Aantu mboka haya kala aadhiginini kuJehova, ohaya kala ya nyanyukwa

1-2. (a) Omapangelo gamwe ohaga pataneke ngiini oshigwana shaJehova, ihe oshigwana she ohashi inyenge ngiini? (b) Omolwashike tatu vulu okukala twa nyanyukwa nonando otatu hepekwa? (Gandja wo etyokosha kethano lyokombanda.)

KUNENA, iilonga yetu yokuuvitha oya ngambekwa nenge yi indikwa miilongo yi vulithe 30. Miilongo yimwe mbyoka, aapangeli oya tula aamwatate naamwameme moondholongo. Mbela oya ninga sha sha puka? Jehova oku shi kutya inaya ninga sha sha puka. Ihe shoka ya ninga, okulesha nokukonakona Ombiimbeli, okulombwela yalwe kombinga yeitaalo lyawo nosho wo okugongala pamwe nooitaali ooyakwawo. Oya tindi wo okukutha ombinga miinima yopapolotika. Kutya nduno oya pita momapataneko ga fa peni, aapiya mbaka aadhiginini yaKalunga oya tsikile okukala aadhigininib noye shi ulike sho ya tsikile okukala aadhiginini. Noshinima shono ngawo ohashi ya nyanyudha lela!

² Otashi vulika wa mona omathano gOonzapo dhimwe oolaadhi tadhi imemeha. Odha nyanyukwa molwaashoka odhi shi kutya Jehova okwe dhi hokwa sho dha kala oondhiginini. (1 Ondjal. 29:17a) Jesus okwa ti: “Aanelago oomboka taa hepekwa molwaashoka taa longo uuwanawa . . . Nyanyukweni, ligoleni pombanda, oshoka ondjambi yeni onene.” — Mat. 5:10-12.

OYE LI OSHIHOLELWA KUTSE

3. Ngaashi sha popiwa mIilonga 4:19, 20, aayapostoli oya li yi inyenge ngiini sho taya hepekwa methelemumvo lyotango, nomolwashike ya ningi ngawo?

³ Aamwatate naamwameme nayo oye li monkalo ngaashi ndjoka yaayapostoli ya li yi idhidhimikile methelemumvo lyotango sho ya li taya hepekwa molwaashono taya uvitha kombinga yaJesus. Aapanguli mompangu yopombanda yAajuda oya kala “noku ya indika yaa longe noyaa popye we nando medhina lyaJesus.” (Iil. 4:18; 5:27, 28, 40) Ihe aayapostoli oyi inyenge ngiini? (Lesha Iilonga 4:19, 20.) Oya li ye shi kutya opu na gumwe e na oonkondopangelo e vule aapanguli mboka, okwe ya ‘lombwele yu uvithile aantu ayehe evaangeli noye ya tseyithile nawanawa’ kombinga yaKristus. (Iil. 10:42) Onkee aapopikalelipo yawo, Petrus naJohannes, oya popi nuulaadhi kutya yo otaya vulika kuKalunga pehala lyokuvulika kaapanguli mboka, noye shi koleke kutya itaye etha po okupopya kombinga yaJesus. Kungawo, oya fa ya li taya pula aapanguli mboka taya ti: ‘Sho tamu dhiladhila iipango yeni oyi vule iipango yaKalunga?’

4. Shi ikolelela kIilonga 5:27-29, oshiholelwa shini aayapostoli ya tulila po Aakriste ayehe, nongiini tatu vulu okuya holela?

⁴ Aayapostoli oya tulila po Aakriste ayehe oshiholelwa oshiwanawa shoka Aakriste ya kala nokulandula, ano ‘shokuvulika kuKalunga, ihe hakaantu.’ (Lesha Iilonga 5:27-29.) Konima sho ya dhengwa, sho ya kala aadhiginini aayapostoli oya zi mo mompangu yopombanda yAajuda, “ya nyanyukwa noonkondo, sho Kalunga e ya tala ya gwana okuhepekelwa edhina lyaJesus” noya tsikile okuuvitha! — Iilonga 5:40-42.

5. Omapulo geni twa pumbwa okuyamukula?

⁵ Oshiholelwa shono aayapostoli ya tula po ohashi pendutha omapulo gamwe. Pashiholelwa, etokolo ndyono ya li ya ningi lyokuvulika kuKalunga ihe hakaantu ota li tsu kumwe ngiini noshipango shomOmbiimbeli ‘shomuntu kehe a vulike kaapangeli mboka taye mu pangele’? (Rom. 13:1) Ongiini tatu vulu okukala hatu “vulika kaaleli nokaapangeli,” ngaashi omuyapostoli Paulus a li a popi, nopethimbo opo tuu mpoka otu li aadhiginini kuKalunga, ngono e li omupangeli gwetu a shiga ko? — Titus 3:1.

