Iinima mbyoka ya ningwa mondjokonona yOonzapo dhaJehova
Otwa hala okukaleka po ondjokonona yetu
AAPIYA yaJehova oye na ondjokonona yoku mu longela onde notayi pendutha ohokwe. Ondjokonona yetu ndjoka otatu yi adha miileshomwa yetu, momathano, moontumwafo, momahokololo gopaumwene nomiikwaniipangitho mbyoka hatu longitha melongelokalunga lyetu nomiilonga yetu yokuuvitha. Mbela okupungula iikulunima noku ka konga mo omauyelele muyo oku na ngaa uuwanawa washa? Omitse dhomaukwanegumbo pethimbo lyAaisraeli odha li dhi na okulonga oyana oompango dhaJehova nosho wo iilongankondo ye, opo oyana ya kale yi “inekela Kalunga.”—Eps. 78:1-7.
Okukonga omauyelele miinima yopandjokonona okwa kala taku dhana onkandangala ya simana mokugwanithwa po kwelalakano lyaJehova. Pashiholelwa, sho aatondi yoshigwana shaJehova ya li ya hala okuya moshipala iilonga yokutunga otempeli muJerusalem, opwa li pwa ningwa elongekidho opo miinima yopandjokonona yAamedia mbyoka ya li moshilandopangelo, Ekbatana, mu hadhwe. Omwa li mwa adhika ondokumende ya nyolwa komukwaniilwa Kores moka a gandja epitikilo lyokutungulula otempeli. (Esra 6:1-4, 12) Iilonga mbyoka oya li metsokumwe nehalo lyaKalunga. Lukas naye wo okwa li a “konakona iinima ayihe okuza petameko” nuukeka sho a nyola Evaangeli ndyoka lye mu lukilwa.—Luk. 1:1-4.
Olutuwiliki olu na ohokwe onene mondjokonona yiilonga yetu mbyoka twa longela Kalunga. Oshilyo shimwe shOlutuwiliki osha ti kutya “opo tu tseye hoka tu uka, otu na okukala tu shi hoka twa zi.” Oshilyo shoka osha popi oohapu ndhika opo shi ulike esimano lyokupungula oondokumende niinima mbyoka tayi totomona mo nawa iilonga yetu. Moombelewa oonene dhetu ndhoka dhi li moBrooklyn, New York, omwa totwa Oshikondo shOkupungula Iinima yOndjokonona yetu, shoka tashi wilikwa kOkomitiye yOkunyola.
ONDJOKONONA YETU OYA FA “OALBUMA YUUKWANEGUMBO” NOSHO WO “EHALA LYIIKULUNIMA”
Ohatu dhimbwa iinima mbyoka twa ninga mondjokonona sho omimvo tadhi ende tadhi humu komeho. Ohashi vulika tu ipe uusama sho inaatu gongela ondjokonona yomaukwanegumbo getu yi ihwa po. Onkee ano, Oshikondo shOkunyola oshi ipyakidhila nopwaahe na oluthuwo okugongela nokupungula oondokumende dhiilonga yetu. Omathano ngoka ge li moshikondo shoka oga fa “oalbuma yuukwanegumbo.” MOshikondo moka omu na iileshomwa yetu yonalenale, omahokololo taga gumu omutima nosho wo oondjokonona tadhi pendutha ohokwe ndhoka twa pumbwa okudhimbulukwa. Oshikondo shoka oshi li wo “ehala lyiikulunima” mbyoka tayi tu dhimbulukitha uuthiga wetu wopambepo mboka tu na notashi tu kwathele tu kale twa taalela onakuyiwa tu na omukumo.
Kala ho lesha oshitopolwa oshipe shi na oshipalanyolo “Iinima Mbyoka ya Ningwa mOndjokonona yOonzapo dhaJehova.” Otashi kala hashi piti omalupita mOshungolangelo yokukonakonwa. Moshifo tashi landula ko otwa hala nokuli okutula mo oshitopolwa shi na oshipalanyolo tashi ti: “Okatemba kokuhumbata iileshomwa kedhina Dawn Mobile oka li ka tya ngiini?” Olye a li he ka longitha? Uunake ka li haka longithwa nonelalakano lyashike?
