Mbela oto landula ngaa Kristus pakuudha?

‘Shika osho hamu ningi shito, shi ningeni mu vule shito.’—1 TES. 4:1.

1, 2. (a) Aantu oyendji yopethimbo lyaJesus oya li ya mono iinima iiwanawa yini? (b) Omolwashike ethimbo ndika tu li mulyo lya simanenena wo?

MBELA opu na esiku wa dhiladhilile kombinga yankene sha li tashi ka kala oshiwanawa ando opo wa li sho Jesus a li kombanda yevi? Otashi vulika wu dhiladhile kombinga yetegameno lyokwaaludhwa kuJesus noku ka kala ihoo uvu we uuwehame wopalutu mboka wu na ngashingeyi. Nenge otashi vulika wu dhiladhile kombinga yenyanyu lyokumona Jesus noku mu uva, sha hala okutya, okwiilonga kuye nenge oku mu mona ta longo iikumithalonga. (Mark. 4:1, 2; Luk. 5:3-9; 9:11) Kasha li tuu tashi vulu okukala uuthembahenda uunene ando otwa li po sho Jesus a longo iilonga ayihe mbyoka! (Luk. 19:37) Kapu na epipi limwe ndyoka li li ko ngashingeyi lya mona iinima mbyoka, naayihe mbyoka Jesus a li a longo kombanda yevi ‘mokwiigandja ye mwene’ itayi ke endululwa we.—Heb. 9:26; Joh. 14:19.

² Nonando ongawo, ethimbo lyetu olya simanenena wo. Omolwashike mbela? Ngashingeyi otu li methimbo ndyoka Ombiimbeli tayi li ithana “ehulilo lyuuyuni” nosho wo “omasiku omahugunina.” (Dan. 12:1-4, 9; 2 Tim. 3:1, OB-1954) Satana oku umbwa mo megulu pethimbo ndika. Nziya ota ka mangwa e tu umbilwa “molumbogo.” (Eh. 12:7-9, 12; 20:1-3) Pethimbo ndika opo wo mpoka tu na uuthembahenda uunene wokuuvitha “onkundana ombwanawa yuukwaniilwa” muuyuni auhe, tatu lombwele aantu kombinga yetegameno lyOparadisa ndjoka tayi ya, mbyoka yi li iilonga itaayi ke endululwa we nando.—Mat. 24:14, NW.

3. Manga owala Jesus inaa londa a ye megulu, oshike a li a lombwele aalanduli ye ya ninge, naashoka osha li tashi ka kwatela mo shike?

³ Manga owala inaa londa a ye megulu, Jesus okwa li a lombwele aalanduli ye a ti: “Otamu ka ninga oonzapo dhokuhokolola ndje paantu ayehe mboka ye li muJerusalem, muJudea alihe nomuSamaria sigo omiilongo ayihe yokombanda yevi.” (Iil. 1:8) Iilonga mbyoka oya li tayi ka kwatela mo iilonga yokulonga aantu muuyuni auhe. Elalakano lyayo olyashike? Olyokuninga aantu aalongwa yaKristus nenge aalanduli ya gwedhwa po, manga ehulilo inaali ya. (Mat. 28:19, 20) Oshike tu na okuninga ngele otwa hala okupondola mokugwanitha po elombwelo lyaKristus?

4. (a) Oohapu dhaPetrus ndhoka tadhi adhika muPetrus omutiyali 3:11, 12 otadhi tsu omuthindo ompumbwe yini? (b) Otwa pumbwa okukala twa kotokela shike?

