Onkundana ombwanawa momalaka 500

OMANGA iita yopashigwana moRwanda ya li metifa, ongundu onshona yaatoloki oya li ya fadhuka po iita nokuthiga po omagumbo nomaliko gawo. Ihe oya li ye shi pondola okufadhuka po nookompiuta dholaptop, ndhoka ya li ya faalele kookamba dhoontauki. Omolwashike mbela? Opo ya vule okutsikila niilonga yokutoloka iileshomwa yopaMbiimbeli melaka lyOshikinyarwanda.

Omukiintu gumwe omugundjuka muumbugantuzilo waAsia okwa li ha topatopa kokompiuta ye sigo omokati kuusiku lela, nonando okwa li ha kala a vulwa noku uvite uupyu nosho wo olusheno ndoka lwa li halu piyaganeke iilonga ye yokutoloka mokukala talu gwaagwaa ko. Okwa li he shi ningi nelalakano lyashike? Opo a tume pethimbo iilonga ye mbyoka a toloka.

Mbaka aatoloki owala yamwe yomo 2 300 mboka yi iyamba okulonga momahala ge vule 190 muuyuni auhe. Yamwe oye na omimvo 20 nayamwe otayi ihilile 90 nohaya longo nuudhiginini opo aantu ya mone etumwalaka lyOmbiimbeli ndyoka tali ya talaleke momalaka 500.—Ehololo 7:9.

Uvithila aantu yomalaka gomiigwana yi ili

Omimvo ndhika iilonga yOonzapo dhaJehova yokutoloka oyi indjipala inaashi monika nando onale. Pashiholelwa, mo 1985 osha li tashi kumitha noonkondo sho Oshungolangelo ya li ya tolokwa momalaka 23 oshita pamwe naandjoka yOshiingilisa. Kunena, Oshungolangelo otayi adhika momalaka ge li 176 ngoka haga nyanyangidhwa oshita, opo aaleshi muuyuni auhe ya leshe uuyelele wa faathana pethimbo limwe.

Momalaka 50 Oshungolangelo oyo owala oshifo shoka hashi nyanyangidhwa nopwaahe na okufaula. Omolwashike mbela? Omolwaashoka omahangano ogendji ihaga ningi po sha ga kwathele okunduluka iileshomwa momalaka ngoka aantu hayu uvu. Ihe Oonzapo dhaJehova muuyuni auhe ohadhi ningi omayambidhidho shi thike pwaashoka tadhi vulu opo Oohapu dhaKalunga niileshomwa mbyoka ya kankamena kOmbiimbeli yi pewe mboka ye yi pumbwa.—2 Aakorinto 8:14.

Aantu ohaya pandula shili etumwalaka lyOmbiimbeli momalaka gawo yene. Pashiholelwa, iileshomwa yopaMbiimbeli oya tameke okundulukwa melaka lyOshimiskito ndyoka hali popiwa kaantu 200 000 lwaampono muNicaragua. Omukiintu gumwe okwa li a pula Embo Lyandje lyOmahokololo gOmbimbelia mOshimiskito, nomusita gwomoshitopolwa opo a li sho omukiintu te li pewa. Sho omusita a mono embo ndyoka ewanawa, okwa li a hala li ninge po lye. Omukiintu okwa tindi nokuli, naasho omusita a li a hala oku mu pa oshako yokoothiwa yookilo 20 opo e li mu pe.

Omimvo omulongo opo dha piti, iileshomwa yopaMbiimbeli oya kala nokutolokwa momalaka 12 gomuMeksiko, ngaashi Oshimaya, Oshinahuatl nOshitzotzil. Omagongalo gelaka lyokuudhika gOonzapo dhaJehova ogi indjipala okuza po 72 sigo opomagongalo 1 200 meni lyomimvo omulongo. Oonzapo dhaJehova ohadhi kunu etumwalaka lyOmbiimbeli momitima dhaantu, ihe ohadhi etha Jehova oye a kokeke oombuto ndhoka.—1 Aakorinto 3:5-7.

Etoloko lyOmbiimbeli ndyoka lyi li momalaka 80

Omimvo opo dha zi ko, Oonzapo dhaJehova odha longa nuudhiginini mokutoloka Ombiimbeli yedhina New World Translation of the Holy Scriptures ayihe nenge Omanyolo gOshigreka owala momalaka 80. Aantu oya li yi inyenge ngiini? Omumwatate gumwe moSouth Africa okwa popi kombinga yOmbiimbeli yOshitswana a ti: “Oyi li shili oshilongitho oshiwanawa. Otayi ka kwathela ndje ndi uve ko nawa Oohapu dhaKalunga. Elaka ndyoka lya longithwa epu notali hokitha uuna to yi lesha.” MoMosambike omuleshi gumwe okwa nyola a ti: “Nonando owu na iileshomwa ayihe yopaMbiimbeli, ihe ku na Ombiimbeli, osha fa owala omindundumo noombadhi kadhi na omvula. Ihe omvula oya loko sho twa mono o-New World Translation of the Holy Scriptures mOshitsonga.”

Mboka haya toloka nokutaandelitha etumwalaka lyOmbiimbeli otaya gwanitha po ehunganeko lyonale momukalo tagu kumitha. Jesus Kristus oye mwene a ti: “Elaka ndika etoye [lyUukwaniilwa, KB] otali ka uvithilwa aantu ayehe, li ningile iigwana ayihe onzapo; notaku ya ihe ehulilo.”—Mateus 24:14.

[Enyolo lyopevi]

[Omusindololo pepandja 30]

(Opo wu mone nkene uuyelele wu unganekwa, tala oshileshomwa)

O-NEW WORLD TRANSLATION

1950 1*

1970 7*

1990 13*

2000 36*

2010 80*

IILESHOMWA YILWE

1950 88*

1960 125*

1970 165*

1980 190*

1990 200*

2010 500*

*MOMALAKA MOKA YI LI

[Omathano pepandja 30]

Aaiyambi 2 300 ohaya toloka iileshomwa yopaMbiimbeli momalaka 500

BENIN

SLOVENIA

ETIOPIA

BRITANIA