Omapulo ga za kaaleshi

Oshiilongomwa shashike shi li mOmayeletumbulo 24:27?

Omunyoli gwOmayeletumbulo ota gandja omayele kaamati aagundjuka ta ti: “Opaleka iilonga yoye pondje, ngoye u tule epya lyoye melandulathano; opo ihe oto ka tunga egumbo lyoye.” Oshitsa shini tashi tsuwa omuthindo movelise ndjika? Omulumentu oku na okwiilongekidha nawa manga inaa hokana nokutameka uukwanegumbo we mwene noku na okukaleka momadhiladhilo oshinakugwanithwa shoka a taalela.

Ovelise ndjika oya li ya fatululwa nale kutya omusamane ke na owala okukala ta gandja eitulomo unene kiilonga ye, ihe oku na wo okuladhipika nenge okutsa omukumo uukwanegumbo we pambepo. Nonando edhiladhilo ndyoka oli li mondjila nolyopamanyolo, halyo naanaa enenedhiladhilo lyovelise ndjika. Omolwashike mbela? Natu tale komatompelo gaali.

Lyotango, ovelise ndjika itayi popi kombinga yokuladhipika nenge yokutsa omukumo uukwanegumbo mboka wa dhikwa po nale. Pehala lyaashono, otayi popi okutunga egumbo lyo lyenelyene. Oshitya “tunga” otashi vulu wo okulongithwa pathaneko, meityo lyokutunga nenge okudhika egumbo, sha hala okutya, okuhokana nokumona aanona.

Oshitiyali, ovelise otayi popi iinima melandulathano, ya fa tayi ti: “Tango ninga shika, e to ningi ihe oshikwawo.” Mbela Omayeletumbulo otage tu ladhipike tu longe tango iilonga yetu yopaumwene, nokonima oyopambepo? Hasho nando!

Pethimbo lyOmbiimbeli, omulumentu ngoka a hala ‘okutunga egumbo’ lye, nenge okutota po uukwanegumbo we ngele a hokana, oku na okwiipula ta ti: ‘Ondi ilongekidha ngaa okusila oshimpwiyu omukulukadhi naanona mboka tatu ka kala tu na?’ Omanga inaa tameka uukwanegumbo, oku na okulonga epya lye tango. Onkee ano Ombiimbeli otayi ti: ‘Tula epya lyoye melandulathano; opo ihe oto ka tunga egumbo lyoye.’ Mbela ekotampango ndyoka otali longo nokunena?

Eeno, otali longo. Omulumentu ngoka a hala okuhokana okwa pumbwa okwiilongekidhila oshinakugwanithwa shoka. Ngele ina lemana, oku na okulonga a sile oshimpwiyu uukwanegumbo we. Ihe shika inashi kwatela mo owala oku wu sila oshimpwiyu palutu. Oohapu dhaKalunga otadhi ti kutya omulumentu ngoka iha sile oshimpwiyu uukwanegumbo we palutu, pamadhiladhilo nopambepo oku vulike komupagani. (1 Tim. 5:8) Onkee ano, uuna omulumentu a hala okuhokana nokukala e na uukwanegumbo, oku na okwiipula omapulo taga landula: ‘Mbela ondi ilongekidha okusila oshimpwiyu uukwanegumbo wandje palutu? Mbela ondi ilongekidha okukwatela komeho iinima yopambepo muukwanegumbo? Otandi ka vula ngaa aluhe okukwatela komeho ekonakonombiimbeli nomukulukadhi naanona?’ Oohapu dhaKalunga otadhi tsu omuthindo kutya okuninga ngaaka osha simanenena. — Deut. 6:6-8; Ef. 6:4.

Onkee ano, omumati ngoka a hala okuhokana oku na okwiipula nawa kombinga yekotampango ndyoka li li mOmayeletumbulo 24:27. Omukadhona naye oku na wo okwiipula ngele okwi ilongekidha tuu okukala omukulukadhi nokumona aanona. Aagundjuka mboka opo ya hokana otaya vulu okwiipula omapulo ga faathana ngele otaya dhiladhila okuputudha aanona. (Luk. 14:28) Uuna oshigwana shaKalunga tashi kala metsokumwe nomayele ngoka ga nwethwa mo otashi ka henuka oluhodhi nokunyanyukilwa onkalamwenyo yuukwanegumbo.

[Oohapu dha simana pepandja 10]

Omapulo geni omumati e na okwiipula manga inaa hokana?