⁴ Tala kwaashoka omuyapostoli Petrus a ti: “Omu na okwaadhika mwa tya ngiini moondjenda oondjapuki nometilokalunga mokutegelela nokweendelelitha eyo lyesiku lyaKalunga?” (2 Pet. 3:11, 12, OB-1954) Oohapu dhaPetrus otadhi tsu omuthindo kutya otwa pumbwa okukala twa tonata momasiku ngaka gahugunina opo tu shilipaleke kutya onkalamwenyo yetu oyi ikolelela kokulonga iilonga yometilokalunga. Iilonga ya tya ngaaka oya kwatela mo okuuvitha onkundana ombwanawa. Onkee ano, kashi li tuu enyanyu enene kutse okumona uulaadhi waamwatate yomuuyuni auhe wokugwanitha po elombwelo lyaKristus lyokuuvitha! Nonando ongaaka, otu wete kutya otwa pumbwa tu kale twa kotoka opo omathininiko gakehe esiku muuyuni waSatana nosho wo ngoka ga za kegamo lyetu lyopanyama ndyoka twa thigulula kaayi ningithe uulaadhi wetu wokulonga iilonga yaKalunga wu kane po. Onkee ano, natu ka tale nkene tatu vulu okushilipaleka kutya otatu tsikile nokulandula Kristus.

Taamba ko iinakugwanithwa we yi pewa kuKalunga

5, 6. (a) Paulus okwa li a pandulile shike ooitaali ooyakwawo muJerusalem, nokwa li e ya londodha ya kotokele shike? (b) Omolwashike kaatu na okukwata nuuhasha iinakugwanithwa yetu mbyoka twa pewa kuKalunga?

⁵ Montumwafo ye yahugunina ndjoka a li a nyolele Aakriste muJerusalem, omuyapostoli Paulus okwa li a pandula ooitaali ooyakwawo omwolweidhidhimiko lyawo nokuli naasho ya li ya hepekwa. Okwa ti: “Dhimbulukweni ano okukala kweni kwonale. Pomasiku ngeyaka uuyelele waKalunga sho we mú minikile, omwa li mwa hepekwa kiinima oyindji, ihe inamu sindika.” Eeno, Jehova okwa li a dhimbulukwa iilonga yawo yuudhiginini. (Heb. 6:10; 10:32-34) Osha yela kutya oohapu dhaPaulus dhopahole dhoku ya pandula odha li dha ladhipike lela Aakriste mboka Aahebeli. Ihe montumwafo omo tuu moka, Paulus okwa li wo a londodha shi na ko nasha negamo lyopantu ndyoka ngele inaali kotokelwa hali vulu okukanithitha po uulaadhi womuntu wokulongela Kalunga. Okwa li a ti kutya Aakriste oye na okukala ya kotoka kaaya “tinde” okuvulika kiipango yaKalunga nenge ya ninge omaipopilo ye ethe po okuvulika kuyo.—Heb. 12:25.

⁶ Elondodho ndyoka kombinga yegamo ‘lyokutinda’ okutaamba ko iinakugwanithwa mbyoka twa pewa kuKalunga otali longo wo nokAakriste kunena. Otu shi shi kutya otwa pumbwa okukala twa tokola toko kaatu kwate nuuhasha iinakugwanithwa yetu yopaKriste nenge tu ethe uulaadhi wetu wiilonga yaKalunga wu kane po. (Heb. 10:39) Dhoshili, okulonga iilonga iiyapuki oshinima shoka tashi ti omwenyo nenge eso.—1 Tim. 4:16.

7, 8. (a) Oshike tashi ke tu kwathela tu tsikile okukala aalaadhi miilonga yaKalunga? (b) Ngele otwa kanitha uulaadhi wetu wumwe mboka twa li tu na petameko, otu na okudhimbulukwa shike kombinga yaJehova naJesus?

⁷ Oshike tashi ke tu kwathela twaaha ninge omaipopilo tu ethe okugwanitha po iinakugwanithwa mbyoka twa pewa kuKalunga? Omukalo gumwe gwa simana ngoka tatu vulu okukondjitha egamo ndyoka ogwo okutedhatedha pandjigilile kwaashoka eiyapulo lyetu tali ti. Paulela, otwa uvanekela Jehova kutya otatu ka pititha komeho monkalamwenyo yetu okulonga ehalo lye notwa hala tu gwanithe po euvaneko ndyoka. (Lesha Mateus 16:24.) Onkee ano, ethimbo limwe otwa pumbwa tu mwene po e tatu ipula tatu ti: ‘Mbela onda tokola toko ngaa natango ndi kale metsokumwe neiyapulo lyandje kuKalunga ngaashi nda li nde shi ningi sho nda li nda ninginithwa? Nenge mbela momukokomo gwoomvula onde enda tandi kanitha uulaadhi wandje?’