AAPANGELI MBOKA TAYE TU PANGELE

6. (a) Shi ikolelela kAaroma 13:1, oshinakugwanithwa shini tu na ngele tashi ya kaapangeli? (b) Aapangeli ayehe yopantu oye na oonkondopangelo dhi thike peni?

⁶ Lesha Aaroma 13:1. Aakriste oye na oshinakugwanithwa shokuvulika kaapangeli mboka taye ya pangele. Ohaya kaleke po ombili nohaya shilipaleke kutya aantu otaya vulika kompango nokuli ndjoka hayi gamene oshigwana shaJehova. (Eh. 12:16) Onkee, otatu kumagidhwa tu gandje “oompale nomafendelo, tu vulike notu ya simaneke ngaashi taye shi pula. (Rom. 13:7) Ihe, omapangelo ngoka oge na owala uuthemba, molwaashoka Jehova e ga etha ga kale ge wu na. Jesus okwa li a yelitha nawa ekotampango ndyoka sho a li ta pulwapulwa komupangeli gwaRoma Pontius Pilatus. Sho Pilatus a li a popi kutya ota vulu okutokola okudhipagitha Jesus, Jesus okwe mu yamukula a ti: “Ku na oonkondo dhokupangula ndje, ngele ino dhi pewa kuKalunga.” (Joh. 19:11) Oonkondopangelo dhaaleli yopantu nodhaanapolotika yokunena odha ngambekwa, ngaashi owala dhaPilatus.

7. Omoonkalo dhini kaatu na okuvulika kaapangeli yopantu, noshike ye na okudhimbulukwa?

⁷ Aakriste oye na okuvulika kaapangeli yopantu, uuna oompango dhawo kaadhi li ompinge noompango dhaKalunga. Ihe itatu vulu okuvulika kaantu ngele otaye tu pula tu ninge shoka Kalunga i indika nenge taye tu indike okuninga shoka Kalunga a pitika. Pashiholelwa, otashi vulika ya pule aalumentu aagundjuka ya wayimine omatanga gegameno.c Nenge yi indike Ombiimbeli yetu niileshomwa yetu ya kankamena kOmbiimbeli, oku tu keelela tu uvithe nokugongala pamwe tu longele Jehova. Uuna aapangeli taya longitha nayi oonkondopangelo dhawo, ngaashi okuhepeka aalongwa yaKristus, otaye ki ihokolola kuKalunga. Jehova oku ya wete! — Omuuv. 5:8.

8. Eyooloko lini li li pokati kaJehova ‘naapangeli’ yopantu?

⁸ ‘Aapangeli’ yopantu oye na oonkondo dhokupangela nohaya ningi iinima oyindji iiwanawa. Ihe shoka inashi hala okutya oya gwanenena nenge ye na oonkondopangelo dha shiga ko. Oku na Omupangeli ngoka a gwanenena noku vule kokule aapangeli ayehe. Omupangeli ngoka oJehova. Ombiimbeli oya popya lwiikando ine kutya Jehova oKalunga ‘Omukombandambanda.’ — Dan. 7:18, 22, 25, 27.

‘KALUNGA OMUKOMBANDAMBANDA’

9. Omuhunganeki Daniel okwa li a mono shike momamoniko?

⁹ Omuhunganeki Daniel okwa li a mono omamoniko ngoka ga li ge shi ulike sha yela kutya Jehova oku na oonkondopangelo e vule omapangelo agehe. Tango, Daniel okwa li a mono iilikama ine iinene mbyoka tayi thaneke omapangelo muuyuni ngoka ga li ko nale, Babilonia, Medo-Persia, Greka, Roma nosho wo ndyoka tali pangele kunena, Anglo-Amerika. (Dan. 7:1-3, 17) Nokonima Daniel okwa li a mono Jehova a kuutumba koshipangelapundi she mompangu megulu. (Dan. 7:9, 10) Shono omuhunganeki ngoka omudhiginini a li a mono, oshi li elondodho kaapangeli yokunena.

10. Shi ikolelela kuDaniel 7:13, 14, 27, Jehova okwa pe oolye oonkondopangelo dhokupangela kombanda yevi, naashono otashi ulike shike kombinga ye?

