Ombiimbeli otayi ti shike kombinga yokwiikalela noyokuya mondjokana?

Momaputuko gamwe, aantu oyi itaala kutya omuntu ita vulu okukala a nyanyukwa ngele ina ya mondjokana. Ihe haantu ayehe mboka ye li mo ya nyanyukwa nosho wo kutya haayehe mboka kaaye li mondjokana inaaya nyanyukwa. Ombiimbeli otayi popi oshili kutya okwiikalela nondjokana, ayihe omagano ga za kuJehova.

1. Okukala inoo ya mondjokana oku na uuwanawa washike?

Ombiimbeli otayi ti: “Ngoka ta hokana omuyalekwa gwe, ota opaleke, naangoka itee shi ningi, sho a hala okwiikalela, ota ningi nawa unene.” (Lesha 1 Aakorinto 7:32, 33, 38.) Omuntu ngoka inaa ya mondjokana oha ningi “nawa unene” momikalo dhini? Mboka kaaye li mondjokana, kaye na iimpwiyu oyindji. Onkee ano, oye na emanguluko olindji. Pashiholelwa, yamwe ohaya vulu okulongitha ethimbo lyawo olindji ya longele Jehova, ngaashi okuya kiilongo yilwe ye ku uvithe onkundana ombwanawa. Shimwe ishewe, ohaya kala ye na ethimbo olindji lyokuhedha popepi naJehova.

2. Okuhokana paveta oku na uuwanawa washike?

Ondjokana nayo oyi na omauwanawa. Ombiimbeli otayi ti kutya “yaali ye vule gumwe.” (Omuuvithi 4:9) Shika osho shi li ngawo kAakriste mboka haya tula miilonga omakotampango gOmbiimbeli mondjokana yawo. Omulumentu nomukiintu mboka taya hokana paveta, ohaya gana kutya otaya ka kala ye holathane noya simanekathana. Kungawo, ohaya ka kala yu uvite ya gamenwa, ye vule mboka ya otekathana. Aanona yawo nayo ohaya ka kala yu uvite ya gamenwa.

3. Jehova okwa tala ko ngiini ondjokana?

Sho Jehova a hokanitha aantu yotango, okwa ti: “Omulumentu oku na okuthiga po he nayina e ta kwatathana nomukadhi.” (Genesis 2:24) Jehova okwa hala omusamane nomukulukadhi ya kale ye holathane nokukala pamwe, manga ye li momwenyo. Okwa pitika owala aaihokani ya teye ondjokana, uuna gumwe a yi moluhondelo. Jehova okwa pitika kuume kopandjokana ngoka kee na ondjo, a tokole ngele ota teya ondjokana nenge hasho.a (Mateus 19:9) Jehova ina pitika Aakriste ya hokane ombanda. — 1 Timoteus 3:2.

ILONGA OSHINDJI

4. Longitha nawa ethimbo lyoye manga inoo ya mondjokana

Jesus okwa li a tala ko okwiikalela ku li omagano. (Mateus 19:11, 12) Lesha Mateus 4:23, e tamu kundathana epulo tali landula:

• Jesus okwa longitha ngiini omagano gokwiikalela a longele He noku kwathele yalwe?

Aakriste mboka kaaye li mondjokana, nayo otaya vulu okulongitha onkalamwenyo yawo ngaashi Jesus. Dhana OKAVIDIO, e tamu kundathana epulo tali landula.

OKAVIDIO: Aakriste aadhiginini mboka kaaye li mondjokana (3:11)

• Omomikalo dhini Aakriste taya vulu okulongitha nawa onkalamwenyo yawo, manga inaaya ya mondjokana?

Owe shi tseya ngaa?

Ombiimbeli inayi popya kondandalunde kutya omuntu oku na okuya mondjokana e na omimvo ngapi. Ihe otayi ladhipike kutya omuntu na tegelele sigo a “koko”. Shika osha hala okutya a pita methimbo ndyoka omahalo gopamilalo haga kala ge na oonkondo, ngoka haga vulu oku mu ningitha kaa ninge omatokolo gopandunge. — 1 Aakorinto 7:36, OB-1954.