⁸ Ngele otwi ikonakona nawa e tatu mono kutya otwa kanitha uulaadhi wetu miilonga yaJehova, otashi ka kala shi li nawa tu dhimbulukwe oohapu tadhi nkondopaleke ndhoka dha li dha popiwa komupolofeti Sefanja. Okwa li a ti: “Ino etha, omaako goye ga yululuke! OMUWA Kalunga koye oku li pungoye; oonkondo dhe otadhi ku pe esindano. Oti imbi e te ku nyanyukilwa.” (Sef. 3:16, 17) Oohapu ndhika tadhi shilipaleke, tango odha li tadhi popi kAaisraeli yonale mboka ya li ya galukile kuJerusalem okuza muukwatwa waBabilonia. Ihe eshilipaleko ndika otali longo wo nokoshigwana shaKalunga kunena. Molwaashoka iilonga mbyoka hatu longo oyi li iilonga yaJehova, otu na okukaleka momadhiladhilo kutya ayehe Jehova nOmwana ohaye tu pe oonkondo opo tu gwanithe po thiluthilu iinakugwanithwa yetu mbyoka twa pewa kuJehova. (Mat. 28:20; Fil. 4:13) Ngele otwa kambadhala tu tsikile tu longe iilonga yaKalunga nuulaadhi, ote ke tu laleka nuuyamba note ke tu kwathela tu tsikile okuyambapala pambepo.

“Tangotango kongeni Uukwaniilwa waKalunga” nuulaadhi

9, 10. Ethaneko lyaJesus li na ko nasha noshituthi oshinene olya hala okutya shike, noshiilongomwa shini tatu ilongo mulyo?

⁹ Manga ya li taya li uulalelo megumbo lyomukuluntu gwAafarisayi, Jesus okwa li a gandja ethaneko kombinga yoshituthi oshinene. Methaneko ndyoka, okwa li a hokolola ompito ndjoka yi niwe koohandimwe yi ili noyi ili ya mone ompito yokuya mUukwaniilwa womegulu. Mulyo okwa li wo a thaneke kutya ‘okutinda’ nenge okuninga omaipopilo sha hala okutya shike. (Lesha Lukas 14:16-21.) Aayenda mboka ya li ya hiywa yomethaneko lyaJesus oya li ya gandja omaipopilo kutya omolwashike itaaya ka kala po poshituthi. Gumwe okwa ti kutya okwa li a pumbwa a ka konakone epya lye ndyoka opo owala a li a landa. Gulwe okwa ti kutya okwa li a landa oongombe nokwa li a hala oku dhi konakona. Omukwawo gulwe okwa ti: ‘Itandi vulu okuya oshoka opo owala nda hokana.’ Ngaka oga li omaipopilo kaage na oshilonga. Kehe ngoka a landa epya nenge iimuna aluhe ohe yi konakona manga inee yi landa, onkee ano kapu na ompumbwe ye endelela e ke yi konakone konima yaashoka. Omolwashike ishewe okukala omuntu opo a hokana shi na oku mu keelela kaa taambe ko ehiyo ndyoka lya simana? Itashi kumitha sho omuhiyi gwomethaneko ndyoka a li a geya noonkondo.

