Aamwatate, kuneni mombepo nokulalakanena iinakugwanithwa megongalo!

‘Ngoka ta kunu mOmbepo, nena ota ka teya omwenyo gwaaluhe.’—GAL. 6:8.

1, 2. Ongiini Mateus 9:37, 38 ta gwanithwa ngashingeyi, naashika oshe etitha ompumbwe ya tya ngiini momagongalo?

NGASHINGEYI owu li to mono iiningwanima mbyoka tayi ka kala nokudhimbulukiwa sigo aluhe! Iilonga mbyoka ya li ya popiwa kuJesus oyi li tayi taandele notayi humu komeho neendelelo. Jesus okwa ti: “Iilya oyi li po oyindji, ihe aalongi oyo aashona. Galikaneni ano mwene gwiilya, a tume aalongi keteyo lye.” (Mat. 9:37, 38) Jehova Kalunga ota yamukula omagalikano ga tya ngaaka momukalo inaagu monika nale. Momumvo gwiilonga 2009, omwaalu gwomagongalo gOonzapo dhaJehova muuyuni auhe ogwi indjipala 2 031, gwa adha 105 298. Ondjelekati yoohandimwe ye thike 757 oya li ya ninginithwa esiku kehe!

² Okukoka kwa tya ngawo ohaku eta po ompumbwe yaamwatate ya pyokoka opo ya kwatele komeho mokulonga nosho wo okuninga omatalelopo guusita momagongalo. (Ef. 4:11) Muule woomvula omilongo, Jehova okwa langeka po aalumentu ya pyokoka opo ya sile oshimpwiyu oompumbwe dhoonzi dhe, notu na einekelo kutya ota ka tsikila okuninga ngawo. Ehunganeko ndyoka lya nyolwa muMika 5:5 (OB-1954) otali tu shilipaleke kutya momasiku gahugunina, oshigwana shaJehova otashi ka kala shi na “aasita yaheyali” nosho wo “aawa yahetatu,” notapu ka kala omwaalu omunene gwaalumentu aanekeka opo ye ya wilike.

3. Yelitha kutya otashi ti shike ‘okukuna mombepo.’

³ Ngele owu li omulumentu Onzapo yaJehova wa ninginithwa, oshike tashi vulu oku ku kwathela opo wu kale wa hala okulalakanena iinakugwanithwa megongalo? Oshinima sha simana osho shoka kutya owu na ‘okukuna mombepo.’ (Gal. 6:8) Okuninga ngawo okwa kwatela mo okukala nonkalo ndjoka tayi pitike ombepo ondjapuki yaKalunga yi ku nwethe mo. Kala wa tokola toko opo waa ‘kune pauhalu.’ Henuka iinima ngaashi omainyanyudho nomafudho opo kaayi nkundipaleke ehalo lyoye lyokwiipyakidhila miilonga yaKalunga. Aakriste ayehe otaya vulu ‘okukuna mombepo,’ nomokweendela ko kwethimbo aalumentu mboka haya ningi ngawo otaya vulu okukala yena iinakugwanithwa megongalo. Molwaashoka opu na ompumbwe onene yaayakuligongalo nosho wo aakuluntugongalo kunena, oshitopolwa shika oshu ukilila unene tuu aalumentu Aakriste. Onkee ano, aamwatate otatu mu ladhipike mu konakone nuukeka pamwe negalikano oshitopolwa shika.

Lalakanena okulonga oshilonga oshiwanawalela

4, 5. (a) Aalumentu mboka ya ninginithwa otaya ladhipikwa ya lalakanene uuthembahenda wuni megongalo? (b) Ongiini gumwe ta vulu okulalakanena okupewa iinakugwanithwa?

⁴ Omulumentu Omukriste iha ningi owala ngeya omutonateli kaapu na oonkambadhala. Oku na okulalakanena “oshilonga oshiwanawalela.” (1 Tim. 3:1) Osha kwatela mo wo okuyakula ooitaali ooyakwawo mokusila oshimpwiyu oompumbwe dhawo tashi zi komutima. (Lesha Jesaja 32:1, 2.) Omulumentu ngoka ha lalakanene iinakugwanithwa e na omatompelo omawanawa iha lalakanene esimano. Pehala lyaashono, oku na ehalo lyokweetela yalwe uuwanawa ihe hakwiihola mwene.

