Omuuvithi ta kundathana nomunegumbo — Mbela Jesus oye Kalunga?

OONZAPO DHAJEHOVA ohadhi nyanyukilwa okukundathana naantu pomagumbo gawo kombinga yOmbiimbeli. Mbela opu oshikundathanwa shopaMbiimbeli shoka ho ipula nasho? Mbela oho kala wa hala okuuva oshindji nenge to ipula kombinga yomalongo nenge yiinima yopalongelokalunga mbyoka hayi ningwa kOonzapo dhaJehova? Ngele osho, ino ongaonga okupula kombinga yaashoka ho ipula nasho ngele owa mono gumwe gwomOonzapo dhaJehova. Ota ka kala a nyanyukwa oku shi kundathana nangoye.

Mpaka otapu landula oonkundathana ndhoka tashi vulika dhi ningwe kugumwe gwomOonzapo dhaJehova naangoka ta adha megumbo. Natu tye nduno Onzapo yedhina Karen oya yi kegumbo lyomukulukadhi gwedhina Samantha.

Mbela oshoshili kutya ne inamu itaala muJesus?

Samantha: Omusita gwetu okwa ti kutya Oonzapo dhaJehova inadhi itaala muJesus. Mbela shoka oshoshili?

Karen: Nandi ku shilipaleke kutya tse otwi itaala muJesus. Uushili owo kutya otwi itaala kutya okukala tu na eitaalo muJesus okwa simana opo omuntu a vule oku ka hupithwa.

Samantha: Nangame shoka osho ndi itaala.

Karen: Nani otwi itaala oshinima sha faathana. Shitiwa, edhina lyandje oKaren. Edhina lyoye olye?

Samantha: Ongame Samantha.

Karen: Otashi vulika wu ipule to ti: ‘Mbela ngele Oonzapo dhaJehova odhi itaala shili muJesus, omolwashike aantu haya ti inadhi itaala muye?’

Samantha: Shoka osho naanaa nda halelela okuuva.

Karen: Nandi ku kuthile ko paufupi. Tse otwi itaala thiluthilu muJesus, ihe inatu itaala kehe shimwe shoka aantu haya ti kombinga ye.

Samantha: Oshike shoka inaamu itaala kombinga yaJesus?

Karen: Aantu yamwe ohaya ti kutya Jesus okwa li owala omulumentu gwanathangwa ngoka a li e na omikalo omiwanawa. Ihe tse itatu tsu kumwe nasho.

Samantha: Nangame itandi tsu kumwe nasho.

Karen: Natango shika oshimwe shomiinima mbyoka atuhe twi itaala. Oshinima oshitiyali osho shoka kutya Oonzapo dhaJehova itadhi tsu kumwe nelongo ndyoka tali kondjithathana naashoka Jesus mwene a popi kombinga yankene a pambathana naHe.

Samantha: Kandi shi uvite ko.

Karen: Oongeleka odhindji ohadhi longo aantu kutya Jesus oye Kalunga. Otashi vulika nangoye osho wa longwa.

Samantha: Ee-ee, omusita gwetu oha ti kutya Kalunga naJesus omuntu gumwe.

Karen: Mbela sho to tala osha simana okukonakona shoka Jesus ye mwene a ti opo tu tseye oshili kombinga ye?

Samantha: Eeno osha simana lela.

Mbela Jesus okwa ti ngiini?

Karen: Natu ka tale kenyolo lyOmbiimbeli ndyoka tali popi kombinga yaashoka. Ndhindhilika shoka tatu lesha muJohannes 6:38. Jesus okwa ti: “Ngame onda za megulu; inandi ya okugwanitha ehalo lyandje mwene, ihe olyaanguka a tuma ndje.” Oohapu ndhika otadhi ka limbilika omuntu kashona ngele nani Jesus oye Kalunga.

Samantha: Omolwashike to tile ngawo?

Karen: Ndhindhilika kutya movelise ndjika Jesus okwa ti kutya sho a zi megulu ine ya okulonga ehalo lye mwene.

Samantha: Eeno shili, okwa ti kutya okwe ya okulonga ehalo lyaaNgoka e mu tumu.

Karen: Ihe nani ngele Jesus oye Kalunga, olye nduno a li e mu tumu okuza megulu? Nomolwashike Jesus a li a longo ehalo lyaaNgoka e mu tumu?

Samantha: Ngashingeyi ondi uvite kutya owa hala okutya shike. Ihe nonando ongawo kandi wete ngele ovelise ndjika oya gwana ngaa okuuvitha ndje ko ndi kale ndi na uushili kutya Jesus haye Kalunga.

Karen: Eewa ano, natu tale ishewe kwaashoka Jesus a popi pompito yilwe. Okwa li a popi oohapu dha faathana montopolwa ya landula ko yaJohannes ngaa natango. Lesha po utale puJohannes 7:16.