¹⁰ Aantu ayehe yomoshigwana shaKalunga otaya vulu okwiilonga mo sha methaneko lyaJesus. Oshike mbela? Katu na nando okupitika iinima yopaumwene, ngaashi mbyoka ya li ya popiwa methaneko lyaJesus, yi kale ya simana unene kutse yo yi thindile pevi iilonga yetu yokulongela Kalunga. Ngele Omukriste iha kala e na ondjele miinima yopaumwene, uulaadhi we wuukalele otashi vulika wu ende tawu kana po kashona nakashona. (Lesha Lukas 8:14.) Opo tu keelele shoka kaashi ningwe, otu na okukala metsokumwe nekumagidho lyaJesus ndika tali ti: “Tangotango kongeni [Uukwaniilwa waKalunga, KB] nuuyuuki we, nena mbika ayihe otamu yi gwedhelwa ko.” (Mat. 6:33) Kashi li tuu tashi ladhipike okumona kutya aapiya yaKalunga, ayehe aagundjuka naakokele, otaya tula miilonga omayele ngoka ga simanenena! Dhoshili, oyendji oya katuka oonkatu ya ninge onkalamwenyo yawo ya nathangwa opo ya longithe ethimbo olindji muukalele. Ohaya mono kutya okukonga tango Uukwaniilwa ohaku ya etele enyanyu lyashili nokukala ya gwanenwa.

11. Ehokololo lyOmbiimbeli lini tali gandja ethaneko lyankene sha simana okulongela Kalunga nomwenyo aguhe nonuulaadhi?

¹¹ Opo tu gandje ethaneko lyankene sha simana tu kale aalaadhi miilonga yaKalunga, tala koshiningwanima shoka sha li sha ningwa monkalamwenyo yomukwaniilwa Joas gwaIsraeli. Joas okwa li e ya kuElisa ta lili molwaashoka okwa li ti ipula kutya otashi vulika Siria a sinde Israeli. Omupolofeti okwe mu lombwele a ka umbe oshikuti okupitila mekende u ukitha kuSiria, shoka tashi ulike kutya Jehova okwe ya pa esindano okusinda oshigwana shoka. Osha yela kutya shika osha li shi na okunkondopaleka omukwaniilwa. Konima Elisa okwa lombwele Joas a kuthe iikuti ye e te yi dhenge pevi. Joas okwe yi dhenge pevi owala iikando itatu. Elisa okwa li a geya, molwaashoka ando okwe yi dhengele pevi iikando itano nenge ihamano ando okwa ka “sinda Aasiria thilu.” Ihe molwaashoka Joas ka li a katuka nuulaadhi, okwa li owala ta ka sindana lutatu. (2 Aak. 13:14-19) Oshiilongomwa shini tatu vulu okwiilonga mehokololo ndika? Jehova ote ke tu laleka nuuyamba owala ngele tatu longo iilonga ye nomwenyo aguhe nonuulaadhi.

12. (a) Oshike tashi ke tu kwathela tu kale tu na uulaadhi mokulongela Kalunga omanga tatu idhidhimikile omashongo gonkalamwenyo? (b) Popya nkene wu li to mono uuwanawa mokukala wi ipyakidhila muukalele.

¹² Omashongo ngoka hatu tsakaneke monkalamwenyo ohaga makele uulaadhi wetu neigandjo lyetu kiilonga yaKalunga. Aamwatate naamwameme oyendji otayi idhidhimikile oonkalo oondhigu dhopamahupilo. Yalwe oya lulilwa molwaashoka omikithi dha kwata miiti odha ngambeka shoka taya vulu okuninga miilonga yaJehova. Nonando ongawo, kehe gumwe gwomutse ota vulu okukatuka oonkatu opo a shilipaleke kutya okwa kakatela uulaadhi we nokutsikila okulandula Kristus pakuudha. Ndhindhilika omaetopo gamwe nomanyolo ngoka ge li mokampungu “Oshike tashi ke ku kwathela wu tsikile nokulandula Kristus?” Tala nkene to vulu oku ga tula miilonga thiluthilu. Ngele owe shi ningi, oto ka mona uuwanawa kaaku na we. Okukala twi ipyakidhila muukalele ohaku tu koleke, ohaku yambapaleke okukalamwenyo kwetu nohaku tu etele ombili oyindji nenyanyu. (1 Kor. 15:58) Kakele kaashono, okukala tatu longele Kalunga nomwenyo aguhe ohashi tu kwathele tu kale twa “tegelela esiku lyaKalunga.”—2 Pet. 3:12.

