Mbela Jesus oKalunga Omunankondoadhihe?
Shoka oyendji haya ti:
▪ “Eeno, Jesus oKalunga Omunankondoadhihe.”
▪ “Jesus oku li olupe lwaKalunga ndoka lwa holoka panyama.”
Jesus okwa ti ngiini?
▪ “Ngele omu hole ndje, nena ando otamu nyanyukwa, sho tandi yi kuTate, oshoka Tate oye omunene e vule ndje.” (Johannes 14:28) Jesus okwe shi zimina kutya ye naHe kaye thike pamwe.
▪ “Otandi shuna kuTate, nokuKalunga kandje nokeni wo.” (Johannes 20:17) Jesus ina tya kutya oye Kalunga, ihe okwa ti ye naKalunga aantu ya yooloka.
▪ “Oshoka ngame inandi popya mungame mwene, ihe Tate, ngoka a tuma ndje, oye a pe ndje oshipango shoka ndi na oku shi tya noku shi popya.” (Johannes 12:49) Elongo lyaJesus inali za muye mwene, ihe okuKalunga.
JESUS okwe shi popya kutya ye ke shi Kalunga Omunankondoadhihe, ihe Omwana gwaKalunga. Ando Jesus okwa li Kalunga, mbela okulye a li a galikana sho a li kombanda yevi? (Mateus 14:23; 26:26-29) Osha yela kutya Jesus ka li owala ti iningitha a fa ta popi nagumwe.
Sho aalongwa ye yaali ya li ye mu pula oondondo dhi ikalekelwa mUukwaniilwa we okwa yamukula a ti: “Okukuutumba kolulyo lwandje nenge kolumoho lwandje hangame tandi ku gandja, ihe okwaamboka ye ku longekidhilwa kuTate.” (Mateus 20:23) Mbela Jesus okwa li ta fundju sho e ya lombwele kutya ye ke na uuthemba oku ya pa shoka taya pula? Hasho nando! Pehala lyaashono, okwa li a zimine kutya Kalunga oye owala e na uuthemba woku shi ninga. Jesus okwa li a yelitha nokuli kutya opu na iinima mbyoka ye naayengeli inaaya tseya, ihe He oye owala e yi shi.—Markus 13:32.
Mbela Jesus okwa li owala e vulike kuKalunga sho a li kombanda yevi? Aawe. Nokuli nokonima yeso neyumuko lye, Ombiimbeli otayi popi kutya okwa kala ha wilikwa kuKalunga. Omuyapostoli Paulus ote tu dhimbulukitha kutya ‘Kalunga oye omutse gwaKristus.’ (1 Aakorinto 11:3) Ombiimbeli otayi ti kutya monakuyiwa “uuna iinima ayihe ya tulwa mepangelo lyaKristus, nena Omwana oti itula wo ye mwene kohi yepangelo lyaKalunga, ngoka a tula iinima ayihe kohi yepangelo lye; naKalunga ota ka ninga oye awike omupangeli gwaayihe.”—1 Aakorinto 15:28.
Osha yela lela kutya Jesus ke shi Kalunga omunankondoadhihe. Shika osho sha li she mu ningitha a popye He kutya oye ‘Kalunga ke.’—Ehololo 3:2, 12; 2 Aakorinto 1:3, 4.a
[Enyolo lyopevi]
a Opo wu mone uuyelele oundji kombinga yaashoka, tala epandja 201-204, membo Omalongo gashili gOmbiimbeli ogeni naanaa?, lya nyanyangidhwa kOonzapo dhaJehova.
[Oohapu dha simana pepandja 7]
Jesus okwa ti kutya opu na iinima mbyoka ye nosho wo aayengeli inaaya tseya, ihe He oye owala e yi shi