwe.”—Luk. 6:40.
11. Omolwashike Jesus a li e hole shoka a longo aantu?
11 Jesus okwa li e hole shoka a longo aantu. Okwa li e shi kutya shoka ta longo aantu oshi na ongushu. Okwa li e ya longo oshili kombinga yaHe yomegulu, “oohapu dhaKalunga” nosho wo “oohapu ndhoka tadhi gandja omwenyo gwaaluhe.” (Joh. 3:34; 6:68) Ngaashi uuyelele wa tsa nawa, oshili ndjoka Jesus a longo aantu oya li ya aneke pomutenya shoka oshiwinayi noya tsu omuthindo shoka shu uka. Oya li ya hekeleke nokugandja etegameno kaaifupipiki mboka ya li ya pukithwa kaawiliki yomalongelokalunga noya hepekwa kOndiaboli. (Iil. 10:38) Ohole yaJesus yokuhola oshili kaya li owala yi iwetikile momalongo ge, ihe oya li wo yi iwetikile mwaashihe shoka a ningi.
12. Omuyapostoli Paulus okwa li a tala ko ngiini onkundana ombwanawa?
12 Ngaashi naanaa Jesus a li e hole oshili ndjoka a longo aantu, aalongwa ye nayo oya li ye hole unene oshili kombinga yaJehova naKristus noya li ye yi lenga, nomolwaashoka aapataneki kaya li taya vulu oku ya teya omukumo ye yi uvithile yalwe. Paulus okwa li a nyolele Aakriste ooyakwawo muRoma a ti: “Onda hala oku mú uvithila wo elaka etoye . . . Ngame inandi sa evaangeli ohoni, oshoka olyo oonkondo dhaKalunga tadhi hupitha ayehe mboka yi itaala.” (Rom. 1:15, 16) Paulus okwa li a tala ko okuuvitha oshili ku li etumba. Okwa nyola a ti: “Ngame tuu nguka, . . . onda pewa kesilohenda, ndi uvithile aapagani elaka etoye lyuuyamba waKristus kaau shi kuyelekwa.” (Ef. 3:8) Kashi li oshidhigu okudhiladhila kombinga yuulaadhi waPaulus sho a longo yalwe shi na ko nasha naJehova nomalalakano ge.
13. Omatompelo geni tu na opo tu kale tu hole onkundana ombwanawa?
13 Onkundana ombwanawa ndjoka yi li mOohapu dhaKalunga otayi tu kwathele tu tseye nawa Omushiti nokukala tu na ekwatathano lyopahole naye. Onkundana ndjoka ombwanawa otayi tu pe omayamukulo taga mbilipaleke komapulo ga simana monkalamwenyo noyi na oonkondo okulundulula onkalamwenyo yetu, oku tu pa etegameno noku tu koleka momathimbo omadhigu. Kakele kaashono, otayi tu ulukile nkene tatu vulu okumona onkalamwenyo tayi ti sha ndjoka itaayi hulu po nando. Kapu na ontseyo yilwe ndjoka yi na ongushu nenge ya simana yi vule onkundana ombwanawa. Oyo omagano ge na ondilo unene ngoka twa pewa notayi tu etele enyanyu enene. Uuna tatu topola omagano ngoka nayalwe, otashi tu etele enyanyu lya gwedhwa po.—Iil. 20:35.
14. Ongiini tatu vulu okukoleka ohole yetu yokuhola shoka hatu longo aantu?
14 Oshike to vulu okuninga opo wu koleke natango ohole yoye yokuhola onkundana ombwanawa? Uuna to lesha Oohapu dhaKalunga, kankama po manga e to tedhatedha kwaashoka to lesha. Pashiholelwa, dhiladhila ando wu li pamwe naJesus pethimbo lyuukalele we kombanda yevi nenge wu li omweendi pamwe nomuyapostoli Paulus. Dhiladhila ando wu li muuyuni uupe nokudhiladhila nkene onkalamwenyo tayi ka kala ya yooloka ko kwaandjoka yonena. Dhiladhila kombinga yomayambeko ngoka wa mona molwaashoka ho kala metsokumwe nonkundana ombwanawa. Ngele owu hole unene onkundana ombwanawa, aakonakonimbiimbeli yoye otaye ke shi mona. Onkee ano, otu na etompelo ewanawa okutedhatedha kwaashoka twi ilonga nokukala tu na ko nasha naashoka hatu longo aantu.—Lesha 1 Timoteus 4:15, 16.
Otu na okukala tu hole aantu
15. Omolwashike omulongi e na okukala e hole aalongwa ye?
15 Omulongi omwaanawa oha gandja ompito kaalongwa ye ya kuthe ombinga ya manguluka mwaashoka tayi ilongo nokunyanyukilwa okugandja omatyokosha. Omulongi ngoka e hole aalongwa ye ohe ya pe ontseyo molwaashoka oku na ko nasha nayo shili. Omulongi omwaanawa oha kaleke momadhiladhilo oompumbwe dhaalongwa ye nohe ya longo shi ikolelela keuvoko lyawo. Oku na ko nasha nomagano gokwiilonga gaalongwa ye nosho wo noonkalo dhawo. Uuna aalongi ye na ohole ya tya ngaaka, aalongwa otaye ke shi mona notaya ka nyanyukilwa okwiilonga.
