Omapulo ga za kaaleshi
Uunake epangelo enankondo ndyoka tali popiwa mOmbiimbeli, Anglo-Amerika lya ningi epangelo enankondo etiheyali lyuuyuni?
▪ Omukwaniilwa Nebukadnezzar okwa li a lala ondjodhi e wete oshiyelekela oshinenenene. Oshiyelekela shoka itashi thaneke omapangelo agehe koonono omanankondo muuyuni. (Dan. 2:31-45) Otashi thaneke owala omapangelo gatano ngoka ga li ga tameke okupangela pethimbo lyaDaniel noku uka komeho noga dhana onkandangala yontumba mokukalamwenyo kwoshigwana shaKalunga.
Daniel okwa hokolola kutya epangelo enankondo lyuuyuni, Anglo-Amerika otali ka tsapuka muRoma, ihe kalya li tali ka umba ko Roma koshipundi. Daniel okwa ti kutya omagulu goshiyelekela oga li gosheela shoka sha li sha tsa koompadhi nokominwe. (Oompadhi nominwe dhasho odha li osheela oshiluudhe sha kwatakanithwa mumwe neloya.)a Shoka otashi ti kutya epangelo enankondo lyuuyuni, Anglo-Amerika olya li tali ka za mwaandyoka tali thanekwa komagulu gosheela. Uushili waashika owi iwetikile mondjokonona. Epangelo lyaBritania ndyoka lya li oshitopolwa shUukwaniilwa waRoma, olya tameke okunkondopala okuza momumvo 1700 nasha. Konima yaashoka Iilongo ya Hangana yaAmerika oya tameke wo okunkondopala. Ihe pethimbo mpoka epangelo enankondo etiheyali ndyoka lya popiwa mOmbiimbeli kalya li po natango. Omolwashike mbela? Pethimbo ndyoka Britania nIilongo ya Hangana kaya li natango ya tameka okulongela kumwe momukalo omundhindhilikwedhi. Oya tameke owala okulongela kumwe pethimbo lyIita yotango yUuyuni.
Pethimbo mpoka “aana yoshilongo,” sha hala okutya, aagwayekwa, oya kala taya longo nuudhiginini unene tuu mIilongo ya Hangana, moBrooklyn, New York moka mwa li oombelewa dhawo oonene. (Mat. 13:36-43) Ongundu yaagwayekwa oya kala yi ipyakidhila niilonga yokuuvitha miilongo mbyoka yi li kohi yepangelo lyaBritania. Pethimbo lyIita yotango yUuyuni, pokati kIigwana ya Hangana yaAmerika naBritania kwa li to gwana po, molwaashoka oya li ya hangana ya kondjithe aatondi yawo yopapolitika. Oya li ya humitha komeho uukwashigwana omolwiita mbyoka ya li ya kutha ombinga muyo noya li ye tonde oluvalo ‘lwomukiintu’ gwaKalunga. Oya li ye lu indike lu taandelithe iileshomwa yalwo nokutula mondholongo mboka ya li taya kwatele komeho iilonga yokuuvitha.—Eh. 12:17.
Omahunganeko gOmbiimbeli otaga holola kutya epangelo etiheyali enankondo lyuuyuni inali tameka okupangela pehulilo lyomumvo 1700 nasha, sho Britania a tameke tango okunkondopala. Ihe olya tameke okupangela petameko lyesiku lyOmuwa.b
[Omanyolo gopevi]
a Osheela shoka sha vundakanithwa mumwe neloya otashi thaneke aantu mboka taya lelwa kepangelo enankondo, Anglo-Amerika. Mokweendela ko kwethimbo aantu mboka oye shi ningi oshidhigu kepangelo ndyoka li kale li na oonkondo ngaashi lya hala.
b Mbuka uuyelele uupe tawu yelitha okatendo 24, pepandja 57 nethano pepandja 56, 139 membo Daniel’s Prophecy.
[Ethano pepandja 19]
Aamwatate yahetatu yokoombelewa oonene dho-Watchtower oya li ya tulwa mondjedhililo muJuni 1918