Samantha: Eewa. “Jesus okwe ya yamukula a ti: ‘Elongo ndika tandi li longo kali shi lyandje mwene, ihe olya za kuKalunga, ngoka a tuma ndje.’”

Karen: Tangi mee Samantha sho wa lesha po. Mbela ovelise ndjoka oya ti kutya Jesus okwa li a longo elongo lye mwene?

Samantha: Aawe, oya ti kutya elongo lye olya zi kuNgoka a li e mu tumu.

Karen: Osho naanaa. Natango shika otashi tu ningitha twi ipule kutya, ‘Olye a li a tumu Jesus? Na, olye a li e mu longo oshili ndjoka a li a longo aantu?’ Mbela Omuntu ngoka ke na tuu okukala omunene e vule Jesus? Aluhe, omutumwa oha kala e vulike kwaangoka e mu tuma.

Samantha: Ta! Oto popi dhu uka. Shika osho oshikando shandje shotango tandi lesha oohapu ndhoka.

Karen: Tala wo koohapu dhaJesus dhi li muJohannes 14:28 tadhi ti: “One omu uvu, sho nde mú lombwele kutya otandi yi, ihe otandi ka galukila kune. Ngele omu hole ndje, nena ando otamu nyanyukwa, sho tandi yi kuTate, oshoka Tate oye omunene e vule ndje.” Pavelise ndjika, mbela sho to tala Jesus okwa li e wete a pambathana naHe ngiini?

Samantha: Okwa ti kutya He omunene e mu vule. Osha yela kutya okwa li e wete kutya Kalunga oku li pondondo yopombanda yi vule ye.

Karen: Osho naanaa. Opo wu mone oshiholelwa shilwe, tala kwaashoka Jesus a li a lombwele aalongwa ye, ngaashi tatu shi lesha muMateus 28:18. Ovelise otayi ti: “Ongame nda pewa epangelo alihe megulu nokombanda yevi.” Mbela Jesus okwa ti kutya okwa kala aluhe e na oonkondopangelo adhihe?

Samantha: Aawe, okwa ti kutya okwe dhi pewa.

Karen: Ihe ngele nani Jesus oye Kalunga, omolwashike nduno ta ti okwa pewa oonkondopangelo? Olye nduno a li e dhi mu pe?

Samantha: Ta! Shoka oshipe momakutsi gandje sho.

Mbela okwa li ta popi nalye?

Karen: Natango opu na sha tashi limbilike ngele Jesus oye Kalunga shili.

Samantha: Shi lombwela ndje nduno.

Karen: Oshi li moohapu tadhi popi kombinga yeninginitho lyaJesus. Tala kehokololo ndyoka li li muLukas 3:21, 22. Tu leshela po utale.

Samantha: “Aantu ayehe sho ya [ninginithwa, NW], Jesus naye wo okwa [ninginithwa, NW]. Manga a li ta galikana, egulu olye eguluka, nOmbepo Ondjapuki oya kuluka noye mu lambele yi na olupe lwolutu lwa fa lwonguti. Ewi nolya zi megulu lya ti: ‘Ongoye omumwandje omuholike, onde ku hokwa.’”

Karen: Mbela owa ndhindhilika shoka Jesus a li ta ningi sho ta ninginithwa?

Samantha: Eeno, okwa li ta galikana.

Karen: Osho naanaa. Otashi vulika tu ipule kutya ‘ngele nduno Jesus oye Kalunga, okwa li ta galikana kulye nani?’

Samantha: O! Epulo ndyoka ewanawa lela. Otandi ka pula naanaa omusita gwetu.

Karen: Ndhindhilika wo kutya sho Jesus a zi momeya opu na ngoka a li a popi okuza megulu. Owa ndhindhilika kutya okwa ti ngiini?

Samantha: Okwa ti kutya Jesus Omwana, kutya oku mu hole nosho wo kutya okwe mu hokwa.

Karen: Osho naanaa. Ihe mbela nani ngele Jesus oye Kalunga, olye a li a popi oohapu ndhoka okuza megulu?

Samantha: Inandi shi dhiladhila nando onale momukalo ngoka kaa.

Omolwashike Kalunga naJesus taku tiwa kutya oye li ngaashi he nomwana?

Karen: Mpaka opu na oshinima shilwe shoka tu na okutala kusho: Otwa lesha kutya Jesus okwa popi kutya Kalunga oye He gwomegulu. Naasho Jesus a li ta ninginithwa, megulu omwa zi ewi lya ti kutya Jesus oye Omwana. Jesus okwa li nokuli i ipopi ye mwene kutya ye Omwana gwaKalunga. Natu tye nduno owa hala okulonga ndje kutya aantu yontumba oye thike pamwe, mbela oto ka longitha oshiholelwa shaantu yeni yomegumbo limwe wu kwathele ndje ndi uve ko nawa kutya aantu mboka oya pambathana ngiini?