Ngaashi owala oalbuma yuukwanegumbo hayi ku dhimbulukitha iinima yonale, noshikondo shoka otashi ke tu dhimbulukitha iinima oyindji kombinga yeitaalo nuulaadhi wetu nowaapiya yaJehova yonale. Otatu ka nyanyukwa wo sho tatu dhimbulukithwa iilonga mbyoka twa longela Tate yetu gwomegulu omunahole nosho wo nkene ha wilike nokusila oshimpwiyu aapiya ye. (Deut. 33:27) Otu na einekelo shili kutya Jehova ota ka yambeka oonkambadhala dhaamwatate sho taya gongele uuyelele mboka tawu ke tu kwathela tu kale twa hangana notawu tu pe oonkondo tu tsikile okulonga ehalo lye.
[Oshimpungu/Ethano pepandja 31]
Nkene uuyelele hawu longithwa
Uuna aanyoli yetu taya longekidha okunyola iileshomwa yetu yopaKriste, uu-DVD niinima iikwawo yopaMbiimbeli, aathaneki, aakongi yomauyelele nosho wo yalwe mboka ya kwatelwa mo ohaya tala miikulunima yetu. Oshikondo shOkunyola ohashi si oshimpwiyu nohashi katuka oonkatu opo shi gongele nokupungula uuyelele owundji mboka wa pamba ehangano, iikondo yaBetel, omagongalo, oohandimwe nosho wo omahangano gomuuyuni. Atuya tu mu kuthile ko paufupi.
Nkene uuyelele hawu konakonwa nokugongelwa: Iinima mbyoka ya simana ohayi kala nokugwedhwa aluhe mOshikondo shiikulunima. Iinima yimwe ohayi pewa Ehangano nenge yi hehelwe oohandimwe nosho wo omaukwanegumbo ngoka ga kala taga longele Jehova nuudhiginini ethimbo ele. Okuyelekanitha nokukonakona iinima mbyoka otaku ke tu kwathela tu kale tu na ontseyo oyindji kombinga yondjokonona yOonzapo ndhoka dha li ko nale.
Nkene iinima hayi nyolwa momusholondondo: Oshikondo shOkunyola ohashi gongele iinima oyindji noonkondo moka mwa kwatelwa yimwe mbyoka ya ninga omimvo dha konda pethele. Iinima mbyoka ihayi kala ya faathana, oyi na uunene nomitholomo dha yoolokathana nohayi nyolwa nawa momusholondondo opo yi vule okulongithwa monakuyiwa.
Nkene iinima hayi opalekululwa nokudhigininwa: Omambo ngoka taga vulu okutuuka nosho wo iikulunima mbyoka tayi vulu okuyonuka nuupu ohayi opalekwa nawa e tayi kala ya dhigininwa. Oondokumende, omathano, iifo yoonkundana ndhoka dha kondwa miileshomwa, oofilima nosho wo omauyelele ngoka ga kwatelwa muungalo ohayi longekidhwa nawa opo yi vule okutulwa mokompiuta. Kungawo, omauyelele ngoka ohaga vulu okumonika nuupu, pehala lyokukala to hadhagula miikwambapila nenge miikulunima.
Okupungula iinima nokugalulila uuyelele mboka wa kana mokompiuta: Iinima mbyoka yopandjokonona ohayi pungulwa melandulathano nawa opo kaayi kane nenge yi yonwe koonte dhetango nosho wo kuututo. Ngele uuyelele wontumba owa kana mo mokompiuta, ohawu vulu okugalulilwa mo.
[Omathano pepandja 32]
1. Epulakata lyofilima yedhina “Photo-Drama of Creation.” 2. Omusholondondo gwaambesteli yiileshomwa. 3. Ohauto yomambako. 4. Oshungolangelo yo 15 Apilili 1912. 5. Ontumwafo tayi tseyitha okumangwa po kwaJ. F. Rutherford. 6. Embako lyoradio yedhina WBBR. 7. Ongalamathona. 8. Okatasa komambo. 9. Omandhindhilikonyolo gopaumwene. 10. Ondelekelama ya nyolelwa J. F. Rutherford.