Konakona nawa oonkalo dhoye

13. Ongiini tatu vulu okumona kutya okulongela Kalunga nomutima aguhe otashi ti shike kutse paumwene?

¹³ Nonando ongawo, oshi li nawa okudhimbulukwa kutya okulonga nomwenyo aguhe inashi ikolelela kutya ohatu longo muukalele ethimbo li thike peni. Otashi ikolele koonkalo dhomuntu kehe. Omuntu ngoka ha longo owala owili yimwe nenge mbali muukalele omwedhi kehe otashi vulika a kale ta nyanyudha Jehova noonkondo ngele shoka osho shili uukolele we tawu mu pitike a ninge. (Yelekanitha Markus 12:41-44.) Onkee ano, opo tu mone kutya okulongela Kalunga nomutima aguhe otashi ti shike kutse paumwene, otwa pumbwa okukonakona nawa mpoka pu thike okuvula kwetu nosho wo oonkalo dhetu. Tu li aalanduli yaKristus, otwa pumbwa wo okukala tu na etaloko lya faathana nolye. (Lesha Aaroma 15:5; 1 Kor. 2:16) Jesus okwa li a pititha shike komeho monkalamwenyo ye? Okwa li a lombwele oongundu ndhoka dha li dha zi kuKapernaum a ti: “Elaka etoye [lyUukwaniilwa waKalunga, KB] ondi na oku li uvitha wo miilando yilwe, oshoka osho naanaa shika Kalunga a tumu ndje, ndi shi ninge.” (Luk. 4:43; Joh. 18:37) Wu na momadhiladhilo uulaadhi waJesus, konakona oonkalo dhoye wu tale ngele oto vulu okutamununa mo uukalele woye.—1 Kor. 11:1.

14. Omomikalo dhini tatu vulu okutamununa mo uukalele wetu?

¹⁴ Okukonakona oonkalo dhetu otaku vulu oku tu kwathela tu thike pehulithodhiladhilo kutya otatu vulu okugwedha ko kethimbo ndyoka hatu longitha muukalele. (Mat. 9:37, 38) Pashiholelwa, aagundjuka yetu oyendji omayovi mboka opo ya mana osikola oya tamununa mo uukalele wawo noye na enyanyu ngashingeyi ndyoka hali zi mokulonga nuulaadhi ye li aakokolindjila. Mbela nangoye owa hala okumona enyanyu lya tya ngaaka? Aamwatate naamwameme yamwe oya li ya konakona oonkalo dhawo e taya tokola kutya otaya vulu okutembukila koshitopolwa moshilongo shawo nenge pondje yoshilongo hoka ku na ompumbwe onene yaauvithi yUukwaniilwa. Natango, yalwe oyi ilonga elaka lilwe opo ya kwathele mboka haya popi omalaka omakwiilongo. Nonando okutamununa mo uukalele wetu otaku vulu okukala eshongo kutse, ohaku eta omalaleko nuuyamba notatu vulu okukwathela yalwe oyendji ya “tseye oshili.”—1 Tim. 2:3, 4; 2 Kor. 9:6.

Iiholelwa yopaMbiimbeli mbyoka tatu vulu okuholela

15, 16. Iiholelwa yoolye tatu vulu okuholela mokukala aalanduli yaKristus aalaadhi?

¹⁵ Ongiini yamwe mboka ya li ya ningi aayapostoli ya li yi inyenge sho Kristus a li e ya ithana ya ninge aalanduli ye? Ehokololo ndika otali popi shi na ko nasha naMateus tali ti: “Okwa thikama nokwa thigi po iinima ayihe e te mu landula.” (Luk. 5:27, 28) Otatu lesha kombinga yaPetrus naAndreas mboka ya li taya yulu oohi taku ti: “Mbalambala oye etha iiyulitho yawo noye mu landula.” Konima Jesus okwa mono Jakob naJohannes, mboka ya li taya hondjo oonete dhawo nahe. Oya li yi inyenge ngiini kehiyo lyaJesus? “Mbalambala oye etha owato nahe noye mu landula.”—Mat. 4:18-22.