5. Hogolola kuume kopandjokana pandunge

Okuhogolola kuume kopandjokana, olyo limwe lyomomatokolo ga simanenena ngoka omuntu ta vulu okuninga. Lesha Mateus 19:4-6, 9, e tamu kundathana epulo tali landula:

• Omolwashike Omukriste kee na okutondokela mondjokana?

Ombiimbeli otayi vulu oku ku kwathela wu tale komaukwatya ngoka taga opalele, uuna to kongo kuume kopandjokana. Osha simanenena, wu konge ngoka e hole Jehova.b Lesha 1 Aakorinto 7:39 nosho wo 2 Aakorinto 6:14, e tamu kundathana omapulo taga landula:

• Omolwashike tu na owala okuya mondjokana nOmukriste omukwetu?

• Sho to tala, mbela Jehova ota ka kala u uvite ngiini, ngele otwa yi mondjokana nomuntu ngoka kee Mu hole?

6. Tala ko ondjokana ngaashi Jehova e yi tala ko

MuIsraeli shonale, aalumentu yamwe oya li haya henge po aakulukadhi yawo omolwokwiihola mwene. Lesha Maleaki 2:13, 14, 16, e tamu kundathana epulo tali landula:

• Omolwashike Jehova e tonde eteyondjokana ndyoka kaali li metsokumwe nOmbiimbeli?

Dhana OKAVIDIO, e tamu kundathana epulo tali landula.

OKAVIDIO: Ondjokana oshinima shi na okukalelela (4:30)

• Ngele owu li mondjokana nagumwe ngoka ihaa longele Jehova, oshike to vulu okuninga, opo mu kale mu uvitathane?

7. Tula miilonga omithikampango dhaJehova dhi na ko nasha nondjokana

OKAVIDIO: Oto vulu okugwanitha po omithikampango dhaJehova dhi na ko nasha nondjokana (4:14)

Lesha Aahebeli 13:4, e tamu kundathana omapulo taga landula:

• Mbela sho to tala, omithikampango dhaJehova dhi na ko nasha nondjokana odhi li ngaa pandunge? Omolwashike to tile ngawo?

Jehova okwa tegelela Aakriste ya hokane paveta nokuteya ondjokana paveta, oshoka miilongo oyindji omapangelo osho ga tegelela aakwashigwana ya ninge. Lesha Titus 3:1, e tamu kundathana epulo tali landula:

• Ngele owu li mondjokana, owa shilipaleka ngaa kutya ondjokana yeni oyi li paveta?

OWI ILONGO SHIKE?

Okwiikalela nondjokana omagano ga za kuJehova. Mboka kaaye li mondjokana nosho wo aaihokani otaya vulu okukala ye na ombili, ngele otaya longo shoka shi li metsokumwe nehalo lyaJehova.

Omapulo geendululo

• Omuntu ota vulu ngiini okulongitha ethimbo lye nawa, manga inaa ya mondjokana?

• Omolwashike Ombiimbeli tayi ti kutya otu na owala okuya mondjokana nOmukriste omukwetu?

• Etompelo owala lini lyopamanyolo lya pitika omuntu a teye ondjokana?

UUYELELE WA GWEDHWA PO

Otashi ti shike okuhokana “mOmuwa?” (OB-1954)

“Omapulo ga za kaaleshi” (Oshungolangelo, 1 Juli 2004)

Tala uuvidio uyali, mboka tawu vulu oku ku kwathela wu ninge omatokolo gopandunge kombinga yokweendelathana nosho wo yondjokana.

Okwiilongekidhila ondjokana (11:53)

Tala okavidio haka wu mone nkene omumwatate gumwe u uvite kutya Jehova okwe mu pa oshindji shi na ongushu, shi vulithe pwaashoka e etha po.

Onda li ndi shi ote ya moshili (1:56)

Omuntu oku na okutala kiinima yini tango, manga inaa tokola a teye ondjokana nenge ya topoke?

“Simaneka ‘shono Kalunga e shi tula kumwe’” (Oshungolangelo, Desemba 2018)