OSHILESHWA 39
Nkene Kalunga a tala ko ombinzi
Ombinzi oshinima sha simana noonkondo, oshoka ngele katu yi na, itatu vulu okukala nomwenyo. Kalunga oye e tu shita, onkee oku na uuthemba woku tu lombwela nkene ombinzi yi na okulongithwa. Okwa popya shike kombinga yombinzi? Otatu vulu ngaa oku yi lya nenge tu yi tulwe molutu? Ongiini to vulu okuninga omatokolo omawanawa moshinima shino?
1. Jehova okwa tala ko ngiini ombinzi?
Pethimbo lyonale Jehova okwa li a lombwele oshigwana she, a ti: “Omwenyo gwomomayulu ogwa kala mombinzi.” (Levitikus 17:14) Jehova ombinzi okwe yi tala ko yi lile po omwenyo. Omwenyo ngoka gu li omagano ga za kuKalunga, omuyapuki, onkee ombinzi nayo ondjapuki.
2. Kalunga okwi indika aantu kaaya longithe ombinzi momukalo guni?
Manga egongalo lyopaKriste inaali totwa, Jehova okwa li a lombwele oshigwana she kaashi lye ombinzi. (Lesha Genesis 9:4 nosho wo Levitikus 17:10.) Konima sho lya totwa po, Jehova okwa endulula ishewe elombwelo ndyoka. Olutuwiliki olwa li lwa gandja elombwelo kAakriste ya ‘yande ombinzi.’ — Lesha Iilonga 15:28, 29, OB-1954.
Okuyanda ombinzi osha hala okutya shike? Ngele ndohotola okwe ku lombwele wu yande iikolitha, osha yela kutya ito ke yi nwa. Ihe mbela oto ka lya ngaa iikulya ya tulwa iikolitha nenge wu yi wendelwe molutu? Ito ke shi ninga. Sha faathana, Kalunga sho te tu lombwele tu yande ombinzi, okwa hala okutya katu na oku yi nwa nenge tu lye oshinamwenyo sha pondwa. Katu na wo okulya iikulya ya tulwa ombinzi.
Ongiini kombinga yankene ombinzi hayi longithwa muunamiti? Omapango gamwe, ohaga yono lela ompango yaKalunga yi na ko nasha nombinzi. Omapango ngoka ongaashi okutula omuntu ombinzi ayihe nenge iitopolwa yayo iinene, ngaashi oosele oontiligane, oosele oontokele, oo-platelet no-plasma. Omapango galwe ihashi kala thiluthilu sha yela, ngele oge li ompinge nompango yaKalunga nenge hasho. Pashiholelwa, gamwe oga kwatela mo okulongitha uutopolwa uushuushuuka wiitopolwa iinene yombinzi. Galwe oga kwatela mo okulongitha ombinzi yomuntu mwene. Onkee ano, kehe gumwe gwomutse oku na okuninga etokolo lye paumwene ngele tashi ya pomikalo ndhika dhepango.a — Aagalati 6:5.
ILONGA OSHINDJI
Konakona nkene wu na okuninga omatokolo gopaunamiti ge na ko nasha nokulongitha ombinzi.
3. Ninga omatokolo gopaunamiti ngoka taga nyanyudha Jehova
Ongiini to vulu okuninga omatokolo gepango ge na ko nasha nombinzi ngono ge li metsokumwe nehalo lyaKalunga? Dhana OKAVIDIO, e tamu kundathana kutya omolwashike sha simana okuninga iinima tayi landula:
Galikana wu pewe uunongo. — Jakob 1:5.
Ninga omapekapeko kombinga yomakotampango gOmbiimbeli nankene taga vulu oku ku kwathela. — Omayeletumbulo 13:16.
Tala kutya moshitopolwa sheni aantu ohaya pangwa ngiini.
Tala kutya omapango geni itaage ku opalele.
Shilipaleka ngele etokolo lyoye otali ku thigi ngaa neiyuvo lya yela. — Iilonga 24:16.b
Kala wu shi kutya ngele tashi ya piinima ya kwatela mo eiyuvo, kapu na ngoka e na oku ku ningila etokolo, kutya nduno okuume koye kopandjokana, omukuluntugongalo nenge oongoka ha konakona nangoye Ombiimbeli. — Aaroma 14:12.
