Oshe ende ngiini iinima yi na omwenyo yi ye po?

Ombiimbeli otayi ti kutya Kalunga oye “oluthithiya lwomwenyo.” (Episalomi 36:9) Mbela shono owe shi itaala? Aantu yamwe ohaya dhiladhila kutya iinima oye ya po owala ohaluka. Ngele shoka oshoshili, osha hala okutya, aantu oye ya po kuyo yene. Ihe ngele Jehova Kalunga oye a shita iinima, nena okwe shi ninga nelalakano lyasha.a Tala shoka Ombiimbeli tayi ti kombinga yiinima kutya oye ya po ngiini nosho wo kutya omolwashike tatu vulu okwiitaala shoka tayi ti.

1. Oshe ende ngiini egulu nevi li holoke po?

Ombiimbeli otayi yamukula tayi ti: “Petameko Kalunga okwa shiti egulu nevi.” (Genesis 1:1) Aanongononi oyendji oye shi zimina kutya egulu nevi, ayihe oyi na etameko. Opo Kalunga a shite egulu nevi okwa longitha shike? Okwa longitha ‘ombepo’ ye ondjapuki, ano oonkondo dhe, opo a shite iinima ayihe megulu nokombanda yevi mwa kwatelwa omilalawili, oonyothi noopulanete. — Genesis 1:2.

2. Omolwashike Kalunga a shiti evi?

Ombiimbeli otayi ti kutya Jehova evi “ine li shita li mbugale, ihe ehala lyokukala aantu.” (Jesaja 45:18) Okwe li shita lya shitikika nokwa tula ko kehe shimwe shoka aantu ya pumbwa. Elalakano lye olya li tu kale ko nomwenyo sigo aluhe. (Lesha Jesaja 40:28; 42:5.) Aanongononi otaya ti kutya evi olyi ikalekelwa nolyo owala opulanete hoka ku na iinima tayi vulu okukaleka aantu nomwenyo.

3. Oshike sha yoolola ko aantu kiinamwenyo?

Konima sho Jehova a shiti evi, okwa shitile ko iinima ayihe mbyoka yi na omwenyo. Tango, kevi okwa shitile ko iimeno oyindjiyindji nosho wo iinamwenyo yomaludhi gi ili nogi ili. Konima yaashono, “Kalunga okwa shiti omuntu oshifetha she.” (Lesha Genesis 1:27.) Omolwashike aantu ya yooloka ko kiishitwa yilwe? Molwaashoka otwa shitwa oshifetha shaKalunga, otatu vulu okuholela omaukwatya ge, ngaashi ohole nuuyuuki. Okwe tu shita wo hatu vulu okwiilonga omalaka, tu hole iinima iiwanawa nosho wo omusika. Ohatu vulu wo okusimaneka Kalunga nokukala tu mu hole, oshinima shoka iinamwenyo ihaayi ningi.

ILONGA OSHINDJI

Tala uumbangi mboka tawu ulike kutya iinima oya shitwa nonokutya otatu vulu okwiinekela shoka Ombiimbeli ye tu lombwela kombinga yeshito. Ilonga wo shoka omaukwatya ngoka tu na tage tu longo kombinga yaKalunga.

4. Iinima yi na omwenyo oya shitwa

Aantu ohaya simanekwa, omolwiinima mbyoka ye eta po nokunduluka po taya holele iinima yomeshito. Olye nduno e na okupewa esimano, omolwiinima mbyoka yi li meshito? Dhana OKAVIDIO, e tamu kundathana epulo tali landula.

OKAVIDIO: Okwiitaala muKalunga (2:43)

• Aantu oya nduluka po shike, taya holele iinima yomeshito?

Egumbo kehe olya sindwa nenge lya thanekwa nokutungwa po komuntu. Mbela olye ngoka e eta po iinima ayihe mbyoka yi li meshito? Lesha Aahebeli 3:4, e tamu kundathana omapulo taga landula:

• Iinima yini hayi ku kumitha meshito?