¹⁶ Oshiholelwa shilwe ishewe oshiwanawa ooshoka shaSaulus ngoka a li a ningi omuyapostoli Paulus. Nonando okwa li omuhepeki omukwanyanya gwaalanduli yaKristus, okwa li a lundulula nokwa ningi ‘omuhogololwa’ gwokuhumbata edhina lyaKristus. “[Paulus] okwa yi u ukilila kosinagoga nokwa tameke okuuvithila aantu kutya Jesus oye Omuna gwaKalunga.” (Iil. 9:3-22) Kakele kokwiidhidhimikila omaupyakadhi ogendji nomahepeko, Paulus ka li nando e etha po uulaadhi we.—2 Kor. 11:23-29; 12:15.

17. (a) Owu na ehalo okuninga shike shi na ko nasha nokulandula Kristus? (b) Ohatu nyanyukilwa omalaleko nuuyamba geni molwaashoka hatu longo ehalo lyaKalunga nomwenyo gwetu aguhe nonoonkondo dhetu adhihe?

¹⁷ Otwa hala shili okuholela iiholelwa iiwanawa yaalongwa mboka yi inyenge kehiyo lyaJesus nehalo nonopwaahe na okwoongaonga. (Heb. 6:11, 12) Omalaleko nuuyamba geni hatu nyanyukilwa sho tatu tsikile nokukambadhala tu landule Kristus nuulaadhi nopakuudha? Ohatu mono enyanyu lyashili mokulonga ehalo lyaKalunga nohatu mono wo egwaneno ndyoka hali zi mokutaamba omauthembahenda giilonga ya gwedhwa po niinakugwanithwa ya gwedhwa po megongalo. (Eps. 40:8; lesha 1 Aatessalonika 4:1.) Eeno, sho tatu itula mo noonkondo mokulandula Kristus, ohatu nyanyukilwa omalaleko nuuyamba taga kalelele ngaashi ombili yopamadhiladhilo, egwaneno, okukala twa hokiwa kuKalunga nosho wo etegameno lyonkalamwenyo sigo aluhe.—1 Tim. 4:10.

Oto dhimbulukwa?

• Otwa pewa iilonga yini ya simana, notu na oku yi tala ko ngiini?

• Otu na okukotokela egamo lyopantu lyokuninga shike, nomolwashike?

• Omolwashike tu na okukonakona nawa oonkalo dhetu?

• Oshike tashi ke tu kwathela tu kale nokulandula Kristus?

[Oshimpungu/Ethano pepandja 31]

Oshike tashi ke ku kwathela wu tsikile nokulandula Kristus?

▪ Lesha Oohapu dhaKalunga kehe esiku nokutedhatedha kwaashoka wa lesha.—Eps. 1:1-3; 1 Tim. 4:15.

▪ Galikana aluhe wu pewe ombepo yaKalunga yi ku ambidhidhe noku ku wilika.—Sak. 4:6; Luk. 11:9, 13.

▪ Kala ho endathana naamboka yu ulika uulaadhi wuukalele nomutima aguhe.—Omayel. 13:20; Heb. 10:24, 25.

▪ Kala wu wete kutya ethimbo ndyoka tu li olye endelela noonkondo.—Ef. 5:15, 16.

▪ Kala wu shi kombinga yiilanduliko ya kwata miiti mbyoka hayi zi ‘mokutinda’ nenge okuninga omaipopilo okwaahalandula iipango yaKalunga.—Luk. 9:59-62.

▪ Kala ho tedhatedha pandjigilile kwaashoka eiyapulo lyoye tali ti nokomalaleko nuuyamba ngoka haga zi mokulongela Jehova nomokulandula Kristus nomutima aguhe.—Eps. 116:12-14; 133:3; Omayel. 10:22.