Samantha: Otandi ka longitha oshiholelwa shaamati yaali aamwayinathana.

Karen: Owu li lela mondjila, tashi vulika nokuli wu longithe oshiholelwa shaakwana mboka ya faathana thiluthilu. Ihe Jesus okwa li a popi kutya Kalunga oye He nokwa li i ipopi kutya ye Omwana gwe. Mbela Jesus okwa li a hala okutya shike sho a popi ngaaka?

Samantha: Ngashingeyi ondi uvite ko kutya owa hala okutya shike. Jesus otu ulike kutya opu na gumwe ngoka e vule mukwawo noku na oonkondopangelo dhi vule dhamukwawo.

Karen: Osho naanaa. Dhiladhila kwaashika: owa gandja oshiholelwa oshiwanawa shoka tashi gandja ethaneko lyaantu yaali ye thike pamwe, shoka shaamwayithana yaali aamati nenge aakwana. Ngele Jesus oye Kalunga, mbela sho to tala ando Jesus, e li Omulongi Omunene ando naye ina gandja oshiholelwa sha faathaana nenge nokuli sha yela shi vulithe pwaashoka twa gandja?

Samantha: Eeno, ando osho a ningi.

Karen: Ihe pehala lyaashono, okwa longitha oshitya “He” nosho wo “Omwana” opo u ulike kutya okwa pambathana ngiini naKalunga.

Samantha: Owa popya oshitsa lela.

Aalongwa yaJesus yopetameko oya ti ngiini kombinga yaashoka?

Karen: Manga inaandi ya, onda hala natango tu tale koshinima shilwe kombinga yoshikundathanwa shika ngele owu na natango okathimbo.

Samantha: Eewa, oshi li nawa.

Karen: Ngele Jesus oye Kalunga shili, mbela ando aalongwa yaJesus inaye shi popya sha yela?

Samantha: Eeno shili, ando oye shi popya.

Karen: Osho lela, ihe kapu na nando oompoka tatu lesha elongo lya tya ngaaka mOmbiimbeli. Mepingathano naashono, ndhindhilika shoka omuyapostoli Paulus, gumwe gwomaalanduli yaJesus yopetameko, a nyola. Okwa popi mAafilippi 2:9 shoka Kalunga a li a ningi konima yeso neyumuko lyaJesus, a ti: ‘Kalunga okwa yele Jesus pombandambanda nokwe mu luku edhina enene li vule omadhina agehe.’ Shi ikolelela kovelise ndjika, Kalunga okwa li a ningile Jesus shike?

Samantha: Otayi ti kutya Kalunga okwe mu yele sho e mu pe ondondo yopombandambanda.

Karen: Osho. Ihe ngele Jesus okwa li e thike pamwe naKalunga manga inaa sa ye Kalunga te ke mu yela ishewe pombandambanda, mbela shoka kasha li tashi ka ningitha Jesus oye a kale pombanda e vule Kalunga? Mbela opu na ngaa ngoka ta vulu okukala pombanda e vule Kalunga?

Samantha: Aawe, kapu na.

Karen: Osho naanaa. Shi ikolelela kuumbangi auhe mboka twa mono, mbela natango oto ti Ombiimbeli otayi tu longo kutya Jesus oye Kalunga?

Samantha: Aawe, ondi wete kutya hasho tayi tu longo nando. Ombiimbeli otayi ti kutya ye Omwana gwaKalunga.

Karen: Osho lela. Natango nandi ku shilipaleke mee Samantha kutya Oonzapo dhaJehova odha simaneka Jesus noonkondo. Otwi itaala kutya molwaashoka oye Mesiasa ngoka a li u uvanekwa, eso lye olye tu palela ondjila opo aantu ayehe aavuliki ya ka hupithwe.

Samantha: Nangame shoka osho wo ndi itaala.

Karen: Otashi vulika nduno wi ipule kutya ‘Ongiini tatu vulu okuulukila Jesus kutya otwe mu pandula sho a gandja omwenyo gwe molwetu?’a

Samantha: Ohandi shi ipula ngaa.

Karen: Mbela otandi vulu ndi galuke opo tu ye tu tale kutya Ombiimbeli otayi ti ngiini kwaashoka? Moshiwike tashi ya omo to kala megumbo pethimbo ngandika?

Samantha: Eeno, omo tandi kala.

Karen: Eewa ano, uhala po nawa, uutsakaneno omoshikando tashi landula.

[Enyolo lyopevi]