¹⁰ Lesha Daniel 7:13, 14, 27. Moovelise ndhoka Kalunga okwa kutha omapangelo gopantu oonkondo dhokupangela e te dhi gandja kwaamboka ya gwana oku dhi pewa noye na oonkondo ye ga vule. Aantu mboka oyeni? ‘Ogumwe a fa omuntu,’ Jesus Kristus nosho wo ‘aantu yaKalunga Omukombandambanda,’ aagwayekwa 144 000 mboka taya ka pangela “ndongo aluhe.” (Dan. 7:18) Osha yela kutya Jehova oye ‘Omukombandambanda,’ oshoka oye owala e na uuthemba woku katuka onkatu ndjoka.

11. Daniel okwa nyola ishewe kombinga yashike shoka tashi ulike kutya Jehova oku na oonkondopangelo dha shiga ko e vule iigwana?

¹¹ Oshiningwanima shoka Daniel a li a mono memoniko, otashi tsu kumwe noshinima shoka a li popi metetekelo. Daniel okwa ti: “Kalunga komegulu . . .  ota kwaniileke aakwaniilwa noku ya shundula.” Okwa nyola wo a ti: “Kalunga gwokombandambanda oku na oonkondo okupangela uukwaniilwa auhe wopantu kombanda yevi, ote u pe ngoka ye mwene e mu hogolola.” (Dan. 2:19-21; 4:17) Mbela opu na iikando yimwe Jehova a li a hulitha po aapangeli nenge a langeke po aapangeli? Osho lela!

12. Gandja oshiholelwa nkene Jehova a li a kutha ko aakwaniilwa kiipangelapundi yawo monakuziwa. (Tala ethano.)

¹² Jehova okwe shi ulika sha yela kutya oku na oonkondopangelo dha shiga ko e vule “aapangeli mboka taya pangele.” Natu taleni kiiholelwa mbika itatu. Farao gwaEgipiti okwa li a tula muupika oshigwana shaJehova nokwa li a tindi lwiikando oku shi etha shi ye. Ihe Kalunga okwa li e shi mangulula nokwa sitha Farao omeya mEfuta etiligane. (Eks. 14:26-28; Eps. 136:15) Omukwaniilwa Belshazzar gwaBabilon okwa li a ningi oshituthi nokwa ‘kondjitha Omuwa gwomegulu, e ta tanga iikalunga ya hambulwa moshingoli nomoshisiliveli’ pehala lyokutanga Jehova. (Dan. 5:22, 23) Ihe Kalunga okwa li a fupipike omulumentu ngoka omunuuntsa. “Uusiku tuu mboka,” Belshazzar okwa li a dhipagwa, nuukwaniilwa we owa li wa gandjwa miikaha yAamedia nAapersia. (Dan. 5:28, 30, 31) Omukwaniilwa Herodes Agrippa gwotango gwaPalestina okwa li a dhipagitha omuyapostoli Jakob, e ta tulitha omuyapostoli Petrus mondholongo nelalakano naye lyoku mu dhipaga. Ihe Jehova okwa li a keelele Herodes kaa ninge oshinima shoka. “Omuyengeli gOmuwa okwa dhenge Herodes nuuvu uudhigu” e ta si. — Iil 12:1-5, 21-23.

13. Gandja oshiholelwa shankene Jehova a li a sindi iipandi yaapangeli.

¹³ Jehova okwa li ulike kutya oku na oonkondopangelo dhi vule dhiipandi yaapangeli. Okwa li a kondjele Aaisraeli, noku ya kwathela ya hanagule po oshipandi shaakwaniilwa 31 Aakanana yi imanga kumwe, noku kwata ko oshitopolwa oshinene shEvi lyEuvaneko. (Jos. 11:4-6, 20; 12:1, 7, 24) Jehova okwa li wo a kwathele Aaisraeli ya sinde omukwaniilwa gwaSiria Benhadad nosho wo aapangeli 32 yaSiria mboka ya li taya kondjo nAaisraeli. — 1 Aak. 20:1, 26-29.

14-15. (a) Aakwaniilwa Nebukadnezzar naDarius oya popi shike kombinga yuunamapangelo waJehova? (b) Omupisalomi gumwe okwa popi shike kombinga yaJehova noshigwana she?