• Mbela oshi li ngaa pandunge okukala wi itaala kutya iinima ayihe megulu nokombanda yevi oya shitwa? Omolwashike to tile ngawo?

Owe shi tseya ngaa?

Ngele owa yi kepandja lyetu lyokointaneta, jw.org/kj, mpoka pwa nyolwa: “Mbela oshinima shika osha shitwa?” nosho wo “Omataloko kombinga yankene iinima yi na omwenyo ye ya po,” oto adha ko iitopolwa nuuvidio owundji kombinga yeshito.

“Egumbo kehe oli na omutungi gwalyo, ihe ngoka a tungu ayihe, oKalunga”

5. Shoka Ombiimbeli ya popya kombinga yeshito oshoshili

OKAVIDIO: Mbela egulu nevi oya shitwa? — Oshitopolwa shokavidio (3:51)

• Mbela Ombiimbeli otayi ti kutya evi niinima ayihe mbyoka yi li ko oya shitwa muule woowili 24, momukokomoko gwomasiku gahamano?

• Mbela sho to dhiladhila, shoka Ombiimbeli ya popya kombinga yeshito oshoshili ngaa noshi li tuu pandunge? Omolwashike to tile ngawo?

Lesha Genesis 1:1, e tamu kundathana epulo tali landula:

• Aanongononi otaya ti kutya egulu nevi, ayihe oyi na etameko. Shoka ya popya otashi tsu kumwe ngiini naashoka wa lesha mOmbiimbeli?

Aantu yamwe ohaya dhiladhila kutya Kalunga okwa shiti owala oshinima shimwe, sho musho tamu zi iikwawo. Lesha Genesis 1:21, 25, 27, e tamu kundathana omapulo taga landula:

• Mbela Ombiimbeli oya ti kutya Kalunga okwa shiti oshinima shimwe e tashi lundulukile moohi, miinamwenyo yilwe nosho wo maantu? Mbela Kalunga okwa shiti iinima ayihe yi na omwenyo ‘pamaludhi’ gayo?b

6. Kalunga okwa shita aantu momukalo gwi ikalekelwa

Otwa yooloka ko kiinamwenyo mbyoka Jehova a shita. Lesha Genesis 1:26, e tamu kundathana epulo tali landula:

• Sho Kalunga e tu shita oshifetha she, hatu vulu okuulika omaukwatya ngaashi ohole nolukeno, mbela shono otashi tu kwathele tu thike pehulithodhiladhilo kutya naye oku na omaukwatya geni?

OWI ILONGO SHIKE?

Jehova oye a shita egulu nevi niinima ayihe yi na omwenyo.

Omapulo geendululo

• Ombiimbeli oya ti kutya egulu nevi oye ya po ngiini?

• Mbela Kalunga okwa shiti oshinima shimwe, e tashi lundulukile miinima yilwe yi na omwenyo, nenge okwa shiti iinima ayihe pamaludhi gawo?

• Oshike sha ningitha aantu ya kale ya yooloka ko kiinima iikwawo yi na omwenyo?

UUYELELE WA GWEDHWA PO

Tala nkene omukalo moka iinima ya shitwa tayi ulike kutya oku na Omushiti.

“Eshito otali tu longo shike?” (Penduka mo! Septemba 2006)

Pulakena nkene omusamane ta yelithile okamwanamati shoka Ombiimbeli tayi ti kombinga yeshito.

Jehova oye a shita iinima ayihe (2:37)

Tala ngele elongo lyoevolusi otali tsu ngaa kumwe naashoka sha popiwa mOmbiimbeli.

“Mbela Kalunga okwa longitha oevolusi a shite iinima yi na omwenyo ya yoolokathana?” (Oshitopolwa shi li kepandja lyetu lyokointaneta)

Tala ngele iipongolo, omasipa giinamwenyo niinima yilwe yonalenale nosho wo omalafululo gaanongononi ngele otayi ulike ngaa kutya iinima yi na omwenyo oya shitwa nenge oye ya po kuyo yene.

Omapulo gatano ga simanenena — nkene iinima yi na omwenyo ye ya po (okambo)