⁵ Ngoka a hala okukala a gwana opo a ninge omuyakuligongalo nokulalakanena okukala omutonateli, oku na okukambadhala okugwanitha po iitegelelwa mbyoka yi li mOmanyolo. (1 Tim. 3:1-10, 12, 13; Tit. 1:5-9) Ngele owu li omulumentu i iyapulila Jehova, ipula to ti: ‘Mbela ohandi kutha ombinga pakuudha miilonga yokuuvitha nondi li handi kwathele yalwe oku shi ninga? Mbela otandi tungu ngaa ooitaali ooyakwetu mokukala ndi na ko nasha nuuwanawa wawo? Mbela ondi shiwike ndi li omulongwa omwaanawa gwOohapu dhaKalunga? Mbela ohandi hwepopaleke ngaa omatyekosha gandje? Mbela ohandi sile ngaa oshimpwiyu oshinakugwanithwa shoka ndi inekelelwa kaakuluntugongalo?’ (2 Tim. 4:5) Omapulo ga tya ngawo oga pumbwa eitulomo lyomuule.

6. Oshinima shini sha simana omumwatate e na okugwanitha po opo a kale a gwana okukala niinakugwanithwa megongalo?

⁶ Omukalo gulwe opo wu kale wa gwana okupewa iinakugwanithwa megongalo ogwo ‘okupewa oonkondo tadhi zi mOmbepo [yaKalunga], opo wu wape okukala wa kola kombinga yomuntu gwoye gwomeni.’ (Ef. 3:16) Okuninga omuyakuligongalo nenge omukuluntugongalo megongalo lyopaKriste kashi shi oshinima shokukala wa hogololelwa iilonga. Uuthembahenda mbuka ohawu monika owala okupitila mokukoka pambepo. Ongiini omuntu ta vulu okukoka pambepo? Omukalo gulwe opo wu vule okukoka pambepo owu na okukala ‘ho endithwa kOmbepo’ nokukokeka iiyimati yayo. (Gal. 5:16, 22, 23) Sho to ulike kutya owu na omaukwatya gopambepo ngoka ga pumbiwa opo wu ungaunge nuuthembahenda wa gwedhwa po naasho to tula miilonga omakumagidho kombinga yankene to vulu okuhwepopala, ‘okuhuma kwoye komeho otaku ki imonikila kwaayehe.’—1 Tim. 4:15.

Owa pumbwa okukala wu na ombepo yeiyambo

7. Okuyakula yalwe okwa kwatela mo shike?

⁷ Okuyakula yalwe okwa kwatela mo okulonga nuudhiginini nokwa pumbwa ombepo yeiyambo. Molwaashoka aatonateli Aakriste oye li aasita yopambepo, ohaya kala tayi ipula noonkondo nomaupyakadhi goshigunda. Ndhindhilika nkene iinakugwanithwa yomuyapostoli Paulus yiilonga yuusita ya li ye mu gumu. Okwa li a lombwele ooitaali ooyakwawo muKorinto a ti: “Otandi mú nyolele ndi na oluhodhi olunene nuuwehame momwenyo gwandje. Onda lili omahodhi ogendji, haku mú nikitha oluhodhi, ihe oku mú ulukila kutya ondi mú hole.” (2 Kor. 2:4) Osha yela kutya Paulus okwa li a tula omutima gwe aguhe miilonga ye.

8, 9. Gandja iiholelwa yomOmbiimbeli mbyoka tayi ulike nkene aalumentu ya li ya sile oshimpwiyu oompumbwe dhayalwe.

⁸ Ombepo yeiyambo mwene oyi li aluhe yi iwetikile maalumentu mboka haya longo pehala lyaalongeli yaJehova. Pashiholelwa, itatu dhiladhila nando kutya Noowa okwa li ta vulu okulombwela uukwanegumbo we ta ti: ‘Tseyithilii ndje ngele mwa mana onguluwato opo ndi ye kune.’ Moses ka li a lombwele Aaisraeli muEgipiti ta ti: ‘Otatu ka tsakaneneni pEfuta Etiligane. Indeni nondjila ndjoka tamu vulu okuya nayo.’ Josua ka li a ti: ‘Tseyithilii ndje ngele omankolo kuma gaJeriko ga teka po.’ Jesaja ka li u ulike ku gumwe i ili e ta ti: ‘Oye ngoka! Mu tuma.’—Jes. 6:8.