¹⁴ Iikando oyindji Jehova okwa kala nokuulika kutya oye Omukombandambanda! Sho omukwaniilwa Nebukadnezzar gwaBabilon a li i inomene ‘oonkondo noonkondopangelo dhe, eadhimo lye nuunenepangelo we’ pehala lyoku shi zimina neifupipiko kutya Jehova oye a gwana okutangwa, Kalunga okwe mu ningi egoya lyo lyenelyene. Konima sho aluka, Nebukadnezzar okwa “hambelele Kalunga gwokombandambanda” e te shi koleke kutya ‘epangelo lyaJehova ota li kala aluhe sigo aluhe.’ Okwa gwedha ko a ti: “Kape na ngoka ta vulu okupangela ehalo lye” nenge tu tye oku mu imba a ninge shoka a hala okuninga. (Dan. 4:30, 33-35) Konima sho uudhiginini waDaniel kuKalunga wa li wa makelwa, Jehova e te mu hupitha mekololo lyoonime, omukwaniilwa Darius okwa li a gandja elombwelo ta li ti: “Shaa ngoka na tile ye a simaneke Kalunga kaDaniel. Oye Kalunga omunamwenyo, oye nota lele aluhe sigo aluhe. Oshilongo she kashi na mpo nashi ka teka po, noonkondo dhe kadhi na mpoka nadhi hulu po.” — Dan. 6:7-10, 19-22, 26, 27.

¹⁵ Omupisalomi gumwe okwe shi ndhindhilike a ti: “Omuwa ota kateke omalalakano giigwana; ote yi imbi, yaa tsakanithe oompangela dhayo.” Okwa gwedha ko a ti: “Oshigwana oshinelago osho shoka shi na Kalunga kasho Omuwa; aanelago aantu mboka Omuwa e yi ihogololele.” (Eps. 33:10, 12) Katu na tuu etompelo ewanawa lyokukala aadhiginini kuJehova!

IITA YAHUGUNINA

16. Otatu vulu okukala tu na uushili wuni shi na ko nasha “nuudhigu uunene,” nomolwashike? (Tala ethano.)

¹⁶ Otwa lesha shoka Jehova a li a ningi monakuziwa. Oshike nduno twa tegelela tashi ka ningwa monakuyiwa yi li popepi? Otatu vulu okukala tu na omukumo kutya Jehova ota ka hupitha aapiya ye aadhiginini pethimbo ‘lyuudhigu uunene.’ (Mat. 24:21; Dan. 12:1) Ote ke shi ninga sho oshipandi shiigwana, ano Gog yaMagog ta ka ponokela nonyanya mboka aadhiginini kuJehova. Ihe nonando oshipandi shoka osha kwatela mo iilyo 193 yIigwana ya Hangana, itayi ka vula okukondjitha Omukombandambanda nosho wo aakwiita ye yomegulu! Jehova oku uvaneka a ti: “Otandi ka ulukila iigwana ayihe kutya ngame omunene nomuyapuki. Otaa ka tseya kutya ongame Omuwa.” — Hes. 38:14-16, 23; Eps. 46:10.

17. Ombiimbeli oya hunganeka shike tashi ka ningilwa aakwaniilwa ayehe kombanda yevi nosho wo mboka aadhiginini kuJehova?

¹⁷ Sho Gog ta ka ponokela oshigwana shaJehova, otashi ka etitha iita yaArmagedon moka Jehova ta ka hanagula po “aakwaniilwa yokombanda yevi alihe.” (Eh. 16:14, 16; 19:19-21) Ihe “aayuuki otaa kala moshilongo, naakaanashipwe oyo taa thigala mo.” — Omayel. 2:21.

NATU KALE AADHIGININI

18. Aakriste oyendji yashili oya kala ye na ehalo lyokuninga shike nomolwashike? (Daniel 3:28)

¹⁸ Mondjokonona ayihe, Aakriste oyendji yashili oya kala nokutula emanguluko lyawo nosho wo oomwenyo dhawo moshiponga, molwaashoka oye hole Jehova e li omupangeli gweshito alihe. Aakriste mboka oya tokola toko okukala aadhiginini kuJehova. Oya fa Aahebeli yatatu mbono ya li aadhiginini kOmukombandambanda ngoka a li e ya hupitha meziko lya hanya. — Lesha Daniel 3:28.

19. Jehova ota ka pangula oshigwana she shi ikolelela kushike, noshike tu na okuninga ngashingeyi?

¹⁹ Omupisalomi David okwa nyola kombinga yesimano lyokukala omudhiginini kuKalunga a ti: “Ongoye omupanguli gwaantu ayehe. Omuwa, uthila ndje okwaanuusama; owa tseya kutya kandi na uusama.”(Eps. 7:8) David okwa nyola ishewe a ti: “Uuyuuki nuunoshili wandje nau popile ndje.” (Eps. 25:21) Oshinima shoka sha dhenga mbanda okukala aadhiginini kuJehova kutya nduno oshike shi holoke po. Kungawo otatu ka kala tu uvite ngaashi omupisalomi ngoka a nyola a ti: “Aanelago oomboka yaa na oshipo . . . , oomboka haa vulika kompango yOmuwa.” — Eps. 119:1.