Nyola etokolo lyoye.
4. Oonzapo dhaJehova ohadhi kongo epango lyopaunamiti ndyoka lya dhenga mbanda
Okuvulika kompango yaKalunga yi na ko nasha nombinzi nosho wo okupewa epango lya dhenga mbanda ndyoka ihaali longitha ombinzi, otaku wapa. Dhana OKAVIDIO.
Lesha Titus 3:2, e tamu kundathana epulo tali landula:
Omolwashike tu na okupopya noondohotola nesimaneko nosho wo nombili?
Inayi pitikwa |
Etokolo lyOmukriste |
|---|---|
1. O-plasma |
Uutopolwa wa za mo-plasma |
2. Oosele oontokele |
Uutopolwa wa za moosele oontokele |
3. Oo-platelet |
Uutopolwa wa za moo-platelet |
4. Oosele oontiligane |
Uutopolwa wa za moosele oontiligane |
5. Uuna epango lya kwatela mo uutopolwa wombinzi
Ombinzi oyi na iitopolwa iinene ine, oosele oontiligane, oosele oontokele, oo-platelet no-plasma. Iitopolwa mbyoka iinene oyi na uutopolwa owundji uushuushuuka, hawu ithanwa uutopolwa wombinzi.c Uutopolwa mbono ohawu longithwa momiti ndhoka hadhi kondjitha omikithi nohadhi kwathele omuntu kaa kanithe ombinzi.
Ngele tashi ya puutopolwa uushona wombinzi, Omukriste kehe oku na okuninga etokolo lye mwene li ikolelela keiyuvo lye lya dheulwa kOmbiimbeli. Yamwe otashi vulika ya tinde epango lyopaunamiti lya kwatela mo uutopolwa uushona wombinzi. Yalwe otashi vulika ya kale ye uvite kutya eiyuvo lyawo otali ya pitike ya taambe uutopolwa mboka uushona.
Uuna to ningi omatokolo moshinima shoka, tala kepulo tali landula:
Ongiini to vulu okuyelithila ndohotola kutya omolwashike wa pitika nenge inoo pitika okulongitha uutopolwa uushona wontumba wombinzi?
GUMWE OTASHI VULIKA A PULE TA TI: “Osha puka ngaa okutulwa ombinzi?”
Ngoye oto ti ngiini?
OWI ILONGO SHIKE?
Jehova okwa hala tu yande okulongitha nayi ombinzi.
Omapulo geendululo
Omolwashike Jehova a tala ko ombinzi yi li ondjapuki?
Otu shi shi ngiini kutya oshipango shaKalunga shokuyanda ombinzi osha kwatela mo kaatu yi tulwe?
Ongiini to vulu okuninga omatokolo omawanawa kombinga yepango lya kwatela mo ombinzi?
UUYELELE WA GWEDHWA PO
Iinima yini wu na okudhiladhila kuyo, manga inoo ninga omatokolo ge na ko nasha nepango lya kwatela mo ombinzi yoye mwene?
Owu na okutala kushike, manga inoo tokola wu tulwe uutopolwa uushona wombinzi?
Oshike sha tompo ndohotola gumwe a itaale kutya etaloko lyaJehova li na ko nasha nombinzi oli li pandunge?
“Otandi tsu kumwe netaloko lyaKalunga li na ko nasha nombinzi” (Penduka mo! 8 Desemba 2003)
Tala okavidio haka, wu uve nkene aakuluntugongalo mboka ye li mOkomitiye yOkukwatathana nIipangelo, haya kwathele aamwatate naamwameme.
a Tala oshileshwa 35, “Nkene to vulu okuninga omatokolo omawanawa.”
b Tala oshitsa 5, “Uuna uutopolwa wombinzi wa kwatelwa mo” nosho wo Eyelitho 3, “Omilandu dhepango ndhoka dha kwatela mo ombinzi.”
c Oondohotola dhimwe odha tala ko iitopolwa iinene yombinzi kutya nayo uutopolwa uushona. Onkee otashi vulika wu kale wa pumbwa okuyelithila ndohotola kutya owa tokola kuu tulwe ombinzi ayihe, oosele oontiligane, oosele oontokele, oo-platelet nenge o-plasma.