⁹ Oshiholelwa shetu shi li dhingi shomulumentu ngoka a li e etha ombepo yaKalunga yi mu inyengithe ooshoka shaJesus Kristus. Okwa li a taamba ko nehalo ewanawa oshinakugwanithwa she a yakule e li omukulili gwaantu. (Joh. 3:16) Mbela ohole yaJesus yeiyambo mwene itayi ke tu inyengitha natse wo tu igandje? Omumwatate ngoka a kala ethimbo ele omukuluntugongalo okwa li a popi nkene ha kala u uvitile oshigunda a ti: “Oohapu ndhoka Jesus a li a lombwele Petrus tadhi ti: ‘Litha oonzi dhandje,’ ohadhi inyengitha ndje. Momukokomoko gwoomvula, onda tameke okukala ndi na olupandu lwankene oohapu oonshona dhopahole nenge iilonga yohenda yanathangwa tayi vulu okutsa omukumo omuntu gulwe. Iilonga yuusita oyi li iilonga mbyoka handi nyanyukilwa noonkondo.”—Joh. 21:16.

10. Oshike tashi vulu okwiinyengitha aalumentu Aakriste ya holelele oshiholelwa shaJesus mokuyakula yalwe?

¹⁰ Shi na ko nasha noshigunda shaKalunga, aalumentu mboka ya ninginithwa ye li megongalo osha yela kutya ohaya kala ya hala okukala ye na iikala ya fa yaJesus, ngoka a ti: ‘Otandi mú pe evululuko.’ (Mat. 11:28) Okukala ye na eitaalo muKalunga nokukala ye hole egongalo ohashi inyengitha aalumentu Aakriste ya lalakanene iilonga iiwanawalela, itaaya dhiladhila kutya shika oshi li eiyambo enenenene nenge kutya otashi pula oshindji. Ongiini mbela ngele gumwe ke na naanaa ehalo lyokulalakanena okugwanitha po iitegelelwa? Mbela omumwatate ota vulu ngaa okukokeka ehalo lyokukala a hala okuyakula egongalo?

Kokeka ehalo lyokuyakula

11. Ongiini gumwe ta vulu okukokeka ehalo lyokuyakula yalwe?

¹¹ Ngele omaiyuvo gokukala wu wete kutya ino gwana oge ku ngambeka kuu lalakanene iinakugwanithwa, oshi li mondjila opo wu galikane kuJehova e ku pe ombepo ondjapuki. (Luk. 11:13) Ombepo yaJehova otayi ke ku kwathela wu idhidhimikile omaipulo kehe ngoka wu na moshinima shika. Ehalo lyokuyakula olya gandjwa kuKalunga, molwaashoka ombepo ye oyo hayi inyengitha omumwatate a lalakanene iinakugwanithwa nokugandja oonkondo dhokulonga iilonga iiyapuki. (Fil. 2:13; 4:13) Onkee ano, oshi li mondjila wu pule Jehova e ku kwathele opo wu kokeke ehalo lyokutaamba ko uuthembahenda wiilonga.—Lesha Episalomi 25:4, 5.

12. Ongiini omuntu ta vulu okumona uunongo wa gwana opo u ungaunge niinakugwanithwa mbyoka i inekelelwa?

¹² Molwaashoka Omukriste okwa mono kutya oompumbwe dhoshigunda odha kitakana unene, otashi vulika a tokole kutya ita ka lalakanena we iinakugwanithwa. Nenge otashi vulika a kale u uvite kutya ke na uunongo wa gwana opo a gwanithe po iinakugwanithwa mbika. Ngele osho shi li ngawo, otashi vulika a mone uunongo mokukala omulongwa omulaadhi lela gwOohapu dhaKalunga nosho wo iileshomwa yi ikolelela kOmbiimbeli. Otashi vulika i ipule, ‘Mbela ohandi kutha ngaa ethimbo ndi konakone Oohapu dhaKalunga, nosho wo mbela ohandi galikana ngaa ndi pewe uunongo?’ Omulongwa Jakob okwa nyola a ti: “Ngele oku na gumwe gwomune a pumbwa oondunge, ne dhi indile kuKalunga, oye note dhi mu pe. Oshoka Kalunga ke shi omundalapata, ihe oha pe ayehe nopwaa na omanyenyeto.” (Jak. 1:5) Mbela owi itaala oohapu ndhika dha nwethwa mo? Mokuyamukula egalikano lyaSalomo, Kalunga okwe mu pe “owino oyindji noondunge” opo a vule okumona eyooloko pokati kaashoka oshiwanawa naashoka oshiwinayi ngele ta pangula. (1 Aak. 3:7-14) Dhoshili, oshiningwanima shaSalomo osha li shi ikalekelwa. Nonando ongawo, otatu vulu okukala tu na einekelo kutya Kalunga ota ka gandja uunongo kaalumentu mboka yi inekelelwa iinakugwanithwa megongalo opo ya vule okusila oshimpwiyu oonzi dhe nawa.—Omayel. 2:6.

