OSHILESHWA 37
Shoka Ombiimbeli tayi ti kombinga yiilonga noyiimaliwa
Mbela opu na esiku limwe wa li to ipula kombinga yiilonga nenge yiimaliwa? Otashi vulika shi kale eshongo okugwanitha po oompumbwe dhetu, tse pethimbo opo tuu mpoka otatu longele Jehova momukalo ngoka a hokwa. Ombiimbeli oyi na omayele omawanawa ngoka taga vulu oku tu kwathela.
1. Ombiimbeli otayi ti ngiini kombinga yiilonga?
Kalunga okwa hala tu kale hatu longo iilonga yetu twa nyanyukwa. Ombiimbeli otayi ti: ‘Omuntu ke na elago lilwe lyaa shi okunyanyudha omwenyo gwe niilonga ye’ yuudhiginini. (Omuuvithi 2:24) Jehova oha longo nuudhiginini. Uuna tatu mu holele mokulonga nuudhiginini, otatu ke mu nyanyudha notatu ka kala twa nyanyukwa.
Iilonga oya simana, ihe hayo tu na okukala twa pititha komeho yokulongela Jehova. (Johannes 6:27) Jehova okwe tu uvanekela kutya ngele otwe mu tula pondondo yotango, ote ke tu sila oshimpwiyu.
2. Otu na okukala twa tala ko ngiini iimaliwa?
Nonando Ombiimbeli otayi ti kutya “iimaliwa oyo egameno,” otayi tu londodha wo kutya itayi vulu oku tu etela enyanyu lyashili. (Omuuvithi 7:12) Onkee ano, Ombiimbeli otayi tu ladhipike kaatu kale tu hole iimaliwa sha pitilila, ihe tu kale twa ‘gwana naashoka tu na.’ (Lesha Aahebeli 13:5.) Ngele otwa kala twa gwana naashoka tu na, itatu ka kala twa lulilwa, molwaashoka twa hala iinima oyindji. Shimwe ishewe, otatu ka yanda oongunga inaadhi pumbiwa. (Omayeletumbulo 22:7) Otatu ka yanda wo oshiponga shokundombola nokukutha ombinga moongeshefa dhokuninga aniwa aantu aayamba meendelelo.
3. Ongiini tatu vulu okulongitha nawa iimaliwa yetu?
Jehova oKalunga ha gandja. Oye hatu holele uuna tatu gandja notatu ‘topolele yalwe momaliko getu.’ (1 Timoteus 6:18) Otatu vulu okulongitha iimaliwa yetu mokuyambidhidha egongalo nomokukwathela yalwe mboka ye li mompumbwe, unene tuu ooitaali ooyakwetu. Jehova iha tala kutya otwa gandja shi thike peni, ihe oha tala kutya otwe shi gandja netompelo lini. Uuna tatu gandja tashi zi komutima, ohashi tu etele enyanyu, nohashi nyanyudha wo Jehova. — Lesha Iilonga 20:35.
ILONGA OSHINDJI
Tala kuuwanawa mboka hawu tu zile mokutala ko iilonga pandjele, nomokukala twa gwanenwa.
4. Simaneka Jehova momukalo moka ho longo iilonga yoye
Ekwatathano lyetu naJehova oli na okunwetha mo etaloko lyetu li na ko nasha niilonga. Dhana OKAVIDIO, e tamu kundathana omapulo taga landula.
Mokavidio haka, oshike she ku kumitha kombinga yiikala yaJason nosho wo yeihumbato lye kiilonga?
Okwa li e shi ulike ngiini kutya okwa tala ko iilonga ye pandjele?
Lesha Aakolossa 3:23, 24, e tamu kundathana epulo tali landula:
Omolwashike etaloko lyetu li na ko nasha niilonga lya simana?
Iilonga oya simana, ihe hayo tu na okukala twa pititha komeho yokulongela Jehova
5. Okukala twa gwanenwa ohaku tu etele uuwanawa
Aantu oyendji ohaya kambadhala ngaashi taya vulu okwiimonena iimaliwa oyindji. Ihe Ombiimbeli hasho tayi tu ladhipikile shoka. Lesha 1 Timoteus 6:6-8, e tamu kundathana epulo tali landula:
Ombiimbeli otayi tu ladhipike tu ninge shike?
Otatu vulu okukala twa nyanyukwa, nonando otu na okashona. Dhana OKAVIDIO, e tamu kundathana epulo tali landula.
Oshike sha ningitha aanegumbo mboka ya kale ya nyanyukwa, nonando oye na iiyemo iishona?
Ongiini ngele otu na sha gwana, ihe natango otwa hala owala iinima oyindji? Jesus okwa gandja eyele kombinga yoshinima shoka sha nika oshiponga. Lesha Lukas 12:15-21, e tamu kundathana epulo tali landula:
Owi ilongo shike meyele lyaJesus? — Tala ovelise 15.
Lesha e to yelekanitha Omayeletumbulo 10:22 naTimoteus gwotango 6:10, e tamu kundathana omapulo taga landula:
Mbela okukala wu na ekwatathano ewanawa naJehova oko kwa simana unene nenge okukala wu na iimaliwa oyindji? Omolwashike to tile ngawo?
Uupyakadhi wuni hawu ya po ngele omuntu oha kala aluhe ta tidha iimaliwa?
6. Jehova ote ke tu sila oshimpwiyu
Ngele otwa kanitha iilonga nenge kaatu na iimaliwa ya gwana, ohashi vulika tu kale kaatu na einekelo muJehova. Dhana OKAVIDIO, wu mone nkene tatu vulu okuungaunga nuupyakadhi mboka, e tamu kundathana omapulo taga landula.
Mokavidio haka, omumwatate okwa li e na uupyakadhi washike?
Okwa ningi po shike, opo a ungaunge nuupyakadhi mboka nomupondo?
Lesha Mateus 6:25-34, e tamu kundathana epulo tali landula:
Jehova okwa uvanekela shike mboka ye mu tula pondondo yotango?
AANTU YAMWE OHAYA TI: “Itandi vulu okukala handi yi kokugongala oshiwike kehe, oshoka ondi na okulonga nuudhiginini, opo ndi kwathele aantu yandjetu.”
Enyolo lini lye ku tompa kutya okupititha Jehova komeho, oko etokolo lya dhenga mbanda?
OWI ILONGO SHIKE?
Iilonga yokwiikongela omboloto nosho wo iimaliwa oya pumbiwa, ihe kayi na nando oku tu imba tu longele Jehova.
Omapulo geendululo
Oshike tashi vulu oku ku kwathela wu kale wu na etaloko li li pandjele li na ko nasha niilonga?
Okukala wa gwanenwa ohaku ku etele uuwanawa wuni?
Ongiini to vulu okwiinekela meuvaneko lyaJehova kutya oha sile oshimpwiyu oshigwana she?
UUYELELE WA GWEDHWA PO
Konakona wu mone ngele Ombiimbeli otayi ti kutya iimaliwa oya nika oshiponga.
Ilonga kutya okugandja koludhi luni haku nyanyudha Kalunga.
“Ombiimbeli otayi ti ngiini kombinga yokugandja?” (Oshitopolwa shi li kepandja lyetu lyokointaneta)
Mbela okundombola okwa nika oshiponga?
“Shoka Ombiimbeli tayi ti kombinga yokundombola” (Penduka mo! Maalitsa 2015)
Tala shoka sha kwathele omulumentu gumwe a ethe po okundombola nokuyaka.
“Ombiimbeli ohayi lundulula onkalamwenyo yaantu” (Oshungolangelo, 1 Novomba 2011)