‘Otandi ka vula ngaa okuuvitha?’
Otu na iiholelwa iiwanawa yaamwatate naamwameme muuyuni auhe mboka haya kutha ombinga miilonga yokuuvitha nuudhiginini nonando oye na omaupyakadhi gi ili nogi ili ngoka tage ya hepeke noonkondo. Gumwe gwomuyo omumwameme Dalia gwoomvula 30 nasha, ngoka ha kala muVilnius, oshilandopangelo shaLithuania.
Dalia okwa valwa nuupyakadhi wokuuluyi mboka hawu mu hepeke noonkondo. Okwa sa ombanda noha popi ta dholomota. Yaandjawo oyo owala haye mu uvu ko nawa ngele ta popi. Dalia oha kala nameme gwe, Galina, ngoka he mu sile oshimpwiyu. Dalia oku na etaloko ewanawa nonando oku na omaupyakadhi niimpwiyu oyindji. Oshike mbela hashi mu kwathele?
Meme gwe okwa hokolola a ti: “Mo 1999 otwa li twa talelwa po komumwamemegona, [meme] Apolonija ngoka e li gumwe gwomOonzapo dhaJehova. Otwa li twa mono kutya oku shi Ombiimbeli nawa, na Dalia okwa li a tameke oku mu pula omapulo ogendji. Konima yokathimbo, okwa li a tameke okukonakona Ombiimbeli naDalia. Onda kala handi kala pekonakono lyawo omathimbo nomathimbo opo ndi mu tolokele shoka Dalia ta ti. Onda li nda mono kutya iinima ayihe mbyoka a li ti ilongo oyi na lela oshilonga. Konima yokathimbo, nangame onda pula Apolonija a konakone nangame Ombiimbili.
Sho Dalia e ende tu uvu ko nawa oshili yOmbiimbeli, okwa kala e na epulo limwe ndyoka lya kala lye mu limbilika noonkondo. Opo nduno, okwa pula yinagona, Apolonija a ti: “Ongiini omuntu ngoka a lemana ngaashi ngame ta vulu okuuvitha?” (Mat. 28:19, 20) Yinagona okwe mu yamukula nengungumano a ti: “Ino tila, Jehova ote ke ku kwathela.” Jehova okwa li naanaa e mu kwathele shili.
Dalia ohe shi ende ngiini opo u uvithe? Ohe shi ningi momikalo dhi ili nodhi ili. Aamwameme ohaye mu kwathele moku mu nyolela ko oontumwafo dhe dhi na etumwalaka lyOmbiimbeli. Tango, ohe ya lombwele shoka a hala okutya. Opo nduno taye mu nyolele ko kontumwafo ye. Dalia oha gandja wo uunzapo mokutuma omatumwalaka nongodhi ye yopeke. Ngele onkalo yombepo oyi li nawa, yamwe megongalo ohaye mu ile ya ka longe pamwe naye koparka nomomapandaanda.
Dalia nameme gwe otaya ningi ehumo komeho ewanawa moshili. Ayehe oyi igandjela Jehova noya li ya ninginithwa muNovomba 2004. MuSeptemba 2008, muVilnius omwa li mwa totwa ongundu yaapopi yOshipoole. Dalia nameme gwe oya li yi iyamba okwaambidhidha ongundu molwaashoka oya li yi na ompumbwe yaauvithi. Dalia okwa ti: “Ohandi kala nda yemata ngele pwa piti omwedhi inaandi uvithila aantu. Ihe shampa nda pula Jehova megalikano, ohaku zi gumwe ngoka ta ningi oshilage shoku ka longa pamwe nangame miilonga yokuuvitha.” Omumwameme Dalia oha kala e u vite ngiini? Ota ti: “Omukithi ngoka ogwa dhipaga ombinga yimwe yolutu lwandje, ihe inagu dhipaga omadhiladhilo gandje. Onda nyanyukwa sho handi vulu okulombwela aantu kombinga yaJehova.”