13, 14. (a) Yelitha nkene Paulus a li a gumwa ‘kohole yaKristus.’ (b) Ongiini “ohole yaKristus” yi na oku tu guma?

¹³ Oshinima shilwe shoka tashi vulu okukwathela omuntu opo a kale e na ehalo lyokuyakula yalwe osho okudhiladhila muule kiinima ayihe mbyoka Jehova nOmwana ye tu ningila. Pashiholelwa, tala 2 Aakorinto 5:14, 15. (Lesha.) Ongiini ‘ohole yaKristus tayi tu pangele’? Ohole ndjoka Kristus u ulike mokugandja omwenyo gwe omolwetu pahalo lyaKalunga oyi li ya tongomana naasho olupandu lwetu talu koko, omitima dhetu ohadhi inyengithwa. Paulus okwe etha opo ohole yaKristus yi nwethe mo oonkatu dhe. Oya li ye mu keelele kaa kale i ihole mwene noku mu kwathela wo a ninge okulongela Kalunga ku kale elalakano lye lyotango nosho wo aantu ooyakwawo meni nokondje yegongalo.

¹⁴ Okutedhatedha kohole yaKristus ndjoka e hole nayo aantu ohashi tu ningitha tu kale tu na olupandu. Otashi ke tu ningitha tu mone kutya itashi ka kala sho opala tu tsikile ‘nokukuna pauhalu’ mokulalakanena omalalakano gokwiihola mwene nokukala tatu gwanitha po omahalo getu yene. Pehala lyaashono, natu ningeni omalunduluko moonkalamwenyo dhetu opo tu pitithe komeho iilonga mbyoka Kalunga e tu pa. Otwi inyengithwa tu ‘yakule’ yaamwatate omolwohole. (Lesha Aagalati 5:13.) Ngele otwi itala ko tu li aapiya notatu longo neidhidhimiko pehala lyaalongeli yaJehova ya ninginithwa, otatu ku ungaunga nayo nesimaneko. Dhoshili, itatu ka holela nando ombepo yokupangula ooyakwetu ndjoka tayi humithwa komeho kuSatana.—Eh. 12:10.

Onkambadhala yuukwanegumbo auhe

15, 16. Iilyo yuukwanegumbo ohayi dhana onkandangala yini opo omulumentu a kale a gwana okulangekwa po e li omuyakuligongalo nenge omukuluntugongalo?

¹⁵ Ngele omumwatate okwa hokana noku na aanona, ohaku talika konkalo yuukwanegumbo we ngele tashi ya pokutokola ngele okwa gwana ngaa a ninge omuyakuligongalo nenge omukuluntugongalo. Dhoshili, uupambepo nosho wo edhina ewanawa lyuukwanegumbo we ohaku gumu okulangekwa po kwe. Shika otashi tsu omuthindo esimano ndyoka tali dhanwa onkandangala kuukwanegumbo mokwaambidhidha omusamane ngoka e li wo tate sho ta kambadhala okuyakula egongalo e li omuyakuligongalo nenge omukuluntugongalo.—Lesha 1 Timoteus 3:4, 5, 12.

¹⁶ Jehova oha kala a nyanyukwa uuna iilyo yuukwanegumbo wopaKriste tayi longele kumwe. (Ef. 3:14, 15) Omutse gwuukwanegumbo ogu na okukala gu na ondjele opo gu gwanithe po iinakugwanithwa yegongalo nosho wo okuwilika aanegumbo lye “momukalo omwaanawa.” Onkee ano, osha simanenena opo omukuluntugongalo nenge omuyakuligongalo a kale ha konakona Ombiimbeli nomukulukadhi gwe pamwe naanona opo ayehe ya vule okumona uuwanawa mEkonakono lyUukwanegumbo oshiwike kehe. Oku na okukala ha kutha ombinga miilonga yomomapya pamwe nayo pandjigilile. Omolwetompelo lya faathana, oshi li sha simana kiilyo yuukwanegumbo opo yi longele kumwe noonkambadhala dhomutse gwegumbo.

Mbela oto ka yakula ishewe egongalo?

