Owe shi tseya tuu?

Omolwashike Ombiimbeli tayi faathanitha oshikalunga Baal niituthi yonyata yiipala?

Oshikalunga Baal shAakaanana osha li oshikalunga sholuvalo. Mboka haye shi galikana oya li yi itaala kutya osho hashi ningitha omapya gawo gi ime niimuna yawo yi vale. Embo Manners and Customs in the Bible otali ti: “Iinima ya pamba omilalo oya li hayi ningwa piiyambelo yoshipagani opo oshilongo shi hume komeho, mokwiindila oshikalunga shoshikungulu Baal nomuholike gwasho Asherah yi ye momilalo opo aantu ya mone eteyo ewanawa niimuna yawo yi indjipale.”

Aakaanana oyi itaala kutya Baal okwa za mevi muule pethimbo lyoluteni sho a li a sindwa kuMot, oshikalunga shuukukutu neso. Ihe uuna omvula tayi temuna, oya li yi itaala kutya oBaal ta nkondopala, shoka hashi etitha omumeno gu li nawa niimuna tayi vala nawa. Aakaanana oya li haya dhana oshituthi shoka paupwidhi. Shika otashi tu pe uuyelele kutya omolwashike Aaisraeli mboka ya ningi aalongeli yaBaal-Pegor ya “hondele naakadhona Aamoab.”—Numeri 25:1-3.

Jesus okwa li a hala okutya shike sho a ti kutya aalongimpango nAafarisayi oya fa “oombila dha kolongwa?”

Sho Jesus u ula aalongimpango nAafarisayi kutya yo aafudhime, okwe ya lombwele a ti: ‘Omwa fa oombila dha kolongwa nodho opala okutalwa kombanda, ihe meni odhu udha omasipa gaasi nonyata ayihe.’ (Mateus 23:27) Opo omamanya goombila ga monike nuupu, Aajuda oya li ye na omukalondjigilile oku ga kolonga nokaalaka uuna omvula ya sheka mo 15 gomwedhi Adar, sho kwa li ku na omwedhi gumwe Opaasa yi thike. Omvula oya li hayi kutha ko okaalaka sho tayi loko.

Embo The Jewish Encyclopedia otali ti kutya osha li hashi ningwa opo oombila kaadhi yonagulwe “kaantu mboka haya ende olundji moondjila ndhoka pethimbo lyoshituthi shOpaasa.” Ompango ndjoka yi li muNumeri 19:16 otayi ti kutya shaa ngoka ta gumu omuntu a dhipagwa nenge i isila kelundu nenge omuntu ta gumu iipongo yomuntu nenge ombila, ota kala a nyata omasiku gaheyali. Aaisraeli mboka ya nyata oya li haya tokolelwa eso ngele ya kutha ombinga melongelokalunga lya yogoka. (Levitikus 15:31) Jesus okwa li a popi eudhi ndyoka sho ku na omasiku omashona kOpaasa, omanga oshinima shoka shokukolonga oombila oshipe momadhiladhilo gaapulakeni ye. Jesus okwa li a hala okulombwela aawiliki yomalongelokalunga mboka ya li taye mu kondjitha kutya oya nyata pambepo, nonando eholokopo lyawo lyokombanda olya li tali monika nawa.

[Ethano pepandja 10]

Emanya lyaBaal gwoombadhi, methelemumvo eti-14 sigo eti-13 K.E.N.

[Edhina lyomuthaneki]

Musée du Louvre, Paris