Nkene to vulu okuuva ko Ombiimbeli

2. Kala wu na ehalo lyokutaamba ko shoka to lesha

Mbela opu na esiku limwe wa lombwelelwe kukuume koye iinima iiwinayi kombinga yomuntu ngoka inoo tsakaneka nando onale? Sho mwa tsakanene nomuntu ngono, mbela okupopya kwakuume koye okwa li kwe ku ningitha waa ha vule okumona oshitalenti nuukwatya we uuwanawa? Oshinima sha faathana otashi vulu okuningwa shi na ko nasha nOmbiimbeli.

OMUYAPOSTOLI Paulus okwe tu londodha shi na ko nasha naashoka tashi ka ningwa po ngele itatu lesha Ombiimbeli tu na ehalo lyokutaamba ko shoka tayi ti. Paulus okwa li a nyola shi na ko nasha nAajuda yamwe yopethimbo lye a ti: “Ngame mwene otandi vulu oku ya hokolola kutya oye na ehwamo lyokulongela Kalunga, nonando kaye na uunongo oku shi ninga lela.”—Aaroma 10:2.

Aajuda yamwe yomethelemumvo lyotango kaya li ya taamba ko oshili ndjoka ya hololwa ya yela kOmanyolo gOshihebeli kutya Jesus oye Mesiasa. Jesus Omunasaret okwa li a gwanitha po iipumbiwa ayihe yOmanyolo nosho wo ehunganeko kehe tali popi kombinga yaashoka Mesiasa a li ta ka ninga. Ihe nonando ongawo, Aajuda oyendji yopethimbo lye kaya li yu uvu ko Oohapu dhaKalunga, molwaashoka oya li ya kukutikile omitse dhawo komadhiladhilo ga puka.

Mbela oshike tatu kiilonga mehokololo ndyoka lyOmbiimbeli? Osha simana okulesha Ombiimbeli tu na ehalo lyokutaamba ko shoka tatu lesha. Omadhiladhilo ga puka otaga vulu okwiimba omuleshi kuu uve ko oshili yOmbiimbeli.

Pashiholelwa, omuprofesoli gumwe ha longo aantu iinima yopalongelokalunga mUumbangalantu waCarolina, muAmerika, okwa li a hokolola kutya Ombiimbeli oyo “embo lya nyolwa kaantu li na omataloko gopantu ogendji ga yoolokathana ngoka kaapu na limwe lyomugo tali gandja ewiliko li shi okwiinekelwa kombinga yankene tu na okukala.” Ngele omuntu ta lesha Ombiimbeli e na etaloko kutya oyo “embo lya nyolwa kaantu, ihe inali nyolwa kuKalunga,” mbela itashi vulika a kale e na egamo okweekelahi ewiliko nenge omakotampango gamo ngoka kee hole?

Mepingathano naashoka, Ombiimbeli otayi tu ladhipike tu yi konakone nuukeka. Shi na ko nasha nAaberea yopethimbo lyaPaulus, Omanyolo otaga ti: “Oya kala ya hokwa okupulakena oohapu dhaKalunga nesiku kehe oya kala nokukonakona Omanyolo opo ya tale ngele shono tashi popiwa kuPaulus oshoshili tuu.” (Iilonga 17:11) Ngaashi aaleshi mboka, nangoye owa pumbwa okweetha po etaloko lya puka nenge okugandja uusama mboka tashi vulika wu yone po euveko lyoye. Lesha Oohapu dhaKalunga nehalo lyokuuva ko etumwalaka linyanyudha lyOmunyoli gwayo.