Ontumwafo ya za kOlutuwiliki

Kooitaali ooyakwetu

Tu li aalongeli yaJehova, otu hole Oohapu dhe, Ombiimbeli. Otwa tompwa kutya otadhi tu pe ondjokonona yi li paushili, ewiliko li shi okwiinekelwa nuunzapo wa yela kutya Jehova oku hole aantu. (Episalomi 119:105; Lukas 1:3; 1 Johannes 4:19) Otwa halelela okukwathela aantu yi ilonge oshili yi na ondilo ndjoka yi li mOohapu dhaKalunga. Omolwetompelo ndyoka, otwa nyanyukwa oku mu pa embo ndika li na oshipalanyolo: “Embo lyandje lyokwiilonga Ombiimbeli.” Ngashingeyi natu mu lombwele paufupi kombinga yalyo.

Embo ndika olya nuninwa unene aanona. Ihe nonando ongaaka, otali vulu wo okulongithwa kaakuluntu mboka ye na ehalo lyokwiilonga oshindji kombinga yOmbiimbeli. Molwaashoka olya nuninwa aantu ayehe, osha yela kutya atuheni otatu ki ilonga mo sha miileshwa mbyoka yi li mo, shoka tashi ke tu kwathela tu kale tu na enyanyu lyashili.

Embo ndika otali hokolola kombinga yaantu okuza peshito, tali longitha omahokololo ga za mOmbiimbeli. Otwa ninga oonkambadhala tu hokolole omahokololo ngoka melandulathano, momukalo gwa yela nomupu ngaashi tashi vulika.

Membo ndika kamu na owala omahokololo gOmbiimbeli. Oohapu dhalyo nomathano, oga longekidhwa momukalo tagu mwenyopaleke omahokololo gOmbiimbeli notagu holola omaiyuvo gaamboka ya popiwa mo.

Embo ndika otali tu kwathele tu mone nkene Ombiimbeli ya hokolola aantu mboka ya vulika kuJehova naamboka inaaya vulika kuye. Otali tu inyengitha wo tu ilonge sha miiholelwa yawo. (Aaroma 15:4; 1 Aakorinto 10:6) Olya topolwa miitopolwa 14. Petameko lyoshitopolwa kehe opu na engongo lyaashoka tatu ki ilonga miileshwa.

Ngele owu li omuvali, oto vulu okulesha oshileshwa nomumwoye e tamu kundathana omathano ngoka ge shi pamba. Opo nduno tamu lesha omanyolo gOmbiimbeli ngoka ge li mo. Kwathela omumwoye a mone kutya ashihe shoka ti ilongo mo osha kankamena kOmbiimbeli. Oto vulu okulongitha omukalo gwa faathana wu kwathele omukuluntu ngoka a hala okuuva ko shoka Ombiimbeli tayi ti.

Otwi inekela kutya embo ndika otali ka kwathela ayehe kutya nduno aanona nenge aakuluntu, yi ilonge sha mOohapu dhaKalunga noya tule miilonga shoka tayi ilongo moonkalamwenyo dhawo. Kungeyi, ayehe otaya ka longela Kalunga ye li iilyo yuukwanegumbo we uuholike.