16. Jesus okwa li u ulukile aantu ohole momikalo dhini?
16 Jesus okwa li u ulike ohole ya tya ngaaka. Okwa li u ulike ohole onenenene sho a gandja omwenyo gwe gwa gwanenena opo aantu ya vule okuhupithwa. (Joh. 15:13) Pethimbo lyuukalele we, Jesus okwa li a longo nopwaahe na ezimbuko okusila aantu oshimpwiyu palutu, ihe unene tuu pambepo. Pehala lyokutegelela aantu ye ye kuye, okwa li e ende ookilometa omathele kolupadhi opo e yu uvithile onkundana ombwaanawa. (Mat. 4:23-25; Luk. 8:1) Okwa li omwiidhidhimiki nokwa li hu uvu ko omaudhigu gaantu. Sho aalongwa ye ya li ya pumbwa okupukululwa, okwe shi ningi nohole. (Mark. 9:33-37) Okwa li e ya ladhipike mokukala e na einekelo muyo kutya otaya ka kala aauvithi yonkundana ombwanawa mboka taye shi pondola. Kapwa li nando omulongi e na ohole yi vule yaJesus. Ohole ndjoka a li u ulukile aalongwa ye oya li ye ya ningitha ya kale ye mu hole nokudhiginina iipango ye.—Lesha Johannes 14:15.
17. Ongiini aalongwa yaJesus ya li yu ulike ohole yawo yokuhola yalwe?
17 Ngaashi Jesus, aalongwa ye nayo oya li ye hole unene mboka ya longo. Nonando oya li ya hepekwa noomwenyo dhawo odha li moshiponga, oya li ya yakula yalwe noye shi pondola mokuuvitha onkundana ombwanawa. Kaya li tuu ye hole mboka ya kwathele pambepo! Oohapu dhomuyapostoli Paulus otadhi gumu omitima dhetu sho a ti: “Otwa kala mokati keni nombili, ngaashi meme ta sile oshimpwiyu oyana. Omolwohole yetu yoku mú hola inatu ya kune owala nelaka etoye lya za kuKalunga, ihe otwa hupula wo oomwenyo dhetu omolweni.”—1 Tes. 2:7, 8.
18, 19. (a) Omolwashike tu na ehalo lyokwiiyamba miilonga yokuuvitha? (b) Gandja oshiholelwa shoka tashi ulike kutya yalwe ohaya mono ohole ndjoka hatu ulike.
18 Sha faathana, pethimbo lyetu, Oonzapo dhaJehova ohadhi uvithile aantu muuyuni auhe dhi konge mboka ya hala okutseya nokulongela Kalunga. Oomvula 17 dha piti, otwa longitha oowili dhi vulithe pomamiliyona eyovi mokuuvithila aantu noku ya ninga aalongwa, notatu tsikile oku shi ninga. Ohatu shi ningi nehalo ewanawa nonando ohatu longitha ethimbo lyetu noonkondo dhetu miilonga mbyoka nosho wo iiniwe yetu yopamaliko. Ngaashi owala Jesus, otu shi shi kutya Tate yetu omunahole gwomegulu okwa hala aantu ya mone ontseyo ndjoka tayi fala komwenyo gwaaluhe. (Joh. 17:3; 1 Tim. 2:3, 4) Ohole yetu ohayi tu inyengitha tu kwathele mboka ye na omitima dhu uka ya tseye Jehova noya kale ye mu hole ngaashi tse.
19 Yalwe ohaya ndhindhilike ohole ndjoka tu na. Pashiholelwa, omumwameme gumwe moAmerika okwa li a nyola oontumwafo okuhekeleka mboka ya silwa. Omulumentu gumwe okwa galula ombapila ndjoka a ti: “Onda li nda kumwa noonkondo okumona omuntu ta ningi oonkambadhala dha mana mo okunyolela ombapila omuntu ngoka keehe shi nando nale e mu hekeleke i idhidhimike uuna e li muudhigu. Ondi shi wete kutya owu hole aantu ooyakweni nosho wo Kalunga ngoka ha wilike aantu mokukalamwenyo kwawo.”
20. Osha simana shi thike peni okulonga aantu nohole?
20 Ohaku tiwa kutya ngele omuntu ta longo sha nohole nosho wo nuunkulungu, oshizemo otashi ka kala sha dhenga mbanda. Uuna tatu longo aakonakoni yetu ohatu kambadhala tu ya kwathele ya kale ye shi Jehova noya kale ye mu hole. Eeno, opo tu kale hatu longo yalwe nuunkulungu, otwa pumbwa ohole yopatatu, ohole yokuhola Kalunga, yokuhola oshili nosho wo ohole yokuhola aantu. Ngele tatu kokeke ohole ya tya ngaaka noku yi ulika muukalele wetu, ohatu kala tu uvite enyanyu ndyoka hali zi mokugandja nokukala twa mbilipalelwa okutseya kutya ohatu holele Jesus nokunyanyudha Jehova.
Oto yamukula ngiini?
• Ngele tatu longo aantu kombinga yonkundana ombwanawa, omolwashike sha simana tu kale . . .
nohole yokuhola Kalunga?
nohole yokuhola shoka hatu ya longo?
nohole yokuhola mboka tatu longo?
[Ethano pepandja 17]
Omolwashike omukalo gwaJesus gwokulonga aantu gwa li gwa yooloka ko kwaangoka gwAafarisayi?
[Ethano pepandja 20]
Opo tu kale aalongi aawanawa, otwa pumbwa ontseyo, uunkulungu, ihe unene tuu ohole