Omapulo ga za kaaleshi

Mbela Omuuvithi 5:8, ota popi kombinga yaapangeli yopantu nenge okombinga yaJehova?

Ovelise ndjoka ohokithi otayi ti: “Ngele to mono ko ehepeko lyoohepele negoyokitho lyomautho nuuyuuki moshilongo, ino kuminwa oshinima shoka, oshoka omunene ota tonatele omunene omukwawo, naanene ishewe ye ya vule taye ya tonatele.” — Omuuv. 5:8.

Pataloko lyopantu, otashi vulika tu dhiladhile kutya ovelise ndjoka otayi popi owala kombinga yaantu mboka ye na oonkondopangelo mepangelo. Ihe ngele otwe shi konakona muule, otatu ka mona kutya otayi popi wo oshili kombinga yaJehova ndjoka tayi vulu oku tu hekeleka noku tu shilipaleka.

Omuuvithi 5:8 ota popi kombinga yomupangeli ngoka ha thindile oohepele kongudhi, ye ihe dhi ningile shoka shu uka. Omupangeli oku na okudhimbulukwa kutya okwa talika kugumwe ngoka e na ondondo nenge oonkondopangelo mepangelo dhi vule dhe. Otashi vulika nokuli pu na yalwe ye na oondondo dhi vule po mpoka. Shiyemateka, ngele tashi ya komapangelo gopantu, aapangeli oyendji ohashi vulika ya kale ye na uulingilingi, shoka hashi monitha iihuna aapangelwa yawo.

Ihe nonando onkalo oyi kale ya fa itaayi lunduluka, otatu vulu okuhekelekwa mokutseya kutya Jehova ‘oku wete aapangeli,’ (NW) yomapangelo gopantu shoka taya ningi. Otatu vulu okupula Kalunga ekwatho noku mu tsika iimpwiyu yetu. (Eps. 55:22; Fil. 4:6, 7) Otu shi kutya “Omuwa ota tonatele uuyuni auhe, a nkondopaleke mboka ye na omitima dhe mu inekela.” — 2 Ondjal. 16:9.

Onkee ano, Omuuvithi 5:8 ote tu dhimbulukitha kutya otu li muuyuni wa tya ngiini nosho wo kutya opu na aluhe ngoka e na oonkondopangelo e vule aantu ayehe. Shoka sha simanenena, ovelise ndjoka otayi tu kwathele tu dhimbulukwe uushili mbuka kutya Jehova oye omunenenene, ano Omunamapangeloagehe. Ngashingeyi ota pangele okupitila mOmwana, Jesus Kristus, Omukwaniilwa gwUukwaniilwa We. Omunankondoawike, ngoka ta tonatela aantu ayehe, omuyuuki thiluthilu nosho wo Omwana.