Mbela Kalunga omuntu ngaa gwolela?
Shoka oyendji haya ti:
◼ “Oku li apuhe, mukehe shimwe. Okwa fa ombepo.”
◼ “Oye oonkondo onenenene ndhoka kaadhi shi omuntu gwolela.”
Jesus okwa ti ngiini?
◼ “Megumbo lyaTate omu na omahala gokukala ogendji.” (Johannes 14:2) Jesus okwa popi kutya Kalunga oku na egumbo lyopathaneko nenge ehala lyokukala.
◼ “Ngame onda za kuTate e tandi ya muuyuni, ihe ngashingeyi otandi thigi po ishewe uuyuni notandi yi kuTate.” (Johannes 16:28) Jesus okwi itaala kutya Kalunga Omuntu gwolela ha kala mehala lyontumba.
JESUS ka li nando a ti kutya Kalunga oku li oonkondo ihaadhi monika. Pehala lyaashono, okwa li ha popi naKalunga nokugalikana kuye. Olundji okwa li i ithana Jehova He gwomegulu, shoka tashi ulike kutya oku na ekwatathano lyopothingo naye.—Mateus 6:14, 26, 32.
Odhoshili kutya “kaku na omuntu a mona Kalunga nando olumwe” nosho wo kutya “Kalunga oye ombepo.” (Johannes 1:18; 4:24) Ihe shika itashi ti kutya oku li kee na olutu. Ombiimbeli otayi tu lombwele tayi ti: “Ngaashi ku na olutu talu vulu okugumwa, osho wo oku na olutu lwopambepo.” (1 Aakorinto 15:44) Mbela Jehova oku na olutu lwopambepo?
Eeno. Sho Jesus a li a yumudhwa okwa “yi megulu lyo lyene, moka te tu popile koshipala shaKalunga.” (Aahebeli 9:24) Shika otashi tu longo iinima iyali ya simana kombinga yaKalunga. Shotango, oku na ehala moka ha kala. Oshitiyali, ye omuntu, ihe ke shi oonkondo ihaadhi monika ndhoka dhi li apuhe.
Ihe ongiini Kalunga ta vulu okupangela iinima ayihe? Kalunga ota vulu okutuma ombepo ondjapuki nenge oonkondo dhe tadhi longo kehe mpoka a hala. Ngaashi he ha longitha oshikaha she okuhekeleka nokwaambidhidha oyana, Kalunga oha longitha ombepo ye ondjapuki a gwanithe po elalakano lye.—Episalomi 104:30; 139:7.
Molwaashoka Kalunga omuntu, oku na wo iinima mbyoka e hole naambyoka e tonde. Oku na wo omaiyuvo nokuli. Ombiimbeli otayi tu lombwele kutya oku hole aantu ye, oha nyanyukilwa iilonga ye, oku tonde elongelo lyiikalunga nohu uvu nayi omolwuukolokoshi. (Genesis 6:6; Deuteronomium 16:22; 1 Aakwaniilwa 10:9; Episalomi 104:31) Mu 1 Timoteus 1:11, OB-1954 oti ithanwa ‘Kalunga omunelago.’ Onkene itashi kumitha sho Jesus a ti kutya otatu vulu okukala tu hole Kalunga nomutima aguhe.—Markus 12:30.a
[Enyolo lyopevi]
a Opo wu mone uuyelele oundji kombinga yaashika, tala ontopolwa 1 membo Omalongo gashili gOmbiimbeli ogeni naanaa?, lya nyanyangidhwa kOonzapo dhaJehova.
[Oohapu dha simana pepandja 5]
Ngaashi he ha longitha oshikaha she okwaambidhidha okamwana, Kalunga oha longitha ombepo ye ondjapuki a gwanithe po elalakano lye