Kalunga okwa shiti egulu nevi

Jehova Kalunga oye Omushiti gwetu. Oye a shita iinima ayihe, mbyoka hatu vulu okumona naambyoka ihaatu vulu okumona. Manga inaa shita iinima mbyoka hatu vulu okumona, okwa shiti aayengeli oyendjiyendji. Aayengeli aantu ya tya ngiini? Aayengeli oyo aantu yopambepo mboka ya shitwa kuJehova. Ihatu vulu oku ya mona, ngaashi owala ihaatu vulu okumona Jehova Kalunga. Jehova okwa kala ha kwathelwa komuyengeli ngoka a shiti tango. Okwe mu kwathele okushita oonyothi, oopulanete niinima yilwe ayihe. Yimwe yomoopulanete ndhoka oyo evi, ndyoka li li egumbo lyetu ewanawa.

Jehova kombanda yevi okwa shitile ko aantu niinamwenyo. Okwa shiti etango li minikile kombanda yevi. Okwa shiti oondundu, omafuta nosho wo omilonga.

Okuza mpono oshike sha ka landula ko? Jehova okwa ti: ‘Kevi otandi ka menithila ko omwiidhi niimeno nosho wo omiti.’ Kevi okwa mene wo omaludhi ogendji giiyimati, iikwamboga noongala. Jehova okwa shiti iinamwenyo ayihe, ngaashi mbyoka hayi tuka, yomomeya, hayi ipwedha naambyoka hayi kookaya. Okwa shiti wo iinamwenyo iishona ngaashi uulimba, niinene ngaashi oondjamba. Oshinamwenyo shini wu hole?

Jehova okwa lombwele omuyengeli ngoka a shiti tango a ti: ‘Natu shite aantu.’ Aantu otaya ka kala ya yooloka ko kiinamwenyo. Otaya ka vula okutota iinima, okupopya, okuyola nosho wo okugalikana. Otaya ka tonatela evi niinamwenyo. Owu shi kutya omuntu gwotango okwa li lye. Natu taleni.