17, 18. (a) Ngele omumwatate ina gwana we okulangekwa po, okwa pumbwa okuninga shike? (b) Omumwatate ngoka a li nale omukuluntugongalo nenge omuyakuligongalo oshi li nawa a kale netaloko lini?

¹⁷ Otashi vulika wa li nale omukuluntugongalo nenge omuyakuligongalo ihe ngashingeyi ku li we ponkatu ndjoka. Owu hole Jehova noto vulu okukala wu na uushili kutya oku na ko nasha nangoye natango. (1 Pet. 5:6, 7) Mbela owa lombwelelwe kutya owu na okuninga omalunduluko gontumba? Kala wu na ehalo lyokuzimina kutya owu na epuko nokulongela kulyo nekwatho lyaKalunga. Ikeelela waa kwatwe kondjahi. Kala wu na oondunge e to ulike ombepo ombwanawa. Omumwatate ngoka a li omukuluntugongalo uule woomvula ihe okwa li a kanitha uuthembahenda we, okwa popi a ti: “Onda li nda tokola toko ndi kale handi yi kokugongala, miilonga yomomapya nokulesha Ombiimbeli ngaashi nda li handi ningi nale sho nda li omukuluntugongalo, elalakano ndyoka nda li nda adha. Ondi ilongo okwiidhidhimika molwaashoka onda li te dhiladhila kutya otandi ka monununa ishewe uuthembahenda wandje muule womvula yimwe nenge mbali, ihe osha kutha konyala oomvula heyali opo ndi ninge ishewe omukuluntugongalo. Pethimbo ndyoka onda li nda kwathelwa ketsomukumo lyaamwatate opo ndaaha vulwe ihe ndi tsikile okulalakanena okukala nda gwana okukala ishewe omuluntugongalo.”

¹⁸ Ngele owu li omumwatate e li monkalo ndjoka opo ya hokololwa, ino teka omukumo. Dhiladhila owala nkene Jehova a kala nokuyambeka uukalele woye nosho wo uukwanegumbo woye. Tunga uukwanegumbo woye pambepo, talela po aavu nokutsa omukumo mboka kaaye na oonkondo. Komeho gaayihe, kala wu na olupandu lwuuthembahenda woye wokuhambelela Kalunga nosho wo wokuuvitha onkundana ombwanawa yUukwaniilwa wu li gumwe gwomOonzapo dhaJehova.a—Eps. 145:1, 2; Jes. 43:10-12.

Ikonakona nawa

19, 20. (a) Aalumentu ayehe ya ninginithwa otaya ladhipikwa ya ninge shike? (b) Oshike tashi ka kundathanwa moshitopolwa tashi landula?

¹⁹ Ngashingeyi opu na ompumbwe onene yaatonateli naayakuligongalo shi vulithe nale. Onkee ano, otatu ladhipike aalumentu ayehe mboka ya ninginithwa ya konakone nawa oonkalo dhawo noyi ipule kutya: ‘Ngele ngame kandi shi omuyakuligongalo nenge omukuluntugongalo, mbela ondi na okukonakona ngaa omatompelo kutya omolwashike shi li ngawo?’ Pitika ombepo yaKalunga yi ku kwathele opo wu mone etaloko li li nawa moshinima shika sha simanenena.

²⁰ Iilyo ayihe yegongalo otayi ka mona uuwanawa meiyambo lyopakalunga lyooitaali ooyakwawo. Ngele tatu longo iilonga yohenda nokwaaihola mwene, ohatu teya enyanyu ndyoka hali zi mokuyakula yalwe nokukuna netaloko lyombepo. Ngaashi oshitopolwa tashi landula tashi ke shi ulika, katu na okunikitha ombepo yaKalunga uuthigwa. Ongiini shoka tashi vulu okuhenukwa?

[Enyolo lyopevi]

Oto yamukula ngiini?

• Ehunganeko ndyoka lya nyolwa muMika 5:5 otali tu shilipaleke shike?

• Yelitha kutya ombepo yeiyambo oya kwatela mo shike.

• Ongiini omuntu ta vulu okukokeka ehalo lyokuyakula yalwe?

• Oongiini okulongela kumwe kuukwanegumbo kwa simana opo omulumentu a kale a gwana okuninga omuyakuligongalo nenge omukuluntugongalo?

[Omathano pepandja 25]

Mbela oshike to vulu okuninga opo wu lalakanene iinakugwanithwa megongalo?